1. Ōmiya o cɛgbá nyá nɛ ɛjɛɛji alɛɛcɛ lɛ ō ya a?

 ĀCƐ icɛ lɛ ɛnɛɛnɛ ōmiya ocɛgbá néē cika ō ya. É géē cɛtra Ujehofa ka anu lɛ íkwu ō wɛ Ɔcɛ́ ku oduudu ɛcɛ mla ɔkpanco a nɛɛ, kɛɛ ka é géē yɛce Usetan nōo wɛ olɛla ku nu a? É géē yɛce ɔcɛ éyi piii. Ōmiya duuma néē ya a, géē mafu ɔdaŋ ka é géē lā oyeeyi opiyoo amāŋ géē kwū. (Umát. 25:31-33, 46) Ɛpleeko ku “ákanya nɛ̄hi” amāŋ owe nɛhi a, é géē lɛ ína ku oyeeyi opiyoo amāŋ ocataajɛ pi uwa.—Mafú 7:14; 14:9-11; Isík. 9:4, 6.

2. (a) Ɔdi nɛ ɔkpá ku Ācɛ Uhíbru 10:35-39 ta alɔ ɔtu kwu ɔtu ō ya a? (b) Ɛgɛnyá nɛ ɔkpá ku Ɔdā Nēé Mafú Lɛ Ujɔ́ni gáā ta alɔ abɔ a?

² Jé Ācɛ Uhíbru 10:35-39. Ɔdaŋ ku a le miya ō cɛtra ɔcɛ́ ō ce ku Ujehofa ɛɛ, ōmiya olɔhi a nɛ a ya a. Babanya, a lɛ ɔtu caca ō ta ācɛ ɔhá abɔ ya ōmiya olɔhi nyā. Alɔ lɔfu bi aɛlā nōo yɔ ipu ɔkpá ku Ɔdā Nēé Mafú Lɛ Ujɔ́ni a le je otabɔ lɛ uwa. Ɔkpá ɔɔma mafu ɔdā nōo gáā ya da ācɛ nōó cɛtɔha mla ɔcɛ́ ō ce ku Ujehofa ŋ, ó klla mafu ɛgɛ nɛ Ujehofa géē hɔha ce ācɛ nōo gē cɛtra ɔcɛ́ ō ce ku nu a. Alɔ cɛgbá ō ya oklɔcɛ ku ɛlā ɔkwɛyi nyā. Ɔdaŋ ku alɔ ya lɛ a, ó géē ta alɔ abɔ hayi kpaakpa ō gba Ujehofa ɛ̄gbā. O ka tu ɔ, ō géē ya ku alɔ ta ācɛ ɔhá abɔ ō gā gba Ujehofa, kéē klla hayi kpaakpa yɔ i gɔbu gba ɔ ɛ̄gbā.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ipu ikpɛyi ɛlā nyā, alɔ géē cila ohi ku aɔka nyā: Ɔdi gáā yɔ lɛ ācɛ nōo gē cɛtra ɔcɛ́ ō ce ku Ujehofa a? Ɔdi gáā ya da ācɛ nōo je ō yɛce ɛbɛ́ obɔbi nɔwa yooo, néē kɛla  lɛyikwu ɔ ipu ɔkpá ku Ɔdā Nēé Mafú Lɛ Ujɔ́ni a?

4. Ígwu nyá yɔ mla Ujisɔsi ɔkpanco nɛ ɔcocɛhɔ Ujɔni má a?

⁴ Ipu ɛbɛ, ɔcocɛhɔ Ujɔni má ígwu ɛpa nōo gē cɛtra ɔcɛ́ ō ce ku Ujehofa, é kē miyɛ ɔhá ku oyeeyi nōó gáā mɛ gboogboo ŋ ma. Ula ofigwaahata (144,000) wɛ aluka ku ācɛ ku ígwu aflɛyi a. (Mafú 7:4) É fu uwa ŋma ipu ɛcɛ nyā kéē lɛ igɔmɛnti amāŋ Ajɔɔcɛ kwaajɛ mla Ujisɔsi ɔkpanco. Uwa mla Ujisɔsi géē cɔcɛ́ ipu oduudu ɛcɛ. (Mafú 5:9, 10; 14:3, 4) Ipu ɛbɛ a, Ujɔni má uwa hayi mla Ujisɔsi ɛyi ɛfu ku Usayɔn.—Mafú 14:1.

5. Ogboji gɛ ŋ, ɔdi gáā ya ācɛ ohile ŋma ācɛ ula ofigwaahata (144,000) nōo yɔ ipu ɛcɛ nyā?

⁵ Ŋma eko ku acocɛhɔ a jaa kwu eko ku alɔ nyā, ācɛ alɛwa yɔ i lɛ ɛga ō wɛ ipu ācɛ ula ofigwaahata (144,000) nyā. (Ulúk. 12:32; Uróm 8:17) Amáŋ, é da Ujɔni ka ācɛ oligii ku uwa foofonu, gáā yeeyi ipu ɛcɛ nyā ɛpleeko nɛ ɛcɛ gáā mɛ a. Gbɔbu ɛɛ ku eko ku owe nɛhi a kóō gbɔɔ, é géē fu uwa nōo “hile” a “ukɔ̄” cɛɛ kóō mafu ka Ujehofa miyɛ uwa ɛɛ. (Mafú 7:2, 3; 12:17) Ɛpleeko ku owe nɛhi a, é géē je ācɛ oligii nōo hile a kpo gā ɔkpanco kéē gáā ba ācɛ ula ofigwaahata (144,000) ohile nōo tɛtɛ gekwu ɛɛ ma. Abɔɔ a, é géē cɔcɛ́ mla Ujisɔsi ipu Ajɔɔcɛ ku Ɔwɔico.—Umát. 24:31; Mafú 5:9, 10.

6-7. (a) Ɔdi nɛ Ujɔni má ɔhá a, ɔdi nɛ alɔ kē lɔfu nwu lɛyikwu uwa a? (b) Ɔdiya nɛ Ɔdā Nēé Mafú Lɛ Ujɔ́ni ɛyi 7 tiile lɛ ohile ku ācɛ ula ofigwaahata mla “ɛwa nɛ̄hi kú ācɛ”?

⁶ Igbihi nɛ Ujɔni lɛ ígwu nōo gáā cɔcɛ́ mla Ujisɔsi a má kwɛyi a, ó má “ɛwa nɛ̄hi kú ācɛ.” Ígwu ku ācɛ nɛ ó má nyā i kōō tōō gbaluka ŋ. (Mafú 7:9, 10) Ɔdi nɛ alɔ nwu lɛyikwu uwa gla a? Ujɔni kahinii: “Aɛ́nɛ̄ e bá nyā wɛ ācɛ nēe wi ŋmá eko kú ákanya nɛ̄hi ā á. É lɛ awulú kú uwā kpó na, klla le yá kóō le pīya ɛnɛ̄hɛ́ ipú oyī kú Ɔyí álá ā ɛɛ́.” (Mafú 7:14) Igbihi néē le wi ŋma owe nɛhi a, “ɛwa nɛ̄hi kú ācɛ” nyā géē lā oyeeyi ku uwa ipu ɛcɛ nyā klla géē jɔɔnyɛ aɔhá ɛyɛɛyɛyi.—Aíjē 37:9-11, 27-29; Aíit. 2:21, 22; Mafú 7:16, 17.

⁷ Ɔdaŋ ku alɔ wɛ ipu ígwu nōo gáā gā ɔkpanco amāŋ alɔ wɛ ipu ācɛ nōo géē lā oyeeyi ku uwa ipu ɛcɛ nyā, alɔ yɔ i má iyi alɔ ipu ɛlā nōo yɔ ipu ɔkpá ku Ɔdā Nēé Mafú Lɛ Ujɔ́ni ɛyi 7 a? Ii gboo. Eko ɔɔma géē wɛ eko ku eeye nɛhi lɛ ígwu ɛpa nōo gē gba Ujehofa ɛ̄gbā nyā! Alɔ géē gweeye nɛhi abɔ alɔ cɛ ō cɛtra ɔcɛ́ ō ce ku Ujehofa a. Ɔdi ɔhá nɛ ɔkpá ku Ɔdā Nēé Mafú Lɛ Ujɔ́ni da alɔ lɛyikwu owe nɛhi amāŋ akanya nɛhi a?—Umát. 24:21.

8. Ɛgɛnyá nɛ owe nɛhi a gáā gbɔɔ a, ɔdi nɛ ācɛ alɛwa gáā ya a?

⁸ Ipu ikpɛyi ɛlā nōo yɔ gbɔbu lɛ ɛnyā a, alɔ nwu ka ācɛ igɔmɛnti ku ɛcɛ nyā géē kpo ɔfu kwu Ubabilɔn Nɛhi, nōo wɛ otrɛyi ku ɛ̄gbā ō gbā ɛkɛmgbɛ ipu oduudu ɛcɛ a. (Mafú 17:16, 17) Ɔfu néē gáā kpo kwu uwa nyā gáā wɛ ō gbɔɔ ku owe nɛhi a. Ɛnyā géē ya ku ācɛ alɛwa kéē gáā gbɔɔ ō gba Ujehofa ɛ̄gbā nɛɛ? Ehee. Ikɔkɔ ɔɔma, Ɔdā Nēé Mafú Lɛ Ujɔ́ni ɛyi 6 mafu ka eko obɔbi ɔɔma, nɛ ācɛ nōó gē gba Ujehofa ɛ̄gbā ŋ ma géē yɔ i dɔka ogbotu, ŋma aya ku imeli mla aya ku ɔhi ō ta ku ɛcɛ nyā néē le gbla aɛfu a. Abɔ é gáā gbɔɔ ō cɛtra ɔcɛ́ ō ce ku Ujehofa mla Ajɔɔcɛ ku nu ŋ ma, Ujehofa géē má uwa ka aolɛla ku nu.—Ulúk. 11:23; Mafú 6:15-17.

9. Ɛgɛná nɛ ācɛ géē jé ku ācɛ o gba Ujehofa ɛ̄gbā, wɛ ɛyɛɛyi gwu ācɛ nóō gē gba Ujehofa ɛ̄gbā ŋ ma ta a, ɔdi kē gáā ya ācɛ ɔlɛ Ujehofa a?

 ⁹ Ó wɛ ɔkwɛyi, ka ācɛ ɔlɛ Ujehofa géē wɛ ɛyɛɛyi gwo ācɛ ɔhá ta eko lɔnɔ nɛhi ɔɔma nōo wɛ eko ku owe nɛhi a. Uwa gáā wɛ ígwu ku ācɛ foofunu ipu ɛcɛ nyā nōo gē gba Ujehofa ɛ̄gbā klla ta ō lɛyitaajɛ lɛ “ɛbɛ́ obɔ̄bí” á. (Mafú 13:14-17) Abɔ é hayi kpaakpa lɛ Ujehofa a, ó géē ya ku ācɛ nōó cɛ ɔcɛ́ ō ce ku Ujehofa ŋ ma kéē gbɔɔ ō cɔnu nɛhi. Ohigbu ɛnyā, ígwu ku aéwo nōo piyatɔha ɔɔma géē gbɔɔ ō nuunu ta ācɛ ɔlɛ Ɔwɔco ipu oduudu ɛcɛ. Uce ila ku uwa ɔɔma nɛ Ubáyíbu hi ka Ugɔgu ku Umagɔgu a.—Isík. 38:14-16.

10. Ɛgɛnɛ ɔkpá ku Ɔdā Nēé Mafú Lɛ Ujɔ́ni 19:19-21 ka a, ɔdi nɛ Ujehofa gáā ya eko néē gáā nuunu ta ācɛ ɔlɛ nu a?

¹⁰ Ɔdi nɛ Ujehofa gáā ya, eko néē gbɔɔ ō nuunu ta ācɛ ɔlɛ nu mla icɔnu nɛhi ku uwa a? Ó da alɔ kahinii: “N géē cɔ̄nū nɛ̄hi.” (Isík. 38:18, 21-23) Ipu ɔkpá ku Ɔdā Nēé Mafú Lɛ Ujɔ́ni ɛyi 19 mafu ɔdā nōo gáā ya gboce ɔ a. Ujehofa tu ɔyi Nu ɛhɔ ka ó je ogbotu lɛ ācɛ ɔlɛ Nu ka ó klla lɛ aolɛla ku uwa kpo yale. “Aícɔ́ɔja kú ɔkpáncō” nōo wɛ aalelekwu otɛhɔ nōo hayi kpaakpa a, mla ācɛ ula ofigwaahata (144,000) néē lɛ anɔ tu uwa ɛyi a, géē nyɔ tɔha mla Ujisɔsi gáā kpɛfu ta Ugɔgu ku Umagɔgu. (Mafú 17:14; 19:11-15) Ɔdi gáā wɛ oŋmɛyi ku ɛfú nyā a? É géē je ɛjɛɛji ācɛ mla ígwu ku ācɛ nōó cɛ mla ɔcɛ́ ō ce ku Ujehofa ŋ ma cataajɛ duudu!—Jé Ɔdā Nēé Mafú Lɛ Ujɔ́ni 19:19-21.

11. Ɔdi wɛ ɔdā ō cɛgbá fiyɛ duu nōo ya ipu ɔkpá ku Ɔdā Nēé Mafú Lɛ Ujɔ́ni a?

¹¹ Leyi yɛ ɛgɛ nɛ ɔtu géē ya ācɛ nōo hayi kpaakpa ipu ɛcɛ a, ō le wi ɛpleeko néē yɔ i je aolɛla ku Ɔwɔico kpo yiifi a! Ɛpleeko ɔɔma, eeye géē yɔ nɛhi! Eeye nɛhi klla géē yɔ ɔkpanco duu, eko néē lɛ Ubabilɔn Nɛhi a cataajɛ. Amáŋ, ó klla lɛ ɔdā ɔhá nōo géē bi eeye nōo fiyɛ eeye ɔɔma wa. (Mafú 19:1-3) Ɛnyā kē wɛ ɔdā ō cɛgbá nɛhi éyi néē kɛla lɛyikwu ɔ ipu ɔkpá ku Ɔdā Nēé Mafú Lɛ Ujɔ́ni, anu kē wɛ eko nɛ “Ɔyí álá ā gáā lɛ ɔnyā ā.”—Mafú 19:6-9.

12. Ɛgɛ néē ta ɔ ipu ɔkpá ku Ɔdā Nēé Mafú Lɛ Ujɔ́ni 21:1, 2 a, eko nyá wɛ eko ku ɔnyā ō lɛ ku Ɔyi ala a?

¹² Eko nyá néē gáā lɛ ɔnyā a? Ɛjɛɛji ācɛ néē lɛ anɔ tu uwa ɛyi nōo wɛ u 144,000 a, géē pɛ gā ɔkpanco gbɔbu ɛɛ kéē kpo ɛfú ku Amagɛdɔn a. Naana kpɔ a, ó wɛ eko ɔɔma wɛ eko ku ɔnyā ō lɛ ku Ɔyi ala a ŋ. (Jé Ɔdā Nēé Mafú Lɛ Ujɔ́ni 21:1, 2.) Eko ku ɔnyā ō lɛ ku Ɔyi ala a géē wɛ igbihi ɛfu ō kpo ku Amagɛdɔn, néē lɛ ɛjɛɛji aolɛla ku Ɔwɔico kpo cataajɛ kpɛmm a.—Aíjē 45:3, 4, 13-17.

13. Ɔdi wɛyi ku ɔnyā ō lɛ ku Ɔyi ala a, mla ācɛ nōó lɛ ō ya mla uwa a?

¹³ Ɔdi wɛ ɛyi ku ɔnyā ō lɛ ku Ɔyi ala a, mla ācɛ nōó lɛ ō ya mla uwa a piii a? Ɛgɛ nɛ umɛɛlɛ mɛɛlɛ gē je ɔcɛnyilɔ mla ɔcɛnya piyatɔha a. Ɛgɔɔma nɛ umɛɛlɛ mɛɛlɛ ku Ɔyi ala gáā je Ujisɔsi, nōo wɛ Ɔcɛ́ a mɛmla ācɛ 144,000, nōo wɛ “ɔnyā” nu a piyatɔha lɛ duu a. Ɛnɛɛnɛ opiyatɔha nyā géē je igɔmɛnti ɛpɛɛpɛ kwaajɛ, nōo géē le ɔcɛ́ ipu ɛcɛ nyā ihayi 1,000.—Mafú 20:6.

14-15. Ɔdi nɛ ɔkpá ku Ɔdā Nēé Mafú Lɛ Ujɔ́ni ɛyi 21 lɛ ācɛ úlā ofigwáahātá (144,000) a gbla ɔ a? (Ifoto Nōo Yɔ Iyɔbu A.)

¹⁴ Oŋma ɔɔma, Ɔdā Nēé Mafú Lɛ Ujɔ́ni ɛyi 21 lɛ ācɛ úlā ofigwáahātá (144,000) nyā, gbla igeli nɛhi nōo heyifuu néē hi ka  “Ujerúsālɛm ɛ̄yīpɛ̄” a. (Mafú 21:2, 9) É lɛ ikpo ku igeli nyā taajɛ ɛyi ɛcɔ 12, nɛ “é le iyē kú ācotɛ̄hɔ̄ igwɛ́ɛpa kú Ɔyí álá ā éyééye tá tū aɛ́cɔ̄ ā éyééye.” Ɔdiya nɛ ɛnyā he Ujɔni ɔtu a? Ohigbu kā ó má iye ku nu ō ta tu éyi ku aɛcɔ a. Ɛnyā kē wɛ ɛnɛɛnɛ ɛga!—Mafú 21:10-14; Āfi. 2:20.

¹⁵ Igeli doodu ma i lɛbɛɛka igeli nyā ŋ. Ulayi o kpɔcii ku nu a, é bi ɛnɛɛnɛ ugoolu nōo le peee a le ya ɔ. Aiyo 12 néē bi le ya odungwɔɔwɛ ku aokonɔɔwɛ igwɛɛpa a, é bi aɛcɔ ō gbɔla le ya aɔdɔ mla ikpo ō le taajɛ ku igeli a, ōmiya ku nu kē le kpaakpa. (Mafú 21:15-21) Naana kpɔ a, Ujɔni má ka ó lɛ odee nōó yɔ ipu igeli a ɛɛ ŋ! Ó kahinii: “Ń má Agblīihɔ-nɛ̄hi dúúmā ipú igelī ā ŋ́, ohígbū ka Óndú nōo wɛ Ɔwɔicō nōo lɔfú fíyɛ́ dúú ā mɛ́mla Ɔyí álá ā kwɛyí Agblīihɔ-nɛ̄hi ipú nū á. Igelī ā í cɛgbá ɛnɔ, ámāŋ ka ɔyā kéē fíyáajɛ ipú nū ŋ́, ohígbū ka ɛgahi ofíyajɛ nɛ̄hi kú Ɔwɔicō gē fíyáajɛ ipú igelī ā, Ɔyí álá ā kē wɛ agege kú nū á” (Mafú 21:22, 23) Ācɛ nōo yɔ ipu Ujerusalɛm ɛyipɛ nyā lɛ ɛga ō nyɔ ɛgiyi Ujehofa abɔyinu. (Uhíb. 7:27; Mafú 22:3, 4) Ɛnyā mafu ka Ujehofa mla Ujisɔsi wɛ agbliihɔ ku igeli nɛhi ɔɔma a.

16. Ɔdi nɛ alɛɛcɛ gáā jɔɔnyɛ nu, eko nɛ Ajɔɔcɛ Ku Ɔwɔico gáā le ɔcɛ́ ihayi ula ɛpa ce ofu igwo a?

¹⁶ Ó wɛ ɔdā olɔhi nɛhi ku ācɛ néē lɛ anɔ tu uwa ɛyi a, kéē yɔ i gbɛla lɛyikwu igeli nyā. Amáŋ ācɛ nōo lɛ eyiyoce ō lā oyeeyi opiyoo ipu ɛcɛ nyā, lɛ ɔdā nōo ya nɛ ɛnyā cika ō hɛ uwa ɔtu. Ihayi ula ɛpa ce ofu igwo nɛ Ajɔɔcɛ Ku Ɔwɔico gáā lé ɔcɛ́ a, Ujerusalɛm ɛyipɛ a géē bi ɔ̄hā nōó tōō galuka ŋ wa ipu ɛcɛ nyā. Ujɔni má ɔhā nyā yɔ i pɛ bɛɛka “énkpɔ̄ nōo ī je oyēeyī ā.” Abɔ ɔhá ku ɔkpa a wɛ “aɔ́cí nɛ̄ īkpō kú uwā gē je oyēeyī,” nɛ epu ku nu “wɛ ɔdā nōo gē hɛ́ aéwo dóódu tá ŋmá ōcē.” (Mafú 22:1, 2) Ɛjɛɛji ācɛ nōo lā ipu ɛcɛ a géē má itene ŋma aɔdā nyā kpɛmm. Ɛmɛɛma, ɛjɛɛji ācɛ nōo gē lɛyitaajɛ lɛ Ujehofa a géē je jila iyē. Ōcē i gáā yɔ gɛ ŋ, ɔnɔ i gáā yɔ gɛ ŋ, ācɛ i gáā jikwu ɛɛ néē gáā yekwu gɛ ŋ.—Mafú 21:3-5.

17. Ɛgɛ nɛ ɔkpá ku Ɔdā Nēé Mafú Lɛ Ujɔ́ni 20:11-13 mafu a, anyɛ gáā lɛ itene ɛpleeko ku ihayi ula ɛpa ce ofu igwo ipu Ajɔɔcɛ ku Ɔwɔico a?

¹⁷ Anyɛ gáā lɛ itene ŋma ɛnɛɛnɛ ōmiya nyā a? Aya aflɛyi ku ācɛ nōo gáā lɛ itene ŋma anu a, wɛ ɛwa nɛhi ku ācɛ nōo géē wi ŋma Amagɛdɔn mla ɔyipɛ duuma néē géē  ma ipu ɛcɛ ɛyipɛ a. Amáŋ ɔkpá ku Ɔdā Nēé Mafú Lɛ Ujɔ́ni ɛyi 20 klla cokonu, ka Ɔwɔico géē je ācɛ nōo kwū a heyi ŋma ɔlekwu. (Jé Ɔdā Nēé Mafú Lɛ Ujɔ́ni 20:11-13.) Ācɛ o hayi kpaakpa nōo ya “ólɔhi” nōo kwū eko igble a, mɛmla ācɛ o “yá ɔdōbɔ̄bí” nōó lɛ ɛga ō nwu ɛlā lɛyikwu Ujehofa ŋ ma géē je heyi ŋma ɔlekwu. (Ācot. 24:15; Ujɔ́n. 5:28, 29) Ɛnyā wɛ ka ɛjɛɛji ācɛ néē gáā je heyi ŋma ɔlekwu, ɛpleeko ku ihayi ula ɛpa ce ofu igwo a nɛɛ? Ehee. Ācɛ nōo ta ō miyɛ ɛga ō nwu ɛlā lɛyikwu Ujehofa, gbɔbu ɛɛ kéē kwū a i gáā heyi ŋma ɔlekwu ŋ. É lɛ ɛga ō nwu ɛlā lɛyikwu Ujehofa amáŋ é ta, é le mafu ka é cika jɛ ō lā oyeeyi ipu Uparadais ipu ɛcɛ nyā ŋ.—Umát. 25:46; 2 Utes. 1:9; Mafú 17:8; 20:15.

18. Oŋmɛyi ku ihayi ula ɛpa ce ofu igwo a, ɛgɛnyá nɛ āhɔ̄ ku ɛcɛ a gáā lɛ a?

¹⁸ Oŋmɛyi ku ihayi ula ɛpa ce ofu igwo (1,000) a, ɛjɛɛji ācɛ nōo géē lā ipu ɛcɛ ɛpleeko ɔɔma géē je piya ācɛ nōo jila iyē mɛɛlɛ. Íne ō biya nɛ alɔ lugwu ŋma ɛgiyi Adam a, i gáā lɛ abɔ kwu ɔcɛ duuma nōo géē yeeyi eko ɔɔma gɛ ŋ. (Uróm 5:12) Ɔwɔico géē je okonu ō ta nōo yɛce íne nɛ Adam biya a fu duudu. Ɛnyā kē wɛ ka ācɛ nōo lā ipu ɛcɛ a “héyī ŋmá ɔlékwū,” ohigbu ka é wɛ ācɛ nōo géē jila iyē mɛɛlɛ oŋmɛyi ku ihayi ula ɛpa ce ofu igwo (1,000) a.—Mafú 20:5.

19. Ɔdiya nɛ ojama amoomɛ a cɛgbá a?

¹⁹ Alɔ jé ka eko nɛ Ebilii ceyitikwu ya ku Ujisɔsi kóō hii hayi kpaakpa gɛ ŋ ma Ujisɔsi ta. Ó hayi kpaakpa ɛgiyi Ɔwɔico, naana nɛ Ebilii yɔ i ya ɔ ojama. Amáŋ ɛjɛɛji ācɛ gáā hayi kpaakpa lɛ a gla, eko duuma nɛ Ebilii gbɔɔ ō bi ojama gē lɛ uwa a nɛɛ? Ɔnyɔɔnyɛ ku alɔ géē lɛ ɛga ō mafu lɛ Ujehofa ku alɔ i gáā ma ɔ ta gboogboo, eko duuma nɛ Ɔwɔico lɛ Ebilii hɛta oŋmɛyi ku ihayi ula ɛpa ce ofu igwo (1,000) a. (Mafú 20:7) Ācɛ nōo géē hayi kpaakpa ɛpleeko ku ojama amoomɛ a, géē lā oyeeyi opiyoo klla géē jɔɔnyɛ ohɛta ku ɔkwɛyi a. (Uróm 8:21) Ācɛ nōo yɛce Ebilii ya ikpɛyi olɔfu ta ɔ Ɔwɔico a, ó géē lɛ uwa mɛmla Ebilii mla aalelekwu obɔbi ku nu a yiifi piyoo.—Mafú 20:8-10.

20. Ɛgɛnyá nɛ ɔtu yɔ i ya uwɔ lɛyikwu aɛnɛɛnɛ akacɛ nōo yɔ ipu ɔkpá ku Ɔdā Nēé Mafú Lɛ Ujɔ́ni a?

²⁰ Abɔ ɔtu yɔ i ya uwɔ lɛ, abɔ alɔ leyi yɛ ɔkpá ku Ɔdā Nēé Mafú Lɛ Ujɔ́ni nyā ɛ ma? A yɔ i gweeye nɛɛnɛhi ō má iyi uwɔ ipu ɛnɛɛnɛ aakacɛ nyā ŋ? Ɛnyā i lɛ abɔ kwu uwɔ ɔtu ō nyɔ i hi ācɛ igwu, kéē wa i ba alɔ iyē ku alɔ gba Ɔwɔico ɛ̄gbā ɔwɛ okpaakpa a ŋ? (Mafú 22:17) Babanya nɛ alɔ lɛ ɛlā ka lɛyikwu aɔdā nōo géē ya ɛcɔbu a ɛ ma, ɔtu hɛ alɔ i bi. Alɔ klla dɔka ō cɛtra ɛlā nɛ Ujɔni nōo wɛ ɔyikpo ku Ujisɔsi ka a, eko nɛ ó kahinii: “Kóō le lɛ ā. Wā, Óndú Ujísɔ̄si!”—Mafú 22:20.