1. Ɔdi nɛ alɔ nwu ipu ōjila ku ihayi doodu aku 2023 a?

 IPU ōjila ku ihayi doodu aku 2023 a, a é lɛ aɛlā ōhī ta alɔ eyī peee fiyɛ lɛyikwu aɔdā ōhī nɛ alɔ kpɔtuce a, alɔ klla po ɛnɛɛnɛ ɛlā ō ka tɛɛcɛ ōhī lɛyikwu uklɔ ku ɔna ō ta ku alɔ. Ocabɔ mafu, alɔ nwu ka ācɛ ōhī lɔfu lɛ ɛnɛɛnɛ ɛga ō gáā gba Ujehofa ɛ̄gbā mla ācɛ ɔlɛ nu igbihi néē kwu Ubabilɔn Nɛhi a i cataajɛ. Alɔ klla nwu ka ó gbɔɔ ŋma Ɔya Ɔmigwoleyi ku ihayi ku 2023, alɔ i gáā cɛgbá ō ta ɛjɛɛji eko nɛ alɔ gē bi le yuklɔ ku ɔna ō ta a taajɛ gɛ ŋ. Aopiyabɔ néē ya nyā mafu ka uklɔ ku ɔna ō ta ku alɔ a i cɛgbá bɛɛka otɛtɛ a gɛ ŋ? Ehee, ó lɛ a ŋ!

2. Abɔ eko gē gla ɛ̄cī doodu a, ɔdiya nɛ uklɔ ku ɔna ō ta ku alɔ a gē cɛgbá tōōtɔ̄ɔ̄ a? (Umáki 13:10)

² Abɔ eko gē gla ɛ̄cī doodu a, uklɔ ku ɔna ō ta ku alɔ a gē cɛgbá tōōtɔ̄ɔ̄. Ɔdiya a? Ohigbu ka eko i yɔ nwune gbɔbu ɛɛ ku oŋmɛyi a kóō wa gɛ ŋ. Leyi yɛ ɛlā nɛ Ujisɔsi ka taajɛ lɛyikwu uklɔ ku ɔna ō ta ɛpleeko ku amoomɛ a. (Jé Umáki 13:10.) Ɛgɛ nɛ ɔkpá ku Umátiyu ka lɛ a, Ujisɔsi ka ka é géē tɔɔna gā odoodu ɛcɛ a gbɔbu ɛɛ ku “eko nɛ̄ ɛcɛ í mɛ ā” kóō wa. (Umát. 24:14) Ɛlā ɔɔma lɛ ō ya mla eko nɛ ɛcɛ obɔbi ku Usetan nyā géē wa oŋmɛyi duudu a. Ujehofa lɛ “ɛ̄cī . . . ámāŋ eko” nɛ aɔdā nyā géē ya nōó gboji gɛ ŋ ma miya taajɛ ɛ. (Umát. 24:36; 25:13; Ācot. 1:7) Ɛ̄cī doodu, alɔ gē tubla  eko ɔɔma ajaajɛ. (Uróm 13:11) Jaa gbeeko nɛ ɛcɛ nyā géē wa oŋmɛyi a, alɔ géē gɔbu yɔ i tɔɔna.

3. Ɔdi gē lɛ abɔ kwu alɔ ɔtu ō tɔɔna a?

³ Má ɔka ocɛgbá nɛhi éyi nɛ ɛjɛɛji alɔ géē dɔka ō gbɛla lɛyikwu ɔ a: Ɔdiya nɛ alɔ gē tɔɔna ku ɔkoolɔhi a? Ohigbu ihɔtu nɛ. Eko duuma nɛ alɔ gē tɔɔna, alɔ gē mafu ihɔtu nɛ alɔ lɛ lɛ ɔkoolɔhi a, ihɔtu nɛ alɔ lɛ lɛ ācɛ, ofiyɛ duu a, ihɔtu nɛ alɔ lɛ lɛ Ujehofa mla iye ku nu a. Alɔ kɛla lɛyikwu eyeeye ku uwa.

ALƆ GĒ TƆƆNA OHIGBU KA ALƆ YIHƆTU KU ƆKOOLƆHI A

4. Ɛgɛnyá nɛ ɔtu gē ya alɔ lɛ eko duuma nɛ alɔ lɛ ɔkoolɔhi po a?

⁴ Gbɛla lɛyikwu ɛgɛ nɛ ɔtu ya uwɔ lɛ eko nɛ ɛnɛɛnɛ odee ya ipu oyeeyi ku uwɔ a. Á jé ŋ, ɔcɛ éyi ipu apɔlɛ ku uwɔ lɛ ɔyi ɛpɛpɛ ma, amāŋ ɔcɛ éyi lɛ uklɔ nɛ a cɛgbá nu ɔkwɔɔkwɛyi a je gā uwɔ. Á jé ŋ, ɔtu he uwɔ nɛɛnɛhi nɛ oboobu ɔɔma, a le da ācɛ apɔlɛ ku uwɔ mla aɔkpa ku uwɔ lɛyikwu ɔ. Ɔdā ekponu ɔɔma ya, eko nɛ a po ɔkoolɔhi fiyɛ duu nōo wɛ ɔkoolɔhi lɛyikwu Ajɔɔcɛ Ku Ɔwɔico a?

5. Ɛgɛnyá nɛ ɔtu ya uwɔ lɛ eko aflɛyi nɛ a nwu ɛlā ɔkwɛyi ŋma ipu Ɛlā Ku Ɔwɔico a? (Má ifoto a.)

⁵ Gbɛla lɛyikwu ɛgɛ nɛ ɔtu ya uwɔ lɛ eko aflɛyi nɛ a nwu ɛlā ɔkwɛyi ŋma ipu Ɛlā ku Ɔwɔico a. A gáā le nwu ka Adā uwɔ nōo yɔ ɔkpanco a yihɔtu ku uwɔ nɛhi, ka ó dɔka ku a wɛ ipu apɔlɛ ku nu nōo gē gba ɔ ɛ̄gbā a, ka ó cokonu ō bi ɛjɛɛji owe mla ɔnɔ wa oŋmɛyi, ku a klla lɔfu lɛ eyiyoce ō má ācɛ nɛ a yihɔtu ku uwa nōo kwū néē géē heyi ŋma ɔlekwu ipu ɛcɛ ɛyipɛ a—mla aɔdā olɔhi alɛwa ɔhá. (Umák. 10:​29, 30; Ujɔ́n. 5:​28, 29; Uróm 8:​38, 39; Mafú 21:​3, 4) Aɛlā ɔɔma nɛ a nwu a cɛ gā uwɔ gweeye nɛhi. (Ulúk. 24:32) A yihɔtu ɛlā nɛ a yɔ i nwu, a kē dɔka ō da ɛjɛɛji ācɛ lɛyikwu ɔ!—Má Ujɛrɛmíya 20:9.

6. Ɔdi nɛ a nwu ŋma ɔ̄kā ku Ernest mla u Rose a?

⁶ Leyi yɛ ɔ̄kā nyā. Ɔyinɛ alɔ nɔnyilɔ éyi nōo lé ka u Ernest a lɛbɛɛka ihayi igwo eko nɛ adā nu kwū a. Ernest kahinii: “N gē  gbɛla: ‘Ó lɛ yɛ gā ɔkpanco ɛɛ? Kɛɛ ka ó gekwu piyoo ɛɛ?’ N gē mimalanyi ayi ɔhá nɛ adā uwa yeeyi kpɔ ɛ ma.” Ernest gē gā ɛga néē gē nyi okwū a ojigogo, ó gē le okwukwu kwaajɛ ɛyi unoji ku adā nu, cɛɛ ó gbɔɔkɔ kahinii: “Koōcō, Ɔwɔico, n dɔka ō jé ɛga nɛ upapa ku um yɔ a.” Odee bɛɛka ihayi igwo ahaapa (17) igbihi nɛ adā nu kwū a, Ɔcɛ Ocijali Ku Ujehofa éyi dɔka ō klɔcɛ mla u Ernest, ó kē cɛ boobu. Ó gweeye nɛhi ō nwu ka ācɛ nōo gekwu a i jé ɔdā duuma gɛ ŋ, bɛɛka é yɔ i gbiyɔla lipu lipu a, klla nwu ka Ubáyíbu cokonu ka ācɛ nōo kwū a géē heyi ŋma ɔlekwu ɛcɔbu. (Ɔ̄cok. 9:​5, 10; Ācot. 24:15) Ɔgayoo, ó lɛ ohi ku aɔka nɛ ó humayi dɔka ō jé ipu ihayi alɛwa a má ɛ! Ernest gweeye nɛhi lɛyikwu ɛlā ɔkwɛyi nɛ ó yɔ i nwu ŋma ipu Ubáyíbu a. Ɔnyā nu Rose gáā ba ɔ iyē ipu oklɔcɛ a, anu abɔyi nu kē yihɔtu ɛlā nɛ ó nwu a. Ipu ihayi ku 1978 uwa ɛplɛɛpa lɛ ubatisim ya. É gē bi ɔtu caca le tɔɔna lɛ ācɛ apɔlɛ ku uwa, aɔkpa ku uwa, mla ācɛ ɔhá lɛyikwu ɛlā ɔkwɛyi ocɛgbá néē nwu a. Ohigbu ɛnyā, Ernest mla u Rose je otabɔ lɛ ācɛ nōo fiyɛ ofu ɛta ce igwo (70) kéē gáā lɛ Ujehofa jé mla ō lɛ ubatisim ya.

7. Ɔdi gē ya ɔdaŋ ka alɔ yihɔtu ɛlā ɔkwɛyi nɛ alɔ nwu ŋma ipu Ubáyíbu a ɔkwɔɔkwɛyi a? (Ulúku 6:45)

⁷ Ɔdaŋ ka alɔ yihɔtu ɛlā ɔkwɛyi nɛ alɔ nwu ŋma ipu Ubáyíbu a ɔkwɔɔkwɛyi, ɔtu gē ya alɔ ku alɔ da ɛjɛɛji ācɛ lɛyikwu ɔ. (Jé Ulúku 6:45.) Ɔtu gē ya alɔ bɛɛka ayikpo ku Ujisɔsi nōo ka kahinii: “Alɔ í lɔfú habɔ̄ ō yɔ̄ ī kɛlā kú ɔdā nɛ̄ alɔ abɔ̄yī alɔ má ā klla pó ā tá glá ŋ́.” (Ācot. 4:20) Alɔ yihɔtu ɛlā ɔkwɛyi a nɛɛnɛhi nɛ alɔ dɔka ō kɛla lɛyikwu ɔ mla ācɛ alɛwa nōo tɔɔtɛ gla a.

ALƆ GĒ TƆƆNA OHIGBU KA ALƆ YIHƆTU ĀCƐ

8. Ɔdi gē lɛ abɔ kwu alɔ ɔtu ō da ācɛ ɔhá lɛyikwu ɔkoolɔhi a? (Má ikpati nyā nōo kahinii: “ Ihɔtu Géē Ta Uwɔ Abɔ—Lɛ Ācɛ Piya Ayikpo.”) (Má ifoto a.)

⁸ Alɔ yihɔtu ācɛ bɛɛka Ujehofa mla Ɔyinɔnyilɔ ku nu a. (Aíit. 8:31; Ujɔ́n. 3:16) Alɔ gē menyinyi ācɛ nōó “jé Ɔwɔicō ŋ́,” néē klla “leyīce ka ɔdā olɔ̄hi dúú ɔ́ɔ géē wā” ŋ ma nɛhi. (Āfi. 2:12) Ohigbu unwalu ɛyɛɛyɛyi néē yɔ i má a, ɔtu lɔfu ya uwa bɛɛka é yɔ ipu ɔgɔ nōo lipu nɛhi a. Amáŋ alɔ lɛ ɔŋgba nōo lɔfu pi uwa bɛɛcɛ ŋma ipu ɔgɔ a: anu kē wɛ ɔkoolɔhi lɛyikwu Ajɔɔcɛ ku Ɔwɔico a. Ohigbu ka alɔ yihɔtu ku uwa klla gē menyinyi uwa nɛhi a, alɔ dɔka ō ya ɔdā duuma nɛ alɔ ya gla a ō da uwa lɛyikwu ɔkoolɔhi a. Eko duuma néē nwu ɛlā lɛyikwu ɔ, ó lɔfu je eyiyoce lɛ uwa, ó lɔfu ta uwa abɔ kéē lɛ eeye babanya, klla lɔfu je ɛnɛɛnɛ ɛga lɛ uwa ō jɔɔnyɛ “oyēeyi ɔkwɛ̄yi,” nōo wɛ oyeeyi opiyoo ipu ɛcɛ ɛyipɛ a.—1 Utím. 6:19.

9. Ahɔ̄ ō pi lɛyikwu ɛcɔbu nyá nɛ alɔ gē da ācɛ lɛyikwu ɔ a, ɔdi kē ya a? (Isíkɛ̄lu 33:​7, 8)

⁹ Ihɔtu nɛ alɔ lɛ lɛ ācɛ a klla gē lɛ abɔ kwu alɔ ɔtu ō da uwa ka oŋmɛyi ku ɛcɛ obɔbi nyā  gáā kwu ajaajɛ ɛ. (Jé Isíkɛ̄lu 33:​7, 8.) Alɔ gē meyinyinyi ɛjɛɛji ācɛ, kwu ācɛ apɔlɛ ku alɔ nōó gē gba Ujehofa ɛ̄gbā ŋ ma. Ācɛ alɛwa gē lā oyeeyi ku uwa néē kóō jé ka “ōwē nɛ̄hi géē yɔ̄ nɛ̄ ɛdɔ nū í yɔ̄ jéjéē ɛ́ɛ́ ŋ́, ŋmá eko nɛ̄ ɛcɛ gbɔɔ́ ā jāā kwu abālɔbányā, nōó kē gáā yɔ̄ gbóógbóō ɛ́ɛ́ gɛ ŋ́.” (Umát. 24:21) Alɔ dɔka kéē jé ɔdā nōo géē ya ɛpleeko ku ɛpɔ ō ka a. Aflɛyi, é géē je ɛjɛɛji ɛ̄gbā ō gba ku ɛkɛmgbɛ cataajɛ, cɛɛ oŋma ɔɔma, ɛjɛɛji ɛcɛ obɔbi nyā géē wa oŋmɛyi ɛpleeko ku Amagɛdɔn. (Mafú 16:​14, 16; 17:​16, 17; 19:​11, 19, 20) Alɔ gē gbɔɔkɔ ku ācɛ alɛwa nōo tɔɔtɛ gla a kéē jahɔ tu ɛlā nɛ alɔ gē da uwa a, ka é klla miya ō gáā gba Ujehofa ɛ̄gbā mla alɔ babanya. Amáŋ ɔdi gáā ya da ācɛ nōo ta ō jahɔ tu alɔ babanya, kwu ācɛ apɔlɛ ku alɔ nɛ alɔ yihɔtu ku uwa nɛhi a?

10. Ɔdiya nōó cɛgbá ku alɔ yɔ i pi ācɛ ahɔ̄ lɛyikwu ɔdā nōo géē ya nōó gboji gɛ ŋ ma?

¹⁰ Ɛgɛ nɛ alɔ ka ipu ikpɛyi ɛlā nōo gáā yɛ a, ó lɔfu wɛ ococɛ ku Ujehofa ō je ohɛta lɛ ācɛ nōo gbɔɔ ō kpɔtuce ɔ eko néē lɛ ocataajɛ ku Ubabilɔn Nɛhi a má a. Ɔdaŋ ka ó lɛ a, ó cɛgbá nɛhi ku alɔ yɔ i da uwa lɛyikwu ɔ babanya. Leyi yɛ ɛlā nyā: Ɔdā nɛ alɔ gē da uwa babanya a lɔfu je odee lɛ uwa néē géē blakwu ɔ eko ɔɔma. (Má Isíkɛ̄lu 33:33.) Á jé ŋ, é lɔfu blakwu ɛlā ku ahɔ̄ ō pi néē po ŋma ɛgiyi alɔ a, ɔɔma kē lɔfu lɛ abɔ kwu uwa ɔtu kéē gáā gbɔɔ ō gba Ujehofa ɛ̄gbā mla alɔ gbɔbu ɛɛ ku eko a kóō mɛ. Bɛɛka ɔcɛ o gbo alagba nōo yɔ Ufilipayi nōo piya ɔtu ku nu abɔ igbihi nɛ ‘ajɛ o jíliyē nɛ̄ɛ̄nɛ̄hi yá’ a, á jé ŋ, ōhī ku ācɛ nōo ta ō jahɔ tu alɔ babanya a, géē piya ɔtu ku uwa abɔ igbihi néē kwu Ubabilɔn Nɛhi a i cataajɛ.—Ācot. 16:​25-34.

ALƆ GĒ TƆƆNA OHIGBU KA ALƆ YIHƆTU KU UJEHOFA MLA IYE KU NU

11. Ɛgɛnyá nɛ alɔ gē cɛtra Ujehofa, gē lɛ ojilima ce ɔ, klla gē bi eko, ɔfu, mla aɔdā agbenu ku alɔ le yuklɔ lɛ ɔ a? (Ɔdā Nēé Mafú Lɛ Ujɔ́ni 4:11) (Má ifoto a.)

¹¹ Ɔdā ocɛgbá fiyɛ duu nōo ya ɛɛ nɛ alɔ gē tɔɔna ku ɔkoolɔhi a, wɛ ohigbu ka alɔ yihɔtu ku Ujehofa nōo wɛ Ɔwɔico a mla iye otiihɔ ku nu. Alɔ gē leyi má uklɔ ku ɔna ō ta a ka ó wɛ ɔwɛ ō je owoofu lɛ Ɔwɔico nɛ alɔ yihɔtu ku nu a. (Jé Ɔdā Nēé Mafú Lɛ Ujɔ́ni 4:11.) Alɔ cɛtɔha ŋma oduudu ɔtu ku alɔ mla ācɛ nōo yɔ ɔkpanco nōo ka kahinii: “Óndú mɛ́mla Ɔwɔicō kú alɔ, A cíkā nēe ī cɛtra uwɔ, lɛ ojīlīmā ce uwɔ, klla cɛ̄tra uwɔ ohígbū ɔfú nɛ̄hi kú uwɔ.” Alɔ gē cɛtra Ujehofa klla lɛ ojilima ce ɔ eko duuma nɛ alɔ da ācɛ ɔhá ɛlā nōo mafu peee ka anu “yá ɛjɛ̄ɛ̄jī odée á,” ka alɔ klla yeeyi ohigbu ka ó je oyeeyi lɛ alɔ. Alɔ klla gē bi eko, ɔfu, mla aɔdā agbenu ku alɔ le yuklɔ ku ɔna ō ta a lɔɔlɔhi ɛgɛ nɛ āhɔ̄ ku alɔ jɛga lɛ alɔ lɛ a. (Umát. 6:33; Ulúk. 13:24; Ukól. 3:23) Alɔ lɔfu ka ɔ ɔwɛ  okpii ɛgɛnyā kahinii, alɔ dɔka ō bēē kɛla lɛyikwu Ɔwɔico nɛ alɔ yihɔtu ku nu a. Ó klla gē lɛ abɔ kwu alɔ ɔtu ō da ācɛ ɔhá lɛyikwu iye ku nu, mla ɛdɔ ɔcɛ nɛ Ɔwɔico wɛ ɔkwɔɔkwɛyi a. Ɔdiya a?

12. Ipu uklɔ ku ɔna ō ta ku alɔ, ɛgɛnyá nɛ alɔ gē ya ku iye ku Ujehofa kóō le ya tiihɔ a?

¹² Ihɔtu nɛ alɔ lɛ lɛ Ujehofa a gē lɛ abɔ kwu alɔ ɔtu ō lɛ iye ku nu ya tiihɔ. (Umát. 6:9) Ɛnyā wɛ ka alɔ géē dɔka ō da ācɛ ɔhá ku aɛlā obɔbi nɛ Usetan ka lɛyikwu Ujehofa a i wɛ ɔkwɛyi ŋ. (Ohút. 3:​1-5; Ujób. 2:4; Ujɔ́n. 8:44) Eko duuma nɛ alɔ gē tɔɔna, alɔ gē lɛ ɔtu caca nɛhi ō da ɛjɛɛji ācɛ nōo géē dɔka ō jahɔ tu alɔ a ɛdɔ ɔcɛ nɛ Ujehofa wɛ, mla ɛgɛ nɛ ó lɛ ɔkwɔɔkwɛyi a. Alɔ dɔka ku ɛjɛɛji ācɛ kéē jé ka uce ō ya ku nu nōo fiyɛ duu a wɛ ihɔtu, ka ɔwɛ ō lé ɔcɛ́ ku nu lɔhi klla le kpaakpa, ka ó gboji gɛ ŋ, Ajɔɔcɛ ku nu géē bi ɛjɛɛji owe nɛ alɔ gē má a wa oŋmɛyi, klla géē bi ɛbɔ mla eeye gē lɛ alɛɛcɛ. (Aíjē 37:​10, 11, 29; 1 Ujɔ́n 4:8) Eko duuma nɛ alɔ da ācɛ aɛlā nōo ba nyā lɛyikwu Ujehofa, alɔ gē ya ku iye ku nu kóō le ya tiihɔ. Alɔ klla gē gweeye ohigbu ku alɔ jé ka alɔ yɔ i ya ɔdā nɛ alɔ cika ō ya abɔ alɔ wɛ Ācɛ Ocijali Ku Ujehofa a. Ɔdiya nɛ alɔ ka lɛ a?

13. Ɔdiya nɛ ɔtu gē ya alɔ ka ó wɛ ɛga ku ojilima ō hi alɔ ka Ācɛ Ocijali Ku Ujehofa a? (Ayisáya 43:​10-12)

¹³ Ujehofa lɛ alɔ fu ō wɛ “aíjáalí” ku nu. (Jé Ayisáya 43:​10-12.) Ihayi ōhī nōo gáā yɛ a, uleta éyi ŋma ɛgiyi Ígwu Nōo Gē Leyi Kwu Ɔwa Ku Alɔ a jé kahinii: “Ojilima nōo fiyɛ duu nɛ oduuma ku alɔ lɔfu lɛ a, wɛ ō hi alɔ ka Ācɛ Ocijali Ku Ujehofa.” Ɔdiya nōó lɛ a? Leyi yɛ ɔ ka é lɛ ɛkɛmgbɛ ka ba uwɔ ku a lɛ ɔdobɔbi éyi ya. Babanya a cɛgbá ɔcɛ éyi nōo géē da ācɛ ɔhá ka ɛkɛmgbɛ néē ka ba uwɔ a, ka wɛ ɔcɛ olɔhi nōó gáā ya ɔdā ɛgɔɔma gboogboo ŋ. Ɛdɔ ɔnyɛ nɛ a géē fu a? Ó lɛ aafu ŋ, ɔcɛ nɛ a jé, nɛ a kpɔtuce, nōo klla lɛ iye olɔhi, o ya ɛɛ ku ācɛ ɔhá kéē kpɔtuce  ɔ. Ŋma lɛ ō fu alɔ ō wɛ Ācɛ Ocijali ku nu, Ujehofa le mafu ka ó jé alɔ lɔɔlɔhi, ka ó klla kpɔtuce alɔ ō da ācɛ ɔhá ka anu foofunu wɛ Ɔwɔico ɔkwɛyi a. Ɔtu gē ya alɔ ka ó wɛ ɛga ku ojilima nɛhi lɛ alɔ ō wɛ Ācɛ Ocijali ku nu. Ɛnyā ya ɛɛ nɛ alɔ gē bi ɛga duuma nɛ alɔ lɛ a le ya ku ācɛ kéē lɛ iye ku nu jé, mla ō mafu ku ɛjɛɛji aɛlā obɔbi néē ka lɛyikwu ɔ a i wɛ ɔkwɛyi ŋ. O bu ɔwɛ nyā, alɔ gē ya ɔdā nɛ iye nɛ alɔ lé a ka ka alɔ ya a: Alɔ wɛ Ācɛ Ocijali Ku Ujehofa!—Aíjē 83:18; Uróm 10:​13-15.

ALƆ GÉĒ GƆBU YƆ I TƆƆNA JAA GBEEKO NƐ ƐCƐ NYĀ GĀ OŊMƐYI

14. Aɔdā eeye nyá lɔfu ya ɛcɔbu nōó gboji gɛ ŋ ma?

¹⁴ Alɔ yɔ i gweeye ō má ɔdā nōo lɔfu ya ɛcɔbu nōó gboji gɛ ŋ ma! Mla ɔhā ku Ujehofa, alɔ leyice ka ācɛ alɛwa géē gáā ba alɔ iyē gbɔbu ɛɛ ku owe nɛhi a kóō gbɔɔ. Alɔ klla gē gweeye ka ɛpleeko ku owe nɛhi nōo wɛ eko olɔnɔ fiyɛ duu a, ācɛ alɛwa lɔfu bɛɛcɛ ŋma ɛcɛ ku Ebilii nōo yɔ i wa oŋmɛyi ɛ ma, ō gáā ba alɔ iyē ō je owoofu lɛ Ujehofa!—Ācot. 13:48.

15-16. Ɔdi nɛ alɔ géē gɔbu yɔ i ya a, jaa gbeeko nyá nɛ alɔ kē géē ya ɔ gáā kwu a?

¹⁵ Jaa gbeeko ɔɔma, alɔ lɛ uklɔ ocɛgbá nɛhi ō ya, uklɔ nɛ alɔ i gáā ya gboogboo gɛ ŋ ma. Alɔ lɛ ɛnɛɛnɛ ɛga ku ojilima ō tɔɔna ku ɔkoolɔhi lɛyikwu Ajɔɔcɛ ku Ɔwɔico a ipu oduudu ɛcɛ. Eko ekponu ɔɔma, alɔ géē gɔbu yɔ i pi ācɛ ahɔ̄ lɛyikwu ɔdā nōo géē ya nōó gboji gɛ ŋ ma. Ācɛ cɛgbá ō jé ka oŋmɛyi ku ɛcɛ obɔbi nyā yɔ i kwu ajaajɛ ɛ. Cɛɛ eko nɛ ɛ̄cī ɛpɔ a gā, é géē jé ka ɛlā nɛ alɔ gē tɔɔna a ŋma ɛgiyi Ujehofa nōo wɛ Ɔwɔico a.—Isík. 38:23.

¹⁶ Ó lɛ a, ɔdi nɛ alɔ lɛ ɔtu ku alɔ ya ekponu ō ya a? Ohigbu ihɔtu—nōo wɛ ihɔtu nɛ alɔ lɛ lɛ ɔkoolɔhi a, ihɔtu nɛ alɔ lɛ lɛ ācɛ, ofiyɛ duu, ihɔtu nɛ alɔ lɛ lɛ Ujehofa nōo wɛ Ɔwɔico mla iye ku nu a—géē ya ku alɔ le tutu eko doodu ō tɔɔna mla ɔtu caca, jaa gbeeko nɛ Ujehofa ka kahinii: “Ó jɛ̄ ɛɛ́!”