Ɛga ɛyɛɛyɛyi ipu oduudu, ācɛ gē nuunu klla gē ya ācɛ ɔhá ɔdobɔbi ohigbu ɛlā ku imeli. Ɛnyā gē ya ku ācɛ ipu oduudu ɛcɛ kóō lɛ ɔtoplico.

•   Abɔ ō ba ɔkpá néē ya ipu éwo ku Mexico ipu ihayi ku 2023-2024 a, é ŋmo ācɛ imeli ofu ce igwahanɛ (39). Ɛnyā kē wɛ aluka nōo fiyɛ duu ku ācɛ néē ŋmo ohigbu ɛlā imeli ipu éwo ɔɔma a. Abɔ ācɛ yɔ i nuunu klla gē ya ācɛ ɔhá ɔdobɔbi kpɔ ɛɛ ma, ō cɛ lɛ ācɛ gbɔɔ ō yuufi klla ta ō lɛ ɔtu ku uwa kwu ɛlā ku imeli.

•   Ipu Europe ācɛ gē nuunu klla gē ya ācɛ ɔhá ɔdobɔbi ohigbu ɛlā ku imeli nɛɛnɛhi. Ipu ɛ̄cī igwɛɛhɔ (15) ku Ɔya Ɔmɛhɔ ku 2024, ācɛ ceyitikwu ya kéē lɛ u Slovakia nōo wɛ prime minister a ŋmo. Amáŋ, ó lɛyi lɛ uwa ŋ.

•   Ɛ̄cī igwɛɛhɔ (15) ku Ɔya Ɔmahaanɛ ku 2024 ipu United States, ācɛ ceyitikwu igbo ɔmpa kéē lɛ u Donald Trump nōo tɛtɛ wɛ ɔcɛ́ ku éwo a ŋmo, amáŋ ó lɛyi lɛ uwa ŋ kpɔ. Ɛnyā kē ya ku ācɛ kéē hidagoo ipu éwo a nɛhi.

 Ɔdiya ācɛ gē nuunu klla gē ya ācɛ ɔhá ɔdobɔbi ohigbu ɛlā ku imeli? Ó géē mɛ gla? Ɔdi nɛ Ubáyíbu ka a?

Ubáyíbu tɛtɛ le ka taajɛ ka ācɛ géē wɔtu ɔmpa uwa ohigbu ɛlā imeli

 Ubáyíbu tɛtɛ le ka taajɛ ka ɛpleeko ku alɔ nyā nōo wɛ “eko nɛ̄ ɛcɛ gáā mɛ” a, ācɛ alɛwa géē dɔka ō ya ɔdā nōo géē ya ku ācɛ kéē nuunu klla wɔtu ku iyi uwa.

•   “Eko kú uwalu í yɔ̄ eko nɛ̄ ɛcɛ gáā mɛ ā. Ācɛ . . . nɛ̄ ɔdā dúúmā í gáā jɛ̄ uwā eyī ŋ́, ɔdā dúúmā í gáā tīihɔ tū uwā gɛ ŋ́, . . . é kē gáā ményinyi ɔ̄cɛ dúúmā ŋ́, . . . ācɛ o yíkpɛ́lā eko dóódu, . . . ācɛ nɛ̄ ɔ̄cɛ í lɛ ɔtūce uwá glá ŋ́, ācɛ nēé lɛ ɛlá wu ɔdā dúúmā ŋ́, ācɛ nɛ̄ ɔbɔ́ɔcɛ le mu uwá ipú hile.”​—2 Utímōti 3:​1-4.

 Ubáyíbu klla ka ku eko nɛ ɛcɛ gáā mɛ nyā ka ācɛ géē yikpɛyi olɔfu ta igɔmɛnti. Ó klla ka ku unwalu ɛyɛɛyɛyi géē yɔ ohigbu ɛlā ku imeli. (Ulúku 21:9) Amáŋ, aunwalu ohigbu ɛlā ku imeli mla ō kɔ igwiigwu i gáā yɔ piyoo ŋ

Unu ō nu mla aɔdobɔbi nɛ ācɛ gē ya ɔmpa uwa ohigbu ɛlā imeli a gē mɛ

 Ubáyíbu lɛ ɔ ta alɔ eyī peee ku Ɔwɔico géē bi Ajɔɔcɛ ku nu le kwɛyi Igɔmɛnti ku alɛɛcɛ.

•   “Ɔwɔicō kú ɔkpáncō géē je ajɔ̄ɔ̄cɛ́ ɔhá kwu ajɛ, . . . Ó géē je odúúdú aájɔ̄ɔ̄cɛ́ ohile ɔhá ā kpó yíífi tāajɛ dúúdú, cɛ́ɛ́ ó gaá yɔ̄ piyóó.”​—Udánīyɛ̄lu 2:44.

 Ajɔɔcɛ ku Ɔwɔico géē ya ku ācɛ kéē piyatɔha klla bi ɛbɔ wa ipu oduudu ɛcɛ a.

•   É gē hi Ujisɔsi nōo wɛ ɔcɛ́ ku Ajɔɔcɛ a ku “Ɔcɛ́ kú ɛbɔ́, . . . oōnyīla kú ajɔ̄ɔ̄cɛ́ mla igɛ́mɛ́nti kú nū gē wɛ ɛbɔ́, ó gāa lɛ ooŋmɛ́yí ŋ́.”​—Ayisáya 9:​6, 7.

•   Babanya, ācɛ nōo yɔ ɛhaajɛ ku ɔcɛ́ ō lé ku nu nyā yɔ i nwu ɛgɛ nɛ é géē lā ɛbɔ mla ɔmpa uwa a. Ɔɔma ya ɛɛ nɛ Ubáyíbu kahinii: “É géē kpó aɔ́kpacaŋ́gelī o bī kpɛ́fú kú uwā kpó na aɛ́nū ō bī hɛ́ɛ̄hɔ̄. É klla í je aóbō kú uwá kpó na aɛ́wā ō bī cē ɔdɛ̄hɔ̄. Aéwo í klla gáā kpɛ́fú tú ɔ́mpā uwā ɛ́ɛ́ gɛ ŋ́. É klla gáā kllɔcɛ́ ɛfú ō kpó ɛ́ɛ́ gɛ ŋ́.”​—Ayisáya 2:​3, 4.

 O ya ɛɛ ku a nwu ɛlā tōōtɔ̄ɔ̄, jé ikpɛyi ɛlā nyā nōo kahinii: “Ɔdi Nɛ Ajɔɔcɛ Ku Ɔwɔico Géē Ya A?” klla lɛ uvidio nyā má nōo kahinii: Ɔdi Wɛ Ajɔɔcɛ Ku Ɔwɔico A?