ƐLĀ Ō NWU ƆMƐ 41
Ɔdi Nɛ Ubáyíbu Ka Lɛyikwu Ɔcɛnya mla Ɔcɛnyilɔ Ō Gwuta Mla Iyi Uwa A?
Ó gē tɔɔtɛ lɛ ācɛ alɛwa kéē kɛla lɛyikwu ɔcɛnya mla ɔcɛnyilɔ ō gwuta mla iyi uwa a ŋ. Naana kpɔ a, eko duuma nɛ Ubáyíbu kɛla lɛyikwu ɔcɛnya mla ɔcɛnyilɔ ō gwuta mla iyi uwa a, ó gē ka ɔ ɔwɛ ō teyi peee ipu ojilima. Ɛlā nɛ Ubáyíbu ka a kē tiile lɛ alɔ. Ó kē lɛyi nɛhi ohigbu ku Ubáyíbu wa ŋma ɛgiyi Ujehofa nōo ya alɔ a. Ó jé ɔdā nōo lɔhi lɛ alɔ fiyɛ duu a. Ó da alɔ ɔdā nɛ alɔ géē ya, o ya ɛɛ kóō gweeye. Ó klla da alɔ ɔdā nōo géē ta alɔ abɔ jɔɔnyɛ oyeeyi ogboogboo ɛcɛ.
1. Ɛgɛnyá nɛ Ujehofa gē leyi má ō gwuta ku ɔcɛnya mla ɔcɛnyilɔ a?
Ō gwuta ku ɔcɛnya mla ɔcɛnyilɔ wɛ ɛhi ŋma ɛgiyi Ujehofa. Ó tine ku ɔcɛnya mla ɔcɛnyilɔ nōo wɛ ɔba mla ɔnyā kéē jɔɔnyɛ nu tɔha. Ɛhi nyā i gáā ya kéē ma ayi foofunu ŋ, amáŋ ó klla géē jɛga lɛ uwa kéē mafu ihɔtu lɛ iyi uwa klla jɔɔnyɛ iyi uwa ō ŋma lɛ ɔwɛ nɛ Ɔwɔico dɔka a. Ɔɔma ya ɛɛ nɛ ɛlā Ɔwɔico kahinii: “Ɔnyā nāa lɛ eko nāa wɛ ɔyípōklóbiyā a, kóō he uwɔ ɔtū.” (Aíita 5:18, 19) Ujehofa tine ku ɔba mla ɔnyā ku Ācɛ O Yɛce Ukraist kéē ya uce ɔkwɛyi mla iyi uwa, o ya ɛɛ ku ɔba kóō nyɔ i cikpo ɔnyā ɔhá amāŋ ɔnyā ō nyɔ i gbaja ŋ.—Jé Ācɛ Uhíbru 13:4.
2. Ɔdi wɛ ikpo ɔnyā ɔhá ō ce mla aja ō gbo a?
Ubáyíbu da alɔ ka “ācocikpɔ́nyā [ɔhá mla ācɛ ō gbo aja] . . . í gáā lúgwū kú ajɔ̄ɔ̄cɛ́ kú Ɔwɔico glá ŋ́.” (1 Ācɛ Ukɔ́rīnti 6:9, 10) Ācɛ nōo ta Ubáyíbu ipu uce ku Ugrisii a bi ɛlā néē i hi ka u por·neiʹa a le yuklɔ eko néē yɔ i kɛla lɛyikwu ikpo ɔnyā ɔhá ō ce mla aja ō gbo a. Ɛnyā kē lɛ ō ya mla (1) ō gwuta ku ɔcɛnyilɔ mla ɔcɛnya a nōó wɛ ɔba mla ɔnyā ŋ, (2) acɛnyilɔ nōo gē cikpo acɛnyilɔ, acɛnya nōo gē cikpo acɛnya mla (3) alɛɛcɛ nōo gē cikpo aɛ́bɛ́. Alɔ géē lɛ itene klla ya ku ɔtu kóō he Ujehofa eko duuma nɛ alɔ i “cikpɔ́nyā ɔhá ámāŋ ka o gbajā ŋ́.”—1 Ācɛ Utesaloníka 4:3.
JÉ GƆBU
Leyi má ɔdā nōo géē ta uwɔ abɔ kwu ŋma ikpo ɔnyā ɔhá ō ce mla aja ō gbo mla itene nɛ a géē lɛ ŋma lɛ ō lɛ iyi uwɔ tu yeŋee a.
3. Le kwu ŋma ikpo ɔnyā ɔhá ō ce mla aja ō gbo
Ujosɛfu nōo hayi kpaakpa a ta ō gwuta mla ɔcɛnya éyi nōo dɔka ō gbo aja mla ɔ. Jé Ohútu 39:1-12, cɛɛ ku aa kɔka lɛyikwu aɔka nōo ba nyā:
-
Ɔdi ta Ujosɛfu abɔ kóō kwinya a?—Má ɔgba 9.
-
A gbɛla ka ōmiya olɔhi nɛ Ujosɛfu ya a? Ɔdiya nɛ a ka lɛ a?
Ɛgɛnyá nɛ aɛdrɔ géē gbla Ujosɛfu ya icɛ ŋma lɛ ō kwu ŋma ikpo ɔnyā ɔhá ō ce mla aja ō gbo a? Lɛ UVIDIO nyā mafu.
Ujehofa dɔka ku alɔ le kwu ŋma ikpo ɔnyā ɔhá ō ce mla aja ō gbo. Jé 1 Ācɛ Ukɔ́rīnti 6:18, cɛɛ ku aa kɔka lɛyikwu aɔka nōo ba nyā:
-
Āhɔ̄ ōhī nyá lɔfu cɛ lɛ ɔcɛ gwonu tu ipu ukpa ku ikpo ɔnyā ɔhá ō ce amāŋ aja ō gbo a?
-
Ɛgɛnyá nɛ a géē kwu ŋma ikpo ɔnyā ɔhá ō ce mla aja ō gbo a?
4. A lɔfu ta ojama gla
Ɔdi lɔfu ya kóō lɔnɔ ō ta ojama ku ikpo ɔnyā ɔhá ō ce mla aja ō gbo a? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɔdi nɛ ɔyinɛ alɔ nɔnyilɔ ipu uvidio a ya eko nɛ ó gáā le má ka aɔdā ōhī nɛ ó yɔ i gbɛla lɛyikwu ɔ a lɔfu ya kóō hii hayi kpaakpa lɛ ɔnyā nu gɛ ŋ ma?
Ācɛ O Yɛce Ukraist nōo hayi kpaakpa gē nya mla ɛlá ō gbo obɔbi ekoohi duu. Ɛgɛnyá nɛ a géē habɔ ō yɔ i gbɛla lɛyikwu aɔdā nōó le kpaakpa ŋ ma ta a? Jé Ācɛ Ufílipāyi 4:8, cɛɛ ku aa kɔka lɛyikwu aɔka nōo ba nyā:
-
Aɔdi nɛ a cika ō yɔ i gbɛla lɛyikwu ɔ a?
-
Ɛgɛnyá nɛ Ubáyíbu ō jé mla ō lɛ uklɔ ō yɔ i ya ipu ɛ̄gbā ō gba ku Ujehofa eko doodu géē ta alɔ abɔ ta ojama ō nyɔ i biya íne a?
5. Aíne ku Ujehofa gē tiile lɛ alɔ
Ujehofa jé ɔdā nōo lɔhi lɛ alɔ fiyɛ duu a. Ó da alɔ ɛgɛ nɛ alɔ géē lɛ iyi alɔ tu yeŋee mla itene nɛ alɔ géē lɛ ɔdaŋ ku alɔ ya lɛ a. Jé Aíita 7:7-27 amāŋ lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɛgɛnyá nɛ ɔyipoklobiya nyā gā ipu āhɔ̄ nōo wɛ ojama lɛ ɔ a?—Má Aíita 7:7-9.
-
Ɛgɛ nɛ Aíita 7:23, 26 ka a, ikpo ɔnyā ɔhá ō ce amāŋ aja ō gbo gē bi unwalu nɛhi wa. Ɔdaŋ ku alɔ lɛ iyi alɔ tu yeŋee ŋma aɔdā obɔbi, unwalu ɛyɛɛyɛyi nyá nɛ alɔ i gáā má ŋ ma?
-
Ɛgɛnyá nɛ ō lɛ iyi ɔcɛ tu yeŋee ŋma aɔdā obɔbi géē ta alɔ abɔ jɔɔnyɛ oyeeyi opiyoo a?
Ācɛ ōhī gbɛla ku ɔdā nɛ Ubáyíbu ka lɛyikwu ɔcɛnyilɔ nōo gē ce ikpo ɔcɛnyilɔ mla ɔcɛnya nōo gē ce ikpo ɔcɛnya i mafu ihɔtu ŋ. Amáŋ, Ujehofa nōo wɛ Ɔwɔico ku ihɔtu a dɔka ku alɔ jɔɔnyɛ oyeeyi opiyoo. O ya ɛɛ ku ɛnyā kóō tɔɔtɛ lɛ alɔ a, alɔ cika ō lā oyeeyi nōo cɛtɔha mla ɔwɛ okpaakpa ku nu. Jé 1 Ācɛ Ukɔ́rīnti 6:9-11, cɛɛ ku aa kɔka lɛyikwu ɔka nyā:
-
Oŋma aya ku Ɔwɔico, unwu ku ɔcɛnyilɔ nōo gē ce ikpo ɔcɛnyilɔ mla ɔcɛnya nōo gē ce ikpo ɔcɛnya foofunu wɛ ɛ̄nɛ̄ ō bɔbi a nɛɛ?
O ya ɛɛ ku alɔ ya ɔdā nōo he Ɔwɔico ɔtu a, ɛjɛɛji alɔ cɛgbá ō ya opiyabɔ. Ō ceyitikwu duuma nɛ alɔ ya, o ya ɛɛ ku alɔ ya opiyabɔ a cika jɛ? Jé Aíjē Kú Ɛ̄gbā 19:8, 11, cɛɛ ku aa kɔka lɛyikwu aɔka nōo ba nyā:
-
A gbɛla ka aíne ku Ujehofa le kpaakpa? Ɔdiya nɛ a ka lɛ a?
Ujehofa ta ācɛ alɛwa abɔ kéē lɛyitaajɛ lɛ aíne ku nu ɛ. Ó lɔfu ta uwɔ abɔ gla duu
ĀCƐ ŌHĪ GĒ KA: “Ɔcɛnyilɔ mla ɔcɛnya nōó lɛ iyi uwa ɛ ŋ nōo gē gwuta mla iyi uwa i wɛ ɔdobɔbi ŋ, ɔdaŋ kéē yihɔtu iyi uwa.”
-
Ɔdi nɛ a géē ka a?
ƆDI NƐ A NWU A?
Ɔcɛnyilɔ mla ɔcɛnya ō gwuta mla iyi uwa wɛ ɛhi ŋma ɛgiyi Ujehofa lɛ ɔba mla ɔnyā kéē jɔɔnyɛ nu.
Aɔka ō tu alɔ ɛlá kwu ɔdā nɛ alɔ nwu
-
Ɔdi nɛ ikpo ɔnyā ɔhá ō ce mla aja ō gbo lɛ ō ya mla ɔ a?
-
Ɔdi gáā ta alɔ abɔ ku alɔ hii gwonu tu ipu ojama ku ikpo ɔnyā ɔhá ō ce mla aja ō gbo ŋ ma?
-
Ɛgɛnyá nɛ alɔ gē lɛ itene eko duuma nɛ alɔ yɛce aíne ku Ujehofa a?
JILA ƐLĀ NYĀ MÁ TŌŌTƆ̄Ɔ̄
Nwu ɔdā nōo ya ɛɛ nɛ Ɔwɔico dɔka ku ɔcɛnyilɔ mla ɔcɛnya kéē lɛ iyi uwa lɛ gbɔbu ɛɛ kéē lā tɔha a.
Naana nɛ Ubáyíbu nwu ka ɔcɛnyilɔ nōo gē ce ikpo ɔcɛnyilɔ mla ɔcɛnya nōo gē ce ikpo ɔcɛnya wɛ ɔdobɔbi a, nwu ɔdā nōo ya ɛɛ nɛ alɔ i cika ō wɔtu ācɛ ɛgɔɔma ŋ ma.
“Ɔcɛnyilɔ Nōo Gē Ce Ikpo Ɔcɛnyilɔ Mla Ɔcɛnya Nōo Gē Ce Ikpo Ɔcɛnya Wɛ Ɔdobɔbi Nɛɛ?” (Web article)
Nwu ɛlā lɛyikwu ɛgɛ nɛ íne nɛ Ɔwɔico le kwaajɛ lɛyikwu ɔcɛnya mla ɔcɛnyilɔ ō gwuta mla iyi uwa gē je ogbotu lɛ alɔ a.
Ipu ɔdā nɛ a má ɛ nōo kahinii: “They Treated Me With Dignity,” má ɔdā nōo ta ɔcɛnyilɔ éyi nōo gē cikpo acɛnyilɔ abɔ kóō piya oyeeyi ku nu abɔ o ya ɛɛ kóō ya ɔdā nōo he Ɔwɔico ɔtu a.
a Aɔwɛ ɛyɛɛyɛyi nōó he Ujehofa ɔtu ŋ ma, lɛ ō ya mla ō lɛ ɛga ō tayinu ku ɔcɛ wu ipu okonu ku ɔcɛ ɔhá, ō ce ikpo ku ɔcɛ ŋma ɔkwu, ō hija mla ɛga ō tayinu ku ɔcɛ nōó wɛ ɔba amāŋ ɔnyā alɔ ŋ ɔwɛ ku aja ō gbo.
