Ang odudu ọlẹ ká iJisọsị jẹ́ ya ẹla nya Ohe ju ọnyang ọla ịSameriya lụka ọ-kpahị ju ka myị́ ri, ọ dọmwụ bwula o-ja oja balọọ. Ányị ahị tị́ ka bwu nwa kịlahị-ịlahị ẹ-ẹga nyọka ya ẹla nya Ohe ju angịlẹ káhị jẹ́ ẹnẹnẹhẹ lẹka?

• Chị ụmwara bala o-ja oja bala angịkịla. Nanana nyori ịnyịrọ wẹẹ chị iJisọsị pyẹpyẹ, ọ dọmwụ nya ẹla oyaya bwula ọ-bile enyi ọnwanwa. Lẹ, à ka jẹ́-ẹ dọmwụ bwula ọnụ ọdachị kẹm-kẹm myị́. Ọọwa lẹ, a ya ẹla pyịnyẹng u-uhye nya enyi ọlẹ kọ́ do lee ohu ọhọhọ lee ẹnụ ọchịchị lẹlẹ. À ka ya ẹla ọlẹ kọ́ họ kpangjẹ ịnyịnyị myị́. Kpịtịya nyori, irya nyang ri ọ-ka ja oja bala ọngọọwa ịnyị. Lẹ, ya ẹla u-uhye nya egbeju nya ẹla ọlẹ ká jẹ́ nyị ka gu ọngọọwa ọ-ọkịlẹtụ. Kori ká ọngọọwa-á myị ke ụrụ ka, aga ọmama nyang á ri ododu ka. Maga ká ya ẹla bala ọngọkịla myịmyị. Bịlẹ iJihova nyọka ya ugbodu ojuju hang.​—Ne 2:4; Ụkụ 4:29.

• Kụ kee gbe iwe ọnyị myị́ ọnyị nyọka ya ẹla nya Ohe, ma a chị agaga ka. Ẹla oyaya nyang bala ọngọọwa á la jaabwọ ọlẹ ká angịnyị-ị̀ joja lawụlẹ. Kori ká juwa chị agaga, ọ ka la ọngọọwa abwẹbwẹhẹ, ọ ka myị-ị ja oja kaka. Kori ká jẹ́ ya ẹla nya Ohe ju ọngọọwa ene kanụ-ụ́ ja oja kpá ka wẹwẹ, ọkịlẹtụ a kpung enyi ka. Kori ká ẹla nyọka ya ẹla nya Ohe ju angịnyị lụka ọ-kpahị ju ka, á kaa lang ujwo aalẹ, maga ká juwa ja oja bala angịnyị ịịwẹ la ọ-kpa irya nyọka ya ẹla nya Ohe ka. [Mẹ iFim ọhọhẹ jẹ, kanụ ya ẹla lawụlẹ u-uhye nyamwụ.]

• Maga nyọka wụrụ ụgbẹyị nya ẹla nya Ohe oyaya da bwula o-ya ẹla u-uhye nya ọmyịmyị ọlẹ ka la bwu ọkịlẹtụ nyang. Ọọwa ka gu ọngọọwa gbịla nyọka tọng ịtọ ẹla. IJisọsị ya ẹla ọlẹ kọ́ gu ọnyang ọwẹ gbịla nyọka tịtọ ẹla. Ọwẹwẹ nya ịtọ ẹla ịịwa, à ri ẹla nya Ohe kọ́ wẹẹ ya jwoo lẹ. [Mẹ iFim oheeye jẹ, kanụ ya ẹla lawụlẹ u-uhye nyamwụ. Mẹ iFim ọhata jẹ, kanụ ya ẹla lawụlẹ u-uhye nyamwụ ịnyịnyị.]