1-2. Ɔdiya nɛ ɔtu lɔfu ya alɔ bɛɛka Ujehofa i yɔ i cila ɔkɔ ō gba ku alɔ ŋ ma?

 “AÁ YÁ ɔdā nēe he Óndú ā ɔtū ā, cɛ́ɛ́ kóō je aɔ́dā nēe he aá ɔtū ā lɛ aá.” (Aíjē 37:4) Ɛnyā wɛ ɛnɛɛnɛ okonu ō ce! Amáŋ alɔ cika ō leyice ka Ujehofa géē je ɛjɛɛji ɔdā nɛ alɔ ba ɔ ɛba ku nu a lɛ alɔ boobu nɛɛ? Ɔdiya nōo da ɔ ɔka nyā cɛgbá nɛhi a? Leyi yɛ ocabɔ nyā ɛ. Ɔyinɛ alɔ nɔnya éyi gbɔɔkɔ kéē lɛ ɔ higwu kóō gā Inɔkpa Ku Ācɛ O Tɔɔna Ku Ajɔɔcɛ Ku Ɔwɔico. Amáŋ ihayi alɛwa le gla, é kē hi ɔ igwú ŋ. Ɔyinɛ alɔ nɔnyilɔ éyi gbɔɔkɔ lɛ Ujehofa kóō ta ɔ abɔ le hɛta ŋma ōcē nōo yɔ i da ɔ a, o ya ɛɛ kóō lɔfu ya nwune ipu ujɔ. Amáŋ ōcē ku nu a i mɛ ŋ kpɔ. Ɛ́nɛ́ mla adā éyi nōo wɛ Ācɛ O Yɛce Ukraist gbɔɔkɔ ku ɔyi uwa kóō gɔbu yɔ i gba Ujehofa ɛ̄gbā. Amáŋ ɔyi uwa a gáā le miya ō lɛ abɔ ci ō gba Ujehofa ɛ̄gbā.

² Á jé ŋ, awɔ abɔyi uwɔ lɔfu ba Ujehofa ɛba ku odee ɛ, amáŋ ó cila ɔkɔ ō gba ku uwɔ ɔɔma ɛ ŋ. Ohigbu ɛnyā, a lɔfu gbɛla ka Ujehofa gē cila ɔkɔ ō gba ku ācɛ ɔhá, amáŋ ó gē cila aku uwɔ ŋ. Amāŋ a lɔfu gbɛla, ku á jé ŋ a lɛ ɔdobɔbi éyi ya ɛ. Ɔtu ya ɔyinɛ alɔ nɔnya éyi nōo lé ka u Janice b a lɛ a. Anu mla ɔba nu gbɔɔkɔ lɛ Ujehofa ohigbu ka ó wɛ ɔtu ku uwa kéē yuklɔ ipu Ubɛtɛlu. Ó kahinii: “Alɔ jé kpɔcii ka ó gáā kpo eko bonu gbɔbu ɛɛ kéē hi alɔ igwú ō gáā yuklɔ ipu Ubɛtɛlu ŋ.” Amáŋ ihayi alɛwa le gla, é kē hi uwa igwú ŋ. Janice Kahinii: “Ɔtu biya gā um nɛhi, n klla le gbaji. N gbɔɔ ō gbɛla ɔdaŋ ka um ya ɔdobɔbi duuma. N gbɔɔkɔ nɛɛnɛhi kéē hi alɔ igwú ō gáā yuklɔ ipu Ubɛtɛlu ɛ. Ɔdiya nɛ ó cila ɔkɔ ō gba ku um ɛ ŋ ma?”

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā a?

 ³ Ekoohi, alɔ lɔfu gbɛla ɔdaŋ ka Ujehofa gē jahɔ tu ɔkɔ ō gba ku alɔ. Ācɛ nōo gba Ujehofa ɛ̄gbā kpaakpa eko ikee a gbɛla lɛ a duu ɛ. (Ujób. 30:20; Aíjē 22:2; Uháb. 1:2) Ɔdi lɔfu cɛ gā uwɔ jé kpɔcii ka Ujehofa géē jahɔ tu ɔkɔ ō gba ku uwɔ a? (Aíjē 65:2) Gbɔbu ɛɛ ku alɔ cila ɔka ɔɔma, aflɛyi alɔ géē cɛgbá ō lɛ ohi ku aɔka nōo ba nyā jé: (1) Ɔdi nɛ alɔ lɔfu leyice ŋma ɛgiyi Ujehofa a? (2) Ɔdi nɛ Ujehofa leyice ŋma ɛgiyi alɔ a? (3) Ɔdiya nɛ alɔ cɛgbá ō ya opiyabɔ lɛyikwu aɔdā ōhī nɛ alɔ gē gbɔɔkɔ lɛyikwu ɔ a?

4. Ɛgɛ nɛ ɔkpá ku Ujɛrɛmíya 29:12 ka a, ɔdi nɛ Ujehofa cokonu ka anuɔ géē ya a?

⁴ Ujehofa cokonu ō jahɔ tu ɔkɔ ō gba ku alɔ. (Jé Ujɛrɛmíya 29:12.) Ɔwɔico ku alɔ yihɔtu alɔ ohigbu ku alɔ gē gba ɔ ɛ̄gbā kpaakpa, ohigbu ɛnyā ó géē jahɔ tu ɔkɔ ō gba ku alɔ eko doodu. (Aíjē 10:17; 37:28) Naana kpɔ a, ɔɔma i wɛ ka ó géē je ɛjɛɛji aɔdā nɛ alɔ ba ɔ ɛba ku nu a lɛ alɔ boobu ŋ. Alɔ géē cɛgbá ō gbeyi jaa gbeeko nɛ ɛcɛ ɛyipɛ a gā, gbɔbu ɛɛ kóō ya aɔdā ōhī nɛ alɔ ba ɔ ɛba ku nu a lɛ alɔ.

5. Ɔdi nɛ Ujehofa gē bi ɔtu eko duuma nɛ ó gē jahɔ tu ɔkɔ ō gba ku alɔ a? Lɛ ɔ teyi peee.

⁵ Ujehofa gē bi ɔdā nɛ ó dɔka ō ya a ɔtu eko duuma nɛ ó gē jahɔ tu ɔkɔ ō gba ku alɔ. (Ayis. 55:​8, 9) Ɔdā éyi ŋma ipu aɔdā nɛ ó bi ɔtu ō ya a, wɛ ka ɛjɛɛji ɛcɛ a kóō le mu mla ācɛ nōo gē lɛyitaajɛ lɛ Ɔcɛ́ ō lé ku nu a. Amáŋ Usetan ka ka alɛɛcɛ géē lɛ eeye fiyɛ, ɔdaŋ ka é gē lé ɔcɛ ikpɛyi ku iyi uwa. (Ohút. 3:​1-5) O ya ɛɛ kóō mafu ka ɛlā nɛ Ebilii ka a wɛ ɛkɛmgbɛ a, Ujehofa lɛ ɛga je lɛ alɛɛcɛ kéē lé ɔcɛ́ ikpɛyi ku iyi uwa. Amáŋ, ɔcɛ́ ō lé ku alɛɛcɛ hɛ unwalu alɛwa nɛ alɔ gē má icɛ a taajɛ lɛ alɔ a. (Ɔ̄cok. 8:9) Alɔ jé peee ka Ujehofa i gáā fu ɛjɛɛji unwalu nɛ alɔ gē má a babanya ŋ. Ɔdaŋ ka ó ya ku ɛjɛɛji unwalu nɛ alɔ gē má a kóō mɛ babanya, ācɛ nōó kpɔtuce Ɔwɔico ŋ ma lɔfu gbɛla ka alɛɛcɛ yɔ i ya ku unwalu a kóō mɛ a.

6. Ɔdiya nɛ alɔ cɛgbá ō jé kpɔcii ka Ujehofa géē ya odee ɔwɛ ku ihɔtu mla ɔwɛ okpaakpa eko doodu a?

⁶ Ujehofa lɔfu cila ɔkɔ ō gba ekponu ɔwɛ ɛyɛɛyɛyi. Ocabɔ mafu, eko nɛ Uhɛzɛkiya nōo wɛ Ɔcɛ́ a yɔ i doōcē bɔbi bɔbi a, ó ba Ujehofa ɛba kóō ta ɔ abɔ kóō le hɛta. Ujehofa lɛ ɔkɔ ō gba ɔɔma cila ó lɛ ohɛta lɛ. (2 Aɔ́cɛ́ 20:​1-6) Abɔ ɔhá ku nu, eko nɛ ɔyikpo Upɔlu gbɔɔkɔ lɛ Ujehofa kóō ya ku “ōcē kú ɔkpíye nōo lɔnɔ bɛ̄ɛka ujē ō kwu ācɛ úklɔ́ ā” kóō mɛ a, á jé ŋ nōo wɛ ōcē nōo yɔ i da ɔ a, Ujehofa i ya ku ōcē ɔɔma kóō mɛ ŋ. (2 Ukɔ́r. 12:​7-9) Leyi yɛ ocabɔ ku ɔyikpo Ujɛmisi mla Upita duu ɛ. Uhɛrɔdu nōo wɛ Ɔcɛ́ a yɔ i dɔka ō lɛ uwa ɛplɛɛpa kpo ŋmo. Ujɔ ku Ācɛ O Yɛce a gbɔɔkɔ lɛyikwu Upita, á jé ŋ lɛyikwu Ujɛmisi duu. Naana kpɔ a, é kwu Ujɛmisi i ŋmo, amáŋ alelekwu otɛhɔ éyi kē lɛ Upita nyata. (Ācot. 12:​1-11) Alɔ lɔfu gbɛla kahinii: ‘Ɔdiya nɛ Ujehofa hɛ Upita ta nɛ ó kē hɛ Ujɛmisi ta ŋ ma?’ Ubáyíbu i da alɔ ɔdā nōo ya a ŋ. c Amáŋ odee nɛ alɔ lɔfu jé kpɔcii a, wɛ ka ɔwɛ o ya odee ku Ujehofa le “kpaakpa” eko doodu. (Obla. 32:4) Alɔ kē jé ka Ujehofa yihɔtu ku Upita mla Ujɛmisi nɛɛnɛhi. (Mafú 21:14) Ekoohi, Ujehofa i lɔfu cila ɔkɔ ō gba ku alɔ ɔwɛ nɛ alɔ leyice piii a ŋ. Amáŋ ohigbu ka alɔ jé kpɔcii ka Ujehofa gē ya ɛlā ɔwɛ ku ihɔtu mla ɔwɛ okpaakpa eko doodu a, alɔ i gē ka ifula lɛyikwu ɔwɛ duuma nɛ Ujehofa miya ō bi le cila ɔkɔ ō gba ku alɔ a ŋ.—Ujób. 33:13.

7. Ɔdi nɛ alɔ cika ō lɛ abɔ ci ō ya a, ɔdi kē ya a?

⁷ Alɔ gē ceyitikwu ō lɛ abɔ ci ō miya āhɔ̄ ku  alɔ mla aku ācɛ ɔhá. Ocabɔ mafu, alɔ lɔfu ba Ujehofa ɛba kóō ta alɔ abɔ ɔwɛ éyi, amáŋ alɔ i miyɛ ɔdā nɛ alɔ gbɔɔkɔ ku nu a ŋ. Igbihaajɛ, alɔ gáā le po ka ɔcɛ ɔhá gbɔɔkɔ lɛyikwu ɔdā ekponu ɔɔma, amáŋ Ujehofa lɛ ɔkɔ ō gba ku nu cila. Ɔdā ekponu nyā ya da ɔyinɛ alɔ nɔnya éyi nōo lé ka u Anna a. Ó gbɔɔkɔ ku ɔba nu nōo lé ka u Matthew a kóō le hɛta ŋma ōcē ku ukansa. Ɛpleeko ekponu ɔɔma, ayinɛ nɔnya ɛpa nōo lé ɔnyakwɔcɛ lɛ ɔba nu a yɔ i nya mla ōcē ku ukansa duu. Anna gbɔɔkɔ ŋma ɔtu lɛyikwu Matthew mla ayinɛ nɔnya a. Ayinɛ nɔnya a le hɛta ŋma ōcē ku uwa, amáŋ Matthew gekwu. Ohigbu ɛnyā, Anna gbɔɔ ō da iyi nu ɔka ɔdaŋ ka Ujehofa je otabɔ lɛ ayinɛ nɔnya a kéē lɛ ohɛta a. Ɔdaŋ ka Ujehofa kē je otabɔ lɛ uwa a, ó lɛ a, ɔdiya ɛɛ nɛ ó cila ɔkɔ ō gba ku nu ku ɔba nu kóō le lɔfu iyē ŋ ma? Ku ɛlā ɔkwɛyi a, alɔ i jé ɛgɛ nɛ ayinɛ nɔnya ɛpa a bi le lɛ ohɛta a ŋ. Amáŋ alɔ jé, ka Ujehofa géē ya ku ɛjɛɛji unwalu nɛ alɔ gē má a kóō mɛ, ó kē yɔ i ŋmo ɔ unwu ō je aɔkpa ku nu nōo kwū a heyi ŋma ɔlekwu.—Ujób. 14:15.

8. (a) Ɛgɛ nɛ ɔkpá ku Ayisáya 43:2 ka a, ɛgɛnyá nɛ Ujehofa gē ta alɔ abɔ a? (b) Ɛgɛnyá nɛ ɔkɔ ō gba lɔfu ta alɔ abɔ eko nɛ alɔ yɔ ipu āhɔ̄ olɔnɔ a? (Má uvidio nyā nōo kahinii: Ɔkɔ Ō Gba Gē Ta Alɔ Abɔ Lé Ɔtu.)

⁸ Ujehofa géē je otabɔ lɛ alɔ eko doodu. Abɔ Ujehofa wɛ Adā nōo yihɔtu alɔ a, ó dɔka ku alɔ má owe ŋ. (Ayis. 63:9) Naana kpɔ a, ó gē ci alɔ ŋma ɛjɛɛji unwalu nōo lɔfu ya da alɔ a ŋ, nɛ alɔ lɔfu le gbla itekwu amāŋ ɔla a. (Jé Ayisáya 43:2.) Amáŋ ó cokonu ka anuɔ géē ta alɔ abɔ ō “bu” ipu aunwalu a. Ɛgɛ duuma nɛ unwalu nɛ alɔ yɔ i má babanya a kóō lɛ a, ó géē má ka ó tɔɔtɛ lɛ alɔ eko doodu ō gba ɔ ɛ̄gbā. Ujehofa klla gē je alelekwu ihɔ ku nu nōo lɛ ɔfu nɛhi a lɛ alɔ, o ya ɛɛ kóō ta alɔ abɔ ō lɔtu. (Ulúk. 11:13; Ufíl. 4:13) Ohigbu ɛnyā, alɔ lɔfu lɔtuce kpɔcii ka ó géē je aɔdā nɛ alɔ cɛgbá yiili a lɛ alɔ eko doodu, o ya ɛɛ ku alɔ lɔfu lɔtu mla ō hayi kpaakpa lɛ ɔ. d

9. Ɛgɛnyá nɛ ɔkpá ku Ujɛ́mīsi 1:​6-9 ta alɔ abɔ ō jé ɔdā nōo ya nɛ alɔ cɛgbá ō kpɔtuce Ujehofa ka ó géē ta alɔ abɔ a?

⁹ Ujehofa leyice ku alɔ géē kpɔtuce ɔ. (Uhíb. 11:6) Ekoohi, ɔtu lɔfu ya alɔ ka aunwalu nɛ alɔ gē má a, lɛbɛɛka ɔdɔ ku iga ku igeli nɛhi nōó gáā tɔɔtɛ ō behe gla ŋ ma. Alɔ kóō lɔfu gbɔɔ ō lɛ aafu ɔdaŋ ka Ujehofa géē ta alɔ abɔ. Amáŋ Ubáyíbu cɛ lɛ alɔ jé kpɔcii ka oŋma lɛ ɔfu ka Ɔwɔico, alɔ lɔfu ca “ɔdɔ kú igá kú igelī nɛ̄hi . . . bēhé.” (Aíjē 18:29) Ohigbu ɛnyā, ikɔkɔ nɛ alɔ géē jɛga lɛ aafu ɔɔma kóō jɛ ipu ɔtu ku alɔ a, alɔ cika ō gbɔɔkɔ mla ɔtu okpoce olɔfu mla ō lɔtuce ka Ujehofa géē cila ɔkɔ ō gba ku alɔ a.—Jé Ujɛ́mīsi 1:​6-9.

10. Je ocabɔ mafu ku ɛgɛ nɛ alɔ cɛgbá ō ceyitikwu lɛ, igbihi nɛ alɔ lɛ ɔkɔ gba lɛ Ujehofa ku otabɔ a.

¹⁰ Ujehofa leyice ku alɔ géē ya aya ku alɔ igbihi nɛ alɔ lɛ ɔkɔ gba lɛ ɔ a. Ocabɔ mafu, ɔyinɛ alɔ nɔnyilɔ éyi lɔfu ba Ujehofa ɛba kóō ta ɔ abɔ, kéē jɛga lɛ ɔ ŋma uklɔ o ya ɛɛ kóō lɔfu gā ojileyi nɛhi ku alɔ. Ɛgɛnyá nɛ Ujehofa lɔfu cila ō gba ɔɔma a? Ó lɔfu je ɔtu ō lɛ lɛ ɔyinɛ alɔ ɔɔma kóō gáā ta ɔkpani ku nu. Amáŋ ɔyinɛ alɔ nɔnyilɔ ɔɔma géē cɛgbá ō gā ɛgiyi ɔkpani ku nu kóō ba ɔ ɛba a. Ó kóō géē cɛgbá ō ba ɔ ɛba ɔɔma igbalɛwa. Ó kóō lɔfu ya ōmiya ō yuklɔ eko ɔhá. Ɔdaŋ nōó kē cɛgbá, ó lɔfu cɛ ō miyɛ ɛga ɔɔma néē géē je ije ku ɛ̄cī ɔɔma fu ŋma ipu ije ku nu.

11. Ɔdiya nɛ alɔ cika ō yɔ i gbɔɔkɔ lɛyikwu unwalu ku alɔ a?

¹¹ Ujehofa leyice ku alɔ géē yɔ i gbɔɔkɔ lɛ ɔ lɛyikwu aɔdā nōo ce alɔ ɛgbá nɛhi a. (1 Utes.  5:17) Ŋma ɛlā nɛ Ujisɔsi ka a, ó mafu ka Ujehofa i gáā ya aɔdā ōhi nɛ alɔ ba ɔ ɛba ku nu a lɛ alɔ boobu ŋ. (Ulúk. 11:9) Ohigbu ɛnyā, ɛ̄jɛ̄ kóō hii jɛ alɔ ŋ! Gbɔɔkɔ ŋma ɔtu ku a klla yɔ i ya ɔɔma ojigogo. (Ulúk. 18:​1-7) Ɔdaŋ ku alɔ gɔbu yɔ i ba Ujehofa ɛba ku odee, ó géē mafu ku ɔdā nɛ alɔ yɔ i gbɔɔkɔ lɛyikwu ɔ a cɛgbá lɛ alɔ ɔkwɔɔkwɛyi. Alɔ klla gē mafu ku alɔ lɛ ɔtu okpoce ka ó géē ta alɔ abɔ.

12. (a) Ɔdi wɛ ɔka éyi nɛ alɔ cika ō da iyi alɔ lɛyikwu aɔdā nɛ alɔ gē gbɔɔkɔ lɛyikwu ɔ a, ɔdi kē ya a? (b) Ɛgɛnyá nɛ alɔ lɔfu má ka ɔdā nɛ alɔ gē gbɔɔkɔ lɛyikwu ɔ a mafu ku alɔ lɛ ojilima ce Ujehofa a? (Má ikpati nyā nōo kahinii: “ Aɔdā Nɛ Um Gē Ba Ujehofa Ɛba Ku Nu A Mafu Ku Um Lɛ Ojilima Ce Ɔ?”)

¹² Ɔdaŋ ka Ujehofa i ya ɔdā nɛ alɔ ba ɔ ɛba ku nu ipu ɔkɔ ō gba a ŋ, alɔ lɔfu da iyi alɔ aɔka ɛta nyā. Ɔka aflɛyi a kahinii: ‘Ɔdā okpaakpa a nɛ um yɔ i gbɔɔkɔ ku nu a?’ Igbalɛwa, alɔ gē gbɛla ku alɔ jé ɔdā nōo lɔhi lɛ alɔ fiyɛ duu a. Amáŋ ekoohi, aɔdā nɛ alɔ gē ba Ujehofa ɛba ku nu a i wɛ aɔdā nōo lɔhi lɛ alɔ fiyɛ duu a ŋ. Ɔdaŋ ku alɔ yɔ i gbɔɔkɔ lɛyikwu unwalu éyi nɛ alɔ lɛ a, á jé ŋ, ó lɛ ɔwɛ ɔhá nɛ alɔ lɔfu bu unwalu ɔɔma nōo lɔhi fiyɛ ɔwɛ nɛ alɔ kóō yɔ i leyice a. Ó klla lɔfu wɛ ku aɔdā ōhī nɛ alɔ gē gbɔɔkɔ lɛyikwu ɔ a, i cɛtɔha mla ococɛ ku Ujehofa ŋ. (1 Ujɔ́n. 5:14) Ocabɔ mafu, leyi yɛ ocabɔ ku ɛ́nɛ́ mla adā nɛ alɔ kɛla lɛyikwu ɔ gbɔbu a. É ba Ujehofa ɛba kóō ta ɔyipɛ ɔlɛ uwa abɔ cɛɛ kóō gɔbu yɔ i gba Ujehofa ɛ̄gbā. Ɛnyā lɔfu lɛbɛɛka ɔdā okpaakpa néē ba Ujehofa ɛba ku nu a. Naana kpɔ a, Ujehofa i gáā kwu oduuma ku alɔ abɔfu ō gba ɔ ɛ̄gbā ŋ. Ó dɔka ku ɛjɛɛji alɔ, kwu ayipɛ ɔlɛ a kóō fu ō gba ɔ ɛ̄gbā. (Obla. 10:​12, 13; 30:​19, 20) Ohigbu ɛnyā, ɛ́nɛ́ mla adā a lɔfu ba Ujehofa ɛba kóō ta uwa abɔ, cɛɛ ku ɛlā ku Ujehofa néē gē nwu ɔyi uwa a kóō gā ipu ɔtu ku nu, o ya ɛɛ ku  ɔyipɛ ɔlɛ uwa a kóō lɛ ɔtu ya ekponu ō yihɔtu ku Ujehofa mla ō kwu piya ɔya ku nu.—Aíit. 22:6; Āfi. 6:4.

13. Ɛgɛ nɛ ɔkpá ku Ācɛ Uhíbru 4:16 ka a, eko nyá nɛ Ujehofa gáā ta alɔ abɔ a? Lɛ ɔ teyi peee.

¹³ Ɔka ɔmpa nɛ alɔ lɔfu da iyi alɔ a kahinii: ‘Eko okpaakpa nɛ Ujehofa cika ō cila ɔkɔ ō gba ku um a yɔ a?’ Ɔtu lɔfu ya alɔ ka Ujehofa cika ō lɛ ɔkɔ ō gba ku alɔ cila boobu. Amáŋ ɔkwɛyi a, wɛ ka Ujehofa jé eko kpaakpa nɛ ó lɔfu ta alɔ abɔ a. (Jé Ācɛ Uhíbru 4:16.) Ɔdaŋ ka Ujehofa i ya ɔdā ɔɔma nɛ alɔ ba ɔ ɛba ku nu a boobu ŋ, alɔ lɔfu gbɛla ka ohi ku nu wɛ ‘Ehee.’ Ku ɛlā ɔkwɛyi a, ohi ku nu lɔfu wɛ ‘Eko a i ya ɛɛ ŋ.’ Ocabɔ mafu, gbɛla lɛyikwu ɔyinɛ nɔnyilɔ nɛ alɔ kɛla lɛyikwu ɔ nōo gbɔɔkɔ ku ōcē ku nu kóō mɛ a. Ɔdaŋ ka Ujehofa gē yɛ i lɛ ɔ hɛta ɔwɛ ohidaago, Usetan lɔfu ka ka ɔyinɛ nɔnyilɔ a gɔbu yɔ i gba Ujehofa ɛ̄gbā ohigbu ka Ujehofa lɛ ɔ hɛta. (Ujób. 1:​9-11; 2:4) O ka tu ɔ, Ujehofa lɛ eko miya taajɛ nɛ ó géē ya ku ɛjɛɛji ōcē kóō mɛ. (Ayis. 33:24; Mafú 21:​3, 4) Jaa gbeeko ɔɔma, alɔ i cika ō leyice ka Ujehofa géē hɛ alɔ ta ŋma ōcē ɔwɛ ohidaago ŋ. Ohigbu ɛnyā, ɔyinɛ alɔ nɔnyilɔ a lɔfu ba Ujehofa ɛba kóō je ɔfu mla ɔtu ɛbɔ lɛ ɔ kóō lɔtu ōcē ku nu a, mla ō gɔbu yɔ i gba Ɔwɔico ɛ̄gbā kpaakpa.—Aíjē 29:11.

14. Ɔdi nɛ a nwu ŋma ɔ̄kā ku Janice a?

¹⁴ Gbɛla lɛyikwu ocabɔ ku Janice, nōo gbɔɔkɔ lɛyikwu ō yuklɔ ku Ubɛtɛlu a. Igbihi nɛ ihayi ɛhɔ le gla a, ó gáā le ta ɔ eyī peee ka Ujehofa lɛ ōhī ku ɔkɔ ō gba ku nu cila, amáŋ ɔwɛ ɛyɛɛyi ɔhá nɛ ó kóō leyice ŋ. Ó kahinii: “Ujehofa bi eko ɔɔma le nwu um ɔdā alɛwa, mla ō ta um abɔ ō kwu piya ɛnɛɛnɛ Ɔcɛ O Yɛce Ukraist. Ɔtu nɛ um le ce ɔ a cɛgbá ō lɔfu fiyɛ. N cɛgbá ō ya lɔhi fiyɛ ipu ō klɔcɛ ku abɔyi um. N klla cɛgbá ō nwu ka um lɔfu lɛ eeye ɛga duuma nɛ um yɔ i gba Ujehofa  ɛ̄gbā a.” Igbihaajɛ, é gáā lɛ u Janice mla ɔba nu higwu ō gáā yuklɔ ku ācɛ o leyikwu usɛkut. Ō gbɛla gā igbihi, Janice kahinii: “Ujehofa lɛ ɔkɔ ō gba ku um cila, amáŋ ó wɛ ɔwɛ nɛ um leyice piii a ŋ. Ó je um eko ō gáā jé ka ɔwɛ nɛ Ujehofa bi le cila ɔkɔ ō gba ku um a wɛ ɛnɛɛnɛ ɛhi. Ó wɛ ɔdā nōo jɛ um eyī nɛhi ka um lɛ ɛnɛɛnɛ ɛga ō má ɛgɛ nɛ ó yihɔtu ku um klla gbonɛnɛ nɛhi lɛ a.”

15. Ɔdiya nōó lɔhi ku alɔ gbɔɔkɔ lɛyikwu aɔdā alɛwa ekoohi a? (Má ifoto a.)

¹⁵ Ɔka ɔmɛta nɛ alɔ lɔfu da iyi alɔ a kahinii: ‘N cika ō yɔ i gbɔɔkɔ lɛyikwu ɔdā ɔhá nɛɛ?’ Ó wɛ ɔdā olɔhi ō bi ɔdā okpɔcii éyi ɔtu ō gbɔɔkɔ lɛyikwu ɔ, amáŋ ekoohi ó géē lɔhi fiyɛ ɔdaŋ ku alɔ gbɔɔkɔ lɛyikwu aɔdā alɛwa, o ya ɛɛ ku alɔ lɔfu jé ɔdā nɛ Ujehofa dɔka lɛ alɔ a. Leyi yɛ ocabɔ ku ɔyinɛ alɔ nɔnya nɛ alɔ kɛla lɛyikwu ɔ nōo humayi gbɔɔkɔ, lɛyikwu ō gā Inɔkpa Ku Ācɛ O Tɔɔna Ku Ajɔɔcɛ Ku Ɔwɔico a. Ó dɔka ō gā inɔkpa ɔɔma o ya ɛɛ kóō lɔfu tabɔ ɛga nɛ ɛgbá ku ācɛ o tɔɔna Ɛlā Ɔwɔico yɔ fiyɛ a. Ohigbu ɛnyā, abɔ ó gɔbu yɔ i gbɔɔkɔ kéē hi ɔ igwú ō gā inɔkpa ɔɔma a, ó lɔfu ba Ujehofa ɛba kóō ta ɔ abɔ ō jé ɔwɛ alɛwa ɔhá nɛ ó lɔfu ya nwune lɛ ɔ fiyɛ a. (Ācot. 16:​9, 10) Igbihi nɛ ó lɛ ɔkɔ nyā gba a, ó lɔfu da ɔcɛ o leyikwu usɛkut ku nu ɔka ɔdaŋ ka ujɔ duuma kwu ajaajɛ nōo cɛgbá ācɛ o gbɔbu ɔna ō ta. Amāŋ ó lɔfu ta ɔkpá gā abɔ ku ɛga o yuklɔ ku alɔ, o ya ɛɛ kóō da ɔka ɔdaŋ ka ɛga duuma yɔ nōo cɛgbá ācɛ o tɔɔna ɛlā Ɔwɔico fiyɛ. e

16. Ɔdi nɛ alɔ lɔfu lɔtuce kpɔcii a?

¹⁶ Ɛgɛ nɛ alɔ nwu ɛ ma, alɔ lɔfu lɔtuce kpɔcii ka Ujehofa géē cila ɔkɔ ō gba ku alɔ ɔwɛ ihɔtu mla ɔwɛ okpaakpa a. (Aíjē 4:3; Ayis. 30:18) Ekoohi, Ujehofa i gáā lɔfu cila ɔkɔ ō gba ku alɔ ɔwɛ nɛ alɔ leyice piii a ŋ. Amáŋ Ujehofa géē cila ɔkɔ ō gba ku alɔ a. Ó yihɔtu alɔ nɛhi. Ó kē gáā cigbihi kwu alɔ gboogboo ŋ. (Aíjē 9:10) Ohigbu ɛnyā, gɔbu yɔ i “kpɔ́tūce Ɔwɔicō eko dóódu,” ku a klla gɔbu yɔ i gbɔɔkɔ lɛ ɔ ŋma ɔtu.—Aíjē 62:8.