Ó gáā gboji gɛ ŋ, ācɛ géē ya ku alɔ lɛ abɔ ci ɛ̄gbā ō gba ku Ujehofa. É klla géē ya alɔ owe nɛhi abɔ alɔ ta ō lɛ abɔ ci ɛ̄gbā ō gba ku Ujehofa a. Ɛnyā cika ō ta alɔ ufi nɛɛ?

1. Ɔdiya nɛ alɔ kē yɔ i leyice ō ya ŋmo a?

Ubáyíbu lɛ ɔ teyi peee kahiniii: “É géē ya ɛjɛ̄ɛ̄jī ācɛ nēe dɔɔ̄kā o lā oyēeyī olɔhi kú ācɔ̄lóhɔ́nyɛtá ipú opīyatɔ̄há mla Ohɔ́nyɛtá Ujísɔ̄si ā ōwē pííí.” (2 Utímōti 3:12) É ya Ujisɔsi ŋmo ohigbu ka ó wɛ aku ɛcɛ ku Usetan nyā ŋ. Ó wɛ ɔdā ō yeyijii ŋ, ɛgɛ nɛ igɔmɛnti mla ɔwa ku aɔwɛ ō gba ɛ̄gbā ku ɛcɛ nyā gē ya alɔ ŋmo a, ohigbu ku alɔ i wɛ aku ɛcɛ ŋ.—Ujɔ́ni 15:18, 19.

2. Ɛgɛnyá nɛ alɔ géē ya otutu lɛyikwu ō ya ŋmo a?

Ó cɛgbá babanya ku alɔ yɔ i ya ku ɔtu nɛ alɔ kpoce Ujehofa a kóō yɔ i lɔfu tōōtɔ̄ɔ̄. Lɛ eko taajɛ ɛ̄cī doodu ku a gbɔɔkɔ lɛ ɔ, ku a klla bēē jé Ɛlā ku nu nōo wɛ Ubáyíbu a. Bēē gā ōjila ku ujɔ ojigogo. Aɔdā nōo ba nyā géē je ɔfu iyē gā uwɔ ku a lɛ ɔtu ipu ō ya ŋmo duuma nɛ a géē má a, ɔdaŋ ka ō ya ŋmo a kóō ŋma ɛgiyi ācɛ apɔlɛ ku uwɔ naana. Ɔcocɛhɔ Upɔlu néē ya ɔ ŋmo igbalɛwa a ta kahinii: “Óndú alɔ wɛ ɔ̄cɛ otá alɔ abɔ̄, alɔ í kē gáā yúufi ŋ́.”—Ācɛ Uhíbru 13:6.

Ɔdaŋ ku alɔ gē yuklɔ ku ɔna ō ta ojigogo, ó géē tu alɔ abɔ ku alɔ yɔ i lɛ ɔtu tōōtɔ̄ɔ̄. Uklɔ ku ɔna ō ta a gē nwu alɔ ku alɔ kpɔtuce Ujehofa, ku alɔ klla hii yuufi ācɛ ŋ. (Aíita 29:25) Ɔdaŋ ku a yɔ i yuklɔ ku ɔna ō ta a mla ɔtu ō lɛ babanya, ó géē tu uwɔ tu ku a yɔ i yuklɔ ku ɔna ō ta eko duuma nɛ igɔmɛnti dɔka ku alɔ kwu abɔ i ci uklɔ ku alɔ.—1 Ācɛ Utesaloníka 2:2.

3. Ɛgɛnyá nɛ alɔ géē lɛ itene ɔdaŋ ku alɔ hayi kpaakpa lɛ Ujehofa eko duuma néē yɔ i ya alɔ ŋmo a?

Ó wɛ ɔkwɛyi ku alɔ i gē jɔɔnyɛ ō ya ŋmo ŋ, amáŋ eko duuma nɛ alɔ hayi kpaakpa lɛ Ujehofa ipu ō ya ŋmo duuma, ɔtu ō kpoce ku alɔ géē lɔfu iyē tōōtɔ̄ɔ̄. Alɔ gē tubla Ujehofa ajaajɛ fiyɛ ohigbu ku alɔ má ɛgɛ nɛ ó ta alɔ abɔ eko nɛ abɔ hɛ alɔ iyē nɛ alɔ gbɛla ku alɔ i gɔbu gla gɛ ŋ ma. (Jé Ujɛ́mīsi 1:2-4.) Owe nɛ alɔ gē má i he Ujehofa ɔtu ŋ, amáŋ ó gē gweeye nɛhi eko duuma nɛ alɔ lɛ ɔtu lé. Ubáyíbu kahinii: “Ɔ́dāŋ́ ka ɔkpani aá lɛ aá ŋmíje ohígbū ɔdā olɔhi nɛ̄ aá yá, Ɔwɔicō géē hɔ́hā ce aá.” (1 Upíta 2:20) Ujehofa géē cila ɛjɛɛji ācɛ nōo hayi kpaakpa lɛ ɔ a ule ku oyeeyi opiyoo ipu ɛcɛ ɛyipɛ nɛ ɛjɛɛji ācɛ nōo lā abɔɔ a géē wɛ ācɛ ō gba Ujehofa ɛ̄gbā ɔwɛ okpaakpa.—Umátiyu 24:13.

 JÉ GƆBU

4. A lɔfu lé ɔtu ō ya ŋmo ŋma apɔlɛ ku uwɔ gla

Ujisɔsi jé peee ka ācɛ ōhī ŋma ipu apɔlɛ ku alɔ i lɔfu dɔka ku alɔ gba Ujehofa ŋ. Jé Umátiyu 10:34-36, cɛɛ ku aa kɔka lɛyikwu ɔka nyā:

• Ɔdi lɔfu ya ɔdaŋ ku ɔcɛ éyi ŋma ipu apɔlɛ le miya ō gáā gbɔɔ ō gba Ujehofa ɛ̄gbā?

5. Gɔbu ku a yɔ i gba Ujehofa ɛ̄gbā naana néē yɔ i ya uwɔ ŋmo a

 6. Ujehofa géē ta uwɔ abɔ ku a lé ɔtu

 ƆDI NƐ A NWU A?

Ɔfu nɛ alɔ gē le tu iyē ku alɔ yɔ i gba Ujehofa ɛ̄gbā naana nɛ alɔ yɔ i má ō ya ŋmo a jɛ ɔ eyī nɛhi. Oŋma lɛ otabɔ ku nu, alɔ géē lé ɔtu mɛɛlɛ!

Aɔka ō tu alɔ ɛlá kwu ɔdā nɛ alɔ nwu

• Ɔdiya nɛ Ācɛ O Yɛce Ukraist cika ō leyice ō ya ŋmo a?

• Ɔdi nɛ a géē ya babanya ku a le tutu taajɛ ku ō ya ŋmo nɛ a géē má ɛcɔbu a?

• Ɔdi gáā ta uwɔ abɔ ku a lɛ ɔtu okpoce ku a lɔfu gba Ujehofa ɛ̄gbā ipu ojama duuma gla a?