ƐLĀ Ō NWU ƆMƐ 15
Ɔdiya nɛ cika ō gɔbu a?
1. Itene nyá nɛ a géē lɛ ŋma ō bēē ya oklɔcɛ ku Ubáyíbu a?
Ó lɛ aafu ŋ, aɔdā nɛ a nwu ŋma ɔkpá nyā ta uwɔ abɔ ya ku ihɔtu nɛ a lɛ lɛ Ujehofa a kóō lɔfu. Amáŋ, a cika ō yɔ i ceyitikwu yuklɔ ku ihɔtu nyā kóō lɔfu tōōtɔ̄ɔ̄. (1 Upíta 2:2) Ɔdaŋ ku a gē ya oklɔcɛ ku Ubáyíbu, a géē tubla Ujehofa ajaajɛ. Ɛnyā kē gáā ya ku a lɛ eyiyoce ku oyeeyi opiyoo a.—Jé Ujɔ́ni 17:3; Ujúudu 21.
Abɔ a yɔ i nwu ɛlā alɛwa lɛyikwu Ɔwɔico a, ɔtu okpoce ku uwɔ géē lɔfu tōōtɔ̄ɔ̄. Ɔtu okpoce gáā ta uwɔ abɔ ku a ya ɔdā nōo he Ɔwɔico ɔtu a. (Ācɛ Uhíbru 11:1, 6) Ó klla géē cɛ gā uwɔ ya opiyabɔ alɛwa ipu oyeeyi ku uwɔ.—Jé Úklɔ́ kú Ācotɛ̄hɔ̄ 3:19.
2. Ɔwɛ nyá nɛ ācɛ ɔhá géē lɛ itene ŋma ɔdā nɛ a jé lɛyikwu Ɔwɔico a?
A lɔfu lɛ ɛnɛɛnɛ ɛma mla Ujehofa
Ō da ācɛ lɛyikwu ɔkoolɔhi gē he ɛjɛɛji alɔ ɔtu ō ya. Alɔ kē jé ku a géē dɔka ō da ācɛ lɛyikwu ɔdā nɛ a nwu ŋma Ubáyíbu a. Abɔ a yɔ i klɔcɛ ku Ubáyíbu a, a géē nwu ɛgɛ nɛ a géē bi Ubáyíbu le da ācɛ ɔhá ɔdā nɛ a yɔ i nwu lɛyikwu Ujehofa mla ɔdā olɔhi nɛ ó gáā ya lɛ alɔ a.—Jé Ācɛ Uróm 10:13-15.
Ācɛ alɛwa gē gbɔɔ mla ō da aoklobiya, ancɛnya amāŋ aɔmaapu uwa lɛyikwu ɔkoolɔhi a. Amáŋ, bi ijeeyi le kɛla lɛ uwa. Ikɔkɔ nɛ a géē da uwa ka icɔɔci ku uwa gē nwu ɛlā ɛkɛmgbɛ a, da uwa lɛyikwu ɔdā olɔhi nɛ Ɔwɔico cokonu ka anuɔ géē ya ɛcɔbu a. Bla ka uce olɔhi ku uwɔ gáā ya ku ācɛ kéē cɛ ku ɛlā nɛ a yɔ i ka a wɛ ɔkwɛyi a, ó wɛ ɛlā nɛ a gē da uwa ŋma okonu anca ŋ.—Jé 2 Utímōti 2:24, 25.
3. Ɛdɔ ɛma nyá nɛ a gáā jɔɔnyɛ mla Ɔwɔico a?
Ō bēē klɔcɛ ku ɛlā Ɔwɔico géē cɛ gā uwɔ lɔfu ipu ɛ̄gbā ō gba ku nu. Ɛnyā géē ya ku a lɛ ɛnɛɛnɛ ɛma mla Ujehofa, ó klla géē ya ku a kwu piya ɔyi nu.—Jé 2 Ācɛ Ukɔ́rīnti 6:18.
4. Ɛgɛnyá nɛ a gáā ya lɔhi fiyɛ ipu ɛ̄gbā ō gba ku uwɔ a?
Oklɔcɛ ku Ubáyíbu géē ta uwɔ abɔ ku a ya lɔhi fiyɛ ipu ɛ̄gbā ō gba ku uwɔ. (Ācɛ Uhíbru 5:13, 14) Da Ɔcɛ Ocijali Ku Ujehofa duuma kóō bi ɔkpá néē i hi ka: What Can the Bible Teach Us? a le ya oklɔcɛ ku Ubáyíbu tɔha mɛmla uwɔ. Abɔ a yɔ i klɔcɛ ku Ubáyíbu a, oyeeyi ku uwɔ géē lɔhi fiyɛ.—Jé Aíjē kú Ɛ̄gbā 1:1-3; 73:27, 28.
Ɛjɛɛji ɔkoolɔhi nɛ alɔ kɛla lɛyikwu ɔ ipu ɔkpá nyā ŋma ɛgiyi Ujehofa nōo wɛ Ɔwɔico ku eeye a. (1 Utímōti 1:11, NW ) A géē tubla ɔ ajaajɛ ɔdaŋ ku a gē piyatɔha mla ācɛ ɔlɛ nu. (Ācɛ Uhíbru 10:24, 25) Ɔdaŋ ku a ceyitikwu yɔ i ya ɔdā nōo he Ujehofa ɔtu, a géē lɛ oyeeyi opiyoo. Ɔdā nōo lɔhi fiyɛ duu nɛ a lɔfu ya ipu oyeeyi ku uwɔ a wɛ ō tubla Ɔwɔico ajaajɛ.—Jé 1 Utímōti 6:19.
You May Also Like
LƐYIKWU ALƆ
Ɔdi Ya Naa Cika O Y’oklɔcɛ ku Ubáyíbu?
Ubáyíbu yɔ johi k’ɔka nɛhi ku oyeeyi lu ɛwa nɛhi ipu ɛcɛ. A dɔka o wɛ éyi ku uwa a?
