1-2. (a) Ɛgɛnyá nɛ ɔtu gē ya Ujehofa lɛyikwu ācɛ nōo biya íne nɛhi klla ta ō piyabɔ a? (b) Ɔdi nɛ Ujehofa dɔka ku ācɛ nōo biya íne a kéē ya a?

 UJEHOFA i gē cɛ mla ɛdɔ ku uce ō ya doodu ŋ. Ó gē wɔtu íne ō biya. (Aíjē 5:​4-6) Ujehofa leyice ku alɔ lɛyitaajɛ lɛ aíne ku nu nōo yɔ ipu Ubáyíbu a. Amáŋ Ujehofa jé ku alɔ i jila iyē ŋ, ohigbu ɛnyā alɔ i gáā lɛyitaajɛ lɛ ɔ mɛɛlɛ gla ŋ. (Aíjē 130:​3, 4) Naana kpɔ a, ó gē cɛ ku ‘ācɛ kéē lɛ abɔ̄ bá ɛhi ku eyīnyinyi kú nu kéē yá ɔdōōbɔ̄bí ŋ.’ (Ujúd 4) Ubáyíbu kɛla lɛyikwu ‘ocataajɛ ku ācɛ nōó jé Ɔwɔico ŋ ma’ ipu ɛfu ku Amagɛdɔn.—2 Upít. 3:7; Mafú 16:16.

² Amáŋ, Ujehofa i dɔka kéē je ɔcɛ duuma yiifi ŋ. Ipu Ɔda Ō Gbaajɛ nyā, alɔ le nwu ɛ ka Ujehofa “tíne ka odúúdú uwā kéē le pīyabɔ̄ ŋmá íne nēé bīya ā.” (2 Upít. 3:9) Bɛɛka Ujehofa a, anyakwɔcɛ ku ujɔ gē gbeyicii eko néē yɔ i ceyitikwu ō ta ɔcɛ nōo biya íne a abɔ kóō le piyabɔ klla tubla Ujehofa ajaajɛ kpɔ a. Amáŋ, ó lɛ ekoohi nɛ ɔcɛ ō biya íne gē ta ō piyabɔ. (Ayis. 6:9) Naana nɛ anyakwɔcɛ ku ujɔ gē ceyitikwu ō tabɔ igbalɛwa a, ācɛ ō biya íne ōhī gē gɔbu ya ɔdobɔbi kpɔ. Ɔdi nɛ anyakwɔcɛ ku ujɔ cika ō ya piii ipu ɛdɔ āhɔ̄ ɛgɔɔma a?

 ‘AÁ LƐ Ɔ̄COBƆ̄BÍIPÚ Ɔ́ƆMA FŪ’

 3. (a) Ɔdi nɛ Ubáyíbu ka ka é cika ō ya ācɛ nōo biya íne nōo ta ō piyabɔ a? (b) Eko nɛ ɔcɛ ta ō piyabɔ, ɔdiya nɛ alɔ lɔfu ka ka ɔcɛ ɔɔma le miya kéē kwu ɔ i fu ŋma ipu ujɔ a?

³ Eko duuma nɛ ɔcɛ ō biya íne ta ō piyabɔ, anyakwɔcɛ ku ujɔ cɛgbá ō yɛce ukɔ́ nōo yɔ ipu ɔkpá ku 1 Ācɛ Ukɔ́rīnti 5:13 a piii nōo kahinii: ‘Aá lɛ ɔ̄cobɔ̄bíipú ɔ́ɔma fū ŋmá ipú aá.’ Ɔcɛ ō biya íne a jé ka ɔdaŋ ka ó piyabɔ ŋ, é géē fu ɔ ŋma ipu ujɔ. Ɛnyā lɛbɛɛka ka ó le miya kéē kwu ɔ i fu ŋma ipu ujɔ a. Ó yɔ i ce ɔdā nɛ ó nyi a. (Ugal. 6:7) Ɔdiya nɛ alɔ lɔfu ka lɛ a? Ohigbu ka ɔcɛ ō biya íne a ta ō piyabɔ naana nɛ anyakwɔcɛ ku ujɔ ceyitikwu igbalɛwa ō ta ɔ abɔ a. (2 Aɔ́cɛ́ 17:​12-15) Oŋma lɛ uce ō ya ku nu, ó le mafu ka ó dɔka ō lɛyitaajɛ lɛ aíne ku Ujehofa ŋ.—Obla. 30:​19, 20.

 4. Ɔdiya néē gē ya ɛlā ō ka tɛɛcɛ eko duuma néē kwu ɔcɛ nōo biya íne nōo ta ō piyabɔ a i fu ŋma ipu ujɔ a?

⁴ Eko duuma néē kwu ɔcɛ ō biya íne nōo ta ō piyabɔ a i fu ŋma ipu ujɔ, é gē ya ɛlā ō ka tɛɛcɛ éyi ō da ujɔ a ka ɔcɛ a i wɛ Ɔcɛ Ocijali ku Ujehofa gɛ ŋ. a É ya ɛlā ō ka tɛɛcɛ a o ya ɛɛ ku uweyi kóō kwu ɔcɛ a ŋ. Ikɔkɔ ɔɔma, é ya ɛlā ō ka tɛɛcɛ a lɛ ujɔ a o ya ɛɛ ku ayinɛ a kéē lɛyitaajɛ lɛ íne ku Ubáyíbu nōo ku alɔ ‘hii piyatɔha’ mla ɔcɛ ɛgɔɔma ŋ, alɔ “híīī lé tɔ̄há” mla anu ŋ duu. (1 Ukɔ́r. 5:​9-11) Ó lɛ aɔdā olɔhi nōo ya nɛ Ujehofa je íne ɔɔma. Ɔcocɛhɔ Upɔlu ta ɔkpá kahinii: “Ɔdōnīigbō ligii gē yá kú ámú kú igbō dúúdú kóō nū á.” (1 Ukɔ́r. 5:6) Ɔdaŋ ka é lɛ ɔcɛ nōo biya íne nōo ta ō piyabɔ a fu ŋma ipu ujɔ ŋ, ācɛ ɔhá lɔfu gbɛla ka é cɛgbá ō lɛyitaajɛ lɛ aíne ku Ujehofa gɛ ŋ.—Aíit. 13:20; 1 Ukɔ́r. 15:33.

 5. Ɛgɛnyá nɛ alɔ cika ō leyi má ɔcɛ néē fu ŋma ipu ujɔ a, ɔdi kē ya a?

⁵ Eko duuma néē kwu ɔyinɛ duuma i fu ŋma ipu ujɔ, ɛgɛnyá nɛ ɔtu cika ō ya alɔ lɛyikwu ɔcɛ ɔɔma a? Ó wɛ ɔkwɛyi ku alɔ i gē piyatɔha mla ɔ gɛ ŋ, amáŋ alɔ i cika ō leyi má ɔ bɛɛka ɔcɛ nɛ ó lɛ eyiyoce gɛ ŋ. Ikɔkɔ ɔɔma, alɔ cika ō leyi má ɔ bɛɛka ala nōo gebi a. Ɔdaŋ ka ala éyi gebi ŋma ipu aala ohile, ó lɔfu cigbihi gla kpɔ. Bla, ka ɔcɛ ɔɔma lɛ oyeeyi ku nu gwɛɛya lɛ Ujehofa. Ó wɛ ɔdā ō kwiiye ka ó yɔ i lɛ okonu nɛ ó ce ō gɔbu lɛyitaajɛ lɛ Ujehofa a tu ŋ. (Isík. 18:31) Amáŋ, abɔ eko yɔ kpɔ ɛ nɛ Ujehofa klla le tutu ō mafu eyinyinyi a, alɔ leyice ka ɔcɛ ɔɔma géē piyabɔ. Ó lɛ a, ɛgɛnyá nɛ anyakwɔcɛ ku ujɔ lɔfu je otabɔ lɛ ɔcɛ nōo biya íne néē fu ŋma ipu ujɔ a?

ƐGƐ NƐ ANYAKWƆCƐ KU UJƆ GĒ JE OTABƆ LƐ ĀCƐ NÉĒ FU ŊMA IPU UJƆ A

 6. Ɔdi nɛ anyakwɔcɛ ku ujɔ géē ya o ya ɛɛ kéē je otabɔ lɛ ɔcɛ néē fu ŋma ipu ujɔ a?

⁶ Eko néē kwu ɔcɛ i fu ŋma ipu ujɔ, anyakwɔcɛ ku ujɔ gē lɛ abɔ ci ō ceyitikwu je otabɔ lɛ ɔ kóō le cigbihi wa ɛgiyi Ujehofa nɛɛ? Ehee! Eko nɛ anyakwɔcɛ ku ujɔ le da ɔcɛ ka é géē fu ɔ ŋma ipu ujɔ, é klla géē da ɔ ɔdā nɛ ó cɛgbá ō ya piii o ya ɛɛ kóō le cigbihi wa ipu ujɔ a. Amáŋ, anyakwɔcɛ ku ujɔ klla géē ya fiyɛ ɛnyā. Ipu āhɔ̄ alɛwa, é géē da ɔcɛ ō biya íne a ka é géē dɔka ō jila mɛmla ɔ kpɔ igbihi nɛ ɔya ōhī le gla, o ya ɛɛ kéē má ɔdaŋ ka ó lɛ uce ō ya ku nu piyabɔ ɛ. Ɔdaŋ ka ɔcɛ a cɛ ō jila mla anyakwɔcɛ ku ujɔ igbihi nɛ ɔya ōhī le gla, anyakwɔcɛ ku ujɔ a géē ta ɔ ɔtu kwu ɔtu ka ó le piyabɔ. Ɔdaŋ nɛ ó kē ya opiyabɔ ɛpleeko ɔɔma ɛ ŋ, anyakwɔcɛ ku ujɔ a géē ceyitikwu ō jila mɛmla ɔ kpɔ ɛcɔbu o ya ɛɛ kéē ta ɔ ɔtu kwu ɔtu kóō le piyabɔ.

 7. Eko duuma néē kwu ɔcɛ i fu ŋma ipu ujɔ, ɛgɛnyá nɛ anyakwɔcɛ ku ujɔ lɔfu yɛce ocabɔ ku eyinyinyi ku Ujehofa a? (Ujɛrɛmíya 3:12)

 ⁷ Anyakwɔcɛ ku ujɔ gē gbla Ujehofa ya ŋma lɛ ō mafu eyinyinyi lɛ ācɛ néē fu ŋma ipu ujɔ a. Ocabɔ mafu, ikee a Ujehofa i gbeyi ku ācɛ ɔlɛ nu nōo wɛ ācɛ Isrɛlu a kéē ya opiyabɔ gbɔbu ɛɛ kóō ta uwa abɔ ŋ. Ikɔkɔ ɔɔma, ó ta acomɛɛbɛ ku nu ɛhɔ fu uwa gbɔbu ɛɛ kéē ya opiyabɔ. Ikpɛyi ɛlā ɔmpa ku Ɔda Ō Gbaajɛ nyā lɛ ɔ teyi peee ɛgɛ nɛ Ujehofa da Uhosiya ka ó kwu je ya ɔnyā nu ɛhi klla miyɛ ɔ cigbihi wa ɔlɛ naana nɛ ó yɔ i biya íne nɛhi kpɔ a. O bu ɔwɛ ɛgɛnyā, Ujehofa nwu ācɛ ɔlɛ nu ka ó gē meyinyinyi nɛhi. (Uhos. 3:1; Umál. 3:7) Bɛɛka Ujehofa a, anyakwɔcɛ ku ujɔ dɔka ō je otabɔ lɛ ɔcɛ nōo biya íne a kóō le piyabɔ klla kwu cigbihi wa ipu ujɔ a. É kē gáā ya ku ō cigbihi kóō le lɔnɔ tu ɔcɛ a ŋ.—Jé Ujɛrɛmíya 3:12.

 8. Ɛgɛnyá nɛ aciije ku Ujisɔsi ku ɔyi nōo bi a ta alɔ abɔ ō jé ɛgɛ nɛ ɔtu gē ya Ujehofa lɛyikwu ācɛ néē fu ŋma ipu ujɔ a? (Ulúku 15:7)

⁸ Gbɛla lɛyikwu ɛgɛ nɛ adā nōo yɔ ipu aciije ku ɔyi nōo bi a ya ɛlā lɛ a. Boobu nɛ adā a lɛ ɔyinɔnyilɔ ku nu má yɔ i cigbihi wa ɔlɛ a, ó “le inya kwu nyɔ̄ gaá lɛ ɔ́ kwú bá ɔtū lɔɔlɔhi.” (Ulúk. 15:20) Leyi bi ɔ ka adā a i gbeyi ku ɔyinɔnyilɔ ku nu kóō gáā gbɔɔkɔ lɛ ɔ kóō kwu je ya ɔ ɛhi ŋ. Ikɔkɔ ɔɔma, adā a lɛ inya kwu gā ɛgiyi ɔyi nu ohigbu ka ó yihɔtu nu. Ɛgɛnyā nɛ ɔtu gē ya Ujehofa lɛyikwu ācɛ nōo nyɛɛ ŋma ɛgiyi nu a, anyakwɔɛ ku ujɔ kē i ya ɔdā duuma néē ya gla o ya ɛɛ kéē gbla Ujehofa ya. É dɔka ku ācɛ nōo nyɛɛ ŋma ɛgiyi Ujehofa a kéē le cigbihi wa ɛgiyi nu. (Ulúk. 15:​22-24, 32) Eko duuma nɛ ɔcɛ ō biya íne le cigbihi, Ujehofa, Ujisɔsi, aalelekwu otɛhɔ, mla ɛjɛɛji ujɔ a gē gweeye nɛhi!—Jé Ulúku 15:7.

 9. Ɔdi nɛ Ujehofa ta ācɛ ō biya íne ɔtu kwu ɔtu kéē ya a?

⁹ Alɔ le nwu ɛ ka Ujehofa i gē jɛga lɛ ɔcɛ duuma nōo ta ō piyabɔ ŋma íne ō biya ku nu a kóō gɔbu yɔ ipu ujɔ ŋ. Naana kpɔ a, ó gē ceyitikwu ō ta uwa abɔ. Ó dɔka kéē le cigbihi. Eko duuma nɛ ācɛ kē le piyabɔ, má ɛgɛ nɛ ɔtu gē ya Ujehofa lɛyikwu uwa a. Uhosíya 14:4 kahinii: “Óndú ā ka anúɔ géē bī ācɛ ɔlɛ́ anúɔ cīgbīhi wā ɛgiyí anúɔ. Ó ka anúɔ géē yíihɔtū tú ūwā mla odúúdú ɔtū kú anúɔ. Ó ka anúɔ í klla gáā cɔ̄nū mla uwá ɛ́ɛ́ gɛ ŋ́.” Ohigbu ka anyakwɔcɛ ku ujɔ jé ɛgɛ nɛ ɔtu gē ya Ujehofa lɛ a, é gē leyi kwɛɛcɛ ku ɔdā duuma nōo mafu ka ɔcɛ gbɔɔ ō ya opiyabɔ ɛ. Aɛlā nyā kóō wɛ ɔtu ō tu kwu ɔtu lɛ ɔcɛ duuma nōo nyɛɛ ŋma ɛgiyi Ujehofa ɛ, ka ó yihɔtu nu klla dɔka kóō le cigbihi wa ɛgiyi nu.

10-11. Ɛgɛnyá nɛ anyakwɔcɛ ku ujɔ géē ceyitikwu je otabɔ lɛ ācɛ néē fu ŋma ipu ujɔ gboji ɛ ma?

¹⁰ Ɛgɛnyá nɛ anyakwɔcɛ ku ujɔ gē ceyitikwu ō je otabɔ lɛ ācɛ néē fu ŋma ipu ujɔ, á jé ŋ ŋmiifi ihayi alɛwa nōo gáā yɛ a? Ācɛ ɛgɛnyā lɔfu kwu abɔ i ci ō ya aɔdā nōo ya néē fu uwa ŋma ipu ujɔ a ɛ. Ipu āhɔ̄ ōhī, é kóō lɔfu blakwu ɔdā nōo ya ɛɛ néē fu uwa a gɛ ŋ. Ɛgɛ duuma nɛ āhɔ̄ a kóō lɛ, anyakwɔcɛ ku ujɔ a géē ceyitikwu ō jé ɛga nɛ ācɛ ɛgɛnyā yɔ a kéē nyɔ gáā lɛ uwa má. Ɛpleeko néē nyɔ gáā má uwa a, anyakwɔcɛ ku ujɔ kóō géē da uwa ka é dɔka ō gbɔɔkɔ tɔha mla uwa klla ta uwa ɔtu kwu ɔtu kéē le cigbihi wa ipu ujɔ a. Ó wɛ ɔkwɛyi ka ɔdaŋ ka ɔcɛ nyɛɛ ŋma ipu ujɔ a ihayi alɛwa ɛ, ó géē cɛgbá ō jé Ujehofa mla aɛlā ɔkwɛyi ku Ubáyíbu a kpɔ. Ohigbu ɛnyā a, ɔdaŋ ka ó ka ka anuɔ dɔka ō cigbihi wa ipu ujɔ a, anyakwɔcɛ ku ujɔ lɔfu ya ōmiya ku ɔcɛ nōo géē ya oklɔcɛ ku Ubáyíbu mla ɔ naana nɛ ó kóō je piya Ɔcɛ Ocijali ɛ ŋ ma. Ipu āhɔ̄  duuma, anyakwɔcɛ ku ujɔ wɛ ācɛ nōo gáā ya ōmiya ku oklɔcɛ ku Ubáyíbu a.

¹¹ Anyakwɔcɛ ku ujɔ gē ceyitikwu ō gbla ɔwɛ nɛ Ujehofa gē mafu eyinyinyi a ya. Ohigbu ɛnyā, ayinɛ a géē dɔka ɛjɛɛji ācɛ nōo nyɛɛ ŋma ɛgiyi Ujehofa ɛ ma klla ta uwa ɔtu kwu ɔtu kéē le cigbihi wa ɛgiyi nu. Boobu nɛ ɔcɛ nōo biya íne a le mafu ka ó lɛ ɛlá ō gbo mla uce ō ya ku nu piyabɔ ɛ, é lɔfu miyɛ ɔ cigbihi gla.—2 Ukɔ́r. 2:​6-8.

12. (a) Āhɔ̄ nyá cɛgbá ku anyakwɔcɛ ku ujɔ kéē leyi kwɛɛcɛ lɔɔlɔhi a? (b) Ɔdiya nɛ ɔtu i cika ō ya alɔ ka ó lɛ ācɛ ō biya íne ōhī nɛ Ujehofa i gáā meyinyinyi ku uwa gboogboo ŋ ma? (Má ɛlā néē ta ɛhaajɛ ku upeji a.)

¹² Amáŋ, ó lɛ āhɔ̄ ōhī nɛ anyakwɔcɛ ku ujɔ cɛgbá ō leyi kwɛɛcɛ lɔɔlɔhi gbɔbu ɛɛ kéē miyɛ ɔcɛ ɔɔma cigbihi. Ocabɔ mafu, ɔdaŋ ka  ɔcɛ lɛ ɔyipɛ nɛ̄ŋcɛ́ hɛ baajɛ, amāŋ kwu igbihi i ce kwu ɛ̄gbā ō gba ku Ujehofa, amāŋ bi ɔwɛ ku ula le ya kóō lɛ obatɔha ku nu bi wa oŋmɛyi, á jé ŋ, oŋma lɛ ikpo ɔnyā ɔhá ō ce amāŋ aja ō gbo, anyakwɔcɛ ku ujɔ cɛgbá ō má peee ka ó le piyabɔ ɔkwɔɔkwɛyi ɛ. (Umál. 2:14; 2 Utím. 3:6) É cɛgbá ō gbo ayinɛ nōo yɔ ipu ujɔ a. Amáŋ, alɔ cika ō jé kpɔcii ka Ujehofa géē miyɛ ɔcɛ ō biya íne duuma cigbihi, ɔdaŋ ka ó le piyabɔ ɔkwɔɔkwɛyi klla kwu abɔ i ci uce obɔbi ō ya ku nu. Naana nɛ anyakwɔcɛ ku ujɔ dɔka ō má peee ka ɔcɛ nōo ya odee ɔwɛ obɔbi nɛhi mla ācɛ ɔhá a le piyabɔ ɔkwɔɔkwɛyi a, anyakwɔcɛ ku ujɔ a i cika ō gbɛla ka Ujehofa i gáā mafu eyinyinyi lɛ ɔcɛ ɛgɔɔma gboogboo gla ŋ nɛ ŋ. b—1 Upít. 2:10.

ƆDĀ NƐ UJƆ A LƆFU YA

13. Ɔdi wɛ ɛyɛɛyi ku ɔwɛ nɛ alɔ gē ya ɛlā mla ɔcɛ nɛ anyakwɔcɛ ku ujɔ lɛ itala ya ɔ mla ɔcɛ néē fu ŋma ipu ujɔ a?

¹³ Ɛgɛ nɛ alɔ kɛla lɛyikwu ɔ ipu ikpɛyi ɛlā nōo gáā yɛ a, ekoohi é gē ya ɛlā ō ka tɛɛcɛ ka é lɛ itala ya ɔcɛ ɛ. Ipu ɛdɔ āhɔ̄ ɛgɔɔma, alɔ lɔfu gɔbu piyatɔha mla ɔ kpɔ ohigbu ka ó lɛ ɛlá ō gbo mla uce ō ya ku nu nōo bɔbi a piyabɔ ɛ. (1 Utím. 5:20) Ó wɛ ipu ujɔ a kpɔ, ó kē cɛgbá ɔtu ō tu kwu ɔtu ŋma ɛgiyi ayinɛ o ya ɛɛ kóō gɔbu yɔ i ya ɔdā okpaakpa. (Uhíb. 10:​24, 25) Amáŋ, āhɔ̄ ku ɔcɛ néē fu ŋma ipu ujɔ a wɛ ɛyɛɛyi. Alɔ i ‘gē piyatɔha’ mla ɔcɛ ɔɔma ŋ, alɔ i klla gē “lé tɔ̄há” mla anu ŋ duu.—1 Ukɔ́r. 5:11.

14. Ōmiya nyá nɛ Ɔcɛ O Yɛce Ukraist lɔfu ya eko nɛ ó yɔ i ya ɛlā mla ɔcɛ néē fu ŋma ipu ujɔ a? (Má ifoto a.)

¹⁴ Ukɔ́ nōo yɔ ipu ɔkpá ku 1 Ācɛ Ukɔ́rīnti 5:11 a, wɛ ka alɔ i gáā hi ɔcɛ néē fu ŋma ipu ujɔ ígwu wa ōjila ku ujɔ ŋ amāŋ hokonu tu ɔ ɔdaŋ ka ó gā ŋ nɛɛ? Ehee. Ɔkwɛyi a wɛ kahinii, alɔ i gáā piyatɔha mla ɔ ŋ. Amáŋ ɔdaŋ ka ó wɛ ɔmaapu alɔ amāŋ wɛ ɔcɛ nōo kwu alɔ ajaajɛ gbɔbu ɛɛ néē fu ɔ ŋma ipu ujɔ a, alɔ lɔfu hi ɔ igwú wa ōjila ku ujɔ. Ɔdaŋ ka ɔcɛ a kē gā ōjila, ɛgɛnyá nɛ alɔ cika ō ya ɛlā mla ɔ a? Gbɔbu a, alɔ i gē hokonu tu ɔcɛ ɛgɔɔma ŋ. Amáŋ, eyeeye ku Ācɛ O Yɛce Ukraist cɛgbá ō bi ɔdā nɛ ó jé ŋma ipu Ubáyíbu a le miya ɔdā nɛ ó géē ya. Ɔtu lɔfu ya ācɛ ōhī ō hokonu  tu ɔcɛ a amāŋ ya ɔ omaaba wa ōjila ku ujɔ a. Amáŋ, alɔ i gáā kɔka gboji ajɛ mla ɔcɛ ɔɔma amāŋ lɛ eko taajɛ yɔ i ya aɔdā ɔhá mla anu ŋ.

15. Ɛdɔ ācɛ ō biya íne nyá nɛ ɔkpá ku 2 Ujɔ́ni 9-11 kɛla lɛyikwu uwa a? (Má ikpati nyā nōo kahinii: “ Ujɔni Mla Upɔlu Yɔ I Kɛla Lɛyikwu Ɛdɔ Íne Ō Biya Ekponu Nɛɛ?”)

¹⁵ Ācɛ ōhī lɔfu gbɛla kahinii: ‘Ubáyíbu i ka ka Ɔcɛ Ō Yɛce Ukraist duuma nōo lɛ okonu hɛ tu ɛdɔ ɔcɛ ɛgɛnyā yɔ i piyatɔha mla anu ipu uce obɔbi ō ya ku nu ŋ?’ (Jé 2 Ujɔ́ni 9-11.) Ɛlā nōo yɔ ɔkpá ku 2 Ujɔ́ni 9-11 a yɔ i kɛla lɛyikwu ɔcɛ nōo kwu igbihi i ce kwu ɛ̄gbā ō gba ku Ujehofa, amāŋ ɔcɛ nōo yɔ i ceyitikwu ya ku ācɛ ɔhá kéē ya ɔdā nɛ Ubáyíbu ka ka ó lɔhi ŋ ma. (Mafú 2:20) Amáŋ, ɔdaŋ ka ɔcɛ kwu igbihi i ce kwu ɛ̄gbā ō gba ku Ujehofa amāŋ yɔ i ya ku ɔdobɔbi kóō yɔ i nyila ipu ujɔ, anyakwɔcɛ ku ujɔ i gáā ya ōmiya ō nyɔ gáā má ɔcɛ ɛgɛnyā ŋ. Amáŋ, ó tɔɔtɛ ku ɔcɛ ɛgɔɔma kóō piyabɔ kpɔ. Jaa gbeeko nɛ ɔɔma le ya, alɔ i gáā hokonu tu ɛdɔ ɔcɛ ɛgɔɔma amāŋ hi ɔ igwú wa ōjila ku ujɔ ŋ.

Ō YƐCE OCABƆ KU EYINYINYI KU UJEHOFA

16-17. (a) Ɔdi nɛ Ujehofa dɔka ku ācɛ ō biya íne kéē ya a? (Isíkɛ̄lu 18:32) (b) Ɛgɛnyá nɛ anyakwɔcɛ ku ujɔ lɔfu yuklɔ tɔha mla Ujehofa a?

¹⁶ Ɔdi nɛ alɔ nwu ipu Ɔda Ō Gbaajɛ nyā ɛ ma? Ujehofa i dɔka ku ɔcɛ duuma kóō le yiifi ŋ! (Jé Isíkɛ̄lu 18:32.) Ó dɔka ku ācɛ ō biya íne kéē lɛ ɛma olɔhi lɛ mla ɔ kpɔ. (2 Ukɔ́r. 5:20) Ɔɔma ya ɛɛ nɛ Ujehofa gē je ɔtu ō tu kwu ɔtu lɛ ācɛ nōo gē gba ɔ ɛ̄gbā amáŋ nōo nyɛɛ ŋma ɛgiyi nu a, kéē le piyabɔ klla kwu cigbihi wa ɛgiyi nu a. Anyakwɔcɛ ku ujɔ gē yuklɔ tɔha mla Ujehofa ō je otabɔ lɛ ācɛ nōo biya íne nɛhi a kéē le piyabɔ.—Uróm 2:4; 1 Ukɔ́r. 3:9.

¹⁷ Eeye nɛhi gē yɔ ɔkpanco eko duuma nɛ ɔcɛ ō biya íne le piyabɔ! Ujehofa Adā alɔ nōo yɔ ɔkpanco a gē gweeye nɛhi eko duuma nɛ eyí ku aala ku nu nōo bi a le cigbihi wa ipu ujɔ. Ihɔtu nɛ alɔ lɛ lɛ Ujehofa a gē lɔfu tōōtɔ̄ɔ̄ abɔ alɔ yɔ i gbɛla lɛyikwu eyinyinyi mla ogbonɛnɛ ku nu nɛ alɔ i cika jɛ ŋ nɛ ó mafu lɛ alɔ a.—Ulúk. 1:78.