“Ịyẹ tị́ du?” ri ịtọ ẹla ọhẹ ọlẹ ká angịnyị kaa tọ ụka ká ẹla ọtịpyọ á họ. Ahị chị ọkẹkẹnị lụmẹ nyọlẹ ká ịBayịbụụ wẹ ịtọ ẹla ọwẹ!

1. Ányị Olegu Onyobyi à tị́ bwu dọmwụ nya ang onyobyi odehe?

Olegu Onyobyi la egbeju ọngịrị ta Ohe Oluhye. Ọ tịtọ nyọka ri olegbeju nya angịkịla, lẹ ọ pịrị Adam bala Iivu ju nyọka la egbeju ọngịrị ta Ohe ịnyịnyị. Ọ họ ịnyị bwula o-me ọnọọkịla ju Iivu. (Ọmwụ Ọdada 3:1-5) Ọ họ du ká Iivu me nyori Ohe nyị wẹẹ ya ịngịhyẹ ọnyịịla kpịbaa hi ọwa. Bwula ọọwa, ọ wẹẹ ya nyori angịnyị ehe nyị ka chị ọkẹkẹnị gụ kori kịị nyị́ ju Ohe ihi ka. Olegu Onyobyi me ọnọọkịla ọhọhẹ bwula o-byi Iivu nyori, kori kịị nyị́ la egbeju ọngịrị, nyị́ ja gbu ka. Ịnyị à du ká ịBayịbụụ wụrwọọ nya “ọlọnọọkịla bala adịda nya ọnọọkịla omeme” lẹ.—ỊJọn 8:44.

2. Ịyẹ Adam bala Iivu à tị́ chụ nyọka họ?

IJihova họ ang ịnyịịla lụmẹ-lụmẹ ha Adam bala Iivu. O byaa nyị ka ri ugbe nya okoji ọnyị myị́ ọnyị ẹ-ẹpwụ nya iku myị́, datị hi ookpokpo ọhẹ. (Ọmwụ Ọdada 2:15-17) Ị́ tị myị họ jaabwọ ká iJihova ya ka. Iivu “hyọọ ri,” ọọwa lẹ, “o hu ugbe nya okoji ọọwa ha ọrụmwụ ri ịnyịnyị” lẹlẹ. (Ọmwụ Ọdada 3:6) Ịwa angị imimiiye pwa la ọ-ka ju ihi nya ehile nya Ohe. Nyọlẹ ká Adam bala Iivu la kpẹẹkpẹẹ, imyi nya ang ọtịpyọ ọhọhọ á kaa nwaa ka. Lẹ ụka kị pwa la ọ-ka ju ihi nya Ohe, ọ́ gwaa gụ họ ka, ị tọchị-tọchị họ ọhọbịrị ịnyị. Ẹla ọlẹ kị họ mẹjẹ nyori ị́ myị ọnụ nya eji ọkpakpa nya Ohe kaka. Eje ọchịchị nyaa ọwẹ kpa akama ọtụka-ọtụka waa.—Ọmwụ Ọdada 3:16-19.

3. Ányị eje ọchịchị nya Adam bala Iivu à tị́ guhi?

Nyọlẹ ká Adam bala Iivu họ ọhọbịrị, anyị nyaa ri ugu nya ọhọbịrị ọọwa bwu ẹga nyaa. ỊBayịbụụ ya ẹla rụ́ Adam yẹkẹẹ: “Ọhọbịrị jụ warị wẹ ẹpwụ nya odehe ọlẹ bwula ọlẹng ookpokpo. Ọọwa lẹ, ọhọbịrị nyamwụ ọọwa a kpa igu ogbugbu jụ warị ịnyịnyị lẹlẹ. Ịnyị a du, ká igu ogbugbu ọọwa chị kịla angịnyị ehe wuu lẹẹ lẹlẹ.”—Ala iRom 5:12.

Ahị kaa yẹ akama chajị nya ang lụmẹ-lụmẹ. Ahị kaa yẹ akama ụka ọhẹ chajị nya eje ọtịpyọ ọlẹ kahị chị. Ahị kaa yẹ akama chajị nya eje ọtịpyọ nya angịkịla ịnyịnyị. Ụka ọhẹ ahị kaa yẹ akama chajị nya ẹla ọ-yahị me-ka.—Wa Ọngọlirya 9:12.

 JẸ́ GỤ ỌỌWA

4. Ọngọlẹ kọ ju ọmwụ nya akama nyahị

Iru nya angịnyị me ká Ohe à kpa odehe ọlẹ ụ-ụbwọ. Ẹlịlẹhị ịnyị? Yẹ IFIM ọwẹ.

Wa iJemsi 1:13 bala 1 ịJọn 5:19, kanụ ya ẹla u-uhye nya ịtọ ẹla ọlẹ:

• Ohe à ju ọmwụ nya akama bala ang onyobyi lẹẹ?

5. Ẹlịyẹ eji ọkpakpa nya Olegu Onyobyi à tị́ họ myị́?

1. Adam bala Iivu la kpẹẹkpẹẹ bala ọ-kaa hịhị i-iku ọnyịịla-ọnyịịla. Ma, ị ke ụrụ wo la Olegu Onyobyi bala ọ-la egbeju ọngịrị ta iJihova

2.   Ụka ká Adam bala Iivu la egbeju ọngịrị, odehe myị̀ la ọhọbịrị, akama, bala igu

3. IJihova ka myị́ ọhọbịrị, akama bala igu. Angịnyị ehe ka myịmyị-ị̀ la kpẹẹkpẹẹ bala ọ-hịhị odehe ọlẹ kọ kpunyi

6. Akama nyahị kaa jụ iJihova

Akama nyahị kaa ri Ohe ẹla? Kụ ẹhị yẹ ẹla ọlẹ ká Adịrahụ iDevidi bala ọlẹrụ ịPita da lẹẹ wẹẹ. Wa Eje Ọnyịịla 31:7 bala 1 iPita 5:7, kanụ ya ẹla u-uhye nya ịtọ ẹla ọlẹ:

• Ányị ọ tị́ lang nyọlẹ ká jẹ́ wẹ nyori iJihova jẹ́ akama nyahị bala o-ri ọ kaa jwọọ ịnyịnyị?

 ẸLỊYẸ A TỊ́ JẸ́?

Olegu Onyobyi bala Adam bala Iivu à ju ọmwụ nya akama olodehe lẹ. Akama nyahị kaa jụ iJihova, ọ tị ja ka chaa eju lụka o-kpii.

Ẹlịyẹ A Tị́ Yụbwọ Chị?

• Ọnọọkịla oyina Olegu Onyobyi à tị́ me ju Iivu?

• Ányị egbeju ọngịrị nya Adam bala Iivu à tị́ guhi wuu?

• Ahị tị́ họ anyị kahị jẹ́ nyori akama nyahị kaa jụ iJihova?