ƐLĀ Ō NWU ƆMƐ 31
Ɔdi Wɛ Ajɔɔcɛ Ku Ɔwɔico A?
Ajɔɔcɛ ku Ɔwɔico wɛ ikpɛyi ɛlā ō kpɔcii ku Ubáyíbu a. Ujehofa géē bi Ajɔɔcɛ ku nu ɔɔma le ya ku ɔdā nɛ ó bi ɔtu aflɛyi ɛɛ nɛ ó ya ɛcɛ a kóō le ya jila. Ɔdi kē wɛ Ajɔɔcɛ ku Ɔwɔico a? Ɛgɛnyá nɛ alɔ bi le jé ka Ajɔɔcɛ ku Ɔwɔico gáā kwaajɛ ɛ ma? Ɔdi nōó ya ɛɛ ma? Ɔdi nōó kéē gáā ya ɛcɔbu a? Ɛlā ō nwu nyā mla aɛlā ō nwu ɛpa nōo gboce ɛnyā géē cila ohi ku aɔka nyā.
1. Ɔdi wɛ Ajɔɔcɛ ku Ɔwɔico a, Ɔnyɛ kē gáā wɛ Ɔcɛ́ ku Ajɔɔcɛ ɔɔma?
Ajɔɔcɛ ɔɔma wɛ igɔmɛnti nɛ Ɔwɔico Ujehofa le kwaajɛ. Ujisɔsi nɛ ó wɛ ɔcɛ́ ku Ajɔɔcɛ ɔɔma géē lé ɔcɛ́ ŋma ɔkpanco. (Umátiyu 4:17; Ujɔ́ni 18:36) Ubáyíbu kɛla lɛyikwu Ujisɔsi kahinii: “Ó géē cɔcɛ́ piyóó.” (Ulúku 1:32, 33) Abɔ Ujisɔsi wɛ ɔcɛ́ ku Ajɔɔcɛ ku Ɔwɔico a, ó géē gbo ɛjɛɛji ācɛ nōo lā ipu ɛcɛ a.
2. Anyɛ gáā lé ɔcɛ́ mla Ujisɔsi a?
Ó wɛ Ujisɔsi foofunu gáā lé ɔcɛ́ a ŋ. Ācɛ ŋma “ipɔ́ɔma dóódu, ŋmá ucē dóódu mɛ́mla éwo dóódu mɛ́mla ɛdɔ ācɛ dóódu á . . . kē í cɔcɛ́ ipú ɛcɛ.” (Ɔdā Nēé Mafú Lɛ Ujɔ́ni 5:9, 10) Ācɛ ɛmula gáā lé ɔcɛ́ mla Ukraist a? Abɔ Ujisɔsi wa ipu ɛcɛ nyā, umiliyɔn ku ācɛ kwu piya Ācɛ O Yɛce Ukraist. Ɛjɛɛji uwa géē lé ɔcɛ́ mla ɔ nɛɛ? Ehee. Ācɛ ula ofu igwaahata (144,000) foofunu gáā lé ɔcɛ́ mla Ujisɔsi ɔkpanco a. (Jé Ɔdā Nēé Mafú Lɛ Ujɔ́ni 14:1-4.) Ɛjɛɛji Ācɛ O Yɛce Ukraist ohile nōo yɔ ipu ɛcɛ a géē lā ɛhaajɛ Ajɔɔcɛ ku Ɔwɔico.—Aíjē Kú Ɛ̄gbā 37:29.
3. Ɔdiya nɛ Ajɔɔcɛ ku Ɔwɔico lɔhi fiyɛ igɔmɛnti ku alɛɛcɛ a?
Ɔdaŋ ka ācɛ nōo gē lé ɔcɛ́ a kóō ceyitikwu kéē ya ɔdā olɔhi naana, é gē lɔfu ō ya ɛjɛɛji ɔdā néē dɔka ō ya a ŋ. A jé ŋ, ɔcɛ nōo kē gáā wa i lé ɔcɛ́ igbihi ɔcɛ ɔɔma géē wɛ ɔcɛ nōo gē gbɛla iyi nu foofunu nōó klla dɔka ō ta ācɛ abɔ ŋ. Amáŋ, ɔcɛ duuma i gáā lé ɔcɛ́ igbihi Ujisɔsi nōo wɛ ɔcɛ́ ku Ajɔɔcɛ ku Ɔwɔico a ŋ. Ɔwɔico ku ɔkpanco lɛ “ajɔ̄ɔ̄cɛ ɔhá kwu ajɛ, nɛ̄ ɔ̄cɛ dúúmā í gáā je ɔ́ yíífi glá ŋ́.” (Udánīyɛ̄lu 2:44) Ujisɔsi géē lé ɔcɛ́ ipu oduudu ɛcɛ. Ó kē gáā ya ɔdā olɔhi lɛ ācɛ éyi fiyɛ ācɛ ɔhá ŋ. Ujisɔsi yihɔtu ācɛ, ó gbonɛnɛ, ó klla gē ya ɔdā okpaakpa. Ó géē nwu ācɛ kéē yihɔtu, gbonɛnɛ klla ya ɔdā okpaakpa lɛ ācɛ ɔhá duu.—Jé Ayisáya 11:9.
JÉ GƆBU
Leyi yɛ ɔdā nōo ya ɛɛ nɛ Ajɔɔcɛ ku Ɔwɔico lɔhi fiyɛ igɔmɛnti ku alɛɛcɛ a.
4. Igɔmɛnti olɔfu géē lé ɔcɛ́ ku oduudu ɛcɛ
Ujisɔsi lɔfu ō lé ɔcɛ́ fiyɛ ɛjɛɛji alɛɛcɛ nōo humayi lé ɔcɛ́ ipu ɛcɛ nyā a. Jé Umátiyu 28:18, cɛɛ ku aa kɔka lɛyikwu ɔka nyā:
-
Ɛgɛnyá nɛ íkwu nɛ Ujisɔsi lɛ ō lé ɔcɛ́ a fiyɛ íkwu nɛ alɛɛcɛ lɛ ō lé ɔcɛ́ a?
Ɔcɛ́ ō lé ku alɛɛcɛ gē piyabɔ ŋma eko ta eko, é klla gē lé ɔcɛ́ a aya ōhī ku ɛcɛ a foofunu. Ajɔɔcɛ ku Ɔwɔico i bɛɛ? Jé Udánīyɛ̄lu 7:14, cɛɛ ku aa kɔka lɛyikwu aɔka nōo ba nyā:
-
Ɔdiya ɛɛ nōó wɛ ɔdā olɔhi ō jé ka Ajɔɔcɛ ku Ɔwɔico “ī kē gāa mɛ ŋ́” ma a?
-
Ɔdiya ɛɛ nōó wɛ ɔdā olɔhi ō jé ka Ajɔɔcɛ ku Ɔwɔico géē lé ɔcɛ́ ipu oduudu ɛcɛ a?
5. Ɔcɛ́ ō lé ku alɛɛcɛ géē mɛ
Ɔdiya ɛɛ nɛ Ajɔɔcɛ ku Ɔwɔico cika ō gáā kwɛyi ɔcɛ́ ō lé ku alɛɛcɛ a? Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
nɛ alɛɛcɛ humayi lé ɔcɛ́ a, itene nyá bɛɛcɛ ŋma anu a?
Jé Ɔ̄cokóītá 8:9, cɛɛ ku aa kɔka lɛyikwu aɔka nōo ba nyā:
-
A gbɛla ka Ajɔɔcɛ ku Ɔwɔico cika ō gáā kwɛyi ɔcɛ́ ō lé ku alɛɛcɛ? Ɔdiya nɛ a ka lɛ a?
6. Ajɔɔcɛ ku Ɔwɔico lɛ aɔcɛ́ nōo jé alɔ lɔɔlɔhi
Abɔ ɔcɛ́ ku alɔ nōo wɛ Ujisɔsi a lā ipu ɛcɛ nyā gbɔbu ɛ ma, “ahi nɛ̄ alɔ kwú ā kwú ɔ̄ iyē nɛ̄hi.” (Ācɛ Uhíbru 4:15) Ujehofa lɛ ācɛ ula ofu igwaahata (144,000) nōo wɛ acɛnya mla acɛnyilɔ nōo gáā lé ɔcɛ́ mla Ujisɔsi ɔkpanco a fu ŋma “ipɔ́ɔma dóódu, ŋmá ucē dóódu mɛ́mla ewo dóódu.”—Ɔdā Nēé Mafú Lɛ Ujɔ́ni 5:9.
-
Ó tu uwɔ ɔtu kwu ɔtu ō jé ku Ujisɔsi mla ācɛ nōo gáā lé ɔcɛ́ mla ɔ a jé ɔdā nōó wɛ ō lā oyeeyi ipu ɛcɛ nyā a? Ɔdiya?
Ujehofa lɛ acɛnyilɔ mla acɛnya nōo gáā lé ɔcɛ́ mla Ujisɔsi ɔkpanco a fu ŋma ipɔɔma, uce, éwo mla ɛdɔ ācɛ doodu
7. Ajɔɔcɛ ku Ɔwɔico lɛ aíne nōo lɔhi fiyɛ aku Ajɔɔcɛ ku alɛɛcɛ a
Igɔmɛnti ɛyɛɛyɛyi gē lɛ íne kwaajɛ o ya ɛɛ kóō gbo ācɛ nōo yɔ ɛhaajɛ ku uwa a. Ajɔɔcɛ ku Ɔwɔico lɛ aíne nɛ ācɛ nōo yɔ ɛhaajɛ nu a cika ō le tu duu. Jé 1 Ācɛ Ukɔ́rīnti 6:9-11, cɛɛ ku aa kɔka lɛyikwu aɔka nōo ba nyā:
-
Ɛgɛnyá nɛ a gbɛla ka ɛcɛ nyā géē lɛ, ɔdaŋ ka ɛjɛɛji ācɛ nōo yɔ ipu nu a gē yɛce íne ku Ɔwɔico a? a
-
A gbɛla ka Ujehofa lɛ íkwu ō leyice ka ācɛ nōo gáā yɔ ɛhaajɛ ku Ajɔɔcɛ ku nu kéē lɛyitaajɛ lɛ aíne ku nu? Ɔdiya?
-
Ɔdi mafu ka ācɛ nōó gē lɛyitaajɛ lɛ aíne nyā ŋ ma lɔfu piyabɔ a?—Má ɔgba 11.
Igɔmɛnti ɛyɛɛyɛyi gē lɛ íne kwaajɛ o ya ɛɛ kóō gbo ācɛ nōo yɔ ɛhaajɛ ku uwa a. Ajɔɔcɛ ku Ɔwɔico lɛ aíne nōo lɔhi fiyɛ nɛ ācɛ nōo yɔ ɛhaajɛ nu a cika ō le tu duu
ƆCƐ LƆFU DA ƆKA KA: “Ɔdi wɛ Ajɔɔcɛ ku Ɔwɔico a?”
-
Ɛgɛnyá nɛ a gáā cila ohi a?
ƆDI NƐ A NWU A?
Ajɔɔcɛ ku Ɔwɔico wɛ igɔmɛnti nōo yɔ ɔkpanco nōo géē lé ɔcɛ́ ipu oduudu ɛcɛ nyā.
Aɔka ō tu alɔ ɛlá kwu ɔdā nɛ alɔ nwu
-
Anyɛ gáā lé ɔcɛ́ ka Ajɔɔcɛ ku Ɔwɔico a?
-
Ɛgɛnyá nɛ Ajɔɔcɛ ku Ɔwɔico lɔhi fiyɛ igɔmɛnti ku alɛɛcɛ duuma a?
-
Ɔdi nɛ Ujehofa cɛgbá ŋma ɛgiyi ācɛ nōo gaā yɔ ɛhaajɛ ku Ajɔɔcɛ ku nu a?
JILA ƐLĀ NYĀ MÁ TŌŌTƆ̄Ɔ̄
Leyi yɛ ɛlā nɛ Ujisɔsi nwu lɛyikwu ɛga nɛ Ajɔɔcɛ ku nu gáā yɔ a.
“Ajɔɔcɛ Ku Ɔwɔico Wɛ Ɔdā Nōo Yɔ Ipu Ɔtu Ku Uwɔ Nɛɛ?” (Web article)
Ɔdiya nɛ Ācɛ Ocijali ku Ujehofa gē lɛyitaajɛ lɛ Ajɔɔcɛ ku Ɔwɔico ikɔkɔ aku alɛɛcɛ a?
Leyi yɛ ɛlā nɛ Ubáyíbu ka lɛyikwu ācɛ ula ofu igwaahata (144,000) nɛ Ujehofa fu kéē lé ɔcɛ́ mla Ujisɔsi a.
Ɔdi ta ɛ́nɛ́ éyi nōo yɔ inu agba abɔ kóō miyɛ cɛ ka Ɔwɔico foofunu gáā ya ka odee kóō yɔ i nyɔ ɔwɛ okpaakpa ipu ɛcɛ nyā gla?
“How I Found the Answer to Injustice” (Awake!, November 2011)
