Asiriya wɛ igeli éyi ipu Uninifɛ, ācɛ ku abɔɔ a kē wɛ acobɔbiipu nɛhi. Ujehofa da ɔcomɛɛbɛ Ujona kóō nyɔ gā Uninifɛ gáā pi uwa ahɔ̄ kéē le piyabɔ. Amáŋ Ujona le kwu gā ɛga ɔhá. Ó le yɛ ta ipu ugbeenyi nōo yɔ i nyɔ gā Utasisi, anuɔ ó le kwu a.

Ɛpleeko nɛ ugbeenyi a cɛyi eŋkpɔ yɔ i nyɔ a, owu nɛhi gbɔɔ ō ta nōo ya nɛ ufi lɛ ācɛ ō pɛ ugbeenyi a kwu nɛɛnɛhi. É gbɔɔkɔ lɛ ɔwɔ ku uwa klla da ɔka kahinii: ‘Ɔdiya nɛ ɔdā nyā yɔ i ya a?’ Igbihaajɛ, Ujona da uwa kahinii: ‘Ami ya ɛɛ nɛ ɔdā nyā yɔ i ya a. N yɔ i kwu ŋma ɔdā nɛ Ujehofa da um ku um ya a. Aa lɛ um ta gā ipu isu a, cɛɛ owu nɛhi a i gáā ta gɛ ŋ.’ Ācɛ ō pɛ ugbeenyi a i dɔka ō ta Ujona gā ipu isu a ŋ, amáŋ Ujona gɔbu yɔ i da uwa kéē lɛ anuɔ ta gā ipu isu a. Eko néē lɛ ɔ ta gā ipu isu a, owu nɛhi a i ta gɛ ŋ.

Ujona gbɛla ka ó géē kwū. Abɔ ó yɔ i gā ɛhaajɛ ku eŋkpɔ a tōōtɔ̄ɔ̄ a, ó lɛ ɔkɔ gba lɛ Ujehofa. Ujehofa lɛ ɛbeenyi nɛhi éyi tɛhɔ. Ó kwu Ujona i mlɛ, amáŋ ó ŋmo ɔ ŋ. Oŋma ipu ku ɛbeenyi a, Ujona gbɔɔkɔ kahinii: ‘N cokonu ō lɛyitaajɛ gā uwɔ eko doodu.’ Ujehofa je ogbotu lɛ Ujona ipu ku ɛbeenyi a ɛ̄cī ɛta, anuɔ ó ya ku ɛbeenyi a kóō kwu Ujona i gba tɛɛcɛ okonu isu a.

Ohigbu ka Ujehofa lɛ Ujona hɛta a, ɔɔma wɛ ka Ujona i gáā nyɔ gā Uninifɛ gɛ ŋ nɛɛ? Ehee. Ujehofa le da Ujona kpɔ kóō nyɔ  gā abɔɔ. Igbo ɛnyā, Ujona lɛyitaajɛ. Ó le yɛ gā abɔɔ gáā da acobɔbiipu a kahinii: ‘Ipu ɛ̄cī ofu ɛpa (40), é géē je Uninifɛ cataajɛ.’ Odee nɛ ɔcɛ i leyice ŋ ma gáā le ya​—⁠ācɛ Uninifɛ a jahɔ klla le piyabɔ. Ɔcɛ́ ku ācɛ Uninifɛ a da ācɛ a kahinii: ‘Ɔnyɔɔnyɛ kóō gbɔɔkɔ lɛ Ɔwɔico klla le piyabɔ. Á jé ŋ, ó gáā kpo alɔ yiifi gɛ ŋ.’ Eko nɛ Ujehofa le má ka ācɛ a le piyabɔ a, ó ca Uninifɛ taajɛ gɛ ŋ.

Ujona le cɔnu nɛɛnɛhi ohigbu ka Ujehofa i ca igeli a taajɛ gɛ ŋ. Gbɛla tu ɔ ɛ: Ujehofa humayi gbeyicii mla Ujona klla mafu eyinyinyi lɛ ɔ, amáŋ Ujona i meyinyinyi ācɛ Uninifɛ a ŋ. Ikɔkɔ ɔɔma, ó gáā yaajɛ eyiyɛcɛ ku igeli a ɛhaajɛ obobowu ku ɔcí éyi lɛ okonu ma kwu. Amáŋ ɔcí a gáā gekwu, Ujona kē kwu cɔnu. Ohigbu ɛnyā Ujehofa da ɔ kahinii: ‘A lɛ ɛlá wu ɔcí nyā fiyɛ ācɛ Uninifɛ a. N mafu eyinyinyi lɛ uwa, é kē le hɛta.’ Ɔdi wɛ ɛlā ō nwu a? Ācɛ Uninifɛ a cɛgbá nɛɛnɛhi fiyɛ ɔcí duuma a.