1. Ɔdiya nɛ ɔtu gē ya ācɛ nōo gē gba Ujehofa ɛ̄gbā bɛɛka é yɔ foofu uwa ekoohi a?

EKOOHI, ɔtu gē ya ɛyinɛhi ku alɔ bɛɛka alɔ yɔ foofu alɔ a. Lɛ ācɛ ōhī, ó gē ya uwa gboji ajɛ ŋ. Aku ācɛ ɔhá kéē i gboji ajɛ. Ó lɔfu ya alɔ bɛɛka alɔ yɔ foofu alɔ ɔdaŋ ku alɔ kóō yɔ mla ācɛ alɛwa naana. Ó gē lɔnɔ tu ācɛ ōhī kéē lɛ aɔya ipu ujɔ ɛyipɛ néē ya anu a. Ācɛ ōhī ŋma apɔlɛ néē gē ya aɔdā alɛwa tɔha, amáŋ ó gē ya uwa bɛɛka é yɔ foofu uwa, ɔdaŋ kē le yɛ ligbo gwu ācɛ apɔlɛ ku uwa ta. Ó kē lɛ ācɛ ɔhá nɛ abɔ ku ācɛ néē yihɔtu ku uwa nōo kwu a kē yɔ i kwu uwa nɛhi. Ɔtu kē lɔfu ya Ācɛ O Yɛce Ukraist ōhī, ofiyɛ duu ācɛ nōo nwu ɔkwɛyi a nōó gboji ɛ ŋ bɛɛka é yɔ foofu uwa, ɔdaŋ ku a apɔlɛ ku uwa amāŋ aɔya ku uwa nōó gē gba Ujehofa ŋ ma leyi gwu uwa bonu, amāŋ gbɔɔ ō ya uwa ŋmo.

2. Aɔka nyá nɛ alɔ gáā cila a?

² Ujehofa jé ɔdā doodu lɛyikwu alɔ. Ɔdaŋ ka ɔtu gē ya alɔ bɛɛka alɔ yɔ foofu alɔ, ó jé, ó kē dɔka ō ta alɔ abɔ. Ɛgɛnyá nɛ Ujehofa gáā ta alɔ abɔ a? Ɔdi nɛ alɔ lɔfu ya ō ta iyi alɔ abɔ a? Ɛgɛnyá nɛ alɔ lɔfu je otabɔ lɛ ācɛ ɔhá ipu ujɔ nɛ ɔtu gē ya uwa lɛ a? Alɔ leyi yɛ ohi ku aɔka nōo ba nyā.

3. Ɛgɛnyá nɛ Ujehofa mafu ka ó lɛ ɛlá wu Ɛlayija a?

³ Ujehofa dɔka ku ɛjɛɛji ācɛ nōo gē gba ɔ ɛ̄gbā a kéē gweeye. Ó yɔ kwu eyeeye ku alɔ ajaajɛ, ó kē jé eko nɛ ɔtu gē biya lɛ alɔ a. (Aíjē 145:18, 19) Gbɛla lɛyikwu ɛgɛ nɛ Ujehofa lɛ ɛlá wu Ɛlayija nōo wɛ ocomɛɛbɛ eko nɛ ɔtu biya lɛ ɔ, mla ɛgɛ nɛ ó ta ɔ abɔ a. Ɔcɛ nōo hayi kpaakpa ɔɔma lā ɛpleeko olɔnɔ ku ɔ̄kā ku  ācɛ Isrɛlu. Ācɛ nōo lɛ íkwu ipu éwo ku Isrɛlu nōó yihɔtu ku Ujehofa ŋ ma, ya ācɛ nōo gē gba ɔ ɛ̄gbā a ŋmo nɛɛnɛhi. Ɛlayija kē wɛ ɔcɛ éyi néē dɔka ō je ŋmo piii. (1 Aɔ́cɛ́ 19:1, 2) Ɛlayija klla gbɛla ka anuɔ foofunu wɛ ɔcɛ nōo hile nōo yɔ i gba Ujehofa ɛ̄gbā a, ɛnyā kē wɛ ɔdā nōo biya ɔ ɔtu nɛhi. (1 Aɔ́cɛ́ 19:10) Boobu a, Ɔwɔico ya odee kóō je otabɔ lɛ Ɛlayija. Ujehofa ta alelekwu otɛhɔ éyi ɛhɔ kóō lɛ ɔtu ō tu kwu ɔtu je lɛ ɔcomɛɛbɛ ɔɔma ka ó yɔ foofunu ŋ. Alelekwu otɛhɔ a da Ɛlayija ka ó lɛ alɛwa ku ācɛ Isrɛlu ɔhá nōo yɔ i gba Ujehofa ɛ̄gbā kpaakpa!​—1 Aɔ́cɛ́ 19:5, 18.

4. Ɛgɛnyá nɛ ɔkpá ku Umáki 10:29, 30 mafu ɛgɛ nɛ Ujehofa lɛ ɛlá wu ācɛ ɔlɛ nu, nɛ otabɔ néē gē miyɛ ŋma ɛgiyi ācɛ ɔhá a hɛ uwa abɔ a?

⁴ Ujehofa jé ku eko duuma nɛ alɔ le miya ō gba ɔ ɛ̄gbā, ka ōhī ku alɔ géē cɛgbá ō leyi gwu aɔdā alɛwa bonu. Ɔdā éyi nōo lɔfu hɛ alɔ abɔ a wɛ otabɔ nɛ alɔ gē miyɛ ŋma ɛgiyi ācɛ apɔlɛ ku alɔ, amāŋ ŋma ɛgiyi aɔya ku alɔ nōó yihɔtu ku Ujehofa ŋ ma. A jé ŋ, ohigbu ufi nōo yɔ ipu ɔtu ku Upita ya ɛɛ nɛ ó da Ujisɔsi ɔka kahinii: “Alɔ habɔ̄ ɔdā dóódu tá gbɔɔ́ ō yɛce uwɔ ɛɛ́. Ɔdí nɛ̄ alɔ kē í lɛ mɛ́ɛ̄ ā?” (Umát. 19:27) Ujisɔsi bi ɔwɛ ogbonɛnɛ le da ayikpo ku nu ku ujɔ a géē lɛbɛɛka apɔlɛ lɛ uwa. (Jé Umáki 10:29, 30.) Ujehofa Adā alɔ nōo yɔ ɔkpanco a, cokonu ka anuɔ géē je otabɔ lɛ ācɛ nōo dɔka ō gba ɔ ɛ̄gbā a. (Aíjē 9:10) Leyi yɛ aɔdā ocɛgbá ōhī nɛ a lɔfu ya ō miyɛ otabɔ ku Ujehofa, eko duuma nɛ a gbɔɔ ō nya mla ɔtu nōo gē ya uwɔ bɛɛka a yɔ foofu uwɔ a.

5. Ɔdiya ɛɛ nōó lɔhi ō gbɛla lɛyikwu ɛgɛ nɛ Ujehofa yɔ i ta uwɔ abɔ a?

⁵ Gbɛla lɛyikwu ɛgɛ nɛ Ujehofa yɔ i ta uwɔ abɔ a. (Aíjē 55:22) Ɛnyā géē ta uwɔ abɔ ō má ku á yɔ foofu uwɔ ŋ. Carol * ɔyinɛ alɔ nɔnya nōó lɛ ɔba ɛ ŋ, nɛ apɔlɛ ku nu duuma i yɔ ipu ɔkwɛyi a ŋ ma kahinii: “Eko duuma nɛ um gbɛla lɛyikwu ɛgɛ nɛ Ujehofa ta um abɔ ku um lɔtu eko nɛ āhɔ̄ lɔnɔ gā um a, ɔɔma gē ta um abɔ ō má ku um yɔ foofu um ŋ. Ó klla cɛ gā um jé kpɔcii ku Ujehofa géē yɔ i je otabɔ gā um ɛcɔbu.”

6. Ɛgɛnyá nɛ ɔkpá ku 1 Upíta 5:9, 10 lɔfu je ɔtu ō tu kwu ɔtu lɛ ācɛ nōo yɔ i nya mla ɔtu nōo gē ya uwa bɛɛka é yɔ foofu uwa a?

 ⁶ Gbɛla lɛyikwu ɛgɛ nɛ Ujehofa yɔ i je otabɔ lɛ ayinɛ alɔ nɛ ɔtu gē ya uwa bɛɛka é yɔ foofu uwa a. (Jé 1 Upíta 5:9, 10.) Ɔyinɛ alɔ nɔnyilɔ Hiroshi nɛ anu foofunu wɛ Ɔcɛ Ocijali Ku Ujehofa ŋma apɔlɛ ku nu ŋmiifi ihayi alɛwa a kahinii: “Ipu ujɔ, ó tɔɔtɛ ō jé ku ɛjɛɛji ācɛ lɛ unwalu. Alɔ jé ku ɛjɛɛji alɔ yɔ i ya ɔdā nɛ alɔ ya gla ō gba Ujehofa ɛ̄gbā, ɔɔma kéē i lɔfu ta ācɛ nōó lɛ apɔlɛ duuma ipu ɔkwɛyi a ŋ ma abɔ.”

7. Ɛgɛnyá nɛ ɔkɔ ō gba ta uwɔ abɔ a?

⁷ Bēē gbɔɔkɔ, jé Ubáyíbu mla ō gā ōjila ku ujɔ ojigogo. A cika ō da Ujehofa ɛgɛ nɛ ɔtu gē ya uwɔ lɛ a yiili. (1 Upít. 5:7) Massiel kahinii: “Ɔdā ocɛgbá nɛhi éyi nōo ta um abɔ ku um lɔtu ō yɔ foofu um a wɛ ō gbɔɔkɔ lɛ Ujehofa ŋma ɔtu.” Eko nɛ ɔyinɛ alɔ nɔnya nōo wɛ ɔyipɛ ɔncɛnya nyā miya ō gba Ujehofa ɛ̄gbā a, ɔtu ya ɔ bɛɛka ó yɔ foofunu ohigbu ku apɔlɛ ku nu i gē gba Ujehofa ɛ̄gbā ŋ. “Ó wɛ Adā ku um ɔkwɔɔkwɛyi, n kē i gbɔɔkɔ lɛ ɔ igbalɛwa ɛ̄cī doodu, gē da ɔ ɛgɛ nɛ ɔtu gē ya um lɛ a.”

8. Ɛgɛnyá nōo jé Ɛlā ku Ɔwɔico mla ō gbɛla tu ɔ ta uwɔ abɔ a?

⁸ Jé Ɛlā ku Ɔwɔico ɛ̄cī doodu, ku a klla gbɛla lɛyikwu ɔ̄kā nōo mafu ka Ujehofa yihɔtu ku uwɔ a. Ɔyinɛ alɔ nɔnya Bianca nōo cɛgbá ō lɔtu aɛlā nōo gē cɛ lɛ ɔtu gbenyi lɛ ɔcɛ ŋma ɛgiyi apɔlɛ ku nu a kahinii: “Ō jé klla gbɛla tu aɔ̄kā ku Ubáyíbu mla aku ācɛ nōo gba Ujehofa ɛgba, nōo lɔtu ɛdɔ unwalu ekponu nɛ um gē má a, ta um abɔ ɔkwɔɔkwɛyi.” Ācɛ O Yɛce Ukraist ōhī lɛ ɛga ku Ubáyíbu nōo gē ta ɔtu kwu ɔtu nɛɛnɛhi jé tɛyi, bɛɛka ɔkpá ku Aíjē Kú Ɛ̄gbā 27:10 mla Ayisáya 41:10. Ācɛ ōhī gē jahɔ tu aɔkɛla ō gwotu ku nu eko duuma néē yɔ i tutu ku ōjila, amāŋ eko néē yɔ i jé Ubáyíbu. É ka ku ɛnyā gē ta uwa abɔ ku ɔtu nōo gē ya uwa bɛɛka é yɔ foofu uwa a, kóō hii ya uwa fiyɛ ɔfu ŋ.

9. Ɛgɛnyá nōo gā ōjila ku ujɔ ta uwɔ abɔ a?

⁹ Ceyitikwu ku a bēē gā ōjila ku ujɔ eko doodu. Ōmiya a géē tu uwɔ ɔtu kwu ɔtu, a klla gē wa i jé ayinɛ uwɔ lɔɔlɔhi fiyɛ. (Uhíb. 10:24, 25) Massiel nɛ alɔ kɛla lɛyikwu ɔ gbɔbu a kahinii: “Naana nɛ um wɛ ɔcɛ nōo gē ya uweyi nɛhi a, n lɛ ɔtu ku um ya ekponu ō bēē gā ōjila ku ujɔ mla ō ta ohi. Ɛnyā ta um abɔ ku um yɔ kwu ayinɛ alɔ nōo yɔ ipu ujɔ a ajaajɛ.”

10. Ɔdiya nōó cɛgbá ku alɔ wɛ ɔya ku ayinɛ alɔ ipu ujɔ a?

¹⁰ Ceyitikwu ku a wɛ ɔya ku ayinɛ alɔ nōo hayi kpaakpa ipu ɛ̄gbā ō gba ku Ujehofa a. Kwu piya ɔya ku ācɛ ipu ujɔ nɛ a lɔfu nwu ɛlā ŋma ɛgiyi uwa. É lɔfu lé ɔnyakwucɛ gā uwɔ, amāŋ a lɔfu lé lɛ uwa amāŋ lɛ ucolo nōo wɛ ɛyɛɛyi gwu aku uwɔ ta. Ubáyíbu ta alɔ ɛlá kwu ɔ ka “anyākwɔ́cɛ” jeeyī nɛhi. (Ujób. 12:12)  Ācɛ nōo le hila okpliici a lɔfu nwu ɔdā alɛwa ŋma ɛgiyi ayipɛ oklobiya nōo yɔ ipu ujɔ a. Ujonatan lé lɛ Udefidi nɛhi, amáŋ ɔɔma i ci uwa ŋma ō jɔɔnyɛ ɛma olɔhi mɛmla iyi uwa ŋ. (1 Usám. 18:1) Udefidi mla Ujonatan ta iyi uwa abɔ kéē gba Ujehofa ɛ̄gbā ipu āhɔ̄ olɔnɔ alɛwa. (1 Usám. 23:16-18) Ɔyinɛ alɔ nɔnya Irina nɛ anu foofunu wɛ ɔcɛ Ocijali ku Ujehofa ŋma apɔlɛ ku nu babanya a kahinii: “Ayinɛ alɔ nɔnyilɔ mla ayinɛ alɔ nɔnya géē lɔfu je piya adā alɔ amāŋ ɛ́nɛ́ alɔ amāŋ bɛɛka ayinɛ ipu ku alɔ a. Ujehofa lɔfu bi uwa yuklɔ kéē wɛ apɔlɛ nɛ alɔ cɛgbá a.”

11. Ɔdi nɛ alɔ cika ō ya ō lɛ ɛnɛɛnɛ ɔya a?

¹¹ Ō lɛ aɔya ɛyipɛ i wɛ ɔdā ō tɔɔtɛ nóó, ofiyɛ duu ɔdaŋ ku a wɛ ɔcɛ nōo gē ya uweyi. Ɔyinɛ alɔ nɔnya Ratna nōo wɛ ɔcɛ ō ya uweyi, nōo nwu ɔkwɛyi naana nɛ ācɛ ɔhá yɔ i ya ɔ ŋmo a kahinii: “N gáā le má ku um cɛgbá otabɔ ku ayinɛ alɔ nōo yɔ ipu ujɔ a.” Ó lɔfu lɔnɔ ō da ɔcɛ ɔhá lɛyikwu ɛgɛ nɛ ɔtu gē ya uwɔ lɛ a, amáŋ ɔdaŋ ku a ya lɛ a, ɔcɛ ɔɔma géē lɔfu je piya ɔya ku uwɔ nōo géē kwu uwɔ ajaajɛ. Aɔya ku uwɔ dɔka ō ta uwɔ ɔtu kwu ɔtu mla ō je otabɔ gā uwɔ, amáŋ é cɛgbá ku a cɛ lɛ uwa jé ɛgɛ néē lɔfu ya ɔɔma a.

12. Ɛgɛnyá nɛ uklɔ ku ɔna ō ta a gáā ta uwɔ abɔ ō lɛ aɛnɛɛnɛ ɔya a?

¹² Ɔwɛ éyi nōo lɔhi fiyɛ duu nɛ alɔ lɔfu lɛ aɔya a, wɛ ō yuklɔ ku ɔna ō ta mla ayinɛ alɔ ɔhá. Carol nɛ alɔ kɛla lɛyikwu ɔ gbɔbu a kahinii: “N gáā lɛ ɛnɛɛnɛ ɔya alɛwa lɛ ŋma lɛ ō yuklɔ ku ɔna ō ta mla ayinɛ alɔ nɔnya, mla ō ya aɔdā ɔhá ipu ɛ̄gbā ō gba ku Ujehofa. Ujehofa bi aɔya nyā le je otabɔ gā um ihayi ōhī nōo gáā yɛ a.” Ó gē lɔhi lɛ alɔ eko duuma nɛ alɔ ya ɔya mla ayinɛ alɔ nōo hayi kpaakpa ipu ɛ̄gbā ō gba ku Ujehofa a. Ujehofa gē bi aɔya ɛgɛnyā le je ɔtu ō tu kwu ɔtu gā uwɔ eko duuma nɛ ɔtu le gbenyi gā uwɔ. Ocabɔ mafu, eko duuma nɛ ɔtu gē ya uwɔ bɛɛka a yɔ foofu uwɔ a.​—Aíit. 17:17.

13. Uklɔ nyá nɛ ɛjɛɛji alɔ nōo yɔ ipu ujɔ a lɛ ō ya a?

¹³ Ɛjɛɛji alɔ ipu ujɔ lɛ uklɔ ō ya ku ɛbɔ kóō yɔ ipu ujɔ mla ō mafu ihɔtu lɛ ɛjɛɛji ācɛ, o ya ɛɛ ku ɔtu kóō ya ɔcɛ duuma bɛɛka ó yɔ foofunu ŋ. (Ujɔ́n. 13:35) Ɔdā nɛ alɔ gē ya mla ō ka a lɔfu ta ācɛ ɔhá abɔ nɛɛnɛhi! Ɔyinɛ alɔ nɔnya éyi kahinii: “Eko nɛ um nwu ɔkwɛyi a, ujɔ a kwu piya apɔlɛ ku um. Ɔdaŋ ka ó géē yɛ i wɛ otabɔ ku ayinɛ alɔ ŋ nɛɛ, n géē yɛ i lɔfu je piya éyi ku Ācɛ Ocijali Ku Ujehofa gla ŋ.” Ɔdi nɛ a lɔfu ya, ō je otabɔ lɛ ācɛ nɛ apɔlɛ ku uwa i yɔ ipu ɔkwɛyi a ŋ, ku ɔtu kóō ya uwa ku ayinɛ alɔ nōo yɔ ipu ujɔ a yihɔtu uwa a?

14. Ɔdi nɛ a lɔfu ya, o ya ɛɛ ku a wɛ ɔya ku ācɛ ɛyipɛ a?

¹⁴ Ceyitikwu ku a wɛ ɔya ku ācɛ ɛyipɛ ipu ujɔ. Alɔ lɔfu gbɔɔ mla ō ya ācɛ ɛyipɛ omaaba ɔwɛ ogbonɛnɛ wa ipu ujɔ. (Uróm 15:7) Amáŋ, alɔ lɔfu ya fiyɛ ō hɛ okonu ta uwa ɔwɛ ojilima. Alɔ dɔka ō ya ku ɛma nɛ alɔ lɛ mla uwa kóō lɔfu fiyɛ. Ó lɛ a, wɛ ɔcɛ ogbonɛnɛ ku a klla mafu ku a lɛ ɛlá wu uwa ɔkwɔɔkwɛyi. Ikɔkɔ nɛ a géē da uwa ɔka nōo géē ya ku uweyi kóō kwu uwa a, ceyitikwu ku a jé ɔdā nōo wɛ unwalu néē yɔ i má a. Ó lɔfu lɔnɔ ta ōhī ku uwa kéē da uwɔ ɛgɛ nɛ ɔtu yɔ i ya uwa lɛ a, ohigbu ɛnyā, a hii kwu uwa abɔfu kéē kɛla ŋ. Ikɔkɔ ɔɔma, bi ɔwɛ ogbonɛnɛ le da ɔka ijeeyi nōo géē cɛ lɛ uwa da uwɔ ɔdā nōo yɔ ipu ɔtu ku uwa a, cɛɛ ku a gbeyi cii jahɔ ta ohi ku uwa. Ocabɔ mafu, a lɔfu da ɔka lɛyikwu ɛgɛ néē gáā jé ɔkwɛyi a.

15. Ɛgɛnyá nɛ Ācɛ O Yɛce Ukraist nōo lɛ ɔtu okpoce olɔfu gáā je otabɔ lɛ ācɛ ɔhá nōo yɔ ipu ujɔ a?

¹⁵ Ɔtu okpoce ku ɛjɛɛji ācɛ nōo yɔ ipu ujɔ a géē lɔfu iyē fiyɛ, ɔdaŋ ku alɔ gē mafu ku alɔ lɛ ɛlá wu iyi alɔ. Ācɛ nōo cika ō ya ɛnyā fiyɛ duu a wɛ anyakwɔcɛ ku ujɔ mla ācɛ nōo lɛ ɔtu  okpoce olɔfu a. Melissa nōo wɛ ɔcɛ éyi nɛ ɛ́nɛ́ nu bi jɛ ipu ɔkwɛyi a kahinii: “N ta ayinɛ alɔ nōo lɛbɛɛka adā gā um, nōo gē lɛ eko taajɛ gē yɔ mla um, nɛ ɛlá ku um klla hɛ uwa ɔtu ihayi ōhī nōo gáā yɛ a ahinya. Eko duuma nɛ um cɛgbá ō kɛla, n jé ku um lɛ ācɛ nōo géē jahɔ gā um.” Ɔtu le biya klla ya ɔyinɛ alɔ nɔnyilɔ Mauricio bɛɛka ó yɔ foofunu eko nɛ itica ku nu nōo nwu ɔ Ubáyíbu a habɔ ɔkwɛyi a ta a. Ó kahinii: “Anyakwɔcɛ ku ujɔ a mafu kē lɛ ɛlá wu um, ɛnyā kē ta um abɔ nɛɛnɛhi. É gē kɛla gā um ojigogo. É gē yuklɔ ku ɔna ō ta mla um, gē kɛla lɛyikwu aɔdā agbenu néē nwu ŋma oklɔcɛ ku abɔyi uwa a mɛmla um, klla gē hija mla um.” Melissa mla Mauricio nyā kē gɔbu ipu uklɔ ō ya lɛ Ujehofa eko doodu.

16-17. Ɔda ɔhá nyá nɛ alɔ lɔfu ya ō je otabɔ lɛ ācɛ ɔhá a?

¹⁶ Je otabɔ ɔwɛ nōo cɛgbá. (Ugal. 6:10) Leo ɔcɛ ō tɔɔna ipu éwo ɔhá nōo yɔ ajɛ nōo ligbo gwu apɔlɛ ku nu ta a kahinii: “Igbalɛwa, ɔdā nɛ a cɛgbá ō ya foofunu a wɛ ō mafu uce ogbonɛnɛ eko okpaakpa. N blakwu eko éyi nɛ um lɛ amiya ku umoto a. Eko nɛ um faajɛ ɔlɛ a, ɔtu ku um plico. Amáŋ, ɔba mla ɔnyā éyi lɛ um higwu wa ɔlɛ uwa ku alɔ lé ɔdole tɔha. Ń blakwu ɔdā nɛ alɔ lé a gɛ ŋ, amáŋ n bla kē jahɔ gā um ɔwɛ ogbonɛnɛ. Oŋmɛyi ku nu a, ɔtu ku um gaajɛ lɔɔlɔhi!”

¹⁷ Ɛjɛɛji alɔ gē jɔɔnyɛ eko nɛ alɔ gē yɔ mla Ācɛ Ocijali Ku Ujehofa ɔmpa alɔ, cɛɛ ku alɔ kɛla lɛyikwu aɛlā ō ka tɛɛcɛ nɛ alɔ po a tɔha. É lɔfu wɛ ɛ̄nɛ̄ alɔ po ŋma ojileyi nɛŋcɛ mla ojileyi nɛhi ku alɔ a. Amáŋ, Carol nɛ alɔ kɛla lɛyikwu ɔ gbɔbu a kahinii: “Ɔtu gē ya um bɛɛka n yɔ foofunu ipu ojileyi nɛŋcɛ amāŋ ojileyi nɛhi ku alɔ a.” Ɔdiya a? Ó kahinii: “Naanɛ nɛ um le yɛ jila ta mla alɛwa ku ayinɛ alɔ nɔnyilɔ mla ayinɛ alɔ nɔnya a, igbalɛwa é gē yɔ tɔha amāŋ yaajɛ mla apɔlɛ ku uwa. Eko duuma nɛ um má uwa lɛ a, ó gē ya um bɛɛka um yɔ foofu um a.” Ó kē i lɔnɔ ta ācɛ ɔhá kéē gā ōjileyi nɛhi amāŋ ojileyi nɛŋcɛ eko aflɛyi igbihi nɛ obiye ku uwa gekwu. A jé ɔcɛ duuma nōo yɔ i má ɛdɔ unwalu ɛgɛnyā? Ó gáā lɔhi nɛhi ɔdaŋ ku a lɛ ɔcɛ ɔɔma higwu cɛɛ ku aa jɔɔnyɛ ōjileyi nɛŋcɛ amāŋ ōjileyi nɛhi ku alɔ tɔha ŋ?

18. Ɛgɛnyá nɛ alɔ gáā yuklɔ mla ɔkpá ku 2 Ācɛ Ukɔ́rīnti 6:11-13, eko duuma nɛ alɔ gē mafu uce ogbonɛnɛ a?

¹⁸ Lɛ eko taajɛ ku aa yɔ tɔha. Ceyitikwu ku a lɛ eko taajɛ ō yɔ tɔha mla ayinɛ alɔ, ofiyɛ duu  ācɛ nɛ ɔtu gē ya uwa bɛɛkɛ é yɔ foofu uwa a. Alɔ dɔka ō lɛ “ɔtū kú alɔ nwulā,” lɛ ɛdɔ ācɛ ɛgɛnyā. (Jé 2 Ācɛ Ukɔ́rīnti 6:11-13.) Melissa nɛ alɔ kɛla lɛyikwu ɔ gbɔbu a kahinii: “Ó gē cɛ lɛ alɔ gweeye nɛhi eko duuma nɛ ayinɛ alɔ lɛ alɔ higwu wa ɔlɛ uwa, cɛɛ ku alɔ yɔ tɔha mla apɔlɛ ku uwa amāŋ ō gā iyawu éyi tɔha.” Ó lɛ ɔcɛ duuma ipu ujɔ ku uwɔ nɛ a lɔfu mafu uce ogbonɛnɛ lɛ ɔ?

19. Eko nyá nōo lɛ eko taajɛ ō yɔ mla Ācɛ O Yɛce Ukraist ɔmpa alɔ a gáā cɛgbá fiyɛ a?

¹⁹ Ó lɔfu lɛ ekoohi nɛ Ācɛ O Yɛce Ukraist ɔmpa alɔ gē gweeye, ɔdaŋ ku alɔ lɛ eko taajɛ yɔ tɔha mla uwa. Ó lɔfu lɔnɔ ta ācɛ ōhī kéē yɔ tɔha mla apɔlɛ ku uwa nōó wɛ Ācɛ Ocijali ŋ, eko duuma néē gē ya isimisi amāŋ aɔdā ɔhá nōo tɛɛma kwu ɛ̄gbā ō gba ku ɛkɛmgbɛ. Ɔtu kē lɔfu biya lɛ ācɛ ōhī lɛyikwu ɛ̄cī éyi néē tu kéē ya odee, bɛɛka ɛ̄cī néē géē ya oblatu ku ɔcɛ néē yihɔtu ku nu nōo kwū ŋmiifi ihayi éyi a. Eko duuma nɛ alɔ je iyi alɔ tɛɛcɛ ō yɔ tɔha mla ayinɛ alɔ nōo yɔ i má ɛdɔ unwalu ɛgɛnyā, alɔ gē mafu lɛ uwa ku alɔ lɛ ‘ɛlá wu uwa ɔkwɔ̄ɔ̄kwɛ̄yi.’​—Ufíl. 2:20.

20. Ɛgɛnyá nɛ aɛlā ku Ujisɔsi nōo yɔ ipu ɔkpá ku Umátiyu 12:48-50 gáā ta alɔ abɔ, eko duuma nɛ ɔtu gē ya alɔ bɛɛka alɔ yɔ foofu alɔ a?

²⁰ Ó lɛ aɔdā alɛwa ɔhá nōo lɔfu ya ku ɔtu kóō ya Ɔcɛ O yɛce bɛɛka ó yɔ foofunu ekoohi. Amáŋ, alɔ i cika ō je mlanyi ku Ujehofa jé ɛgɛ nɛ ɔtu gē ya alɔ lɛ a ŋ. Igbalɛwa, ó gē bi ayinɛ alɔ le je otabɔ nɛ alɔ cɛgbá a lɛ alɔ. (Jé Umátiyu 12:48-50.) Alɔ gē mafu lɛ Ujehofa ku ujɔ nɛ alɔ ya anu a jɛ alɔ eyī, eko duuma nɛ alɔ ya ɔdā nɛ alɔ ya gla ō je otabɔ lɛ ayinɛ alɔ. Ɛgɛ duuma nɛ ɔtu lɔfu ya alɔ lɛ ekoohi, alɔ i yɔ foofu alɔ ŋ, ohigbu ku Ujehofa yɔ pi alɔ eko doodu!