1-2. Ɔdi wɛ odee nōo cɛgbá lɛ Ujehofa nɛɛnɛhi a, ɔdi nɛ ó kē dɔka ku alɔ ya a?

 ƐGƐ nɛ alɔ gē ya ɛlā mla ācɛ ɔhá a cɛgbá lɛ Ujehofa nɛɛnɛhi. Ujisɔsi nwu alɔ ka alɔ yihɔtu ācɛ ɔhá ɛgɛ nɛ alɔ yihɔtu ku iyi alɔ a. (Umát. 22:​37-39) Ɔɔma kē lɛ ō ya mla ācɛ nōó kóō gē gba Ujehofa ɛ̄gbā ŋ ma. Eko duuma nɛ alɔ mafu ogbonɛnɛ ɔwɛ ɛgɛnyā, ayika alɔ yɔ i yɛce ocabɔ ku Ujehofa nōo wɛ Ɔwɔico, nōo gē ya ku “ɛnɔ kú nū [kóō] cɛ̄ klá ɔ̄cɛ obɔ̄bí mɛ́mla ɔ̄cɛ olɔhi. Ɔwɔ kú nū [kóō] yá klá ɔ̄cɛ nōo gē lɛ íne tū mɛ́mla ɔ̄cɛ nōo gē bīya íne” a.—Umát. 5:45.

² Naana nɛ Ujehofa yihɔtu ɛjɛɛji ācɛ a, ó yihɔtu ācɛ nōo gē lɛyitaajɛ lɛ ɔ a fiyɛ. (Ujɔ́n. 14:21) Ó kē dɔka ku alɔ yɛce ocabɔ ku nu. Ó ta alɔ ɔtu kwu ɔtu ku alɔ lɛ “ihɔtū [olɔfu]” lɛ ayinɛ alɔ mla ō “yíihɔtū tá ɔ́mpa [alɔ] bɛ̄ɛka ayínɛ́ ékpónú ā.” (1 Upít. 4:8; Uróm 12:10) Ɛdɔ ihɔtu nyā wɛ ekponu mla ihɔtu nɛ alɔ lɛ lɛ ɔmaapu alɔ nɛ alɔ yihɔtu nu, amāŋ ɔkpa ku alɔ nɛ alɔ kwu ɔ ajaajɛ a.

3. Ɔdi nɛ alɔ cika ō blakwu ɔ lɛyikwu ihɔtu a?

³ Ɛgɛ nɛ alɔ cɛgbá ō teyi kwu ɔcí nɛ alɔ lɛ ipu ɛhɔ ku alɔ o ya ɛɛ kóō jɛ a, alɔ cɛgbá ō gɔbu yuklɔ lɔfu lɔfu o ya ɛɛ ku ihɔtu nɛ alɔ lɛ lɛ ācɛ ɔhá a kóō yɔ i lɔfu tōōtɔ̄ɔ̄. Ɔcotɛhɔ Upɔlu tu Ācɛ O Yɛce Ukraist ukɔ́ kahinii: “Aá yɔ̄ ī yíihɔtū tá ayínɛ́ ācɔ̄lóhɔ́nyɛtá ɔ́mpa aá.” (Uhíb. 13:1) Ujehofa dɔka ku alɔ gɔbu  yɔ i ya ku ihɔtu nɛ alɔ lɛ lɛ ācɛ ɔhá a kóō yɔ i lɛ ɔfu tōōtɔ̄ɔ̄. Ikpɛyi ɛlā oklɔcɛ nyā géē kɛla lɛyikwu ɔdā nōo ya ɛɛ nɛ alɔ cika ō yɔ kwu ayinɛ alɔ ajaajɛ, mla ɛgɛ nɛ alɔ lɔfu gɔbu yɔ i ya lɛ a.

ƆDĀ NŌO YA ƐƐ NƐ ALƆ CIKA Ō YƆ KWU IYI ALƆ AJAAJƐ A

4. Ɛgɛ nɛ ɔkpá ku Aíjē Kú Ɛ̄gbā 133:1 ka a, ɛgɛnyá nɛ alɔ gáā gɔbu mafu ka opiyatɔha nōo yɔ ɔtahɛ ku alɔ a jɛ alɔ eyī a? (Má ifoto a.)

⁴ Jé Aíjē Kú Ɛ̄gbā 133:1. Alɔ cɛtɔha mla ɔcɛ nōo ta ɔkpá ku Aíjē Kú Ɛ̄gbā nōo ka ka ō wɛ ɔkpa ku ācɛ nōo yihɔtu ku Ujehofa “lɔhi” klla “lɔnyɛ” a. Amáŋ ɛgɛ nɛ ɔcɛ lɔfu leyi gwu ɔcí nōo heyifuu ō má a bonu ohigbu ka ó gē má ɔ ɛ̄cī doodu a, alɔ lɔfu leyi gwu oheyifuu ku ɛgɛ nɛ alɔ piyatɔha mla ayinɛ alɔ a bonu. Alɔ gē má ayinɛ alɔ ojigogo, á jé ŋ, igbalɛwa ipu alaadi. Ɛgɛnyá nɛ alɔ gáā lɔfu gɔbu mafu ka é jɛ alɔ eyī a? Ihɔtu nɛ alɔ lɛ lɛ ayinɛ alɔ a géē lɛ ɔfu tōōtɔ̄ɔ̄ ɔdaŋ ku alɔ lɛ eko taajɛ ō gbɛla tu ɛgɛ nɛ eyeeye ku uwa cɛgbá nɛhi lɛ ujɔ a mla alɔ a.

5. Ɛgɛnyá nɛ ihɔtu nōo yɔ ɔtahɛ ku ayinɛ alɔ a lɔfu lɛ abɔ kwu ācɛ ɔhá a?

⁵ Ihɔtu nɛ alɔ lɛ lɛ iyi alɔ a gē lɛ abɔ kwu ācɛ ōhī nōo wa ipu ujɔ ɛpɛpɛ a ɔtu nɛɛnɛhi. Oŋma lɛ ɔɔma foofunu, é lɔfu lɛ ɛlā ŋmɛyi ka é lɛ ɔkwɛyi a má ɛ. Ujisɔsi kahinii: “Ɔ́dāŋ́ ka aá gē yíihɔtū tá iyī aá, cɛ́ɛ́ ācɛ géē jé ka aá wɛ ayíkpó kú um.” (Ujɔ́n. 13:35) Leyi yɛ ocabɔ ku Chaithra, nōo yɔ inɔkpa nɛhi nōo yɔ i klɔcɛ mla Ācɛ Ocijali Ku Ujehofa a. Ó miyɛ ɔkpá ō higwu ō gā ojileyi nɛhi ku alɔ. Igbihi nɛ ó gā ojileyi nɛhi a eyī caa ɛ̄cī aflɛyi a, ó da ɔcɛ nōo gē klɔcɛ mla ɔ a kahinii: “Upapa mla umama ku um i kwu um bɔtu jejee ɛ ŋ. Amáŋ  ipu ojileyi nɛhi ku aa a, ācɛ ofɛpa ce igwo ɛpa kwu um bɔtu ɛ̄cī ekponu! Ɔtu ya um ka Ujehofa yɔ i bi ācɛ ɔlɛ nu le mafu ihɔtu gā um a. N dɔka ō wɛ ipu apɔlɛ ɔɔma.” Chaithra gɔbu yɔ i ya lɔhi klla lɛ ubatisim ya ipu ihayi ku 2024. Ku ɛlā ɔkwɛyi a, eko duuma nɛ ācɛ ɛpɛpɛ má uklɔ olɔhi nɛ alɔ gē ya mla ihɔtu nɛ alɔ gē mafu lɛ iyi alɔ a, igbalɛwa ó gē lɛ abɔ kwu uwa ɔtu ō gba Ujehofa ɛ̄gbā.—Umát. 5:16.

6. Ɛgɛnyá nōo yɔ kwu ayinɛ alɔ ajaajɛ lɔfu je ogbotu lɛ alɔ a?

⁶ Ō yɔ kwu ayinɛ alɔ ajaajɛ lɔfu jɛ ogbotu lɛ alɔ. Upɔlu ta Ācɛ O Yɛce Ukraist ɔtu kwu ɔtu kahinii: “Aá lɔfú tū ɔ́mpa aá iyē ɛ̄cī dóódu . . . cɛ́ɛ́ ká ɛ́plá kú ínōbīya kóō je ɔtū ká aá yá lɔfú ŋ́.” (Uhíb. 3:13) Eko duuma nɛ ɔtu le gbenyi lɛ alɔ nɛɛnɛhi nōó gbɔɔ ō lɔnɔ tu alɔ ō ya ɔdā okpaakpa a, Ujehofa lɔfu lɛ abɔ kwu ɔyinɛ duuma nōo má āhɔ̄ nɛ alɔ yɔ anu a ɔtu kóō je otabɔ nɛ alɔ cɛgbá a lɛ alɔ. (Aíjē 73:​2, 17, 23) Ɛdɔ ɔtu ō tu kwu ɔtu ɛgɛnyā cɛgbá lɛ alɔ nɛɛnɛhi.

7. Ɛgɛnyá nɛ ihɔtu tɛɛma kwu opiyatɔha a? (Ācɛ Ukólōsi 3:​13, 14)

⁷ Alɔ wɛ ipu ígwu ku ācɛ nōo gē yuklɔ lɔfu lɔfu ō mafu ihɔtu lɛ iyi uwa, ohigbu ɛnyā alɔ gē miyɛ ɔhā alɛwa. (1 Ujɔ́n. 4:11) Ocabɔ mafu, ihɔtu gē lɛ abɔ kwu alɔ ɔtu ō hii “gwū ɔ́mpa [alɔ] ɔcí ŋ́,” ɔɔma kē i ta alɔ abɔ ō yɔ kwu ayinɛ alɔ ajaajɛ. (Jé Ācɛ Ukólōsi 3:​13, 14; Āfi. 4:​2-6) Ohigbu ɛnyā, ipu aōjila ku alɔ, alɔ lɛ ɛga nɛ alɔ gē jɔɔnyɛ ɛ̄gbā ō gba fiyɛ ígwu ku ɛ̄gbā ō gba duuma ɔhá ipu ɛcɛ nyā.

MAFU OJILIMA LƐ ĀCƐ ƆHÁ

8. Ɛgɛnyá nɛ Ujehofa ta alɔ abɔ ō piyatɔha mla ayinɛ alɔ a?

⁸ Ujehofa ya ku opiyatɔha nōo yɔ ɔtahɛ ku alɔ mla ayinɛ alɔ ipu oduudu ɛcɛ a kóō tɔɔtɛ a. Ujehofa ya kóō tɔɔtɛ naana nɛ alɔ i jila iyē ŋ ma. (1 Ukɔ́r. 12:25) Ubáyíbu ka ka alɔ wɛ ācɛ nɛ “Ɔwɔicō abɔ̄yīnū lɛ ɔwɛ nɛ̄ [alɔ] cíkā ō yíhɔtū tá ɔ́mpa [alɔ] nwū [alɔ] ɛɛ́.” (1 Utes. 4:9) Ɛnyā wɛ ka Ujehofa gē bi Ubáyíbu le da alɔ ɔdā nɛ alɔ cika ō ya o ya ɛɛ ku alɔ yɔ kwu iyi alɔ ajaajɛ fiyɛ a. ‘Ɔwɔicō abɔ̄yīnū lɔfu nwu alɔ ɛlā’ ŋma lɛ ō klɔcɛ ku Ɛlā ku nu lɔɔlɔhi mla ō bi uwa le yuklɔ. (Uhíb. 4:12; Ujɛ́m. 1:25) Ɔdā nɛ Ācɛ Ocijali Ku Ujehofa kē i ceyitikwu lɔfu lɔfu ō ya a yɔ abɔɔ a.

9. Ɛlā nyá nɛ alɔ nwu ŋma ɔkpá ku Ācɛ Uróm 12:​9-13 lɛyikwu ō mafu ojilima lɛ ācɛ ɔhá a?

⁹ Ɛgɛnyá nɛ ɛlā ku Ɔwɔico gē nwu alɔ ō tubla iyi alɔ ajaajɛ fiyɛ a? Leyi yɛ ɛlā nɛ Upɔlu ka lɛyikwu ɛlā nyā nōo yɔ ipu ɔkpá ku Ācɛ Uróm 12:​9-13 a. (Jé.) Leyi bi ɛlā nɛ ó ka a. Ó kahinii: “Aá híī kpéeko bónū ō lɛ ojīlīmā ce ɔ́mpa aá ŋ́.” Ɔdi wɛ ɛyi ɛlā ɔɔma a? Alɔ cika ō dɔka ɔwɛ ɛyɛɛyɛyi ō “yíihɔtū tá ɔ́mpa [alɔ] bɛ̄ɛka ayínɛ́ ékpónú ā” ŋma lɛ ō je ya uwa ɛhi, ō miyɛ uwa wa ɔlɛ alɔ, mla ō nwula abɔ lɛ uwa. (Āfi. 4:32) A hii gbeyi ku ɔyinɛ uwɔ kóō tubla uwɔ ajaajɛ gbɔbu ŋ. Á cika ō “kpéeko bónū” ō ya lɛ a ŋ. A géē jɔɔnyɛ ɔdā nɛ Ujisɔsi cokonu ku nu a eko nɛ ó ka kahinii: “Aɔ́dā olɔhi [amāŋ eeye] kóō yɔ̄ lɛ ɔ̄cɛ nōo gē je ā fíyɛ́ ɔ̄cɛ nōo gē mīyɛ ā.”—Ācot. 20:35.

10. Ɛgɛnyá nɛ alɔ lɔfu mafu ku alɔ i gē “kpéeko bónū ō lɛ ojīlīmā ce ɔ́mpa” alɔ ŋ ma? (Má ifoto a.)

¹⁰ Ó wɛ ɔdā ō ta ɔtu kwu ɔtu ka u boobu nɛ ó da alɔ ka alɔ hii kpo eko bonu ō lɛ ojilima ce ācɛ ɔhá ŋ ma, Upɔlu ta alɔ ɔtu kwu ɔtu kahinii: “Aá cēyītīkwū, aá híī kwáahi ŋ́.” Ɔcɛ nōo gē ceyitikwu wɛ ɔcɛ nōo lɛ ɔtu caca klla wɛ ɔcɛ o yuklɔ lɔfu lɔfu. Eko nɛ ɔcɛ nōo gē ceyitikwu lɛ uklɔ duuma miyɛ, ó gē yuklɔ ɔɔma lɔɔlɔhi. Ɔkpá ku Aíita 3:​27, 28 ta alɔ ɔtu kwu ɔtu kahinii: “Aá yá ɔdā nɛ̄ aá yá glá ā lɛ ɛjɛ̄ɛ̄jī ācɛ nēe cɛgbá kú aá tá uwā abɔ̄ ā.” Ohigbu ɛnyā eko duuma nɛ alɔ má ka ɔcɛ cɛgbá otabɔ,  alɔ gē ceyitikwu ō ya ɔdā duuma nɛ alɔ ya gla a ō je otabɔ lɛ ɔ boobu. Alɔ i gē pi ɔkwu ajɛ ō ya ɔdā nɛ alɔ cika ō ya a ŋ; amāŋ gē lɛ ɛlā ŋmɛyi ka ɔcɛ ɔhá géē ya ɔ ŋ.—1 Ujɔ́n. 3:​17, 18.

11. Ɔdi lɔfu ta alɔ abɔ ō tubla iyi alɔ ajaajɛ fiyɛ a?

¹¹ Ɔwɛ ɔhá nɛ alɔ lɔfu mafu ka alɔ gē lɛ ojilima ce ācɛ ɔhá a, wɛ ō je ya uwa ɛhi fiyaa eko duuma néē lɛ alɔ ya cɔnu. Ɔkpá ku Ācɛ Ɛ́fēsɔsi 4:26 kahinii: “Ā í mabɔ̄ ɔnū nɛ̄ a cɛ̄ ā tá gbɔbū lɛ ɛnɔ o gaajɛ.” Ɔdiya a? Ɔgba 27 da alɔ ka ɔdaŋ nɛ alɔ ya lɛ a, alɔ i gáā “je ɛga dúúmā lɛ Ebilíi ā ŋ́.” Ipu Ɛlā ku nu, Ujehofa da alɔ igbalɛwa ka alɔ je ya iyi alɔ ɛhi. Ɔkpá ku Ācɛ Ukólōsi 3:13 ta alɔ ɔtu kwu ɔtu ō “[gɔbu yɔ i] . . . je yá ɔ́mpa [alɔ] ɛhi.” Ō je inyileyi ku ācɛ ɔhá ya uwa ɛhi wɛ ɔwɛ olɔhi fiyɛ duu ō yɔ kwu uwa ajaajɛ a. Ɔdaŋ ka alɔ je ya ācɛ ɔhá ɛhi, alɔ gē tabɔ ō “pīyatɔ̄há mla iyī [alɔ] kpɔ́ ɛ́gɛ́nɛ̄ alelékwū kú Ɔwɔicō yá ɔ̄ tɔ́ɔtɛ lɛ [alɔ] oŋmá lɛ ɛbɔ́ nōó je lɛ [alɔ] ā.” (Āfi. 4:3) Ó teyi peee ka ɔdaŋ ka alɔ je ya ācɛ ɔhá ɛhi, alɔ gē tabɔ ya ku ɔwa ku Ujehofa kóō piyatɔha lɔfu lɔfu klla yɔ ɛbɔ.

12. Ɛgɛnyá nɛ Ujehofa gē ta alɔ abɔ ō je yɛhi a?

¹² Ku ɛlā ɔkwɛyi a, ó lɔfu lɔnɔ tu alɔ ō je ya ācɛ nōo ya alɔ cɔnu amāŋ biya alɔ ɔtu a ɛhi. Amáŋ alɔ lɔfu je ya ɛhi oŋma lɛ otabɔ ku alelekwu ihɔ ku Ɔwɔico. Igbihi nɛ ó ta alɔ ɔtu kwu ɔtu ō “yíihɔtū tá ɔ́mpa [alɔ] bɛ̄ɛka ayínɛ́ ékpónú” mla ō “cēyītīkwū” a, Ubáyíbu da alɔ kahinii: “Cɛ̄ Óndú ā ɛhɔ̄ mla ɔtū ékpónú.” Ɛnyā wɛ ka alelekwu ihɔ ku Ɔwɔico lɔfu ya ku alɔ lɛ ɔtu caca. Ohigbu ɛnyā, alelekwu ihɔ ku Ɔwɔico lɔfu ta alɔ abɔ ō mafu ihɔtu lɛ ɔmpa alɔ bɛɛka alɔ wɛ ayinɛ ekponu a klla je ya uwa ɛhi ŋma ɔtu. Ɛnyā wɛ ɔdā nōo ya ɛɛ nɛ alɔ gē ba Ujehofa ɛba ŋma ɔtu kóō ta alɔ abɔ a.—Ulúk. 11:13.

“AÁ HÍĪĪ KƆ̄ ÍGWÍÍGWU Ŋ́”

13. Ɔdi lɔfu bi ō kɔ wa ɔtahɛ ku alɔ a?

¹³ Ujɔ a le mu mla ‘ɛdɔ ku ācɛ doodu’ nōo ŋma ɛga ɛyɛɛyɛyi. (1 Utím. 2:​3, 4) Ohigbu ɛnyā, eyeeye ku alɔ lɔfu ya ōmiya ɛyɛɛyɛyi lɛyikwu ɛdɔ ili nɛ alɔ géē je wiye, ɛdɔ ɛyi nɛ alɔ géē ya, ɛdɔ ɛcí nɛ alɔ géē miyɛ, amāŋ ɔdā nɛ alɔ géē fu ō bi le jɔɔnyɛ iyi alɔ a. Ɔdaŋ ka alɔ i leyi kwɛɛcɛ ŋ, aɔdā ɛyɛɛyɛyi nōo ba nyā lɔfu  lɛ alɔ kɔ. (Uróm 14:4; 1 Ukɔ́r. 1:10) Ohigbu ka alɔ wɛ ācɛ nɛ “Ɔwɔicō abɔ̄yīnū lɛ ɔwɛ nɛ̄ [alɔ] cíkā ō yíhɔtū tá ɔ́mpa [alɔ] nwū [alɔ] ɛɛ́” ma, alɔ cɛgbá ō leyi kwɛɛcɛ lɔɔlɔhi ō yɔ i pi ka aōmiya nɛ alɔ ya a lɔhi fiyɛ aku ācɛ ɔhá ŋ.—Ufíl. 2:3.

14. Ɛdɔ ɔcɛ nyá nɛ alɔ cika ō ceyitikwu ō wɛ eko doodu a, ɔdi kē ya a?

¹⁴ Alɔ klla lɔfu ceyitikwu ku ujɔ a kóō hii je kɔ ŋ, ŋma lɛ ō yɔ i ceyitikwu ō gbonɛnɛ mla ō je ɔtu ō tu kwu ɔtu lɛ ācɛ ɔhá eko doodu. (1 Utes. 5:11) Ó gboji lɛ a ɛ ŋ, alɛwa ku ācɛ nōó gē gā ōjila ku ujɔ amāŋ uklɔ ku ɔna ō ta gɛ ŋ amāŋ néē fu ŋma ipu ujɔ a le cigbihi wa ipu ujɔ a kpɔ ɛ. Alɔ ya uwa omaaba! (2 Ukɔ́r. 2:8) Leyi bi ɔdā nōo ya da ɔyinɛ alɔ nɔnya éyi nōo gā ōjila ku ujɔ ipu Agbla Ku Ajɔɔcɛ eko aflɛyi igbihi nɛ ó gē gā ōjila ku ujɔ amāŋ uklɔ ku ɔna ō ta gɛ ŋ ihayi igwo a. Ó kahinii: “Ɛjɛɛji ācɛ yɛhɛ mla um klla miyɛ um abɔ.” (Ācot. 3:19) Ɛgɛnyá nɛ ɔwɛ ogbonɛnɛ néē ya ɛlā mla ɔ nyā lɛ abɔ kwu ɔ a? Ó kahinii: “Ɔtu ya um ka Ujehofa yɔ i ta um abɔ ō lɛ eeye lɛ kpɔ.” Ɔdaŋ ka alɔ ceyitikwu ō ta ācɛ ɔhá ɔtu kwu ɔtu, Ukraist lɔfu bi alɔ le je ɔtu ō tu kwu ɔtu lɛ ācɛ nōo yɔ i “yúklɔ́, nɛ̄ iyó le jɛ̄ [uwa] á.”—Umát. 11:​28, 29.

15. Ɔdā ɔhá nyá nɛ alɔ lɔfu ya nōo géē ta ujɔ a abɔ ō piyatɔha a? (Má ifoto a.)

¹⁵ Ɔwɛ ɔhá nɛ alɔ lɔfu ya ku opiyatɔha nōo yɔ ipu ujɔ a kóō yɔ i gɔbu a, wɛ oŋma lɛ ɛlā nɛ alɔ gē ka a. Ɔkpá ku Ujóbu 12:11  kahinii: “Eko nɛ̄ ahɔ̄ kú ɔ̄cɛ lɛ ɛlā pó, ó gē jīla anú . . . bɛ̄ɛka ɛ́gɛ́nɛ̄ okónu gē jé ohɔ́ɔnɔ amáŋ ka olɔnyɛ kú ɔdōlé ā.” Ɛgɛ nɛ ɔcɛ nōo jé ō he ɔdole lɔɔlɔhi gē jé ɔ má o ya ɛɛ kóō má ka ó lɔnyɛ gbɔbu ɛɛ kóō je lɛ ācɛ ɔhá a, alɔ cɛgbá ō gbɛla lɔɔlɔhi tu ɛlā nɛ alɔ gáā ka a gbɔbu ɛɛ ku alɔ ka ɔ. (Aíjē 141:3) Alɔ dɔka ō má eko doodu ka ɛlā nɛ alɔ gáā ka a géē wɛ ɛlā okpaakpa, ɛla ō ta ɔtu kwu ɔtu mla “[ɛlā] olɔhi nōo géē tīile lɛ ācɛ” ɔhá.—Āfi. 4:29.

16. Anyɛ cɛgbá ō ceyitikwu fiyɛ duu ō je ɔtu ō tu kwu ɔtu lɛ ācɛ ipu ɛlā néē gē ka a?

¹⁶ Aɔba mla aɛ́nɛ́ mla aadā cɛgbá ō leyi kwɛɛcɛ lɔɔlɔhi fiyɛ kéē kɛla ɔwɛ ō ta ɔtu kwu ɔtu. (Ukól. 3:​19, 21; Utáy. 2:4) Anyakwɔcɛ ku ujɔ duu cika ō wɛ ācɛ nōo gē je ɔtu ō tu kwu ɔtu mla ɔtu ō tu lé lɛ aala ku Ujehofa. (Ayis. 32:​1, 2; Ugal. 6:1) Ɔkpá ku Aíita tu alɔ ɛlá kwu ɔ kahinii: “Ɔ̄cɛ nōo gē jé ohi okpaakpa ō tá eko okpaakpa kú ɛlá dóódu ā gwéeyē!”—Aíit. 15:23.

“ALƆ HÍĪ YÍIHƆTŪ KÚ ÍGBLƐ́NYĪ ÁMĀŊ ÁKÚ AKPOKÓNU ICÍÍCI Ŋ́”

17. Ɛgɛnyá nɛ alɔ lɔfu má ka ihɔtu nɛ alɔ gē mafu lɛ ayinɛ alɔ a ŋma ipu ɔtu ku alɔ a?

¹⁷ Ɔcotɛhɔ Ujɔni ta alɔ ɔtu kwu ɔtu kahinii: “Alɔ híī yíihɔtū kú ígblɛ́nyī ámāŋ ákú akpokónu icííci ŋ́.” (1 Ujɔ́n. 3:18) Alɔ dɔka ku ihɔtu nɛ alɔ lɛ lɛ ayinɛ alɔ a kóō ŋma ipu ɔtu ku alɔ. Ɛgɛnyá nɛ alɔ lɔfu bi le ya ɛnyā a? Ɔdaŋ ka alɔ gē bi eko nwune le yɔ tɔha mla ayinɛ alɔ, ɛgɔɔma nɛ alɔ gáā yɔ i tubla iyi alɔ ajaajɛ nɛ ihɔtu nɛ alɔ lɛ lɛ iyi alɔ a gáā yɔ i lɛ ɔfu tōōtɔ̄ɔ̄ a. Ohigbu ɛnyā, dɔka aɔwɛ ɛnɛɛnɛ nɛ a géē yɔ i bi le yɔ tɔha mla ācɛ ɔhá. Ocabɔ mafu, ipu ōjila ku ujɔ, mla uklɔ ku ɔna ō ta. Bēē lɛ eko taajɛ ō nyɔ gáā má ācɛ ɔhá ɔlɛ uwa. Ɔdaŋ ka alɔ ya aɔdā nōo ba nyā, alɔ gē mafu ka alɔ wɛ ācɛ nɛ “Ɔwɔicō abɔ̄yīnū lɛ ɔwɛ nɛ̄ [alɔ] cíkā ō yíhɔtū tá ɔ́mpa [alɔ] nwū [alɔ] ɛɛ́.” (1 Utes. 4:9) Alɔ abɔyi alɔ kē géē wa i má ka ó “lɔhi klla lɔnyɛ kú ayíné ká ē lā tɔ̄há ɛbɔ́ ipú ō pīyatɔ̄há!”—Aíjē 133:1.