Ó gē lɔnɔ tu uwɔ ekoohi ō blakwu ikpɛlā ku ɛga ku Ubáyíbu nɛ a jé igbalɛwa ɛ, amāŋ ɛga nōó yɔ ipu Ubáyíbu a? Ó lɔfu wɛ ɛ̄nɛ̄ ō gē ta uwɔ ɔtu kwu ɔtu, nōo gē ta uwɔ abɔ ō ya ɛlá ō gbo obɔbi lé, amāŋ ɛ̄nɛ̄ á dɔka ō kɔ mla ɔcɛ éyi. (Aíjē 119:​11, 111) Leyi yɛ aɔdā ōhī nɛ a lɔfu ya nōo lɔfu ta uwɔ abɔ ō blakwu aɛga ku Ubáyíbu a.

• Yuklɔ mla u JW Library^® app. Ɔdaŋ ku a yɔ i jé Ubáyíbu ipu JW Library, nɛ a kē lɛ ɛga ku Ubáyíbu éyi nɛ a géē dɔka ō blakwu ɔ a jé, a lɔfu lɛ ɔ ya ɔwɛ nōó géē tɔɔtɛ gā uwɔ ō má ɔ igbɔha.

• Lɛ ɛga ku Ubáyíbu a ta ɛga nɛ a lɔfu má ɔ. Lɛ ɛga ku Ubáyíbu nɛ a géē dɔka ō blakwu ɔ a ta taajɛ ipu ɔkpá éyi, cɛɛ a kwu ɔ i ta ɛga nɛ a géē yɔ i má ɔ igbalɛwa a. Ācɛ ōhī gē je ɔ ba aklo ku ogigo omɛɛbɛ ku uwa; ācɛ ɔhá kē i je ɔ ba ɔwɛ ku ufrigi ku uwa. Ācɛ ɔhá gē je ɛga ku Ubáyíbu ɔɔma ifoto mla ɔdā ō le gwu uwaya ku uwa, cɛɛ é kwu ɔ i piya ɔdā nōo géē yɔ i mafu ipeyi ku ɔdā ō le gwu uwaya amāŋ ukɔmputa ku uwa a.

• Lɛ ɔ ta ipu ɔkpá ɔwɛ nōo géē ta uwɔ abɔ ō bi ɔ tɛyi. Lɛ ɔkpá ku Ubáyíbu a, ɛyi ku nu, mla ɔgba ku Ubáyíbu a ta taajɛ aya éyi ipu ɔkpá, mla ikpɛlā ku ɛga ku Ubáyíbu ɔɔma aya ɔhá ku ɔkpá a. Oŋma ɔɔma, má aya nɛ a ta ɛga ku Ubáyíbu a tu ɔ a cɛɛ ku a ceyitikwu ō blakwu ɔdā nɛ aikpɛlā a wɛ a, cɛɛ ku a klla ceyitikwu ō blakwu ɛga nōó yɔ ipu Ubáyíbu a.