1. Eko kpii gbɔbu ɛɛ ku ɔyikpo Upita kóō kwū a, ɔdi nɛ Ujehofa bi ɔ le ya a?

 ƆYIKPO Upita gba Ujehofa ɛ̄gbā kpaakpa ihayi alɛwa. Ó ba Ujisɔsi iyē ipu uklɔ ku ɔna ō ta ku nu, ó gbɔɔ uklɔ ku ɔna ō ta a ipu ācɛ nōó wɛ ācɛ Ujiyu ŋ ma, igbihaajɛ ó kē kwu piya éyi ku ācɛ nōo gē leyikwu ujɔ ku Ācɛ O Yɛce Ukraist ku eko aflɛyi a. Eko nɛ Upita jé ka ó le ba ō kwū ɛ ma, Ujehofa klla je uklɔ alɛwa lɛ ɔ kóō ya. Ɛpla ihayi bɛɛka 62-64 Eko Ku Ukraist a, Ujehofa bi Upita le ta aɔkpá ɛpa nōo wɛ ɔkpá ku Upíta aflɛyi mla ɔmpa a. Upita kē leyice ka aɔkpá nɛ ó ta nyā, géē ta Ācɛ O Yɛce Ukraist abɔ igbihi nɛ ó gekwu.—2 Upít. 1:​12-15.

2. Ɔdiya nɛ aɔkpá nɛ Upita ta a cɛgbá nɛɛnɛhi a?

² Upita ta aɔkpá nyā ɛpleeko nɛ ayinɛ nu ipu ɛlā Ɔwɔico yɔ i má “ɛdɔ kú ōwē ɛyɛ́ɛyɛ́yí alɛwa” a. (1 Upít. 1:6) Ācɛ obɔbiipu yɔ i ceyitikwu kéē bi ɛlā ō nwu ɛkɛmgbɛ mla uce nōó le yeŋee ŋ wa ipu ujɔ ku Ācɛ O Yɛce Ukraist. (2 Upít. 2:​1, 2, 14) Ó gboji ŋ, Ācɛ O Yɛce Ukraist nōo lā Ujɛrusalɛm a géē ‘má ocataajɛ ku igeli’ ɔɔma, nɛ aicɔɔja ku ācɛ Urom géē bi le bi eko ku uwa wa oŋmɛyi a. (1 Upít. 4:7) Ó lɛ aafu ŋ, aɔkpá nɛ Upita ta a ta Ācɛ O Yɛce Ukraist abɔ kéē jé ɛgɛ néē géē hayi kpaakpa naana néē yɔ i má unwalu ɛyɛɛyɛyi, mla ɛgɛ néē géē ya otutu taajɛ ku unwalu ɛyɛɛyɛyi ɔhá néē géē má ɛcɔbu a. b

3. Ɔdiya nɛ alɔ cika ō leyi yɛ aɔkpá nɛ Upita ta a?

³ Naana nɛ Upita ta aɔkpá nyā gē lɛ Ācɛ O Yɛce Ukraist  nōo lā ɛpleeko ɔɔma a, Ujehofa ya ku aɔkpá nɛ ó ta nyā kóō wɛ ipu Ɛlā ku nu. Ohigbu ɛnyā, alɔ lɔfu lɛ itene ŋma aɔkpá ɔɔma icɛ duu. (Uróm 15:4) Bɛɛka Ācɛ O Yɛce Ukraist ku eko aflɛyi a, alɔ lā ipu ɛcɛ nɛ ācɛ alɛwa gē lā oyeeyi nōó le yeŋee ŋ ma. O ka tu ɔ, ó gboji gɛ ŋ eko ku owe nɛhi a géē gbɔɔ nōo fiyɛ ɛ̄nɛ̄ o bi oŋmɛyi gē lɛ eko ku ācɛ Ujiyu a. Alɔ má aɛlā ocɛgbá ōhī nōo géē ta alɔ ɛlá kwu odee ipu aɔkpá ɛpa nɛ Upita ta a. Ɛnyā géē ta alɔ abɔ ō le tutu gbeyi eko nɛ ɛcɛ nyā géē wa oŋmɛyi, ō lɛ abɔ ci ō yuufi ɔdā nɛ ācɛ lɔfu gbɛla lɛyikwu alɔ amāŋ ya alɔ, mla ō lɛ ihɔtu ɔkwɛyi lɛ ayinɛ alɔ. Ɛlá ō tu kwu nyā klla lɔfu ta anyakwɔcɛ ku ujɔ abɔ kéē má ɛgɛ néē lɔfu ta ayinɛ uwa nōo yɔ ipu ujɔ a abɔ kéē hayi lɔfu a.

4. Ɛgɛ néē ma ɔ fu ipu ɔkpá ku 2 Upíta 3:​3, 4 a, ɔdi lɔfu lɛ abɔ kwu ɔtu ō kpoce ku alɔ gla a?

⁴ Ācɛ nōó kpɔtuce ɛlā nɛ Ubáyíbu ka lɛyikwu ɛcɔbu ŋ ma le yɛ jila alɔ ta. Ācɛ nōo gē bɛyikwu alɔ a lɔfu yɛhɛ tu alɔ ohigbu ka ó gboji nɛ alɔ humayi ka ka oŋmɛyi ku ɛcɛ a le ba ɛ. Ācɛ ōhī gē ka ka ɛcɛ nyā i gáā mɛ gboogboo gla ŋ. (Jé 2 Upíta 3:​3, 4.) Ɔdaŋ ka alɔ po ɛdɔ ɛlā ɛgɛnyā ŋma ɛgiyi ɔcɛ nɛ alɔ tɔɔna lɛ ɔ, ɔcɛ nɛ alɔ gē yuklɔ tɔha mla ɔ, amāŋ ɔcɛ apɔlɛ ku alɔ, ó lɔfu lɛ abɔ kwu ɔtu okpoce ku alɔ. Upita kɛla lɛyikwu ɔdā nōo lɔfu ta alɔ abɔ a.

5. Ɔdi gáā ta alɔ abɔ ō gbeyi eko nɛ oŋmɛyi ku ɛcɛ nyā gáā wa a? (2 Upíta 3:​8, 9)

⁵ Ɔtu lɔfu ya ācɛ ōhī bɛɛka Ujehofa yɔ i kpo eko bonu ō bi ɛcɛ obɔbi nyā wa oŋmɛyi a. Aɛlā nɛ Upita ka a lɔfu ta alɔ abɔ, ohigbu ka ó ta alɔ ɛlá kwu ɔ ka ɔwɛ nɛ Ujehofa gē leyi má eko a wɛ ɛyɛɛyi gwu ɛgɛ nɛ alɛɛcɛ gē leyi má eko a ta. (Jé 2 Upíta 3:​8, 9.) Tu Ujehofa, ihayi ula ɛpa ce ofu igwo lɛbɛɛka ɛ̄cī ekponu a. Ujehofa yɔ i lɔtu, ohigbu ka ó tine ku ɔcɛ duuma kóō je yiifi ŋ. Eko nɛ ɛ̄cī ku Ondu a gā, ɛcɛ obɔbi nyā géē wa oŋmɛyi. Ó wɛ ɛnɛɛnɛ ɛga lɛ alɔ ō bi eko nōo hile a le tɔɔna lɛ ācɛ nōo yɔ ipu oduudu ɛcɛ a.

6. Ɛgɛnyá nɛ alɔ lɔfu “gbēyī ɛ̄cī kú Óndú ā”? (2 Upíta 3:​11, 12)

⁶ Upita ta alɔ ɔtu kwu ɔtu ō “gbēyī ɛ̄cī kú Óndú ā.” (Jé 2 Upíta 3:​11, 12.) Ɛgɛnyá nɛ alɔ lɔfu ya ɔɔma a? Ɛ̄cī doodu, alɔ lɔfu ceyitikwu ō gbɛla lɛyikwu ɛgɛ nɛ oyeeyi géē lɔɔnyɛ lɛ ipu ɛcɛ ɛyipɛ a. Má iyi uwɔ ku a yɔ i fu ɛnɛɛnɛ owu ipu ɛcɛ ɛyipɛ a, yɔ i lé ɛnɛɛnɛ ɔdole, klla yɔ i ya ācɛ apɔlɛ ku uwɔ mla aɔkpa ku uwɔ nōo heyi ŋma ɔlekwu a omaaba, mla ō nwu ācɛ nōo lā eko ku ikee a lɛyikwu ō ya jila ku aakacɛ nōo yɔ ipu Ubáyíbu a. Ɔdaŋ ku a gbɛla lɛyikwu aɔdā nōo ba nyā, ó géē ta uwɔ abɔ ō gbeyi ɛ̄cī ku Ondu a mla ɔtu caca, mla ō jé kpɔcii ka oŋmɛyi ku ɛcɛ a i gáā gboji gɛ ŋ. Abɔ alɔ lɛ ‘aɔ́dā nēe bá nyā jé lɛyikwu ɛcɔbu ku alɔ ɛ ma, alɔ i gáā cɛ ku aɛlā ō nwu ɛkɛmgbɛ’ kóō pla alɔ ŋ.—2 Upít. 3:17.

7. Ɛgɛnyá nɛ ufi ku alɛɛcɛ ō ya lɔfu lɛ abɔ kwu alɔ a?

⁷ Ohigbu ka alɔ jé ka ɛ̄cī ku Ondu a i gáā gboji ō wa gɛ ŋ ma, alɔ gē ya ɔdā nɛ alɔ ya gla ō da ācɛ ɔhá lɛyikwu ɔkoolɔhi a. Amáŋ ekoohi ufi lɔfu ya alɔ. Ɔdiya a? Ohigbu ka alɔ gē yuufi ɔdā nɛ ācɛ lɔfu gbɛla lɛyikwu alɔ amāŋ ya alɔ a. Ɔdā ekponu ɔɔma ya da Upita. Otu amoomɛ néē kwu Ujisɔsi yɔ i ya ɔ owe nɛɛnɛhi a, Upita gbɔɔ ō yuufi ō cɛ ka anuɔ wɛ éyi ku ayikpo ku Ujisɔsi klla hiho igbalɛwa ka anuɔ i jé Ujisɔsi ŋ. (Umát. 26:​69-75) Amáŋ Upita lɛ ufi ku nu yale klla ta ɔkpá mla ɔtu ekponu kahinii: “Aá híī yúufi ācɛ nēe gē yá aá ōwē ā ŋ́. Aá lɛ ɛla wu ɔdā  dúúmā ŋ́.” (1 Upít. 3:14) Aɛlā nɛ Upita ka nyā lɔfu ta alɔ ɔtu kwu ka alɔ lɔfu yuufi alɛɛcɛ lé duu.

8. Ɔdi lɔfu ta alɔ abɔ ō yuufi alɛɛcɛ lé a? (1 Upíta 3:15)

⁸ Ɔdi lɔfu ta alɔ abɔ ō yuufi alɛɛcɛ lé a? Upita da alɔ kahinii: “Aá lɛ ojīlīma ɔkwɛ̄yi ā ce Ohɔ́nyɛtá ipú ɔtū ká aá ohígbū ka anú wɛ Óndú aá á.” (Jé 1 Upíta 3:15.) Alɔ lɔfu ta iyi alɔ ɛlá kwu ɔ ka Ujisɔsi Ukraist wɛ Ɔcɛ́ ku alɔ a, ka ó klla lɔfu nɛhi. Ɔdaŋ ku a gbɔɔ ō lɛ ɔtooplico amāŋ gbɔɔ ō yuufi eko nɛ a lɛ ɛga ō da ɔcɛ lɛyikwu ɔkoolɔhi a, blakwu Ɔcɛ́ ku alɔ a. Gbɛla ku a yɔ i má ɔ yɔ i lé ɔcɛ́ ipu ɔkpanco klla le yɛ jila ta mla umilliyɔn alɛwa ku aalelekwu otɛhɔ. Bla, ka é “kwú ɔfú dóódu nōo yɔ̄ ɔkpáncō mɛ́mla ɛcɛ ú kpó” lɛ ɔ ɛ, ka ó klla “géē yɔ̄ mla alɔ eko dóódu jāā gbéeko nɛ̄ ɛcɛ í mɛ” a. (Umát. 28:​18-20) Upita ta alɔ ɔtu kwu ɔtu ō le “tútū eko dóódu” ō kɛla lɛyikwu ɔdā nɛ alɔ kpɔtuce a. Ó géē he uwɔ ɔtu ō tɔɔna lɛ ɔcɛ ɛga uklɔ, ipu inɔkpa, amāŋ ɛga ɔhá a? Lɛ ɛlá ku eko nōo yɔ ɔɔma lɔfu tɔɔtɛ gā uwɔ a gbo taajɛ, cɛɛ ku a lɛ otutu ku ɛlā nɛ a lɔfu ka a ya. Gbɔɔkɔ ku ɔtu ō lɛ, ku a klla lɔtuce ka Ujehofa géē ta uwɔ abɔ ō yuufi alɛɛcɛ lé.—Ācot. 4:29.

9. Ipu āhɔ̄ éyi lɛ a, ɛgɛnyá nɛ Upita ta ō mafu ihɔtu a? (Má ifoto a.)

⁹ Upita nwu ɛgɛ nɛ ó géē mafu ihɔtu a. Ó  po eko nɛ Ujisɔsi ka kahinii: “N je íne ɛ̄yīpɛ̄ lɛ aá, ká aá yíihɔtū tū iyī aá. Ɛ́gɛ́nɛ̄ n yíihɔtū tū aá ā, ɛ́gɔ́ɔmā aá í yíihɔtū tū iyī aá lɛ ā dúú á.” (Ujɔ́n. 13:34) Naana nɛ ó po ɛlā nyā a, igbihaajɛ Upita ta ō lé ɔdole mla ayinɛ nu nōó wɛ ācɛ Ujiyu ŋ ma, ohigbu ka ó yɔ i yuufi ācɛ Ujiyu nōo wɛ Ācɛ O Yɛce Ukraist a. Ɔyikpo Upɔlu hi ɔdā nɛ Upita ya nyā ka uce ku “ɔ̄cɛ o leyī ɛpa.” (Ugal. 2:​11-14) Upita miyɛ ahɔ̄ nɛ Upɔlu pi ɔ a klla nwu ɛlā ŋma anu. Ipu aɔkpá ɛpa nɛ ó ta a, Upita ka ka alɔ i cika ō yihɔtu ku ayinɛ alɔ ipu ɔtu ku alɔ foofunu ŋ, amáŋ alɔ cika ō mafu ihɔtu ɔɔma lɛ uwa.

10. Ɔdi gē ta alɔ abɔ ō mafu “ihɔtū ɔkwɛ̄yi” lɛ ayinɛ alɔ a? Lɛ ɔ teyi peee. (1 Upíta 1:22)

¹⁰ Upita ka ka alɔ cika ō “yíihɔtū ɔkwɛ̄yi tá ayínɛ́” alɔ nōo yɔ ipu ujɔ a. (Jé 1 Upíta 1:22.) Alɔ géē lɛ ɛdɔ ihɔtu nyā ɔdaŋ ku alɔ lɛyitaajɛ lɛ ɛjɛɛji ɛlā “ɔkwɛ̄yi” nɛ alɔ nwu a. Ɛlā ɔkwɛyi nyā lɛ ō ya mla ɛlā ō nwu ka “Ɔwɔicō í má eyīgoo kú ɔ̄cɛ ŋ́.” (Ācot. 10:​34, 35) Alɔ i gáā lɛyitaajɛ lɛ ɔ́da ku Ujisɔsi lɛyikwu ō mafu ihɔtu, ɔdaŋ ka alɔ yihɔtu ācɛ ōhī fiyɛ ācɛ ɔhá ipu ujɔ ŋ. Ó wɛ ɔkwɛyi ka alɔ lɔfu kwu ācɛ ōhī ajaajɛ fiyɛ ācɛ ɔhá ɛgɛ nɛ Ujisɔsi ya a. (Ujɔ́n. 13:23; 20:2) Amáŋ Upita ta alɔ ɛlá kwu ɔ ka alɔ cika ō ceyitikwu ō yihɔtu “ɛjɛ̄ɛ̄jī” ayinɛ alɔ, ohigbu ka é wɛ ipu apɔlɛ ku alɔ.—1 Upít. 2:17.

11. Ɔdi wɛ ɛyi kóō mafu “ihɔtu ɔkwɛyi” lɛ ayinɛ alɔ a?

¹¹ Upita ta alɔ ɔtu kwu ɔtu kahinii: “Aá yíihɔtū tū ɔ́mpa aá ŋmá ɔtū ékpó ɛ́gɛ́nɛ̄ ɔfú kú aá jɛ̄ lɛ ā.” Ipu ɔgba nyā, ō yihɔtu “ŋmá ɔtū ékpó” lɛ ō ya mla ō mafu ihɔtu lɛ ɔcɛ ɔdaŋ nōó kóō lɔnɔ nɛhi ō mafu ihɔtu lɛ ɔcɛ ɔɔma. Ocabɔ mafu, ɔdi nɛ alɔ gáā ya ɔdaŋ ka ɔyinɛ éyi lɛ ɔdā okwiye ya alɔ a? Eko aflɛyi a, alɔ géē dɔka ō ya ɛlā mla ɔ ɔwɛ obɔbi ɛgɛ nɛ ó ya mla alɔ a, ikɔkɔ ō mafu ihɔtu. Amáŋ Upita nwu ŋma ɛgiyi Ujisɔsi ka ɛdɔ uce ō ya ɛgɔɔma i he Ɔwɔico ɔtu ŋ. (Ujɔ́n. 18:​10, 11) Upita ta ɔkpá kahinii: “Aá nɛ̄ ācɛ ɔhá yá aá ɔdōbɔ̄bí ā, aá bī obɔ̄bí le cíla ulé obɔ̄bí ɔ́ɔmā lɛ uwá ŋ́, aá ka ɔdōbɔ̄bí ká ācɛ nēe gē ka ɔdōbɔ̄bí ká aá ā ŋ́, ikɔkɔ ɔ́ɔmā da Ɔwɔicō kóō hɔ́hā ce uwá.” (1 Upít. 3:9) Ɔdaŋ ku a lɛ ihɔtu ɔkwɛyi, a géē ya ɛlā ɔwɛ ogbonɛnɛ klla géē lɛ ɛlá wu ācɛ nōo ya uwɔ ɔdā okwiye a.

12. (a) Ɔdā ɔhá nyá nɛ ihɔtu gáā ta alɔ abɔ ō ya a? (b) Ɛgɛ néē ma ɔ fu ipu uvidio nōo kahinii: Preserve the Precious Gift of Unity a, ɔdi nɛ a géē ceyitikwu ō ya a?

¹² Ipu aɔkpá nɛ ó ta a, Upita bi ɛlā nyā nōo kahinii: “Ihɔtu ɔkwɛyi” a le yuklɔ. Ipu ɔkpá aflɛyi nɛ ó ta a, Upita ka ka ihɔtu ɔkwɛyi géē ta alɔ abɔ ō je yɛyi, ó wɛ íne ō biya ligii foofunu ŋ amáŋ “ínoōbīya” alɛwa. (1 Upít. 4:8) Á jé ŋ, Upita blakwu aɛlā nɛ ó nwu ŋma ɛgiyi Ujisɔsi lɛyikwu ō je yɛhi a. Eko ɔɔma, Upita lɔfu kpɔtuce ka ó wɛ ɔcɛ olɔhi nɛhi eko nɛ ó ka ka ó géē je ɛlā ya ɔyinɛ nu ipu ɛlā Ɔwɔico ɛhi “igbo ahāapa” a. Amáŋ Ujisɔsi nwu ɔ ɛlā mla ɛjɛɛji alɔ ō je yɛhi ó wɛ igbo ahaapa ŋ, “amáŋ igbo ofɛtá cigwó ɛga ahāapa.” Ɛnyā wɛ ka ō je yɛhi ku alɔ i cika ō lɛ ɛji ŋ. (Umát. 18:​21, 22) Ɔdaŋ ka ó yɔ i lɔnɔ tu uwa ō yuklɔ mla ukɔ́ nyā, ɔtu kóō hii gbenyi gā uwɔ ŋ! Ekoohi, ó gē lɔnɔ nɛhi lɛ ɛjɛɛji ācɛ o gba Ujehofa ɛ̄gbā nōo wɛ ācɛ nōó jila iyē ŋ ma ō je ɛlā yɛhi. Ɔdā nōo cɛgbá fiyɛ duu babanya a, wɛ ō ya ɔdā nɛ a ya gla ō je ya ɔyinɛ uwɔ ɛhi mla ō ya ɛbɔ mla ɔ. c

13. Ɔdi lɔfu ya kóō lɔnɔ tu anyakwɔcɛ ku ujɔ ō lɛ eko ō ta ayinɛ uwa ɔtu kwu ɔtu a?

¹³ Ku ɛlā ɔkwɛyi a, Upita i je ɛlā nɛ Ujisɔsi nwu ɔ igbihi nɛ ó le heyi ŋma ɔlekwu a  mlanyi ŋ. Ujisɔsi da ɔ kahinii: “Gbō aálá kú um.” (Ujɔ́n. 21:16) Ɔdaŋ ku a wɛ ɔnyakwɔcɛ ku ujɔ, ayika ukɔ́ nyā tɛɛma kwu uwɔ. Naana kpɔ a, ó lɔfu lɔnɔ nɛhi ku ɔnyakwɔcɛ ku ujɔ kóō lɛ eko ō yuklɔ nōo cɛgbá nɛhi nyā a. Aflɛyi, anyakwɔcɛ ku ujɔ géē má ka apɔlɛ ku uwa lɛ ɛjɛɛji ɔdā néē cɛgbá a. É géē má ka é yihɔtu ɛjɛɛji ācɛ nōo yɔ ipu apɔlɛ ku uwa a, ka é klla ta ācɛ apɔlɛ ku uwa abɔ kéē pi bla Ujehofa ajaajɛ. É klla gē gbɔbu ipu uklɔ ku ɔna ō ta, mla ō ya otutu klla ya aya ku uwa ipu ōjila ku ujɔ, aojileyi mla aojileyi nɛhi. Ōhī ku uwa klla gē yuklɔ mla ígwu ku Hospital Liaison Committees, amāŋ gē yuklɔ mla ígwu ku Local Design/Construction Department. Anyakwɔcɛ ku ujɔ wɛ ācɛ nōo lɛ ɔdā alɛwa ō ya ɔkwɔɔkwɛyi!

14. Ɔdi lɔfu lɛ abɔ kwu anyakwɔcɛ ku ujɔ ɔtu kéē gbo aala ku Ɔwɔico a? (1 Upíta 5:​1-4)

¹⁴ Upita ta anyakwɔcɛ ku ujɔ ɔmpa nu ɔtu kwu ɔtu kahinii: ‘Gbo aala ku Ɔwɔico.’ (Jé 1 Upíta 5:​1-4.) Ɔdaŋ ku a wɛ ɔnyakwɔcɛ ku ujɔ, alɔ jé ku a yihɔtu ayinɛ uwɔ nɛɛnɛhi klla dɔka ō gbo uwa. Naana kpɔ a, ekoohi ɔtu lɔfu ya uwɔ ku a lɛ aɔdā alɛwa ō ya amāŋ ɛ̄jɛ̄ gē jɛ uwɔ ō yuklɔ ocɛgbá ɔɔma. Ɔdi nɛ a lɔfu ya a? Da Ujehofa ɛgɛ nɛ ɔtu gē ya uwɔ lɛ a. Upita ta ɔkpá kahinii: “Ɔ̄cɛ dúú nōo gē cɛ̄hɔ̄ ipú [ujɔ] géē bī ɛjɛ̄ɛ̄jī ɔfú nɛ̄ Ɔwɔicō je lɛ ɔ́ ā le cɛ̄hɔ̄ piíí.” (1 Upít. 4:11) Ayinɛ uwɔ lɔfu yɔ i má unwalu nōó lɔfu wa oŋmɛyi ipu ɛcɛ ku obabanya a ŋ. Amáŋ bla ku Ujisɔsi Ukraist nōo wɛ “otrɛ̄yí kú ācogbāálá ā,” lɔfu je otabɔ lɛ uwa lɔɔlɔhi fiyɛ ɔcɛ duuma ɔhá. Ó lɔfu ya ɔɔma babanya mla ipu ɛcɛ ɛyipɛ a. Ɔdā nɛ Ujehofa dɔka ku anyakwɔcɛ ku ujɔ kéē ya a wɛ o yihɔtu ku ayinɛ uwa, ō gbo ayinɛ uwa, mla ō “yá ɔdā nēé géē má gbla glá.”

15. Ɛgɛnyá nɛ ɔnyakwɔcɛ ku ujɔ éyi gbo aala ku Ɔwɔico a? (Má ifoto a.)

¹⁵ William nōo wɛ ɔnyakwɔcɛ ku ujɔ gboji gboji ɛ ma, jé ɔdā nōo wɛ ɛgbá kóō gbo ayinɛ nōo yɔ ipu ujɔ a. Eko nɛ ōcē ku Corona nōo tu ipu oduudu ɛcɛ gbɔɔ a, anu mla anyakwɔcɛ ku ujɔ ɔhá nōo yɔ ipu ujɔ ku nu a lɛ ɔ ya ōmiya ku uwa ō bēē yɛ fu eyeeye ku ayinɛ nōo yɔ ipu ígwu ku uwa a alaadi doodu. Ó ka ɔdā nōo ya a kahinii: “Alɛwa ku ayinɛ a yɔ ɔlɛ foofu uwa, ɛnyā kē lɔfu ya kéē lɛ ɛlá ō gbo obɔbi.” Eko nɛ ɔyinɛ duuma lɛ unwalu, William gē jahɔ lɔɔlɔhi o ya ɛɛ kóō jé ɔdā nōo wɛ unwalu ku uwa mla ɔdā néē  cɛgbá a. Oŋma ɔɔma, ó gē ceyitikwu ō dɔka aɔkpá amāŋ auvidio ŋma uwɛbsite ku alɔ nɛ ó lɔfu bi le ta ɔyinɛ ɔɔma ɔtu kwu ɔtu. Ó kahinii: “Alɔ cɛgbá ō gbo ayinɛ alɔ babanya fiyɛ otɛtɛ. Alɔ gē ceyitikwu lɔfu lɔfu ō je otabɔ lɛ ācɛ nōó wɛ ayinɛ alɔ ŋ ma kéē nwu ɛlā lɛyikwu Ujehofa, alɔ cɛgbá ō ceyitikwu lɔfu lɔfu ɔwɛ ɛgɔɔma ō ta ācɛ nōo wɛ ayinɛ alɔ a abɔ kéē yɔ ipu ɔkwɛyi a.”

16. Ɔwɛ ɛyɛɛyɛyi nyá nɛ alɔ lɔfu bi ɛlā nɛ alɔ nwu ŋma aɔkpá nɛ Upita ta a le yuklɔ a?

¹⁶ Alɔ lɛ ɛlā ka lɛyikwu aɛlā ōhī nɛ alɔ nwu ŋma aɔkpá ɛpa nɛ Upita ta a ɛ. Á jé ŋ, a lɛ ɛga éyi má nɛ a lɔfu ya lɔhi fiyɛ anu ɛ. Ocabɔ mafu, ó géē he uwɔ ɔtu ō gbɛla lɛyikwu aɔhā nɛ alɔ géē jɔɔnyɛ nu ipu ɛcɛ ɛyipɛ a fiyɛ? A lɛ ɔ ya ōmiya ku uwɔ ō tɔɔna ɛga uklɔ, ipu inɔkpa, amāŋ ɛga ɔhá? A má ɔwɛ ɛyɛɛyɛyi nɛ a lɔfu mafu ihɔtu ɔkwɛyi lɛ ayinɛ uwɔ lɔɔlɔhi fiyɛ? Anyakwɔcɛ ku ujɔ, aa le tutu ō gbo ayinɛ aa ŋma ɔtu ekponu? Da iyi uwɔ ɔkwɛyi a ku a má ɛga nɛ a lɔfu ya lɔhi fiyɛ a, amáŋ ɔtu ka ó hii gbenyi gā uwɔ ŋ. “Óndú ā gbonɛnɛ,” ó géē ta uwɔ abɔ ō ya lɔhi fiyɛ. (1 Upít. 2:3) Upita ta alɔ ɔtu kwu ɔtu kahinii: “Ɔwɔicō . . . géē yá ká aá le jōōjīla ipú alelékwū. Ó géē yá kú aá lɔtu ce ɔ̄ lɔfú fíyɛ́, ká aá háyi kli, ká ɔdā dúú kóō jíla aá iye ŋ́.”—1 Upít. 5:10.

17. Ɔdaŋ ku alɔ ceyitikwu lɔfu lɔfu ō gba Ujehofa ɛ̄gbā kpaakpa klla jɛga lɛ Ujehofa kóō nwu alɔ ɛlā, itene nyá nɛ alɔ gáā lɛ a?

¹⁷ Eko aflɛyi a, ɔtu ya Upita bɛɛka ó cika jɛ ō yɔ mla Ujisɔsi ŋ ma. (Ulúk. 5:8) Amáŋ oŋma lɛ otabɔ ku Ujehofa mla Ujisɔsi, Upita ceyitikwu lɔfu lɔfu ō yɛce Ujisɔsi kpaakpa. Ohigbu ɛnyā, Ujehofa jɛga lɛ Upita kóō “ga ajɔ̄ɔ̄cɛ́ nɛ̄ ó lɛ ōmɛ ŋ́ kú Óndú alɔ Ujísɔ̄si Ohɔ́nyɛtá ā.” (2 Upít. 1:11) Ɛnyā wɛ ɛnɛɛnɛ ɔhā! Ɔdaŋ ku a ceyitikwu lɔfu lɔfu ō gba Ujehofa ɛ̄gbā kpaakpa ɛgɛ nɛ Upita ya a, nɛ a klla jɛga lɛ Ujehofa kóō nwu uwɔ ɛlā, a géē miyɛ ule ka oyeeyi opiyoo a. A klla géē miyɛ ‘ule ku ɔtu nɛ a kpɔtuce Ɔwɔico nōo géē ya ku a lɛ onyata a.’—1 Upít. 1:9.