1-2. Ɔdi nōo yihɔtu ku Ujehofa lɛ ō ya mla ɔ a, ɛgɛnyá nɛ Ujisɔsi kē mafu ɛnyā a?

 UJISƆSI lɛ ɔ teyi peee ɔdā nōo cɛgbá fiyɛ duu ipu Íne nɛ Ɔwɔico je a eko nɛ ó kahinii: “Bī odúúdú odo kú uwɔ, odúúdú ɔtū kú uwɔ mɛ́mla odúúdú ɔfú mɛ́mla ɛlá ō gbo kú uwɔ le yíhɔtū tá Ɔwɔicō.” (Ulúk. 10:27) Ohigbu ɛnyā, alɔ gē yihɔtu ku Ujehofa mla ɛjɛɛji ɔdā nɛ alɔ lɛ a mla ɛjɛɛji ɔdā nɛ alɔ wɛ a. Ɛnyā lɛ ō ya mla unwu ku alɔ, ɛgɛ nɛ ɔtu gē ya alɔ lɛ, mla ɔfu ku alɔ. Ó klla lɛ ō ya mla ɛgɛ nɛ alɔ gē gbɛla a. Ku ɛlā ɔkwɛyi a, alɔ i gáā lɔfu jɛyi ku ɔwɛ nɛ Ujehofa gē gbɛla a duudu gboogboo gla ŋ. Amáŋ alɔ lɔfu jɛyi ku ɛgɛ nɛ Ɔwɔico gē gbɛla a lɔɔlɔhi fiyɛ ŋma lɛ ō klɔcɛ ku “ɔtū kú Óndú” a, ohigbu ka Ujisɔsi gē gbɛla ɔwɛ nɛ Adā nu gē gbɛla a klla gē gbla ɔ ya mɛɛlɛ.—1 Ukɔ́r. 2:16 mla u study note “we do have the mind of Christ.”

² Ujisɔsi yihɔtu ku Ujehofa mla oduudu ɔtu ku nu. Ujisɔsi jé ɔdā nɛ Ɔwɔico dɔka kóō ya a, ó kē lɛ ɔtu ku nu ya ekponu ō ya ɔ naana nɛ ó jé ka ō ya ɔɔma géē ya kóō má owe a. Ohigbu ka Ujisɔsi lɛ ɔtu ku nu kwu ō ya ɔdā nōo géē cɛ lɛ Adā nu gweeye a, ó jɛga lɛ ɔdā duuma ɔhá kóō kwu piya ɔdā ocɛgbá fiyɛ duu ipu oyeeyi ku nu ŋ.

3. Ɔdi nɛ ɔyikpo Upita nwu ŋma ɛgiyi Ujisɔsi a, ɔdi nɛ Upita kē ta Ācɛ O Yɛce Ukraist ɔmpa nu ɔtu kwu ɔtu kéē ya a? (1 Upíta 4:1)

 ³ Upita mla acotɛhɔ ɔhá a lɛ ɛnɛɛnɛ ɛga ō bi eko alɛwa le yɔ tɔha mla Ujisɔsi mla ō nwu ɛlā lɛyikwu ɛgɛ nɛ ó gē gbɛla a. Eko nɛ Upita ta ɔkpá aflɛyi ku nu mla otabɔ ku alelekwu ihɔ a, ó ta Ācɛ O Yɛce Ukraist ɔtu kwu ɔtu kéē lɛ ɛdɔ uce ō ya ekponu bɛɛka Ukraist a. (Jé 1 Upíta 4:1.) Ipu uce okpɔcii néē bi le ta Ubáyíbu a, eko nɛ Upita ta ɔkpá kahinii: “Aa lɛ iyi aa tutu lɔɔlɔhi” a, ó bi ɛlā éyi yuklɔ nōo kɛla lɛyikwu aicɔɔja nōo lɛ iyi uwa tutu lɔɔlɔhi ku ɛfú ō kpo a. Ohigbu ɛnyā, ɔdaŋ ka Ācɛ O Yɛce Ukraist nwu ō gbɛla ɛgɛ nɛ Ujisɔsi gē gbɛla a, é géē lɛ ɔdā néē cɛgbá ō ya unwu ku ɔdobɔbi lé, mla ō ta ɔdobɔbi duuma nōo yɔ ipu ɛcɛ nyā nɛ Usetan gē lé ɔcɛ́ ikpɛyi ku nu a.—2 Ukɔ́r. 10:​3-5; Āfi. 6:12.

4. Ɔdi nɛ alɔ gáā leyi yɛ ɔ ipu ikpɛyi ɛlā nyā a?

⁴ Ipu ikpɛyi ɛlā nyā, alɔ géē leyi yɛ ɔwɛ nɛ Ujisɔsi gē gbɛla a mla ɛgɛ nɛ alɔ lɔfu ya ɛgbla ku nu a. Alɔ géē nwu ɛlā ŋma ocabɔ ku nu ɛgɛ nɛ alɔ lɔfu (1) ya ɛgbla ku ɔwɛ nɛ Ujehofa gē gbɛla a, nōo géē ta ɛjɛɛji alɔ abɔ ō gbɛla ɔwɛ ekponu a, (2) ō tu iyi alɔ waajɛ, mla (3) ō tu ohilipu ŋma lɛ ō gbolo ce Ujehofa ipu ɔkɔ ō gba.

YA ƐGBLA KU ƆWƐ NƐ UJEHOFA GĒ GBƐLA A

5. Eko éyi lɛ a, ɛgɛnyá nɛ Upita i gbɛla ɛgɛ nɛ Ujehofa gē gbɛla a ŋ ma?

⁵ Leyi yɛ eko éyi nɛ Upita i gbɛla ɛgɛ nɛ Ujehofa gē gbɛla ipu āhɔ̄ ōhī ŋ ma. Ujisɔsi da ayikpo ku nu ka ó géē nyɔ gā Ujerusalɛm ɛga nɛ aotrɛyi ku ɛ̄gbā ō gba a géē kwu ɔ, géē ya ɛlā mla anu ɔwɛ obɔbi, klla géē je ɔ ŋmo a. (Umát. 16:21) Upita jé ka Ujisɔsi wɛ Umɛsayiya néē cokonu ku nu nōo géē wa i nya ācɛ ɔlɛ Ɔwɔico ta a. Ohigbu ɛnyā, ó lɔfu lɔnɔ tu Upita ō kpɔtuce ka Ujehofa géē jɛga kéē lɛ Ujisɔsi ŋmo. (Umát. 16:16) Ohigbu ɛnyā, Upita lɛ Ujisɔsi bi gā ɛkwuba anu ó da ɔ kahinii: “Óndú, Ɔwɔicō tá, ká ɔdā ɛ́gɔ́ɔmā kóō yá uwɔ.” (Umát. 16:22) Ujisɔsi mla Upita i lɛ ocɛtɔha lɛyikwu ɛlā nyā ŋ, ohigbu ka Upita i yɔ i gbɛla ɔwɛ nɛ Ujehofa gē gbɛla a ŋ. 

6. Ɔwɛ nyá nɛ Ujisɔsi mafu ka ó gē gbɛla ɔwɛ nɛ Ujehofa gē gbɛla a?

⁶ Ujisɔsi jé ɛgɛ nɛ Adā nu gē gbɛla a lɔɔlɔhi, ó kē ya ɛgbla ku ɔwɛ nɛ Adā nu gē gbɛla a mɛɛlɛ. Ujisɔsi da Upita kahinii: “Nyɛ̄ɛ̄ ga igbīhi um, Usétan! A wɛ ɔdā o ŋmɔ́ɔwɛ tū um, ohígbū ka ɛlá nɛ̄ a gbo nyā í ŋmá ɛgiyí Ɔwɔicō ŋ́, amáŋ ɛgiyí ɔlɛɛcɛ nɛ.” (Umát. 16:23) Ujisɔsi jé ka o ya ɛɛ kóō lɛ ɔdā nōo wɛ ococɛ ku Ujehofa a ya jila, ó géē cɛgbá ō má owe klla kwū. Ohigbu ɛnyā, Ujisɔsi ta ɛlá ō gbo ku Upita a naana nɛ Upita lɔfu dɔka ō ta ɔ abɔ a. Ŋma ɔdā nōo ya nyā, Upita le nwu ka ó cɛgbá ō gbɛla ɔwɛ nɛ Ɔwɔico gē gbɛla a. Ɛnyā kē wɛ ɛlā ō nwu ocɛgbá nɛhi lɛ ɛjɛɛji alɔ duu.

7. Ɛgɛnyá nɛ Upita mafu igbihaajɛ ka ó dɔka ō piya ɔwɛ nɛ ó gē gbɛla a abɔ, o ya ɛɛ kóō cɛtɔha mla ɔwɛ nɛ Ujehofa gē gbɛla a? (Má ifoto nōo yɔ ku Ɔda Ō Gbaajɛ nyā a.)

⁷ Igbihaajɛ, Upita le mafu ka ó dɔka ō nwu ō gbɛla ɛgɛ nɛ Ujehofa gē gbɛla a. Eko ku Ujehofa le ya ku ācɛ ku éwo doodu kéē gáā wɛ ipu ācɛ ɔlɛ nu. Ɔwɔico le da Upita kóō lɛ ɔna ta lɛ Ukɔniliyɔsi nōo je piya ɔcɛ aflɛyi nōó wɛ ɔcɛ Ujiyu ŋ nōo je piya Ɔcɛ O Yɛce Ukraist a. Ācɛ Ujiyu a i gē lɛ ɔdā duuma ō ya mla ācɛ nōó wɛ ācɛ Ujiyu ŋ ma ŋ, ohigbu ɛnyā Upita cɛgbá ō lɛ ɔwɛ nɛ ó gē gbɛla a piyabɔ o ya ɛɛ kóō lɔfu tɔɔna lɛ ācɛ nōó wɛ ācɛ Ujiyu ŋ ma. Eko nɛ Upita gáā le jé lɛyikwu ɔdā nōo wɛ ɛlá ō gbo ku Ɔwɔico lɛyikwu ācɛ nōó wɛ ācɛ Ujiyu ŋ ma, ó lɛ ɔwɛ nɛ ó gē leyi má ɛlā a piyabɔ. Ohigbu ɛnyā eko nɛ  Ukɔniliyɔsi da Upita kóō wa ɔlɛ nu a, Upita i lɛ “ɔtū ōbɛ́pa ŋ́” le yɛ. (Ācot. 10:​28, 29) Ó lɛ ɔna ta lɛ Ukɔniliyɔsi mla ācɛ apɔlɛ ku nu, é kē lɛ ubatisim ya.—Ācot. 10:​21-23, 34, 35, 44-48.

8. Ɛgɛnyá nɛ alɔ lɔfu mafu ka ɛlá ō gbo ku alɔ cɛtɔha mla ɛlá ō gbo ku Ujehofa a? (1 Upíta 3:8)

⁸ Igbihi nɛ ihayi ōhī le gla a, Upita ta Ācɛ O Yɛce Ukraist ɔmpa nu ɔtu kwu ɔtu kahinii: “Ɛlá ō gbo . . . ku aá cíkā ō wɛ ékpó.” (Jé 1 Upíta 3:8.) Alɔ lɔfu gbɛla ɔwɛ ekponu bɛɛka ayinɛ alɔ a, ɔdaŋ ka alɔ ya ɛgbla ku ɔwɛ nɛ Ujehofa gē gbɛla nɛ alɔ gē nwu ɛlā lɛyikwu ɔ ŋma ipu Ubáyíbu a. Ocabɔ mafu, Ujisɔsi ta ācɛ nōo gē yɛce ɔ a ɔtu kwu ɔtu kéē kwu ɛlā ku Ajɔɔcɛ a i ta aflɛyi ipu oyeeyi ku uwa. (Umát. 6:33) Mla ɛnyā ipu ɔtu, ɔcɛ o tɔɔna ɛlā Ɔwɔico éyi ipu ujɔ ku uwɔ lɔfu miya ō gbɔɔ ō gbɔbu ɔna ō ta amāŋ ō gā ipu uklɔ ō ya lɛ Ujehofa eko doodu ɔwɛ ɔhá. Ikɔkɔ nɛ a géē da ɔ kóō fu ɔwɛ ku oyeeyi ɔhá nōo géē tɔɔtɛ lɛ ɔ fiyɛ a, a lɔfu da ɔ aɛlā olɔhi lɛyikwu ōmiya ku nu a mla ō je otabɔ nɛ ó cɛgbá a lɛ ɔ.

TU IYI UWƆ WAAJƐ

9-10. Ɛgɛnyá nɛ Ujisɔsi mafu ka ó wɛ ɔcɛ o tu iyi nu waajɛ nɛɛnɛhi a?

⁹ Otu gbɔbu ɛɛ kéē ŋmo ɔ a, Ujisɔsi nwu Upita mla acotɛhɔ ɔhá a ɛlā ocɛgbá nɛhi éyi lɛyikwu ō tu iyi ɔcɛ waajɛ. Gbɔbu lɛ eko ɔɔma, Ujisɔsi lɛ Upita mla Ujɔni tɛhɔ kéē lɛ aɔdā ōhī tutu ku ɔdole amoomɛ nɛ Ujisɔsi géē lé mla uwa gbɔbu ɛɛ kóō kwū a. Á jé ŋ, aɔdā ōhī néē lɔfu tutu taajɛ a lɛ ō ya mla ɔgbaŋjɛ mla utɔwɛlu née lɔfu bi le na ikpo ku ācɛ nōo wa a gbɔbu ɛɛ kéē lɛ ɔdole a. Amáŋ ɔnyɛ gáā tu iyi nu waajɛ ō na ikpo ku ācɛ ɔhá a?

¹⁰ Ujisɔsi i pi ɔkwu ajɛ ō yuklɔ nyā ŋ, ó mafu ka ó wɛ ɔcɛ ō tu iyi nu waajɛ nɛɛnɛhi. Ó lɛ aafu ŋ, acotɛhɔ a géē le kpo hidaago ō má Ujisɔsi yɔ i ya ɛdɔ uklɔ nyā nɛ acocɛhɔ gē ya igbalɛwa a. Ujisɔsi kwu awulu ku nu i pla baajɛ, kwu utɔwɛlu éyi gbo ɛnyɔ, lɛ enkpɔ hɛ tu ipu ɔgbaŋjɛ a, anu ó gbɔɔ ō na ikpo ku uwa a. (Ujɔ́n. 13:​4, 5) Ujisɔsi lɛ ikpo ku ɛjɛɛji acotɛhɔ igwɛɛpa ku nu a na. Ɛnyā lɔfu je eko nɛhi. Ó kóō na ikpo ku Ujudasi nōo géē ya ibiyaajɛ tu ɔ a duu. Naana kpɔ a, Ujisɔsi tu iyi nu waajɛ lɛ uklɔ nyā ya kwɛyi. Oŋma ɔɔma, Ujisɔsi gbeyicii lɛ ɛlā ta uwa eyī peee kahinii: “Aá jɛ́yí ɔdā nɛ̄ n yá nyā ā? Aá gē hī um ka, Itíca mɛ́mla Óndú ā. Ɔ́ɔmā le kpaakpa lɛ ā, ohígbū ka ɛ́gɔ́ɔmā nɛ̄ n wɛ á. Ɔ́dāŋ́ ka ó lɛ ā, nɛ̄ ami nōo wɛ Óndú mɛ́mla Itíca kú aá ā, lɛ ikpó kú aá na, ó lɛ ā aá cíkā ō na ikpó kú ɔ́mpa iyī aá.”—Ujɔ́n. 13:​12-14.

11. Ɛgɛnyá nɛ Upita mafu ka ó le nwu ō wɛ ɔcɛ o tu iyi nu waajɛ ɛ ma? (1 Upíta 5:5) (Má ifoto a.)

¹¹ Upita nwu ɛlā ŋma uce kóō tu iyi ɔcɛ waajɛ ku Ujisɔsi a. Igbihi nɛ Ujisɔsi le cigbihi gā ɔkpanco a, Upita lɛ uklɔ idaago éyi ya ŋma lɛ ō je ohɛta lɛ adā éyi nōo wɛ ocikpo ŋma ipu ku ɛ́nɛ́ nu a. (Ācot. 1:​8, 9; 3:​2, 6-8) Ɛwa nɛhi ku ācɛ má uklɔ idaago nyā klla le yɛ jila Upita ta. (Ācot. 3:11) Amáŋ Upita i dɔka ku ācɛ a kéē je owoofu lɛ ɔ ŋ, naana néē bi ɔ jɛ ipu uculo nɛ ācɛ a gē dɔka kéē je owoofu lɛ uwa nɛɛnɛhi a. Ikɔkɔ ɔɔma, ó tu iyi nu waajɛ klla da ācɛ a kéē je owoofu lɛ Ujehofa mla Ujisɔsi ŋma lɛ ō ka kahinii: “Ŋmá le ɔtū okpóce iyē nū, ocɛ̄ɛ̄lā kú Ujísɔ̄si yá nɛ̄ ɔ̄cɛ ā lɔfú iyē, ɛ́gɛ́nɛ̄ odúúdú aá má ɔ̄ nyā á.” (Ācot. 3:​12-16) Aɛlā nɛ Upita bi le yuklɔ ipu ɔkpá éyi nɛ ó ta gē lɛ Ācɛ O Yɛce Ukraist lɛyikwu ɛgbá kóō lɛ uce kóō tu iyi ɔcɛ waajɛ a, lɔfu ta  alɔ ɛlá kwu eko nɛ Ujisɔsi lɛ utɔwɛlu gbo ɛnyɔ ku nu klla na ikpo ku acotɛhɔ ku nu a.—Jé 1 Upíta 5:5.

12. Ɛgɛnyá nɛ alɔ lɔfu lɛbɛɛka Upita klla gɔbu yɔ i ceyitikwu ō wɛ ācɛ o tu iyi alɔ waajɛ a?

¹² Alɔ lɔfu gbla Upita ya ŋma lɛ ō ceyitikwu ō lɛ uce kóō tu iyi ɔcɛ waajɛ. Ō tu iyi alɔ waajɛ i lɛ ō ya mla ɛlā nɛ alɔ gē ka a foofunu ŋ. Ɛlā nɛ Upita bi yuklɔ ō kɛla lɛyikwu ō “tu iyi [ɔcɛ] waajɛ” a, mafu ka ō tu iyi ɔcɛ waajɛ lɛ ō ya mla ɔwɛ nɛ ɔcɛ gē gbɛla lɛyikwu ācɛ ɔhá mla iyi nu a. Alɔ gē ya odee lɛ ācɛ ohigbu ka alɔ yihɔtu ku Ujehofa mla ācɛ ɔhá, ó wɛ ohigbu ka alɔ dɔka ku ācɛ kéē cɛtra alɔ ŋ. Alɔ gē mafu ka alɔ wɛ ācɛ o tu iyi alɔ waajɛ ɔkwɔɔkwɛyi ɔdaŋ ka alɔ gba Ujehofa ɛ̄gbā klla cɛ ayinɛ alɔ ɛhɔ mla eeye, ɔdaŋ nɛ ācɛ ɔhá í kóō má ɔdā nɛ alɔ gē ya a ŋ naana.—Umát. 6:​1-4.

WƐ ƆCƐ O “TU OHILIPU”

13. Ɔdi nōó wɛ ō wɛ ɔcɛ o “tu ohilipu” a?

¹³ Ō wɛ ɔcɛ o “tu ohilipu,” ɔdi nōó lɛ ō ya mla ɔ a? (1 Upít. 4:7 NW) Ɔdaŋ ka alɔ wɛ ācɛ o tu ohilipu, alɔ géē gbɛla lɛyikwu ɛgɛ nɛ Ujehofa gē leyi má ɛlā a eko duuma nɛ alɔ gē  ya ōmiya. Alɔ géē bla ka ɛma nɛ alɔ lɛ mla Ujehofa a wɛ ɔdā ocɛgbá fiyɛ duu ipu oyeeyi ku alɔ a. Alɔ klla géē lɛ abɔ ci ō gbɛla fiyɛ ɔfu lɛyikwu iyi alɔ, klla bi ipu ɔtu ku alɔ i jé ɛjɛɛji odee ŋ. Ɔdaŋ ka alɔ wɛ ācɛ o tu ohilipu, alɔ géē gbolo ce Ujehofa ŋma lɛ ō gbɔɔkɔ lɛ ɔ eko doodu kóō bi alɔ jé ɔwɛ.

14. Eko éyi lɛ a, ɛgɛnyá nɛ Upita ta ō gbolo ce Ujehofa a?

¹⁴ Otu amoomɛ gbɔbu ɛɛ kóō kwū a, Ujisɔsi pi ayikpo ku nu ahɔ̄ kahinii: “Otú mā piíí ā odúúdú aá géē kwu ŋmá ɛgiyí um.” Upita lɛ ɔtu ce iyi nu fiyɛ ɔfu ta ɔ ohi kahinii: “Ɔ́dāŋ ka odúúdú ācɛ le kwu ŋmá ɛgiyí uwɔ, ń gáā kwu gbóógbóō ŋ́!” Otu ɔɔma Ujisɔsi tu ōhī ku ayikpo ku nu ukɔ́ kahinii: “Aá leyī kwɛɛcɛ kú aá kē gbɔ̄ɔkɔ [ojigogo].” (Umát. 26:​31, 33, 41) Upita i bi ukɔ́ ɔɔma le yuklɔ ŋ. Ɔdaŋ nɛ ó gē yɛ i bi ukɔ́ ɔɔma le yuklɔ nɛ, á jé ŋ, ó gē yɛ i lɛ ɔtu lɛ igbihaajɛ ō ka ka anuɔ wɛ ɔyikpo ku Ujisɔsi. Ikɔkɔ ɔɔma, Upita lɛ iho hɛ ka anuɔ i jé Ujisɔsi ŋ, ó kē hijema ku ɛlā ɔɔma nɛɛnɛhi.—Umát. 26:​69-75.

15. Ɛgɛnyá nɛ Ujisɔsi gɔbu mafu ka ó wɛ ɔcɛ o tu ohilipu otu amoomɛ ku oyeeyi ku nu ipu ɛcɛ nyā a?

¹⁵ Ujisɔsi gbolo ce Ujehofa duudu. Naana nɛ Ujisɔsi wɛ ɔcɛ nōo jila iyē a, ó gbɔɔkɔ igbalɛwa otu gbɔbu ɛɛ kóō kwū a. Ɔɔma je ɔtu ō lɛ nɛ ó cɛgbá a lɛ ɔ ō ya ɔdā nɛ Ujehofa dɔka kóō ya a. (Umát. 26:​39, 42, 44; Ujɔ́n. 18:​4, 5) Ó lɛ aafu ŋ, Upita i je mlanyi ka Ujisɔsi gbɔɔkɔ igbalɛwa otu amoomɛ gbɔbu ɛɛ kóō kwū a ŋ.

16. Ɛgɛnyá nɛ Upita mafu igbihaajɛ ka ó kwu piya ɔcɛ o tu ohilipu ɛ ma? (1 Upíta 4:7 NW)

 ¹⁶ Abɔ eko dēē gla a, Upita le nwu ō gbolo ce Ujehofa fiyɛ ipu ɔkɔ ō gba. Ujisɔsi néē heyi ŋma ɔlekwu a cɛ lɛ Upita mla acotɛhɔ ɔhá a jé kpɔcii ka ó géē je alelekwu ihɔ lɛ uwa, o ya ɛɛ kéē lɔfu tɔɔna ku ɔkoolɔhi a. Amáŋ, Ujisɔsi da uwa kéē gbeyi Ujerusalɛm jaa gbeeko nɛ ɔɔma le ya. (Ulúk. 24:49; Ācot. 1:​4, 5) Ɔdi nɛ Upita ya abɔ ó yɔ i gbeyi a? Upita mla Ācɛ O Yɛce Ukraist ɔmpa nu gē “jīla tɔhā ojigógó gē gbɔ̄ɔkɔ mla ɔtū ékpó.” (Ācot. 1:​13, 14) Igbihaajɛ ipu ɔkpá aflɛyi ku nu nɛ ó ta a, Upita ta Ācɛ O Yɛce Ukraist ɔmpa nu ɔtu kwu ɔtu kéē tu ohilipu klla gbolo ce Ujehofa ipu ɔkɔ ō gba. (Jé 1 Upíta 4:7 NW.) Upita kwu piya ɔyinɛ nōo jikoko ipu ɛlā ku Ɔwɔico. Ó kwu piya ɔcɛ nōo tu ohilipu, ɛnyā kē ya kóō tɔɔtɛ lɛ ɔ ō je otabɔ lɛ ayinɛ nu mla ō lɛ ɔfu tu uwa iyē.—Ugal. 2:9.

17. Ɔdi nɛ alɔ cɛgbá ō gɔbu yɔ i ya a? (Má ifoto a.)

¹⁷ O ya ɛɛ ku alɔ wɛ ācɛ o tu ohilipu, alɔ cɛgbá ō yɔ i gbɔɔkɔ lɛ Ujehofa eko doodu. Alɔ jé ka alɔ cɛgbá ō yɔ i gbɔɔkɔ lɛ Ujehofa ku otabɔ, ɔdaŋ nɛ alɔ gbɛla ka ó tɔɔtɛ lɛ alɔ ō ya aɔdā ōhī abɔyi alɔ naana. Ohigbu ɛnyā eko duuma nɛ alɔ lɛ aōmiya ocɛgbá ō ya, alɔ gē gbɔɔkɔ lɛ Ujehofa kóō bi alɔ jé ɔwɛ ŋma lɛ ō lɔtuce ka ó jé ɔdā nōo lɔhi lɛ alɔ fiyɛ duu a.

18. Ɛgɛnyá nɛ alɔ lɔfu piya ɔwɛ nɛ alɔ gē gbɛla a abɔ o ya ɛɛ ku alɔ lɔfu ya ɛgbla ku ɔwɛ nɛ Ujehofa gē gbɛla a lɔɔlɔhi a?

¹⁸ Ó jɛ alɔ eyī nɛɛnɛhi ka Ujehofa lɛ alɔ ya ɔwɛ nɛ alɔ lɔfu ya ɛgbla ku auce ō ya ku nu. (Ohút. 1:26) Ku ɛlā ɔkwɛyi a, alɔ i gáā gbla Ujehofa ya mɛɛlɛ gla ŋ. (Ayis. 55:9) Amáŋ bɛɛka Upita a, alɔ dɔka ō gɔbu yɔ i ceyitikwu ō nwu ō gbɛla ɛgɛ nɛ Ujehofa gē gbɛla a, ō tu iyi alɔ waajɛ, mla ō wɛ ācɛ o tu ohilipu.