Bwu Ọya Ọhọhe nya ẹka 2018, ọ-họ mẹjẹ nya ụgbẹyị ọlẹ áhị ka bwu ya ẹla kaa hi ehe ugo-ẹkpẹ nya ụpwụ nya Ọhịhị Bala Ụkụrwọ Nyahị Ahị Angịnyị nya ỊKịrayịsị—Ụpwụ Ọ-kpa Jẹ́ Ang. Ányị ahị tị́ ka bwu kpa họ ụkụrwọ?

Ụka Kị Ya Ụkụrwọ Hang ọ-Ọjịra-jịra: À ka jẹ́-ẹ kpa ịtọ ẹla, ụpwụ ịgọgọ bala ịtọ ẹla ọ-ya nọ e-eji họ ụkụrwọ. Ma, ọọwa a tị́ ri yẹkẹẹ à ka ya omyi ẹla ọnyị myị́ ọnyị ọlẹ kọ ju ẹ-ẹpwụ nya ifim nya ụgbẹyị ọlẹ áhị ka bwu ya ẹla ọọwa kpangga ka. À ka jẹ́-ẹ kpa abwụma ọkịla, lee ọ-dọmwụ nya ẹla ụ-ụgbẹyị ọkịla, lee ọ-kpa irya ụma ọkịla ya ẹla myị ịnyịnyị. À ka jẹ́-ẹ ya ụpwụ ọhẹ bwu ẹpwụ nya Ang-abwọ ịlẹ Kahị kaa Kpa Mẹ Ang Jẹ ha ọngịnyị, oriri kị ya ẹla rụ ụpwụ ọọwa ụpa ọwẹ ka wẹwẹ.

Ụka Kahị Juwa ẹ-Ẹrụ Ọnyịịla ọ-Kpa Pyẹ: Ị gba ị-họ mẹjẹ nya ụgbẹyị ọlẹ áhị ka bwu ya ẹla ịwẹ kpehe, chajị kị ka ya irya hahị ịnyị. Kori ká ọngịnyị á ke ụrụ lang, kọ tị tịtọ nyọka jẹ́ ang gụ ọọwa, à ka jẹ́-ẹ kịnyaa la ang ọjẹ́jẹ balọọ bwula ọ-ka kpa ẹla ọlẹpwụ nya ọmwẹẹkpẹ họ ụkụrwọ myị́. À ka jẹ́-ẹ nwụ ọ-họ mẹjẹ ọọwa họ lee o-yoo ụgbẹyị ọkịla datị gbang-gbang myị́ ịnyịnyị. À ka tọ ịlọng wo myị́, egbeju nya ẹla ọ-la ọya ọkẹkpẹ lee ụpwụ ịgọgọ ọkịla ka kpụ aloye nyam ịpyọ gụ? Ọ-kaa kpụ angịnyị iloye nyam ịpyọ nyọka ke ụrụ wo oja nya ẹla ọlẹ kọ họ kpangjẹ? Jaabwọ myị́ abwọ ọlẹ ká chụ nyọka kpa ị-họ mẹjẹ nya ụgbẹyị ọlẹ áhị ka bwu ya ẹla họ ụkụrwọ wẹwẹ, ẹla ọlẹ ká ka kpa i-irya ri ọ-ka “họ ang ịwẹ wuu ịnyị, chajị nya ịlahị ọkaka nya ẹrụ ọnyịịla ọ-kpa pyẹ,” chajị kọ ka jẹ́-ẹ wu angịkịla ọyị.—1Kọr 9:22, 23.