ANG ỌJẸ́JẸ 11
Abwọlẹ Á ka Bwu Ye Apyobwuna Bwu ỊBayịbụụ Ọjẹ́jẹ
À la irya nyọka họ ụkụrwọ ọtụka ọhẹ, a me nyori nyị ka lujwo kaka kpoye ụka ọhẹ lẹ? Nyọka họ kọ ka chịng kpẹẹ, ọhẹka à chị ụkụrwọ ọọwa ebwo ka ụpa ichiche-ichiche ịlẹ ká ka hu dụmwọ-dụmwọ. Ịnyị ọ la ẹ-ẹga nya ịBayịbụụ ọwawa lẹ. À ka me irya myị́, ‘Ale m tị́ ka dọmwụ bwu?’ A-ang ọjẹ́jẹ ọlẹ, ahị ka kụ ẹhị yẹ ang ị-pyịnyẹng ịhyẹ ịlẹ ká ka jẹ́-ẹ họ chajị ká ịBayịbụụ ọwawa bala ọjẹ́jẹ ka kpụng ịpyọ.
1. Ịyẹ tị́ du kahị baba nyọka wa ịBayịbụụ ụka myị́ ụka?
Ọngịnyị ọlẹ kọ kaa wa ịBayịbụụ, lee ‘ehile nya iJihova,’ ụka myị́ ụka kaa chị ọkẹkẹnị bala ọ-ka ịlahị ẹ-ẹpwụ nya ang myị́ ang ọlẹ kọ họ. (Wa Eje Ọnyịịla 1:1-3.) Nyọka dọmwụ, maga ká wa ịBayịbụụ ẹ-ẹpwụ nya iminiti ịmanyị-ịmanyị ahyẹẹnụ ọnyị myị́ ọnyị wẹẹ. Jaabwọ ká wẹẹ jẹ́ Omyi Ẹla nya Ohe gụ ọwọwa, ịnyị ịBayịbụụ ọwawa à ka ja kpụng ịpyọ lẹlẹ.
2. Ịyẹ à tị́ ka dang ụbwọ nyọka yé apyobwuna bwu ịBayịbụụ ọwọwa?
Nyọka yé apyobwuna bwu ịBayịbụụ ọwawa, ahị baba nyọka chị godayị kahị ka kụ irya kpori-kpori ju ẹla ọlẹ kahị wẹẹ wa. Áhị ka wọọ wa kem ka, ahị ka “me irya jwoo” ịnyịnyị. (IJochuwa 1:8) Jaabwọ ká wẹẹ wọọ, tịlọng ịtọ ẹla lala: ‘Ẹlịyẹ ẹgẹwẹ à tị́ mẹjẹ́m u-uhye nya iJihova? Ányị m tị́ ka bwu kpa ẹla ọwẹ họ ụkụrwọ ọ-ọhịhị nyam? Ányị m tị́ ka bwu kpa ẹla ọwẹ da angịkịla ụbwọ?’
3. Ụka oyina a tị́ ka hu nọ nya ịBayịbụụ ọwawa?
Ọ kaa lang ujwo nyọka yé ụka nya ịBayịbụụ ọwawa? Ọ kaa la iru nyahị ujwo. Maga nyọka “kpa ụka . . . [nyang] họ ụkụrwọ ọnyịịla.” (Ala Efesọsị 5:16) À ka jẹ́-ẹ họ ịnyị bwula o-hu ụka ọhẹ kpangga nọ ahyẹẹnụ ọnyọnyọọnyị nyọka wa ịBayịbụụ. Angịhyẹ kaa hu ụka nọ lụtụrụ nyọka wa ịBayịbụụ. Angịkịla kaa hu ụka ọkịla nọ ẹ-ẹpwụ nya ahyẹẹnụ, lala ụka nya ịnyọ ọmwụ́mwụ nya ẹnụ nyaa. Angịkịla tị kaa wa ịBayịbụụ lobyi ene kị ka nune. Ụka oyina à tị́ pwoku hang ahụ?
JẸ́ GỤ ỌỌWA
Jẹ́ ang ọlẹ á ka họ ká ịBayịbụụ ọwawa ka kpụng ịpyọ gụ ọwọwa. Jẹ́ jaabwọ á ka bwu nwụlanọ yẹẹyẹẹ chajị á ka ye apyobwuna bwu ịBayịbụụ ọwawa nyang.
Jaabwọ ká ang oriri onyeewe ka jẹ́-ẹ háahị dụmwọ-dụmwọ, ịnyị ịBayịbụụ ọwawa à ka jẹ́-ẹ háahị ịnyịnyị lẹ
4. Họ ká ịBayịbụụ ọwawa a kpụng ịpyọ
Ọ́ ka chịkpẹẹ nyọka dọmwụ nya ịBayịbụụ ọwawa ka myị́. Ma, à ka jẹ́-ẹ dọmwụ nyọka “charịnya” nyamwu myị́, jaabwọ ká ang oriri onyeewe kaa há ọngịnyị dụmwọ-dụmwọ. Wa 1 iPita 2:2, kanụ ya ẹla u-uhye nya ịtọ ẹla ọlẹ:
-
Kori ká wa ịBayịbụụ ẹnụ myị́ ẹnụ, à me irya nyori ọ ka jẹ́-ẹ kpụng ịpyọ kpụ a ka charịnya nyọka wọọ gụ ọwọwa?
Yẹ IFIM ọwẹ nyọka jẹ́ jaabwọ ká angịhyẹ họ du ká ịBayịbụụ ọwawa kpaa ịpyọ, kanụ ya ẹla u-uhye nya ịtọ ẹla ịlẹ.
-
I-ifim ọwẹ, akama oyina anjwo ịwẹ à tị́ kụrụ?
-
Ịyẹ à tị́ daa ụbwọ nyọka kịnyaa la ịBayịbụụ ọwawa?
-
Ịyẹ ị tị́ họ du ká ịBayịbụụ ọwawa kpaa ịpyọ?
Ang ịhyẹ ịlẹ kị ka jẹ́-ẹ dang ụbwọ nyọka dọmwụ:
-
Chụ ịBayịbụụ ọlẹ kị yẹ ẹla ọlụwa da kpẹẹkpẹẹ, kọ tị la jaabwọ kị kaa ya ẹla lụka nyahị ọlẹ. Maga nyọka wa New World Translation kori ko ji la òja nyang.
-
Dọmwụ bwula ọ-wa ụpa nya ịBayịbụụ ọlẹ kọ kpụng ịpyọ gụ. Nyọka yẹ irya ọ-gba kpehe, yẹ ụpa ọlẹ ko ri, “Dọmwụ nya ỊBayịbụụ Ọwawa.”
-
Kpịtịya nya ẹla ọlẹ ká wa. Kpa ụpa ọlẹ ko ri, “Bahị nya Ẹga Ọlẹ Ká Wa ỊBayịbụụ Pwụ́” ọlẹpwụ nya ụpwụ ọlẹ họ ịnyị.
-
Wa bwu JW Library®app. Bwulọọ, à ka jẹ́-ẹ wa ịBayịbụụ bala o-ke ụrụ wo lọọ la ifon lee ang-abwọ nya ichene ọkịla ẹ-ẹga myị́ ẹga ká ji.
-
Kpa appendix ịla New World Translation họ ụkụrwọ. Ịmapụ, arụrụ ụma ịdatị-datị, bala ẹga ọ-da omyi ẹla wụlẹ juwa, ịlẹ kị ka du ká ịBayịbụụ ọwawa ka kpụng ịpyọ gụ ọwọwa.
5. Nwụlanọ gbe ịBayịbụụ ọjẹ́jẹ nyang
Wa Eje Ọnyịịla 119:34, kanụ ya ẹla u-uhye nya ịtọ ẹla ọlẹ:
-
Ịyẹ tị́ du kọ há nyọka raabwọ ene á ka wa ịBayịbụụ lee ọ-nwụlanọ gbe ịBayịbụụ ọjẹ́jẹ nyang?
Ụgbẹyị oyina a tị́ ka bwu yé apyobwuna bwu ang ọjẹ́jẹ ọnyọnyọọnyị? Ang ọjẹ́jẹ ọnyị myị́ ọnyị ká juwa nwụlanọ ụ-ụpwụ ọlẹ, maga ká họ ẹla ịlẹ:
-
Wa ọgba ịhọhẹ-họhẹ ịla ang ọjẹ́jẹ ọọwa.
-
Wa ịBayịbụụ ịlẹ kị ya nyị wa, ká maga nyọka yẹ jaabwọ kị bwu gu ang ọlẹ ká wẹẹ jẹ́.
-
Ju ẹhị nya ẹla ịlẹ kị wẹ ịtọ ẹla ọnyọnyọọnyị ẹjẹẹ; ọọwa ka dang ụbwọ nyọka jẹ́-ẹ ya ẹla ọlẹ ká jẹ́ bwu ụwa bala angọmẹjẹ nyang.
À jẹ́ ẹla ọlẹ?
Alibeenu nya iJihova kaa wa ịBayịbụụ ịdatị-datị. Ma, ọlẹ kọ tị háahị gụ wuu ri New World Translation of the Holy Scriptures chajị ọ la kpẹẹkpẹẹ, ọ la gbagbịla, ẹnyị nya Ohe tị juwa.—Yẹ Ụpwụ ọla intanẹtị ọlẹ ko ri, “Alibeenu nya IJihova La ỊBayịbụụ Nyịlaa?”
ANGỊHYẸ KAA YẸKẸẸ: “ỊBayịbụụ ọjẹ́jẹ lujwo kpoye. Ḿ hi ụbwọ lee ọ-la ọngịrị nyamwụ ka.”
-
Ányị ahụ à tị́ yọọ?
ẸLỊYẸ A TỊ́ JẸ́?
Nyọka yé apyobwuna yẹẹyẹẹ bwu ịBayịbụụ ọwawa, hu ụka nọ nyọka wọọ, raabwọ ká ka wo etu nya ẹla ọlẹ ká wẹẹ wa, bala ọ-nwụlanọ gbe ang ọjẹ́jẹ.
Ẹlịyẹ A Tị́ Yụbwọ Chị?
-
Ịyẹ à tị́ ka dang ụbwọ nyọka yé apyobwuna yẹẹyẹẹ bwu ịBayịbụụ ọwawa?
-
Ụka oyina a tị́ ka jẹ́-ẹ hu nọ nyọka wa ịBayịbụụ bala ọ-jọ́ọ jẹ́?
-
Ịyẹ tị́ du kọ há nyọka nwụlanọ gbe ịBayịbụụ ọjẹ́jẹ nyang?
JẸ́ ANG ỊLẸ DỌỌ U-UHYE
Kụ ẹhị yẹ irya ọ-gba kpehe ịhyẹ ịlẹ kị ka dang ụbwọ nyọka yé apyobwuna yẹẹyẹẹ bwu ịBayịbụụ ọwawa nyang.
“Jaabwọ Á ka Bwu Yé Apyobwuna Yẹẹyẹẹ Bwu ỊBayịbụụ Ọwawa” (Ẹpwang ọ-Kụ Gbeji No. 1 2017)
Jẹ́ agbẹyị ịta ịhyẹ ịlẹ á ka jẹ́-ẹ wa ịBayịbụụ.
“Ányị ỊBayịbụụ à Tị́ ka Jẹ́-ẹ Dam Ụbwọ?—Ụpa 1: Mwahị Chẹrị-chẹrị” (Ụpwụ ọla intanẹtị)
Yẹ jaabwọ á ka họ chajị ká ịBayịbụụ ọwawa ka kpụng ịpyọ.
“Ányị ỊBayịbụụ à Tị́ ka Jẹ́-ẹ Dam Ụbwọ?—Ụpa 2: Họ ká ỊBayịbụụ Ọwawa a Kpụng Ịpyọ” (Ụpwụ ọla intanẹtị)
Wo irya ọ-gba kpehe bwu ẹga nya angịlẹ kị wa ịBayịbụụ ẹ-ẹpwụ nya ẹka ịmanyị tị́ lẹ.
