Ɔcɛ́ ɔhá nɛ Ubabilɔn lɛ a wɛ Udariyɔsi nōo wɛ ɔcɛ ku Umede a. Udariyɔsi le má ka Udaniyɛlu wɛ ɛyɛɛyi gwu ācɛ ohile a ta. Ó kwu Udaniyɛlu i piya otrɛyi ku acɛnyilɔ nōo cɛgbá fiyɛ duu ipu ajɛ a. Acɛnyilɔ nyā gbɔɔ ō mimalanyi ku Udaniyɛlu klla dɔka ō kwu ɔ u ŋmo. É jé ka Udaniyɛlu gē gbɔɔkɔ igbo ɛta ɛ̄cī, ohigbu ɛnyā é da Udariyɔsi kahinii: ‘Agabaidu, alɔ cika ō lɛ íne éyi kwaajɛ ka ɛjɛɛji ācɛ cika ō gbɔɔkɔ lɛ uwɔ ofoofunu. Ɔcɛ duuma nōo ta ō lɛyitaajɛ lɛ íne a, é géē je ɔ tɛcɔ gā ipu ɔgɔ ku aagaba.’ Udariyɔsi dɔka ɛlá ō gbo a, ó kē kwu abɔ i ta ɔkpá kéē kwu íne a u kwaajɛ.

Boobu nɛ Udaniyɛlu le po lɛyikwu íne ɛpɛpɛ a, ó le yɛ gā ɔlɛ nu. Iyɔbu uwindo nōo le nwula, ó kwu okwuukwu i kwaajɛ gbɔɔ ō gbɔɔkɔ lɛ Ujehofa. Acɛnyilɔ nōo yɔ i mimalanyi ku nu a le yɛ gā ɔlɛ nu, anuɔ é má ɔ yɔ i gbɔɔkɔ a. É lɛ inya kwu gā ɛgiyi Udariyɔsi gáā da ɔ kahinii: ‘Udaniyɛlu i lɛyitaajɛ lɛ íne ku uwɔ a ŋ. Ó gē gbɔɔkɔ lɛ Ɔwɔico ku nu igbo ɛta ɛ̄cī doodu.’ Udariyɔsi dɔka Udaniyɛlu nɛɛnɛhi, ó kē dɔka kóō kwū ŋ. Ŋma ɔcɔɔci jaa gbo ɔtu ó yɔ i gbɛla lɛyikwu ɛgɛ nɛ ó gēé hɛ Udanyɛlu ta. Amáŋ ɔcɛ́ a abɔyinu i kóō piya íne nɛ ó lɛ abɔ tu ɔ gbɔbu ɛɛ ma abɔ gla ŋ. Ó lɛ ɔ́da je lɛ aicɔɔja ku nu kéē kwu Udaniyɛlu i tɛcɔ gā ipu ɔgɔ ku aagaba.

 Otu ɔɔma, Udariyɔsi yɔ i junwalu lɛ iyi nu ohigbu Udaniyɛlu nɛɛnɛhi nōó kóō tɔɔtɛ lɛ ɔ ō gbiyɔla ŋ. Ɔcɔɔci, ó lɛ inya kwu gā ɛgiyi ɔgɔ a lɛ ɛgbá dɛ hi Udaniyɛlu kahinii: ‘Ɔwɔico ku uwɔ lɛ uwɔ hɛta a?’

Udariyɔsi lɛ ɔkɛla éyi po. Ɔkɛla ku Udaniyɛlu nɛɛ! Ó ta Udariyɔsi ohi kahinii: ‘Ujehofa lɛ okonu ku aagaba a gwu. É ya um agbe duuma ŋ.’ Udariyɔsi gweeye nɛɛnɛhi! Ó lɛ ɔ́da je kéē lɛ Udaniyɛlu bi wɛɛcɛ ŋma ipu ɔgɔ a. Udaniyɛlu i lɛ agbe duuma iyē ŋ. Anuɔ ɔcɛ́ a gáā lɛ ɔ́da je kahinii: ‘Kwu acɛnyilɔ nōo ce ije ba Udaniyɛlu a i kpo tɛɛcɛ gā ipu ɔgɔ a.’ Eko néē kwu acɛnyilɔ nyā i kpo tɛcɔ gā ipu ɔgɔ a, aagaba a kwu uwa i kpo lé.

Udariyɔsi lɛ ɔ́da je lɛ ācɛ ɔlɛ nu kahinii: ‘Oduudu ācɛ kéē yuufi Ɔwɔico ku Udaniyɛlu. Ó lɛ Udaniyɛlu hɛta ŋma okonu ku aagaba.’

A gē gbɔɔkɔ lɛ Ujehofa ɛ̄cī doodu bɛɛka Udaniyɛlu a?