Ayisáya 60:1 kahinii: “Ujerúsālɛm, aá cāŋjɛ, kú aá fíyajɛ bɛ̄ɛka ɛnɔ ā. Eyī ɛ̄yīpɛ̄ kú aá le nyā ɛɛ́. Ɛgahi kú Óndú ā kē yɔ̄ ī fíyájɛ ce aá ɛ́gɛ́nɛ̄ ɔlá gē fíyajɛ ce odée ā.” Igeli ku Ujerusalɛm amāŋ Usayɔn nōo wɛ ɔlɛ ɔtahɛ ku Ujuda ɛpleeko ɔɔma a, kwɛyi ɛjɛɛji éwo ku ācɛ Isrɛlu a. (Ayis. 60:14; 62:​1, 2) Ohigbu ɛnyā, alɔ géē cila ōhi ku aɔka ɛpa lɛyikwu ɛlā nɛ Ayisáya ka ipu ɛga ku Ubáyíbu nyā a: Aflɛyi, eko amāŋ ɛgɛnyá nɛ Ujerusalɛm “cāŋjɛ” klla fiyajɛ bɛɛka ɛnɔ a? Ɔmpa, ɛlā ku Ayisáya a yɔ i ya jila fiyɛ ɛpleeko ku alɔ nyā a?

Eko amāŋ ɛgɛnyá nɛ Ujerusalɛm “cāŋjɛ” klla fiyajɛ bɛɛka ɛnɔ a? Ujerusalɛm mla agbliihɔ a wɛ ō cataajɛ ɛpleeko nɛ ācɛ Ujiyu a wɛ ɔfiyɛ ipu ajɛ ku Ubabilɔn ihayi ofu ɛta ce igwo a. Amáŋ igbihi nɛ ācɛ Umedes mla Upɛsiya miyɛ Ubabilɔn tabɔ a, é lɛ ɛjɛɛji ācɛ ku Isrɛlu nōo yɔ aya ɛyɛɛyɛyi ku Ubabilɔn a hɛta kéē le cigbihi gā ɔlɛ uwa, mla ō lɛ ɛ̄gbā ō gba ku ɔkwɛyi a kwaajɛ kpɔ. (Ɛ́sra 1:​1-4) O gbɔɔ ŋma ihayi ku 537 Gbɔbu Lɛ Eko Ku Ukraist a, ācɛ nōo hayi kpaakpa nōo hile ŋma ipɔɔma igwo ɛpa a le ya lɛ a. (Ayis. 60:4) É gbɔɔ ō gwɛɛya lɛ Ujehofa, gbɔɔ ō ya ucɛ ku onyata, klla gbɔɔ ō gwo agbliihɔ a kpɔ. (Ɛ́sra 3:​1-4, 7-11; 6:​16-22) Ɛgahi ku Ujehofa klla gbɔɔ ō fiyajɛ ipu Ujerusalɛm kpɔ, ɛnyā wɛ ka ó gbɔɔ ō fiyajɛ kla ācɛ ɔlɛ nu. Uwa abɔyi uwa klla kwu piya ɔlá ō fiyajɛ lɛ aéwo nōó jé Ujehofa ŋ ma.

Amáŋ, akacɛ ku Ayisáya a ya jila ligii foofunu ɛpleeko ɔɔma. Ɛyinɛhi ku ācɛ Isrɛlu a i gɔbu ō lɛyitaajɛ lɛ Ɔwɔico ŋ. (Uneh. 13:27; Umál. 1:​6-8; 2:​13, 14; Umát. 15:​7-9) Igbihaajɛ, é kóō ta Umesayiya nōo wɛ Ujisɔsi Ukraist a. (Umát. 27:​1, 2) Ipu ihayi ku 70 Eko Ku Ukraist, é kwu Ujerusalɛm mla agbliihɔ a u cataajɛ igbɔha kpɔ.

Ujehofa le ka taajɛ ka ɛlā nyā géē ya. (Udán. 9:​24-27) Ó teyi peee ka ó wɛ ococɛ ku nu ku Ujerusalɛm ku ɛpleeko ɔɔma a kóō lɛ ɛjɛɛji aakacɛ nōo yɔ ipu ɔkpá ku Ayisáya ɛyi 60 a ya jila ŋ.

Ɛlā ku Ayisaya a yɔ i ya jila fiyɛ? Ii gbóó, amáŋ ɛnyā yɔ i ya jila ɛgiyi “Ujerusalɛm néē kɛla lɛyikwu ico a.” Ɔyikpo Upɔlu ta ɔkpá lɛyikwu ɔ kahinii: “Ujerúsālɛm . . . wɛ ɛ́nɛ́ alɔ á.” (Ugal. 4:26) Ujerusalɛm néē kɛla lɛyikwu ɔ ico a, kwɛyi aya ku ɔwa ku Ɔwɔico nōo yɔ ɔkpanco nōo lɛ ō ya mla aalelekwu otɛhɔ nōo gē lɛyitaajɛ lɛ ɔ a. Ayi nu a wɛ Ujisɔsi mla Ācɛ O Yɛce Ukraist ula ofigwaahata (144,000) néē lɛ anɔ tu uwa ɛyi, nōo lɛ eyiyoce ō gā ɔkpanco bɛɛka ɔyikpo Upɔlu a. Ācɛ O Yɛce Ukraist néē lɛ anɔ tu uwa ɛyi a “wɛ éwo [otiihɔ]”—“Ísrɛ̄lu kú Ɔwɔicō á.”—1 Upít. 2:9; Ugal. 6:16.

Ɛgɛnyá nɛ Ujerusalɛm néē kɛla lɛyikwu ɔ ico a “cāŋjɛ” klla “fiyajɛ bɛ̄ɛka ɛnɔ” a? Ó ya ɛnyā o bu ɔwɛ ku ayi nu néē lɛ anɔ tu uwa ɛyi nōo yɔ ipu ɛcɛ nyā a. Má ɛgɛ nɛ ocabɔ ku uwa tɛɛma kwu ɛlā nōo yɔ ipu ɔkpá ku Ayisáya ɛyi 60 a.

Ācɛ néē lɛ anɔ tu uwa ɛyi a cɛgbá ō “cāŋjɛ” ohigbu ka ó lɛbɛɛka é yɔ ipu ajɛ odobu ɛgɛ nɛ ɔcɛ i kɛla a, eko nɛ ācɛ nōo cigbihi kwu ɛ̄gbā ō gba ku Ujehofa je nyila igbihi nɛ ayikpo a gekwu a. (Umát. 13:​37-43) Ɛpleeko ɔɔma, é gáā yɔ ɛhaajɛ ku Ubabilɔn Nɛhi nōo kwɛyi ɛjɛɛji ɛ̄gbā ō gba ku ɛkɛmgbɛ a. Ācɛ néē lɛ anɔ tu uwa ɛyi a yɔ ɛhaajɛ ku uwa jaa gáā kwu “eko nɛ̄ ɛcɛ í mɛ á,” nōo gbɔɔ ŋma ihayi ku 1914 a. (Umát. 13:​39, 40) Ó gboji ŋ igbihi ɔɔma, ipu ihayi ku 1919, é le hɛta gbɔɔ ō fiyajɛ oŋma lɛ ō gbɔɔ uklɔ ku ɔna ō ta lɛyikwu Ajɔɔcɛ a boobu. a  Ŋmiifi ihayi ɔɔma, ācɛ alɛwa ŋma ipu oduudu ɛcɛ gáā yɔ ipu ɔlā ō fiyajɛ ɔɔma ɛ, kwu ācɛ ohile ku Isrɛlu ku Ɔwɔico nōo wɛ “aɔ́cɛ́” néē kɛla lɛyikwu ɔ ipu ɔkpá ku Ayisáya 60:3 a.—Mafú 5:​9, 10.

Ɛcɔbu, ācɛ néē lɛ anɔ tu uwa ɛyi a géē ya ku ɔlá nōo ŋma ɛgiyi Ujehofa ɔɔma kóō fiyajɛ tōōtɔ̄ɔ̄. Ɛgɛnyá a? Ɔdaŋ néē gekwu ŋma ɛcɛ nyā, é géē gáā wɛ ipu “Ujerúsālɛm Ɛ̄yīpɛ̄” a, amāŋ ɔnyā ku Ukraist nōo wɛ ācɛ ula ofigwaahata (144,000) nōo géē wɛ aɔcɛ́ mla acogwɛɛya a.—Mafú 14:1; 21:​1, 2, 24; 22:​3-5.

Ujerusalɛm Ɛyipɛ a géē yuklɔ ocɛgbá nɛhi ipu ō ya jila ku ɛlā nōo yɔ ipu ɔkpá ku Ayisáya 60:1 a. (Má Ayisáya 60:​1, 3, 5, 11, 19, 20 mla Ɔdā Nēé Mafú Lɛ Ujɔ́ni 21:​2, 9-11, 22-26.) Ɛgɛ nɛ Ujerusalɛm nōo yɔ ipu ɛcɛ nyā a wɛ ɔlɛ ɔtahɛ ku igɔmɛnti ku ācɛ Isrɛlu ku ikee a, ɛgɔɔma nɛ Ujerusalɛm Ɛyipɛ a mla Ukraist gáā je piya igɔmɛnti ku ɛcɛ ɛyipɛ a. Ɛgɛnyá nɛ Ujerusalɛm Ɛyipɛ a “wāajɛ ŋmá ɔkpáncō ɛgiyí Ɔwɔicō” a? Oŋma lɛ ō ya odee nōo lɛ abɔ kwu ɛcɛ a. Ācɛ nōo gē yuufi Ɔwɔico nōo ŋma ipu oduudu ɛcɛ a, “géē lā ipú ofíyajɛ kú ɔlá nōo ŋmá igelī ā.” É kóō gáā biya íne amāŋ kwū ɛ gɛ ŋ. (Mafú 21:​3, 4, 24) Ɔdā nōo gáā bɛɛcɛ ŋma anu a wɛ ka é géē je “aɔ́dā dóódu yá ɛ̄yīpɛ̄,” ɛgɛ nɛ Ayisáya mla acomɛɛbɛ ɔhá ka lɛ a. (Ācot. 3:21) Ō je aɔdā doodu ya ɛyipɛ nyā gbɔɔ ŋma eko nɛ Ukraist je piya Ɔcɛ́ a, ó kē géē ŋmɛyi ɛpleeko ku Ihayi Ula Ɛpa Ce Ofu Igwo nɛ ó gáā lé ɔcɛ́ gáā kwu a.