Ācɛ Isrɛlu nyɛɛ ŋma Ɛfu ku Usinayi gáā bu ajɛ ikpakpla ku Uparan gā ɛga néē hi ka Ukadɛssi a. Abɔɔ a, Ujehofa da Umosisi kahinii: ‘Lɛ ācɛ igwɛɛpa tɛhɔ, ɔcɛ éyi ŋma ipɔɔma doodu, o ya ɛɛ kéē gáā lɛ ajɛ ku Ukenan nɛ um gáā je lɛ ācɛ Isrɛlu a jila má tayinu.’ Umosisi da ācɛ igwɛɛpa nɛ ó fu a kahinii: ‘Aa nyɔ gā Ukenan, cɛɛ ku aa le ajɛ a jila má ɔdaŋ ku ajɛ a lɔhi ō ya ɔdɛhɔ. Ku aa klla má ɔ ɔdaŋ ka é wɛ ācɛ ō kwaahi amāŋ ācɛ nōo lɛ ɔfu, ɔdaŋ ka é lā ipu aklɔkpɛ amāŋ ipu igeli.’ Ācɛ ō jila ajɛ má tayinu igwɛɛpa nɛ Ujossuwa mla Ukalɛbu wɛ ipu uwa a gbɔɔ ō nyɔ gā Ukenan.

Igbihi ɛ̄cī ofu ɛpa (40) a, ācɛ ō jila ajɛ má tayinu a kwu cigbihi, é bi aikpo ku ɔcí ufigi, upɔmegrɛneeti mla ɔcí ɔhá néē hi ka ufayin a. Ācɛ ō jila ajɛ má tayinu a kahinii: ‘Ó wɛ ajɛ olɔhi, amáŋ ācɛ a lɛ ɔfu nɛhi, ɔdɔ ku igeli ku uwa a klla jɛ lico nɛɛnɛhi.’ Anuɔ Ukalɛbu kahinii: ‘Alɔ ya uwa lé gla. Alɔ kpo eko bonu ŋ, alɔ gbɔɔ boobu!’ A jé ɔdā nōo ya nɛ Ukalɛbu ka lɛ a? Ohigbu ka anu mla Ujossuwa kpɔtuce Ujehofa. Amáŋ, ācɛ igwo ɔhá a kahinii: ‘Ehee! Ācɛ nōo ba abɔɔ a gbɛ nɛhi, é lɛbɛɛka aɔbagwu a! Alɔ lɛbɛɛka aikpanga ɛgiyi uwa a.’

Ɔtu le gbenyi lɛ ācɛ Isrɛlu. É gbɔɔ ō ka iŋini gē da iyi uwa kahinii: ‘Alɔ lɛ ɔcɛ ɔhá fu kóō lɛ alɔ kpo cigbihi gā Ijipiti. Ɔdiya nɛ alɔ géē gā ipu ajɛ ɔɔma kéē lɛ alɔ kpo ŋmo a?’ Ujossuwa mla Ukalɛbu kahinii:  ‘Aa hii ya ikpɛyi olɔfu ta Ujehofa ŋ, aa hii yuufi ŋ. Ujehofa géē gbo alɔ.’ Amáŋ, ācɛ Isrɛlu a ta ō jahɔ. É kóō dɔka ō je Ujossuwa mla Ukalɛbu ŋmo!

Ɔdi nɛ Ujehofa ya a? Ujehofa da Umosisi kahinii: ‘Igbihi ɛjɛɛji ɔdā nɛ um ya lɛ ācɛ Isrɛlu a, é lɛyitaajɛ gā um ŋ kpɔ. É géē yɔ ipu igbili amanya ihayi ofu ɛpa (40), amanya néē kē gáā je pɛ kwū a. Ayipɛ ɔlɛ uwa mla Ujossuwa mɛmla Ukalɛbu foofunu gáā nyɔ gā ipu ajɛ nɛ um cokonu ō je lɛ uwa a.’