Íne ku Umosisi ka ɔcɛnyilɔ duuma nōo dɔka o ta ɔnyā nu kóō lɛ ɔkpá ku ɔnyā o ta tutu. Ɛnyā i gē ya ku ɔba mla ɔnyā kéē ta iyi uwa fiya fiya ŋ. Naana a, eko nɛ Ujisɔsi yɔ ɛcɛ a, aotrɛyi ku ɛga o gba ɛ̄gbā cɛ lɛ ɔba mla ɔnyā o ta iyi uwa kwu ta alaha. Eko ɔɔma, acɛnyilɔ lɔfu ta anyā uwa ohigbu ɔdā duuma gla. (ɔdā ōhī néē ka ipu nwtsty lɛyikwu Umák 10:​4, 11) Ujisɔsi cɛ lɛ alɔ le jé ka ɔba mla ɔnyā o lɛ, wɛ ōmiya nōo ŋma ɛgiyi Ujehofa. (Umák 10:​2-12) Eko duuma nɛ ɔba lɛ ɔnyā lɛ, e gē je piya “ɔkpíyē ékpó” ipu opiyatɔha nōó i mɛ ŋ ma. Ipu ɔkpá ku Umátiyu ɔdā ekponu nōo lɔfu ya ku ɔba mla ɔnyā kóō ta iyi uwa a wɛ ‘aja o gbo.’​—Umt 19:9.

Icɛ, ācɛ alɛwa i gē má ɔba mla ɔnyā o lɛ ɔwɛ nɛ Ujisɔsi i má ɔ a ŋ, ikɔkɔ ɔɔma e yɔ i má ɔ ɔwɛ nɛ ācɛ Ufarisii má ɔ eko ɔɔma a. Eko nɛ unwalu gā ɔtahɛ ɔba mla ɔnyā, ācɛ ku ɛcɛ nyā i gē kpo eko bɔnu o ta iyi uwa ŋ. Amáŋ, ɔba mla ɔnyā duuma nōo wɛ ācɛ o yɛce Ukraist i gē ya lɛ a ŋ, e gē je okonu néē ce eko néē yɔ i lɛ iyi uwa a ta abɔ éyi ŋ, e klla gē ceyitikwu bi aukɔ́ ku Ubáyíbu le ka iyi uwa gwo. Eko nɛ aa lɛ uvidio nōo kahinii: Ihɔtu mla Ojilima gē piya apɔlɛ tɔha a má mɛ, cɛɛ aa lɛ aɔka nōo yɔ ɛhaajɛ a cila

• Ɛgɛnyá nɛ a gáā bi ɔkpá ku Aíita 15:1 le yuklɔ ipu ɔba mla ɔnyā o lɛ ku uwɔ a, ɔdiya nɛ ɔɔma kē cɛgbá a?

• Ɛgɛnyá nɛ ō yuklɔ mla ukɔ́ nōo yɔ ipu ɔkpá ku Aíita 19:11 géē ta uwɔ abɔ kwu hɛ unwalu ta a?

• Ɔdaŋ ku ɔba mla ɔnyā o lɛ ku uwɔ yɔ i lɛ unwalu nɛɛnɛhi, ikɔkɔ nɛ a géē yɔ i gbɛla lɛyikwu ɔba amāŋ ɔnyā o ta a, aɔka nyá nɛ a cika o leyi yɛ ɔ a?

• Ɛgɛnyá nɛ ō bi ɔkpá ku Umátiyu 7:12 le yuklɔ géē ta uwɔ abɔ ka a wɛ ɔba amāŋ ɔnyā olɔhi lɛ a?