Nicolas mla u Céline má unwalu ɛyɛɛyi ɔhá. É miyɛ uklɔ ŋma abɔɔ ku ɛga ō yuklɔ ku alɔ nōo yɔ u France a ō nyɔ gā ujɔ ɛyipɛ. É kahinii: “Eko aflɛyi a, alɔ gweeye nɛhi, amáŋ abɔ ku aɔkpa ku alɔ gbɔɔ ō kwu alɔ. Alɔ i pi bla ayinɛ alɔ nōo yɔ ipu ujɔ ɛyipɛ ku alɔ a ajaajɛ ɛ ŋ.” a Ohigbu ka ó lɔfu lɔnɔ a, ɛgɛnyá nɛ a lɔfu lɛ eeye klla ya lɔhi eko duuma nɛ a le yɛ gā ujɔ ɛyipɛ a? Ɔdi nɛ ācɛ ɔhá lɔfu ya ō tabɔ a? Aɔwɛ ɛyɛɛyɛyi nyá nɛ a kē lɔfu je ɔtu ō tu kwu ɔtu lɛ ācɛ ɔhá nōo yɔ ipu ujɔ ɛyipɛ ku uwɔ, ka é klla ta uwɔ ɔtu kwu ɔtu duu a?

AUKƆ́ ƐNƐ NŌO LƆFU TA UWƆ ABƆ KU UJƆ ƐYIPƐ NƐ A YƆ A KÓŌ JÉ UWƆ IYĒ

1. Gbolo ce Ujehofa. (Aíjē 37:5) Kazumi, nōo yɔ u Japan a, nyɛɛ ŋma ujɔ nɛ ó humayi yɔ anu ihayi ofu ɛ ma, eko néē lɛ ɔba nu tɛhɔ gā ɛga ɔhá kóō yuklɔ ku nu a. Ɛgɛnyá nɛ ó “kwú iyī [nu] ú tū Ɔwɔicō abɔ̄” a? Ó kahinii: “Ŋma eko teeko, n gē da Ujehofa lɛyikwu ɛjɛɛji ufi nɛ um lɛ, ɛgɛ nɛ ɔtu gē ya um ku um yɔ foofu um, mla ɔtooplico nɛ um gē lɛ a. Eko duuma nɛ um ya lɛ a, ó gē je ɔfu nɛ um cɛgbá a gā um.”

Ɛgɛnyá nɛ a lɔfu gbolo ce Ujehofa tōōtɔ̄ɔ̄ fiyɛ a? Ɛgɛ nɛ ikpo ɔcí cɛgbá eŋkpɔ mla aɔdā ocɛgbá nōo yɔ ipu ajɛ o ya ɛɛ kóō jɛ a, ɔwɛ ekponu ɔɔma, ɔtu okpoce ku alɔ cɛgbá eŋkpɔ mla aɔdā ocɛgbá ɛgɛ nɛ ɔcɛ i kɛla a, o ya ɛɛ kóō lɔfu iyē tōōtɔ̄ɔ̄. Nicolas nɛ alɔ kɛla lɛyikwu ɔ gbɔbu a gbɛla lɛyikwu ocabɔ ku Ebraham, Ujisɔsi, mla Upɔlu nɛ ɛjɛɛji uwa leyi gwu aɔdā alɛwa bonu, o ya ɛɛ kéē ya ɔdā nōo wɛ ococɛ ku Ɔwɔico a. Ɛnyā kē ya kóō lɔtuce Ujehofa fiyɛ ka ó géē ta ɔ abɔ. Ɔdaŋ ku a gē ya oklɔcɛ  ku Ubáyíbu ojigogo, ɔɔma géē ta uwɔ abɔ ku a lɔtu opiyabɔ duuma nōo ya ipu oyeeyi ku uwɔ, a klla géē nwu aɛlā nɛ a lɔfu bi le je ɔtu ō tu kwu ɔtu lɛ ācɛ ɔhá nōo yɔ ipu ujɔ ɛyipɛ ku uwɔ a.

2. A hii bēē miya ujɔ otɛtɛ ku uwɔ mla ujɔ ɛyipɛ nɛ a yɔ anu a ŋ. (Ɔ̄cok. 7:10) Jules cɛgbá ō ya ku ucolu ɛyipɛ ɔhá kóō jé ɔ iyē eko nɛ ó calɛ ŋma u Benin gā United States a. Ó kahinii: “Ɔtu ya um ka um cɛgbá ō da eyeeye ku ɔcɛ ɛyipɛ duuma nɛ um má a ɔdā doodu lɛyikwu iyi um.” Ohigbu ka ɛnyā wɛ ɛyɛɛyi gwu ɔdā nōo jé ɔ iyē a ta a, ó gbɔɔ ō kwu iyi nu bi ŋma ɛgiyi ayinɛ a. Amáŋ igbihi nɛ ó lɛ eko taajɛ lɛ ayinɛ a jé lɔɔlɔhi a, ɛgɛ nɛ ɔtu gē ya ɔ lɛ a kwu piyabɔ. Ó kahinii: “Babanya n gáā le jé ka ɛga duuma nɛ a yɔ ipu ɛcɛ nyā a, alɛɛcɛ wɛ ekponu. É gē kɛla klla gē ya odee ɔwɛ ɛyɛɛyi foofunu. Ó cɛgbá nɛhi ō jɛga lɛ alɛɛcɛ kéē ya odee ɔwɛ nōo jé uwa iyē a.” Ohigbu ɛnyā, lɛ abɔ ci ō miya ujɔ otɛtɛ ku uwɔ mla ujɔ ɛyipɛ nɛ a yɔ anu a. Ɔyinɛ alɔ nɔnya éyi nōo lé ka Anne-Lise nōo wɛ ɔcɛ o gbɔbu ɔna ō ta a kahinii: “N calɛ gā ɛga ɔhá o ya ɛɛ ku um nwu aɛlā ɛpɛpɛ, ó wɛ ohigbu ka um leyice ku ɛjɛɛji aɔdā nōo yɔ ipu ɔlɛ ɛyipɛ ku um a géē wɛ ekponu yilii ɛgɛ nōó lɛ ipu ɔlɛ otɛtɛ ku um a ŋ.”

Anyakwɔcɛ ku ujɔ cɛgbá ō lɛ abɔ ci ō miya ujɔ otɛtɛ ku uwa mla ujɔ ɛyipɛ ku uwa a duu. Ohigbu ku ayinɛ nōo yɔ ipu ujɔ ɛyipɛ ku uwɔ gē ya odee ɔwɛ ɛyɛɛyi a, i wɛ ka é gē ya odee ɔwɛ nōó kpaakpa eko doodu ŋ nɛ ŋ. Ó géē wɛ ɔdā ijeeyi ō nwu ɛlā fiyɛ lɛyikwu ɔdā nōo wɛ āhɔ̄ ku abɔɔ a, gbɔbu ɛɛ ku a ka ɔtu ku uwɔ lɛyikwu odee. (Ɔ̄cok. 3:​1, 7b) Ó géē lɔhi fiyɛ ō nwu ayinɛ a ɛlā oŋma lɛ ɛnɛɛnɛ ocabɔ ku uwɔ, ikɔkɔ ō kwu uwa abɔfu kéē gbɛla ɔwɛ nɛ a gē ya a.—2 Ukɔ́r. 1:24.

3. Lɛ abɔ bi ɔdā alɛwa ō ya ipu ujɔ ɛyipɛ ku uwɔ a. (Ufíl. 1:27) Naana nōo calɛ gā ɛga ɔhá wɛ uklɔ nɛhi klla gē je eko a, ó cɛgbá nɛhi ku a bēē gā ōjila ku ujɔ ipu ujɔ ɛyipɛ ku uwɔ a, ku a klla bēē nyɔ eyī caa ɔdaŋ ka ó tɔɔtɛ. Ayinɛ nōo yɔ ipu ujɔ ɛyipɛ ku uwɔ a cɛgbá ō má uwɔ eko doodu o ya ɛɛ kéē tubla uwɔ ajaajɛ, mla o ya ɛɛ kóō tɔɔtɛ lɛ uwa ō je otabɔ gā uwɔ. Lucinda, nōo calɛ mla ayinɔnya ku nu ɛpa gā ipu igeli nɛhi éyi nōo yɔ South Africa a kahinii: “Aɔkpa ku um ta um ɔtu kwu ɔtu ō lɛ ɔtu ku um kwu ō tubla ācɛ nōo yɔ ipu ujɔ ɛyipɛ ku um a ajaajɛ, ō yuklɔ mla ācɛ ɔhá ipu uklɔ ku ɔna ō ta, mla ō ta ohi ipu ōjila ku ujɔ. Alɔ klla da ayinɛ a ka é lɔfu jila ɔlɛ alɔ o ya ɛɛ kéē ya ōjila ku uklɔ ku ɔna ō ta.”

Ō “yɔ̄ ī [yuklɔ] tɔ̄há” ipu auklɔ ɛyɛɛyɛyi nōo yɔ ipu ujɔ a mla ayinɛ uwɔ, géē tabɔ ō ya ku awɔ mla ācɛ ɔhá kóō lɔfu iyē tōōtɔ̄ɔ̄.” Anyakwɔcɛ ku ujɔ je ɔtu ō tu kwu ɔtu lɛ u Anne-Lise nɛ alɔ kɛla lɛyikwu ɔ gbɔbu a, kóō ceyitikwu ō bēē gā uklɔ ku ɔna ō ta mla ɛjɛɛji ayinɛ nōo yɔ ipu ujɔ ɛyipɛ ku nu a. Ɔdi bɛɛcɛ ŋma anu a? Ó kahinii: “N gáā le má fiyaa ka ɛnyā wɛ ɔwɛ ɛnɛɛnɛ ō jé ku a wɛ ipu ujɔ a.” Ō fu iyi uwɔ tɛɛcɛ ō ya auklɔ bɛɛka ō nya Agbla Ku Ajɔɔcɛ mla ō tu uwa bi, géē mafu ka babanya a leyi má ujɔ a ka ó wɛ ujɔ ku uwɔ. Abɔ a gē ya aɔdā ɛyɛɛyɛyi nyā tōōtɔ̄ɔ̄ fiyɛ a, ɛgɔɔma nɛ ayinɛ a gáā lɛ ɔtu ogbonɛɛ ō tubla uwɔ ajaajɛ fiyɛ a, ɔtu klla géē ya uwɔ ka ācɛ apɔlɛ ku uwɔ néē wɛ a.

 4. Ya aɔkpa ɛyipɛ. (2 Ukɔ́r. 6:​11-13) Ɔdaŋ ka ācɛ má ku a lɛ ɛlá wu uwa, ó géē tɔɔtɛ fiyɛ ō je piya ɔkpa ku uwa. Ohigbu ɛnyā, lɛ ōmiya ya ō gā Agbla Ku Ajɔɔcɛ gbɔbu ɛɛ ku ōjila kóō gbɔɔ, ku a klla yɔ igbihi nɛ ōjila a le ŋmɛyi, o ya ɛɛ ku a lɛ eko jɛ nɛ a lɔfu kɛla mla ācɛ mla ō jé uwa lɔɔlɔhi fiyɛ. Ceyitikwu ku a jé iye ku uwa. Ɔdaŋ ku a gē blakwu iye ku ācɛ, nɛ a wɛ ɔcɛ néē lɔfu ya ɔkpa mla ɔ, néē klla lɔfu kɛla mla uwɔ ŋma ɔtu gla, é géē dɔka ō jé uwɔ tōōtɔ̄ɔ̄ fiyɛ, aa klla lɔfu je piya ɔkpa olɔhi.

Ikɔkɔ ō yula bɛɛka wɛ ɔcɛ ɛyɛɛyi gwu ɔcɛ nɛ a wɛ ɔkwɔɔkwɛyi a ta o ya ɛɛ ku ācɛ kéē dɔka uwɔ, ya ku aɔkpa ku uwɔ kéē jé ɛdɔ ɔcɛ nɛ a wɛ ɔkwɔɔkwɛyi a. Ohigbu ɛnyā, batɔ ō piyatɔha mla ayinɛ uwɔ ipu Agbla Ku Ajɔɔcɛ, ceyitikwu ku a piyatɔha mla uwa ɔwɛ nɛ aa géē jé iyi aa lɔɔlɔhi fiyɛ. Nwu ɛlā ŋma ɛgiyi u Lucinda nōo kahinii: “Alɔ lɛ aɔkpa nōo kwu alɔ ajaajɛ babanya, ohigbu ku alɔ fu ikpo aflɛyi ō hi ācɛ ɔhá igwú wa ɔlɛ alɔ a.”

“AÁ MĪYƐ Ɔ́MPA AÁ”

Ō gā ipu Agbla Ku Ajɔɔcɛ nōo le mu mla augbɔga lɔfu wɛ ɔdā ō tuufi nɛhi lɛ ācɛ ōhī. Ohigbu ɛnyā, ɛgɛnyá nɛ a lɔfu ya ku āhɔ̄ a kóō tɔɔtɛ lɛ ācɛ nōo wa ipu ujɔ ɛpɛpɛ a? Ɔyikpo Upɔlu ta alɔ ɔtu kwu ɔtu kahinii: “Aá mīyɛ ɔ́mpa aá . . . ɛ́gɛ́nɛ̄ Ohɔ́nyɛtá mīyɛ aá ā.” (Uróm 15:7) Oŋma lɛ ō yɛce ocabɔ ku Ukraist, anyakwɔcɛ ku ujɔ lɔfu tabɔ ō ya ku ɔtu kóō gbonɛɛ lɛ ācɛ ɛyipɛ nōo wa ipu ujɔ a. (Má ikpati nyā nōo kahinii: “ Ɛgɛ Nɛ A Lɔfu Ya Kóō Calɛ Gā Ɛga Ɔhá Ku Uwɔ Kóō Nyɔ Mɛɛlɛ A.”) Amáŋ, ɛjɛɛji ācɛ ipu ujɔ kwu ayipɛ nɛ̄ŋcɛ́ lɔfu ya ku ɔtu kóō gbonɛɛ lɛ ācɛ ɛyipɛ nōo wa ipu ujɔ a.

Ō miyɛ ācɛ ɔhá amāŋ ō ya uwa omaaba lɛ ō ya mla aodee bɛɛka ō hi uwa igwú wa ɔlɛ uwɔ, amáŋ ó klla lɔfu lɛ ō ya mla ō je otabɔ nōo cɛgbá a lɛ uwa. Ocabɔ mafu, ɔyinɛ alɔ nɔnya éyi lɛ eko ku nu taajɛ ō bi ɔyinɛ alɔ nɔnya ɔhá yɛ jila igeli a ta nōó gboji nɛ ó calɛ gā ɔwɛ abɔɔ ɛ ŋ ma, o ya ɛɛ kóō mafu lɛ ɔ ɛgɛ nɛ ó gē jé ō je ɔdā okwinya ŋma ɛga néē gē ce ŋma a. Ɔyinɛ alɔ nɔnya nōo calɛ gā ɔwɛ abɔɔ ɛpɛpɛ a gweeye nɛhi, ɛnyā klla ta ɔ abɔ kóō lɛ ɔtu ogbonɛɛ ipu ɔlɛ ɛpɛpɛ ku nu, klla ta ɔ abɔ kóō lā ɔwɛ abɔɔ a kóō jé ɔ iyē fiyaa.

 ƐNƐƐNƐ ƐGA Ō BI LE YA Ō JƐ GƆBU

Abɔ efuma gē jikoko a, ó gē hila óhī igbalɛwa gbɔbu ɛɛ kóō tɔɔtɛ lɛ ɔ ō wu. Ɔwɛ ekponu ɔɔma, eko duuma nɛ a yɔ i gā ujɔ ɛpɛpɛ, a cɛgbá ō lɛ ɔtooplico duuma nɛ a lɛ a fu ŋma ipu ɔtu ku uwɔ, nōo lɔfu ya ku a hii jɛ gɔbu ipu ɛ̄gbā ō gba ku Ujehofa ŋ ma. Nicolas mla u Céline kahinii: “Ō calɛ gā ɛga ɛyipɛ wɛ ɔwɛ ɛnɛɛnɛ ō bi le nwu ɛlā. O ya ɛɛ ku ācɛ mla ɛga ɛpɛpɛ ɔhá kóō jɛ alɔ iyē, alɔ cɛgbá ō lɛ auce ō ya ɛyipɛ.” Jean-Charles nɛ alɔ kɛla lɛyikwu ɔ gbɔbu a kɛla lɛyikwu ɛgɛ nɛ apɔlɛ ku nu lɛ itene ɛ ma. Ó kahinii: “Ipu ujɔ ɛyipɛ ku alɔ a, ayipɛ ɔlɛ alɔ yɔ i je piya ācɛ o jikoko klla yɔ i tubla Ujehofa ajaajɛ fiyɛ. Igbihi nɛ ɔya ōhī le gla a, ɔyinɔnya ku alɔ gbɔɔ ō lɛ aya ipu ōjila ku ɔtahɛ ku alaadi, ɔyinɔnyilɔ ku alɔ kē kwu piya ɔcɛ o tɔɔna ɛlā Ɔwɔico nōó ya ubatisim ɛ ŋ.”

Ɔdi nɛ a lɔfu ya ɔdaŋ ka ohigbu āhɔ̄ ku uwɔ, ó tɔɔtɛ gā uwɔ ō calɛ gā ɛga nɛ ɛgbá ku ācɛ o tɔɔna ɛlā Ɔwɔico yɔ fiyɛ ŋ ma? A lɔfu ya ku ujɔ otɛtɛ nɛ a yɔ anu a kóō lɛbɛɛka ɛyipɛ tu uwɔ, ŋma lɛ ō bi aɛlā ōhī néē kɛla lɛyikwu ɔ ipu ikpɛyi ɛlā nyā a le yuklɔ. Abɔ a gɔbu yɔ i gbolo ce Ujehofa a, lɛ abɔ bi ɔdā alɛwa yɔ i ya ipu ujɔ ku uwɔ, ŋma lɛ ō ya ōmiya ō yuklɔ mla ācɛ ɔhá ipu uklɔ ku ɔna ō ta, ō ya aɔkpa ɛpɛpɛ, amāŋ ō je piya ɔkpa olɔhi fiyɛ mla ācɛ nɛ a jé gbɔbu ɛ ma. Á jé ŋ, a lɔfu fu ikpo ɔɔma ō je otabɔ ɔwɛ nōo cɛgbá a lɛ ācɛ ɛyipɛ nōo yɔ ipu ujɔ ku uwɔ amāŋ ācɛ nɛ ɛgbá ce uwa a. Abɔ ihɔtu wɛ uce ō ya néē gē bi le jé Ācɛ O Yɛce Ukraist ɔkwɛyi a, ō je otabɔ lɛ ācɛ ɔhá lɔfu ya ku á bi bla Ujehofa ajaajɛ fiyɛ. (Ujɔ́n. 13:35) A lɔfu lɔtuce kpɔcii ka “ɛ̄nyā wɛ ɛdɔ kú ɛya ogwó nōo gē he Ɔwɔicō ɔtū á.”—Uhíb. 13:16.

Naana nōó tɔɔtɛ ŋ ma, ó le tɔɔtɛ lɛ ɛyinɛhi ku Ācɛ O Yɛce Ukraist ō lɛ eeye ipu ujɔ ɛyipɛ ku uwa—a kē lɔfu ya lɛ a gla duu! Anne-Lise kahinii: “Ō gā ujɔ ɛpɛpɛ ɔhá ta um abɔ ō jé ācɛ alɛwa fiyɛ.” Kazumi lɔtuce kpɔcii babanya ka oŋma lɛ ō gā ujɔ ɛpɛpɛ ɔhá, “Ujehofa géē ta uwɔ abɔ ɔwɛ nɛ a kóō má jejee ɛ ŋ ma.” Ɛgɛnyá nɛ ɔtu kē ya u Jules lɛ a? Ó kahinii: “Aɔkpa ɛpɛpɛ nɛ um ya ɛ ma ta um abɔ ō ya ku um lɛ ɔtu ogbonɛɛ. Babanya n yɔ kwu ujɔ ku um ajaajɛ fiyɛ nōó géē lɔnɔ ta um ō nyɛɛ ŋma anu.”