Ɛpleeko nɛ ɔwɔ i ya ŋ ma, Ujehofa da Ɛlayija kahinii: ‘Nyɔ gā Usarefati. Ɔnyokwu éyi yɔ abɔɔ nōo géē je ɔdole gā uwɔ.’ Ɛgiyi ɔwɛ ku iga ku igeli a, Ɛlayija má ɔnyokwu ogbɛha éyi yɔ i kpo ɛfu ba. Ó da ɔ kóó je eŋkpɔ lɛ anuɔ ku anuɔ gwa. Abɔ ó yɔ i nyɔ gáā bi eŋkpɔ wa a, Ɛlayija klla da ɔ kahinii: ‘Kōōcō lɛ igbo bi gē um duu.’ Amáŋ, ɔnyokwu a da ɔ kahinii: ‘Ń lɛ igbo duuma nɛ um géē je gā uwɔ ŋ. N lɛ umu mla anɔ ligii ō le ya ɔdole ku ami mla ɔyi um kóō lé.’ Ɛlayija da ɔ kahinii: ‘Ujehofa cokonu ka ɔdaŋ ku a lɛ igbo ōhī ya gā um, umu mla anɔ ku uwɔ a i gáā mɛ ŋ jaa gbeeko nɛ ɔwɔ gbɔɔ ō ya igbɔha kpɔ.’

Anuɔ ɔnyokwu a le yɛ ta ɔlɛ gáā lɛ igbo ya lɛ ɔcomɛɛbɛ ku Ujehofa a. Ɛgɛ nɛ Ujehofa cokonu lɛ a, ɔnyokwu a mla ɔyi nu lɛ ɔdole ō lé jaa gbeeko nɛ ɔwɔ gbɔɔ ō ya. Umu a i mɛ ŋ ma anɔ a i kē mɛ ŋ duu.

 Ɔdobɔbi éyi gáā le ya. Ɔyi ku ɔnyokwu a gáā gbɔɔ ō doōcē nɛhi, anuɔ ó klla gáā gekwu a. Ó gbɔɔkɔ ta Ɛlayija kóō ta ɔ abɔ. Ɛlayija miyɛ ɔyi a ŋma abɔ nu, anuɔ ó kē kwu ɔ u bi gā ipu inu éyi ku inu ico ku ɔlɛ ɔnyā a. Ó kwu ɔ u gwuta agodo anuɔ ó gbɔɔkɔ kahinii: ‘Ujehofa, kōōcō lɛ ɔyi a heyi.’ A jé ɔdā nōo ya nōó wɛ ɔdā idaago ku Ujehofa kóō ya ɛnyā a? Ohigbu ka oŋma lɛ ɔdā nɛ alɔ jé a, ɔcɛ duuma i heyi ŋma ɔlekwu jeeje ɛ ŋ. Ɔnyokwu nyā mla ɔyi nu nɔnyilɔ a i kóō wɛ ācɛ Isrɛlu ŋ.

Ɔyi a kwu heyi! Ɛlayija da ɔnyokwu a kahinii: ‘Má ɔ! Ɔyi uwɔ a kwu heyi ɛɛ.’ Ó gweeye nɛɛnɛhi anuɔ ó da Ɛlayija kahinii: ‘A wɛ ɔcɛ ku Ɔwɔico ɔkwɔɔkwɛyi. N jé ɛnyā ohigbu ku a gē ka ɔdā nɛ Ujehofa da uwɔ ku a ka a foofunu.’