Umosisi cokonu lɛ Ufero ka anuɔ géē ceyitikwu ya ka anuɔ kóō hii má ɔ gɛ ŋ. Amáŋ, gbɔbu kóō nyɔ a, ó da Ufero kahinii: ‘Ahapotu, ɛjɛɛji ayinɔnyilɔ aflɛyi ku ācɛ Ijipiti, oŋma ɔyinɔnyilɔ aflɛyi ku Ufero jaa gā kwu ɔyinɔnyilɔ aflɛyi ku aɔfiyɛ a géē kwū.’

Ujehofa da ācɛ Isrɛlu ka é lɛ ɛnɛɛnɛ ucɛ lé. Ó kahinii: ‘Aa géē ŋmo ala amáŋ opi nōo wɛ ihayi éyi, cɛɛ aa géē je oyi ku ɛ́bɛ́ a nya ɔcí ku odungwɔwɛ ku aa. Aa géē pa ɛ́bɛ́ a otu ɔɔma klla i je ɔ lé mla igbo nɛ ó gē nu ŋ. Aa lɛ ɛnyɔ ku aa gbo, lɛ ablakpa ku aa kpo wu ikpo ku a le tutu ō nyɔ. Otu ma, n géē hɛ aa ta.’ A gbɛla ka ācɛ Isrɛlu géē gweeye nɛɛnɛhi?

Ahapotu, alelekwu otɛhɔ ku Ujehofa le ta ɔlɛ ku ɛjɛɛji ācɛ Ijipiti. Ɛjɛɛji ɔlɛ nōó lɛ oyi ku ɛ́bɛ́ odungwɔwɛ a ŋ ma, ɔkpla ku uwa gekwu. Alelekwu otɛhɔ a le wu gla ɛjɛɛji ɔlɛ nōo lɛ oyi ku ɛ́bɛ́ a. Ɛjɛɛji apɔlɛ ku ācɛ Ijipiti, kwu ācɛ nōo lɛ ije jaa kwu ācɛ nōó lɛ ije ŋ ma, ɔkpla ku uwa gekwu. Amáŋ, oduuma ku ayi ku Isrɛlu a i kē kwū ŋ.

Ɔyinɔnyilɔ ku Ufero abɔyinu gekwu duu. Ufero i lé ɔtu unwalu a gla gɛ ŋ. Otootu ɔɔma, Ufero da Umosisi mla Arɔni kahinii: ‘Aa le bɛɛcɛ ŋma amanya. Aa nyɔ gáā gba Ɔwɔico ku aa ɛ̄gbā. Aa lɛ aɛ́bɛ́ ku aa kpo ku aa nyɔ!’

 Eko nɛ ɔya gā ɛyi a, ācɛ Isrɛlu lɛ iyi uwa tuba ɛgɛ nɛ apɔlɛ mla uce ku uwa wɛ a, anuɔ é gbɔɔ iyawu ku uwa ŋma Ijipiti a. Acɛnyilɔ ku ācɛ Isrɛlu a wɛ 600,000. É gbaluka acɛnya mla ayipɛ tu uwa ŋ. Ācɛ Ijipiti alɛwa nyɔ mla uwa o ya ɛɛ kéē gba Ujehofa ɛ̄gbā duu. Oŋmɛyi ku nu a, ācɛ Isrɛlu a gáā lɛ onyata lɛ!

O ya ɛɛ ka ācɛ Isrɛlu kéē yɔ i blakwu ɛgɛ nɛ Ujehofa nya uwa ta lɛ a, é géē yɔ i lé ɛnɛɛnɛ ucɛ nyā ihayi doodu. Iye ku ɛnɛɛnɛ ucɛ nyā wɛ Ucɛ Ku Onyata.