AYINƐ alɔ nɔnya ɛta lā ipu Indonesia ipu idɔ ligii éyi nōo yɔ u Sangir Besar a. Ipu ihayi ōhī nōo gáā yɛ a, é gē yuklɔ tɔha ɛgiyi eŋkpɔ nɛhi nōo yɔ abɔɔ a. É jé uwa lɔɔlɔhi ka é wɛ ācɛ o yuklɔ ku ɔna ō ta, néē bi le ta ācɛ abɔ ō gáā jɛyi ku Ubáyíbu a. Amáŋ ipu āhɔ̄ ɔɔma, uklɔ ɛyɛɛyi ɔhá néē yɔ i ya a.

É gē nyɔ gā ipu eŋkpɔ a ō gáā kpo ɛcɔ nɛhi nɛhi. Ōhī ku aɛcɔ nyā gē gbɛ bɛɛka ubɔlu a. Cɛɛ é gáā yaajɛ lɛ ɛjɛɛji ɛcɔ a ca nyɛŋɛnyɛŋɛ nōo géē nyɛɛ fiyɛ ayigwu. Igbihi ɔɔma, é lɛ ɔ kpo tu urɔba lɛ ɔ bi gā ɔlɛ néē lā a. Cɛɛ é lɛ ɛcɔ a kpo tu ɛkpa nɛ aumoto géē wa i kpo, cɛɛ é bi uwa le ya ɔwɛ.

Éyi ku ayinɛ nɔnya nyā wɛ u Hulda. Āhɔ̄ ku nu gē jɛga lɛ ɔ kóō yuklɔ nyā fiyɛ ācɛ ohile nōo gē yuklɔ a. Igbalɛwa, ó gē bi ɛjɛɛji ije nɛ ó gē ya a le ya ɛgbá ku ācɛ apɔlɛ ku nu ɛ̄cī doodu. Amáŋ eko nyā, ó dɔka ō gbo ije tu le ya ɔdā ɔhá. Ó dɔka ō lā ɔdā ō le gwo uwaya, o ya ɛɛ kóō lɔfu bi u JW Library^® app le yuklɔ. Hulda jé ka auvidio nōo yɔ ipu app a géē lɔfu ta ɔ abɔ tɔɔna lɛ ācɛ ɔhá, ō bi ɔ le ya oklɔcɛ, mla ō ta ɔ abɔ ō jɛyi ku Ubáyíbu lɔɔlɔhi fiyɛ.

Hulda gē yuklɔ ku ɛcɔ ō ca a eko doodu, o ya ɛɛ kóō ya ɛgbá ku ācɛ apɔlɛ ku nu. Amáŋ ó klla yuklɔ fiyɛ awa ɛpa ɔcɔɔci doodu ipu ɔya éyi ce, gē ca ɛcɔ nɛɛnɛhi nōo lɔfu mu umoto ligii, o ya ɛɛ kóō lɛ ɔdā nɛ ó miya a ya jila. Igbihaajɛ, ó gáā lɛ ije má lɛ ɔdā ō le gwo uwaya lā.

Hulda kahinii: “Naana nɛ ɛ̄jɛ̄ gē jɛ um nɛ um klla gē má ɔnɔ nɛɛnɛhi ŋma ɛcɔ nɛ um gē ca a, ó gboji ŋ, n kwu mlanyi ɛjɛɛji owe mla ɔnɔ nɛ um má a, abɔ ó le tɔɔtɛ gā um ō bi ɔdā ō le gwo uwaya ɛpɛpɛ nyā le ta iyi um abɔ, ō ya lɔhi fiyɛ ipu uklɔ ku ɔna ō ta, mla ō le ya otutu ku aōjila ku ujɔ a.” Ó klla ka ka ɔdā ō le gwo uwaya nyā ta ɔ abɔ, eko nɛ ōcē ku Corona nōo tu ipu oduudu ɛcɛ a gbɔɔ, abɔ é gbɔɔ ō ya ɛjɛɛji ōjila ku ujɔ o bu ipu zoom a. Alɔ gweeye mla Hulda nɛhi ka ó lɛ ɔdā nɛ ó miya a ya jila.