ANG ỌJẸ́JẸ 15

Owo IJisọsị à Tị́ Ri?

IJisọsị rụ́ ohi yẹẹyẹẹ. Ma, datị hi ẹnyị nyamwụ ọjẹ́jẹ, iru nya angịnyị-ị́ jẹ́ ang lụmẹ u-uhye nyamwụ ka, angịkịla tị la irya ịdatị-datị u-uhye nya ọngọlẹ ká iJisọsị ri. Ẹlịyẹ ịBayịbụụ à tị́ ya u-uhye nyamwụ?

1. Owo iJisọsị à tị́ ri?

IJisọsị ri olegu ọlẹ kọ la ọngịrị yẹẹyẹẹ. Ọ juwa e-epwoohe. IJihova họọ ene nya ang ịkịla wuu. Chajị nya ọọwa lẹ, ịBayịbụụ wụrwọọ nya “ọnyị ọhọhẹ nya ang ịlẹ wuu ká Ohe họ.” (Ala iKolosi 1:15, NW ) ỊBayịbụụ wụrụ iJisọsị nya “Ọnyẹwẹ” nya Ohe chajị ọwa kem iJihova à kpa ụbwọ nyịlọmwụ họ lẹ. (ỊJọn 3:16) IJisọsị họ ụkụrwọ bala iJihova Adamwụ, ọ da Adamwụ ụbwọ họ ang ịkịla wuu. (Wa Etu 8:30.) IJisọsị bala iJihova ju awụlẹ chwẹẹ yẹẹyẹẹ. O ri ọngọ kpa ọnụ ẹla nya Ohe, ịnyị à du ká ịBayịbụụ wụrwọọ nya Omyi “Ẹla” nya iJihova lẹ, chajị ọ kaa kpa omyi ẹla bala ẹrụ nya Ohe ka ya je angịkịla.—ỊJọn 1:14.

2. Ịyẹ tị́ du ká iJisọsị wẹ odehe?

Lala ẹka 2,000 kẹkpẹ, iJihova họ ụkụrwọ ẹbyẹbyị ọhẹ. Ọ kpa olegu ịgọgọ nyamwụ yẹ ọhịhị nya iJisọsị kpataa bwu epwoohe ju ka ẹpwụ nya oruma nya ọnyị ọnyang ọhẹ ọlẹ kọ jẹ́ ọlẹng ka, ká ẹnyị nyamwụ ri iMeri. Ụgbẹyị ọwẹ ị ma iJisọsị wẹ odehe ka ri ọngịnyị ehe lẹ. (Wa iLuku 1:34, 35.) IJisọsị warị wẹ odehe nyọka ri iMesaya lee ịKịrayịsị ọlẹ ká iJihova chehe nyị ka chị angịnyị ehe da ịnyị. a Ọmwụ ịlẹ ká iJihova yẹ ị-ịBayịbụụ wuu chajị nya iMesaya họ jịra u-uhye nya iJisọsị. Ọọwa du ká angịnyị jẹ́ iJisọsị nya “ịKịrayịsị Ọnyẹwẹ nya Ohe Oluhye ọlẹ kọ juwa hịhị.”—ỊMatiyu 16:16.

3. Ale iJisọsị à tị́ ji lẹẹlẹẹ?

Nyọlẹ ká iJisọsị gbu kpá, o wuleji bwula igu ka ri olegu bala ọ-tịrẹkpẹ rụ ka epwoohe. Ụ-ụwa, “Ohe Oluhye hu ịKịrayịsị . . . hwaa kele kaka hụ iwe-ahụrụ ọlẹ kọ la uhye gụ iwe-ahụrụ ịkịla wuu.” (Ala iFilipayị 2:9) Ọlẹẹlẹẹ, iJisọsị ri olegu-ẹrụ ọ-la ọngịrị ọtụka-ọtụka lẹ. IJihova kẹnẹ-kẹnẹ à la ọngịrị gwọọ lẹ.

JẸ́ GỤ ỌỌWA

Jẹ́ ang gụ ọọwa u-uhye nya ọngọlẹ ká iJisọsị ri bala ang odudu kahị baba nyọka jẹ́ ang u-uhye nyamwụ.

4. I-iJisọsị à ri Ohe Oluhye Agụgụ ka

ỊBayịbụụ mẹjẹ nyori, nanana nyọlẹ ká iJisọsị ri olegu ọlẹ kọ la ọngịrị yẹẹyẹẹ ụ-ụwa e-epwoohe, ọ kaa kpịlọmwụ keji ha iJihova, ko ri Ohe nyamwụ bala Adamwụ. Ahị tị́ họ ányị kahi jẹ́? Yẹ IFIM ọwẹ nyọka jẹ́ jaabwọ ká ịBayịbụụ mẹjẹ nyori iJisọsị datị hi Ohe Oluhye Agụgụ.

IFIM: IJisọsị à Ri Ohe Lẹ? (3:22)

Ụpwụ ịgọgọ ịwẹ dahị ụbwọ nyọka jẹ́ nyori iJisọsị datị hi iJihova. Wa ụpwụ ịgọgọ ọnyọnyọọnyị, kanụ ya ẹla u-uhye nya ịtọ ẹla ịlẹ kị taa da:

Wa iLuku 1:30-32.

Ányị ẹla ọlẹ ká olegu-ẹrụ ya à tị́ mẹjẹ nyori iJisọsị datị hi iJihova “Ohe Oluhye Agụgụ”?

Wa ịMatiyu 3:16, 17.

Ụka ká iJisọsị hu enyi Ohe, ẹlịyẹ ọkọ ọhẹ bwu epwoohe à tị́ ya?
Ọkọ nya owo a tị́ me irya kọ ri?

Wa ịJọn 14:28.

Ẹ-ẹpwụ nya adịda bala ọnyị, oowo à tị́ ri ọngọgbahị lee ọ-kpa ọngịrị ụ-ụbwọ gụ?
Ịyẹ à tị́ ri etu nyọlẹ ká iJisọsị wụrụ iJihova nya Adịda?

Wa ịJọn 12:49.

IJisọsị me irya nyori ọwa bala Adịdọwa nyị ri ọngịnyị ookpokpo? Ányị a tị́ yẹ ẹlẹwẹ?

5. Ang ọlẹ kọ mẹjẹ nyori iJisọsị à ri iMesaya lẹ

Ọmwụ ọyẹyẹ lụmẹ-lụmẹ juwa ẹ-ẹpwụ nya ịBayịbụụ u-uhye nya iMesaya, ko ri ọngọlẹ ká Ohe chụ nyọka chị angịnyị ehe da. Ọmwụ ọyẹyẹ ịịwa da angịnyị ụbwọ nyọka jẹ́ ọngọlẹ ko ri iMesaya ọọwa. Yẹ IFIM ọwẹ, nyọka jẹ́ ang u-uhye nya ọmwụ ọyẹyẹ ịhyẹ ịlẹ ká iJisọsị họ jịra ụka kọ wẹ odehe.

IFIM: IJisọsị Họ Ọmwụ Ọyẹyẹ Jịra (3:03)

Wa ọmwụ ọyẹyẹ ịla ịBayịbụụ ịwẹ, kanụ ya ẹla u-uhye nya ịtọ ẹla ịlẹ kị taa da:

Wa ịMayịka 5:2 nyọka jẹ́ ẹga ọlẹ kị ka ma iMesaya. b

Ọmama nya iJisọsị họ ọmwụ ọyẹyẹ ọwẹ jịra?—ỊMatiyu 2:1.

Wa Eje Ọnyịịla 34:20 bala ịSẹkaraya 12:10 nyọka yẹ ẹla ọlẹ ká ịBayịbụụ ya neeji u-uhye nya igu nya iMesaya.

Ọmwụ ọyẹyẹ ịwẹ họ jịra?—ỊJọn 19:33-37.
IJisọsị à chụ ang ọlẹ kị ka họ ta ogu nyamwụ lẹ?
Ẹlịyẹ ọwẹ à tị́ mẹjẹ́ng u-uhye nya iJisọsị?

6. Ahị ka yé apyobwuna bwula ọ-jẹ́ ang u-uhye nya iJisọsị

ỊBayịbụụ ya nyori nyị baba yẹẹyẹẹ nyọka jẹ́ ang u-uhye nya iJisọsị bala ang ọlẹ ká Ohe tịtọ ká iJisọsị ka họ. Wa ịJọn 14:6 bala 17:3, kanụ ya ẹla u-uhye nya ịtọ ẹla ọlẹ: