Igbihi eŋkpɔ oceenyi a, ayi ku Unowa mla anya uwa ma ayi alɛwa. Apɔlɛ ku uwa kwu lɛwa, é klla gbɔɔ ō nyila gā aya ɛyɛɛyɛyi ku ɛcɛ a ɛgɛ nɛ Ujehofa da uwa a.

Amáŋ, ōhī ku ācɛ apɔlɛ a i lɛyitaajɛ lɛ Ujehofa ŋ. É kahinii: ‘Alɔ le igeli nɛhi gwo lɛ iyi alɔ. Alɔ géē gwo inu ɔda nōo géē lico gáā kwu ɔkpanco. Cɛɛ alɔ lɛ iye lé lɛ iyi alɔ.’

 Ujehofa i gweeye mla ɔdā nɛ ācɛ a yɔ i ya ŋ, ohigbu ɔɔma ó le miya ó lɛ uwa anu ci. A jé ɛgɛ nɛ ó yɔ a? Igbeekponu, ó ya nēé gbɔɔ ō ka uce ɛyɛɛyɛyi. Abɔ é jɛyi ku ɛlā néē yɔ i ka a gɛ ŋ ma, é ma ō gwo ɔlɛ a. Igeli nēé humayi gwo a kwu piya Ubabɛlu, nɛ ɛyi nu wɛ ‘igbaji.’ Ācɛ gbɔɔ ō nyila gā ɛbɛɛbɛ ipu ɛcɛ a. Amáŋ, ācɛ klla gɔbu yɔ i ya ɔdobɔbi ɛga ɛyipɛ néē lā a kpɔ. Amáŋ, ó lɛ ɔcɛ duuma nɛ ó yihɔtu ku Ujehofa eko ɔɔma? Alɔ géē má ɔ ŋma ɛlā ō nwu nōo gboce ɛnyā a.