1. Ɔdi nɛ ɔcɛ cika ō ya, ɔdaŋ ka ó dɔka ō kɛla lɛ ɔcɛ́ ku Upɛsiya a?

LEYI má ɔ ku a lā ɛpleeko ku ihayi ula ɛhili ce ofu ɛhɔ (2,500) ipu ajɛ ku Upɛsiya a. A kē dɔka ō kɛla lɛ ɔcɛ́ ka ajɛ ɔɔma lɛyikwu ɛlā éyi. Ohigbu ɔɔma a lɛ iyawu yɛ gā igeli nɛhi ku Ususa (shushan) ɛga nɛ ɔcɛ́ a lā a. Amáŋ, gbɔbu ɛɛ ku a lɔfu kɛla lɛ ɔcɛ́ a, a cika ō miyɛ ɛga ŋma ɛgiyi nu. Ɔdaŋ ka ya lɛ a ŋ, nɛ a kē dɔka ō kɛla lɛ ɔ piii, é lɔfu ŋmo uwɔ!—Ɛ́sta 4:11.

2. Ɛgɛnyá nɛ Ujehofa dɔka ku ɔtu kóō ya alɔ lɛyikwu ō kɛla lɛ ɔ a?

² Alɔ gweeye nɛɛnɛhi ō jé ku Ujehofa i lɛbɛɛka ɔcɛ́ ku Upɛsiya ɔɔma a ŋ! Ujehofa lɔfu nɛɛnɛhi klla cɛgbá fiyɛ ɔlɛɛcɛ duuma nōo wɛ ɔcɛ́ a. Naana a, alɔ lɔfu kɛla lɛ ɔ eko duuma gla. Ó dɔka ku alɔ hii yuufi ō kɛla lɛ ɔ ŋ. Ocabɔ mafu, naana nɛ Ujehofa lɛ aɛnɛɛnɛ icagba, bɛɛka Ɔcɛ Ō Ya Ɔna Ku Odee, O Lɔfu Fiyɛ Duu, mla Ondu Alɔ a, ó klla dɔka ku alɔ kɛla lɛ ɔ, ŋma lɛ ō hi ɔ iyē nɛ alɔ jé lɔɔlɔhi, “Ádā.” (Umát. 6:9) Alɔ gē gweeye nɛhi ku Ujehofa dɔka ku alɔ jé ku alɔ yɔ kwu ɔ ajaajɛ!

3. Ɔdiya nɛ alɔ lɔfu hi Ujehofa ku “Ádā” a, ɔdi nɛ ikpɛyi ɛlā nyā géē kɛla lɛyikwu ɔ a?

³ Ó kpaakpa ku alɔ hi Ujehofa ka “Ádā,” ohigbu ku anu ya ɔdā doodu nōo yeeyi a. (Aíjē 36:9) Ohigbu ka ó wɛ Ádā alɔ a, alɔ klla cika ō lɛyitaajɛ lɛ ɔ. Ɔdaŋ ku alɔ gē ya ɔdā nɛ ó gē da alɔ ku alɔ ya, alɔ géē jɔɔnyɛ ɔhā alɛwa. (Uhíb. 12:9) Ɔhā alɛwa ɔɔma kē lɛ ō ya mla ō lā oyeeyi opiyoo ipu ɛcɛ nyā amāŋ ɔkpanco. Alɔ klla gē jɔɔnyɛ itene alɛwa babanya. Ikpɛyi ɛlā nyā géē kɛla lɛyikwu aɔdā nōo mafu babanya ka Ujehofa wɛ Adā nōo yihɔtu alɔ. Ó klla géē kɛla lɛyikwu aɔdā nōo ya ɛɛ nɛ alɔ cika ō jé kpɔcii ka ó gáā ma alɔ ta ɛcɔbu ŋ. Amáŋ, aflɛyi alɔ leyi yɛ ɔdā nōo ya ɛɛ nɛ alɔ cika ō jé kpɔcii ka Ujehofa wɛ Adā nōo yihɔtu alɔ nɛhi, nōo klla dɔka ō ta alɔ abɔ a.

4. Ɔdiya nɛ ó gē lɔnɔ ta ācɛ ōhī ō má Ujehofa bɛɛka Adā uwa a?

⁴ Ó gē lɔnɔ ta uwɔ ō má Ɔwɔico bɛɛka Adā nɛɛ? Ācɛ ōhī lɔfu gbɛla ku Ujehofa fiyɛ duu a, ku alɔ i cɛgbá lɛ ɔ ŋ. É gbɛla ku Ɔwɔico Nōo Fiyɛ Duu a lɛ ɛlá wu ɔnyɔɔnyɛ ku uwa ŋ. Nanna a, Ujehofa nōo yihɔtu alɔ a, i dɔka ku alɔ gbɛla lɛ a ŋ. Ó je oyeeyi lɛ alɔ klla dɔka ku alɔ lɛ ɛma olɔhi mla ɔ. Abɔ Upɔlu lɛ ɛlā ɔkwɛyi nyā ka a, ó klla lɛ ɔ ta ācɛ Atɛnsi nōo yɔ i jahɔ lɛ ɔ a eyī peee ku Ujehofa “í kē yɔ̄ ligbó lɛ ɔ̄cɛ dúúmā kú alɔ ŋ́.” (Ācot. 17:24-29) Ɔwɔico dɔka ku eyeeye ku alɔ kóō kɛla lɛ ɔ ɛgɛ nɛ ɔyipɛ nɛ̄ŋcɛ́ gē lɔfu kɛla lɛ adā nu mɛmla ɛ́nɛ́ nu nōo yihɔtu nu klla lɛ ɛlá wu ɔ a.

5. Ɔdi nɛ alɔ nwu ŋma ocabɔ ku ɔyinɛ alɔ nɔnya éyi a?

⁵ Ó lɔfu lɔnɔ ta ācɛ ōhī kē má Ujehofa bɛɛka Adā a, ohigbu ku adā nōo ma uwa a mafu ihɔtu lɛ uwa ligii. Adā ōhī i kóō ma ihɔtu duuma fu lɛ ayipɛ ɔlɛ uwa ŋ, e kóō gbonɛnɛ lɛ uwa ŋ. Má ɔdā nɛ ɔyinɛ alɔ nɔnya éyi ka a. Ó kahinii: “Adā um gē ca alɔ ɛca nɛɛnɛhi. Eko aflɛyi nɛ um gbɔɔ ō klɔcɛ ku Ubáyíbu a, ó lɔnɔ ta um nɛhi ō tubla Adā nōo yɔ ɔkpanco a ajaajɛ. Amáŋ abɔ um gáā lɛ Ujehofa jé a, ɛnyā kpɛmm kwu piyabɔ.” Ó gē ya uwɔ lɛ a duu? Ó lɛ a, ɔtu kóō hii biya gā uwɔ ŋ. Abɔ eko yɔ i nyɔ a, awɔ abɔyi uwɔ géē má ka Ujehofa wɛ Adā nōo lɔhi fiyɛ adā duuma a.

6. Ɛgɛ nɛ ɔkpá ku Umátiyu 11:27 ka a, ɔdi wɛ ɔwɛ éyi nɛ Ujehofa gē ta alɔ abɔ ku alɔ má ɔ bɛɛka Adā nōo yihɔtu alɔ a?

⁶ Aɛlā nɛ Ujisɔsi ka mla aɔdā nɛ ó ya, nɛ Ujehofa ya kéē lɛ ɔ ta ipu Ubáyíbu a, wɛ ɔwɛ éyi nɛ Ujehofa gē ta alɔ abɔ ku alɔ má ɔ bɛɛka Adā nōo yihɔtu alɔ a. (Jé Umátiyu 11:27.) Ujisɔsi ya ɛgbla ku uce ō ya ka Adā nu mɛɛlɛ, ohigbu ɔɔma ó lɔfu kahinii: “Ɔ̄cɛ nōo lɛ um má, lɛ Áda ā má ɛɛ́.” (Ujɔ́n. 14:9) Igbalɛwa Ujisɔsi gē hi Ujehofa ka Adā. Ocabɔ mafu, ipu ɔkpá ku Umátiyu, Umáki, Ulúkú, mɛmla Ujɔ́ni a, Ujisɔsi hi Ujehofa ka “Ádā” odee bɛɛka ɛga ofu ahaata ce ɛhɔ a. Ɔdiya nɛ Ujisɔsi kɛla nɛhi lɛyikwu Ujehofa lɛ a? Ɔdā éyi nōo ya a wɛ kahinii, ó dɔka ku ācɛ kéē jé kpɔcii ka Ujehofa wɛ Adā nōo yihɔtu alɔ nɛɛnɛhi.—Ujɔ́n. 17:25, 26.

7. Ɔdi nɛ alɔ nwu lɛyikwu Ujehofa ŋma ɔwɛ nɛ ó ya odee mla ɔyi nu Ujisɔsi a?

⁷ Leyi yɛ ɔdā nɛ alɔ nwu lɛyikwu Ujehofa ŋma ɔwɛ nɛ Ujehofa ya odee mla ɔyi nu Ujisɔsi a. Ujehofa gē jahɔ tu ɔkɔ ō gba ku Ujisɔsi eko doodu. Ó wɛ jahɔ tu ɔ foofunu ŋ, amáŋ, ó gē ya ɔdā nɛ ó gbɔɔkɔ ku nu a lɛ ɔ duu. (Ujɔ́n. 11:41, 42) Ipu ojama duuma nɛ Ujisɔsi má a, ó má eko doodu ka Adā nu yihɔtu nu klla ta ɔ abɔ.—Ulúk. 22:42, 43.

8. Ɔwɛ nyá nɛ Ujehofa ta Ujisɔsi abɔ a?

⁸ Ujisɔsi mafu ku Adā nu je oyeeyi lɛ ɔ a, anu klla yɔ i gbo oyeeyi ku nu a, anu ya ɛɛ nɛ ó kahinii: “Ohígbū koó yēeyī ā, n yēeyī dúú” a. (Ujɔ́n. 6:57) Ujisɔsi kpɔtuce Adā nu nɛɛnɛhi. Ujehofa kē je ɛjɛɛji aɔdā nɛ ó cɛgbá o ya ɛɛ kóō yeeyi a lɛ ɔ. Ɛ̄nɛ̄ ō cɛgbá fiyɛ a wɛ ka Ujehofa ta Ujisɔsi abɔ kóō hayi kpaakpa.—Umát. 4:4.

9. Ɛgɛnyá nɛ Ujehofa mafu ka ó wɛ Adā nōo yihɔtu ku Ujisɔsi nɛhi a?

⁹ Ohigbu ku Ujehofa wɛ Adā ihɔtu a, o ya ku ɔyi nu kóō le jé kpɔcii ka ó yɔ mla ɔ. (Umát. 26:53; Ujɔ́n. 8:16) Naana nɛ Ujehofa i gbo Ujisɔsi ŋma ɛgiyi ɛjɛɛji unwalu ku nu ŋ ma a, ó ta ɔ abɔ kóō lɔtu ojama. Ujisɔsi jé kpɔcii ku unwalu duuma nɛ ó lɔfu má a, i gáā gboji ajɛ ŋ. (Uhíb. 12:2) Ujehofa mafu ka ó yihɔtu ku Ujisɔsi, ŋma lɛ ō jahɔ ta ɔ, ō je aɔdā nɛ ó cɛgbá a lɛ ɔ,  ō nwu ɔ ɛlā, mɛmla o ta ɔ abɔ duu. (Ujɔ́n. 5:20; 8:28) Babanya, alɔ má ɔwɛ nɛ Adā alɔ Ujehofa gē ta alɔ abɔ ɛgɛ nɛ ó ta Ujisɔsi abɔ a.

10. Oŋma ɛlā nōo yɔ ipu ɔkpá ku Aíjē Kú Ɛ̄gbā 66:19, 20 a, ɛgɛnyá nɛ Ujehofa gē mafu ka ó yihɔtu alɔ a?

¹⁰ Ujehofa gē jahɔ ta ɔkɔ ō gba ku alɔ. (Jé Aíjē Kú Ɛ̄gbā 66:19, 20.) Ujehofa i dɔka ku ɔkɔ ō gba ku alɔ kóō lɛ ɛji ŋ. Ó da alɔ ku alɔ gbɔɔkɔ lɛ ɔ eko doodu. (1 Utes. 5:17) Alɔ lɔfu kɛla lɛ Ujehofa eko duuma mla ɛga doodu nɛ alɔ yɔ a gla. Ɛ̄jɛ̄ i gē jɛ Ujehofa ō jahɔ ta alɔ ŋ. Ó le tutu ō jahɔ ta alɔ eko doodu. Ɔdaŋ ku alɔ gáā le jé ka Ujehofa gē jahɔ tu ɔkɔ ō gba ku alɔ, ó géē ya ku alɔ tublɔ ɔ ajaajɛ fiyɛ. Ɔcɛ éyi nōo ta ɔkpá ku Aíjē Kú Ɛ̄gbā a kahinii: “N géē yíihɔtū tá Óndú ā, ohígbū ka ó ī pó ɔkɔ kú um.”—Aíjē 116:1.

11. Ɛgɛnyá nɛ Ujehofa gē po ɔkɔ ō gba ku alɔ a?

¹¹ Ujehofa i gē jahɔ ta ɔkɔ ō gba ku alɔ foofunu ŋ, amáŋ ó gē cila ɔkɔ ō gba a duu. Ujɔni nōo wɛ ɔcocɛhɔ a da alɔ kahinii: “Ɔ́dāŋ́ ka alɔ ba ɔ́ ɔdā dóódu nōo tá ɔ̄ ɔtū, ó gē jāhɔ̄ lɛ alɔ.” (1 Ujɔ́n. 5:14, 15) Ó wɛ ɔkwɛyi ku Ujehofa i gáā lɔfu cila ɔkɔ ō gba ku alɔ ɛgɛ nɛ alɔ leyice a ŋ. Ó jé ɔdā nōo lɔhi lɛ alɔ fiyɛ a, ohigbu ɔɔma, ohi ku nu gē wɛ ehee ekoohi amāŋ ó dɔka ku alɔ gbeyi.—2 Ukɔ́r. 12:7-9.

12-13. Ɔwɛ ɛgɛnyá nɛ Adā alɔ Ujehofa gē ya ɛgbá ku alɔ a?

¹² Ujehofa gē ya ɛgbá ku alɔ. Ujehofa gē ya ɔda nɛ ó dɔka ku oduudu adā kéē ya a. (1 Utím. 5:8) Ó gē je ɔdā nɛ ayipɛ ɔlɛ nu cɛgbá o ya ɛɛ kéē yeeyi a lɛ uwa. Ó dɔka ku alɔ junwalu lɛ ɔtu ku alɔ lɛyikwu ɔdole, ɔda ō wiiye, amāŋ ɛga nɛ alɔ gáā lā ŋ. (Umát. 6:32, 33; 7:11) Abɔ Ujehofa wɛ Adā nōo yihɔtu alɔ a, ó klla le ya ku alɔ lɛ ɛjɛɛji aɔdā nɛ alɔ cɛgbá a ɛcɔbu duu.

¹³ Ɛ̄nɛ̄ ō cɛgbá fiyɛ duu a wɛ ka Ujehofa gē je aɔdā nɛ alɔ cɛgbá o ya ɛɛ ku alɔ lɛ ɛma olɔhi mla ɔ a lɛ alɔ. Ipu Ubáyíbu, Ujehofa da alɔ ɛdɔ ɔcɛ nɛ ó wɛ, ɛgɛ nɛ ó dɔka ka aɔdā nɛ ó ya a kéē lɛ, ɔdā nōo ya ɛɛ nɛ ó ya alɔ, mɛmla aɔdā nō géē ya ɛcɔbu a. Ó ta alɔ abɔ ŋma lɛ ō bi adā alɔ mɛmla ɛ́nɛ́ alɔ amāŋ ācɛ ɔhá le nwu alɔ ɛlā lɛyikwu ɔ. Ó kē yɔ i ta alɔ abɔ ku alɔ wɛ ɔya ku nu, ŋma lɛ ō yɔ i bi anyakwɔcɛ ku ujɔ, ayinɛ nɔnya mɛmla ayinɛ nɔnyilɔ nōo jikoko ipu ujɔ a le je otabɔ lɛ alɔ ɔwɛ ogbonɛnɛ. Ó wɛ ɔɔma foofunu ŋ, Ujehofa klla gē nwu alɔ ɛlā ipu ōjila ku ujɔ mɛmla ayinɛ alɔ nɔnya mla ayinɛ alɔ nɔnyilɔ. Oŋma lɛ ɔwɛ nyā mla aɔwɛ ɔhá, Ujehofa gē mafu ka ó lɛ ɛlá wu ɛjɛɛji alɔ ɛgɛ nɛ adā gē ya a.—Aíjē 32:8.

14. Ɔdiya nɛ Ujehofa gē nwu alɔ ɛlā a, ɛgɛnyá nɛ ó kē i bi le ya ɔ a?

¹⁴ Ujehofa gē nwu alɔ ɛlā. Alɔ i lɛbɛɛka Ujisɔsi nōo jila iyē a ŋ. Ohigbu ɔɔma Ujehofa gē ya alɔ itala eko duuma nōó cɛgbá, ó ya ɛɛ kóō bi ɔ le nwu alɔ ɛlā. Ubáyíbu da alɔ kahinii: “Óndú ā gē yá ɔ̄cɛ nɛ̄ ɔtū nū he ɔ́ ā itala.” (Uhíb. 12:6, 7) Ujehofa gē ya alɔ itala ɔwɛ ɛyɛɛyɛyi. Ocabɔ mafu, alɔ lɔfu jé odee ŋma ipu Ubáyíbu amāŋ po odee ipu ōjila ku ujɔ nōo géē cɛ lɛ alɔ wa i má ku alɔ cɛgbá opiyabɔ ɔwɛ nɛ alɔ gē gbɛla amāŋ ya odee a. Amāŋ, otabɔ nɛ alɔ cɛgbá a lɔfu wa ŋma ɛgiyi anyakwɔcɛ ku ujɔ. Ɛgɛ duuma nɛ itala a kóō lɛ, alɔ jé ka ihɔtu nɛ Ujehofa lɛ lɛ alɔ a, ya ɛɛ nɛ ó gē ya alɔ itala a.—Ujɛr. 30:11.

15. Ɔwɛ ɛyɛɛyɛyi nyá nɛ Ujehofa gē bi le gbo alɔ a?

¹⁵ Ujehofa gē ta alɔ abɔ ku alɔ lɔtu ojama. Ɛgɛ nɛ ada nōo yihɔtu ayi nu gē ta uwa abɔ eko néē yɔ ipu unwalu a, ɛgɔɔma nɛ Adā alɔ Ujehofa gē ta alɔ abɔ ku alɔ lɔtu  ipu unwalu a. Ó gē je alelekwu ihɔ ku nu lɛ alɔ. Alelekwu a kē i gbo alɔ ŋma ɛgiyi ɔdā duuma nōo lɔfu je ɛma ku alɔ mla Ujehofa biya a. (Ulúk. 11:13) Ujehofa klla gē ta alɔ abɔ eko duuma nɛ ɔtu ku alɔ lɛ gbenyi. Ocabɔ mafu, ó je ɛnɛɛnɛ eyiyoce lɛ alɔ. Eyiyoce ɔɔma gē ta alɔ abɔ ku alɔ lɔtu ojama olɔnɔ duuma. Leyi yɛ ɛlā nyā ɛ: Ɔdobɔbi duuma nōo kóō ya alɔ naana, Ujehofa nōo yihɔtu alɔ a géē ya ku aɔdobɔbi ɔɔma kóō mɛ. Unwalu duuma nɛ alɔ yɔ i má a i gáā yɔ piyoo ŋ, amáŋ aɔdā nɛ Ujehofa gē je lɛ alɔ a géē yɔ ogboogboo ɛcɛ.—2 Ukɔ́r. 4:16-18.

16. Ɔdiya eko nɛ Adam ya ikpɛyi olɔfu tu Ujehofa Adā nu nōo yihɔtu nu a?

¹⁶ Ō gbɛla lɛyikwu ɔdā nɛ Ujehofa ya eko nɛ Adam ya ikpɛyi olɔfu tu ɔ a, géē ta alɔ abɔ ku alɔ má ka ó yihɔtu alɔ nɛɛnɛhi. Oŋma eko nɛ Adam ya ikpɛyi olɔfu tu Ujehofa a, ó wɛ ipu apɔlɛ ku Ujehofa gɛ ŋ, ayaayi ku nu i kē wɛ gɛ ŋ duu. (Uróm 5:12; 7:14) Amáŋ Ujehofa lɛ odee ya, o ya ɛɛ kóō ta ayaayi ku Adam abɔ.

17. Ɔdi nɛ Ujehofa ya boobu nɛ Adam ya ikpɛyi olɔfu tu ɔ a?

¹⁷ Ujehofa ya Adam itala, amáŋ, ó cokonu ka anuɔ géē ta ayaayi ku Adam abɔ. Boobu, Ujehofa gáā lɛ okonu ce ka ācɛ nōo lɛyitaajɛ lɛ ɔ a géē wɛ ipu apɔlɛ ku nu kpɔ. (Ohút. 3:15; Uróm 8:20, 21) Ujehofa lɛ ɛnyā ya tɔɔtɛ, oŋma lɛ ikwū nɛ ó cɛ lɛ ɔyi nu Ujisɔsi kóō gáā kwū lɛ alɔ a. Ɔdā nyā nɛ Ujehofa ya ohigbu alɔ a, mafu ka ó yihɔtu alɔ nɛɛnɛhi.—Ujɔ́n. 3:16.

18. Ɔdiya nɛ alɔ jé kpɔcii ku Ujehofa dɔka ka alɔ wɛ ayipɛ ɔlɛ nu, naana nɛ alɔ kóō ma ɔ ta gbɔbu ɛ ma?

¹⁸ Nanna nɛ alɔ i jila iyē ŋ ma a, Ujehofa dɔka ku alɔ wɛ ipu apɔlɛ ku nu kpɔ. Ó gē gbɛla ka ō ta alɔ abɔ wɛ iyo nɛhi lɛ ɔ ŋ. Alɔ lɔfu lɛ Ujehofa abɔ gaajɛ amāŋ ma ɔ ta  eko kpii, naana a, Ujehofa gē leyice ku alɔ géē cigbihi wa ɛgiyi nu kpɔ. Ujisɔsi mafu ɛgɛ nɛ Ujehofa yihɔtu ayipɛ ɔlɛ nu lɛ a, ipu aciije nɛ ó ta lɛyikwu ɔyinɔnyilɔ nōo bi a. (Ulúk. 15:11-32) Adā nɛ ɔyi nu nyɛɛ ŋma ɔlɛ ipu aciije ɔɔma gē leyice lɔfu lɔfu ku ɔyi nu nɔnyilɔ géē cigbihi wa ɔlɛ kpɔ. Eko nɛ ɔyi a kwu cigbihi wa ɔlɛ a, adā nu gweeye nɛɛnɛhi klla ya ɔ omaaba wa ɔlɛ. Ɔdaŋ ku alɔ ma Ujehofa ta gbɔbu, nɛ alɔ kē le piyabɔ, alɔ jé kpɔcii ku Adā alɔ nōo yihɔtu alɔ a le tutu ō miyɛ alɔ cigbihi kpɔ.

19. Ɛgɛnyá nɛ Ujehofa gáā lɛ aɔdobɔbi nōo biya kpɛmm ohigbu Adam a kpo glaya a?

¹⁹ Adā alɔ géē lɛ aɔdobɔbi nōo biya kpɛmm ohigbu Adam a kpo glaya. Abɔ Adam ya ikpɛyi olɔfu tu Ujehofa a, Ujehofa gáā le miya ō miyɛ ācɛ ula ofigwaahata (144,000) ŋma ipu ɛcɛ nyā, kéē wɛ aɔcɛ́ mɛmla acogwɛɛya mla ɔyi nu Ujisɔsi ɔkpanco. Ipu ɛcɛ ɛpɛpɛ a, Ujisɔsi mla ācɛ nōo ba nyā, géē ta ācɛ nōo gē lɛyitaajɛ lɛ Ujehofa a abɔ kéē gáā jila iyē kpɔ. Ɔdaŋ kē lɛ ojama amoomɛ ku ohayi kpaakpa ku uwa má mɛ, Ɔwɔico géē je oyeeyi opiyoo lɛ uwa. Ɛpleeko ɔɔma, Adā alɔ géē gweeye nɛɛnɛhi ō má ɛgɛ nɛ ɛcɛ a géē le mu mla ayipɛ ɔlɛ nu nōo jila iyē a. A hɛbɛɛ, ó wɛ eeye nɛ̄ŋcɛ́ nɛ alɔ gáā gwo ɛpleeko ɔɔma a nóó!

20. Ɔwɛ ɛyɛɛyɛyi nyá nɛ Ujehofa mafu lɛ alɔ ka ó yihɔtu alɔ ɛ ma, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nōo gboce ɛnyā a?

²⁰ Ujehofa le mafu lɛ alɔ ka ó yihɔtu alɔ nɛɛnɛhi ɛ. Anu foofunu wɛ Adā nōo lɔhi fiyɛ ɛjɛɛji adā a. Ó gē po ɔkɔ ō gba ku alɔ, klla gē ya ɛjɛɛji ɛgbá ku alɔ. Ó gē nwu alɔ ɛlā klla gē ta alɔ abɔ. Ó klla géē ya aɔdā olɔhi alɛwa lɛ alɔ ɛcɔbu. Ó gē cɛ lɛ alɔ gweeye nɛɛnɛhi ō jé ka Adā alɔ yihɔtu alɔ klla lɛ ɛlá wu alɔ nɛɛnɛhi! Ipu ikpɛyi ɛlā nōo gboce ɛnyā a, alɔ géē kɛla lɛyikwu ɔwɛ ɛyɛɛyɛyi nɛ alɔ lɔfu mafu ka ihɔtu ku Ujehofa jɛ alɔ eyī nɛhi a.