Saksi-Saksi Jehovah pechaya, prinsip sereta lalau ari Bup Kudus nulung kami ngaga pemutus ti manah, lalu ngelantangka ati Petara. (Isaiah 48:17, 18) Ukai kami ke netapka prinsip sereta lalau tu, tang kami deka nitihka iya. Peratika baka ni prinsip sereta lalau ke bekaul enggau bedating. a

•   Tikah nya sempama tali pengerindu ti ulih ditanchang dua iku orang, lalu tan belama iya. (Matthew 19:6) Saksi-Saksi Jehovah amat beberatka utai tu, laban kami ngumbai pengawa dating nya siti chara kena nirika pengidup berumah tangga.

•   Semina sida ke chukup umur sereta nemu berunding pasal tikah ulih bedating. Sida patut udah nemu “nagang pengingin diri,” iya nya udah lepas ari pengingin seks ti balat.—1 Korint 7:36.

•   Sida ke dating patut orang ke nadai penanggul ba tikah. Ba mata Petara, sekeda orang enda ulih kawin taja pan sida udah sah sarak. Tu ketegal ukum Petara bisi madahka, semina siti aja kebuah orang ulih sarak, iya nya ketegal butang.—Matthew 19:9.

•   Orang Kristian ke deka kawin, patut milih orang ke sama pengarap. (1 Korint 7:39) Ba Saksi-Saksi Jehovah, orang ke sama pengarap, ukai semina orang ke bebasaka pengarap kami, tang orang ke ngereja pengawa kami, lalu iya mega seiku ari Saksi-Saksi Jehovah ke udah dibaptisa. (2 Korint 6:14) Kenyau ari suba, Petara endang udah mesan nembiak Iya patut jadi enggau orang ke sama pengarap. (Pemungkal 24:3; Malaki 2:11) Nitihka pansik, pesan tu amat beguna kemayaharitu. b

•   Anak patut ngasika apai indai. (Jaku Dalam 1:8; Kolosi 3:20) Ngagai bala anak ke agi diau segulai enggau apai indai, pesan tu nyengkaum ngasika sida pasal pengawa dating. Chunto iya, apai indai engka udah netapka umur ti ngena maya anak sida ulih dating, tauka ngereja sebarang pengawa ke patut ba anak sida.

•   Nengah iring Bup Kudus, Saksi-Saksi Jehovah ulih milih enggau sapa sida deka bedating, tauka sida pan ulih mutuska kediri empu sekalika sida deka dating tauka enggai. Tu sejalai enggau prinsip Bup Kudus ke madah, “Laban genap iku kita enda tau enda mai ma diri empu.” (Galatia 6:5) Taja pia, mayuh ari Saksi deka dating dulu, lalu berunding enggau manah sereta minta penemu ari Saksi-Saksi Jehovah ke bepenemu ti ibuhka sida.—Jaku Dalam 1:5.

•   Mayuh ari pengawa ke dikereja orang maya dating nya dosa ti besai. Ngambika chunto, pesan ari Bup Kudus ngasuh kitai nyeliahka semua pengawa seks ti enda bemoral. Tu ukai semina pengawa beleman, tang nyengkaum pengawa murus perengka seks pangan diri, ngeluchu, tauka seks ngagai bala jelu. (1 Korint 6:9-11) Taja pan orang ke dating enda beleman enggau pangan diri, tang meransang pangan diri bisi pengingin seks, nya pan utai ti kamah ba mata Petara. (Galatia 5:19-21) Randau ti ngembuan “jaku ti kamah” mega utai ti kamah ba ajar Bup Kudus.—Kolosi 3:8.

•   Ati mensia nemu ngakal. (Jeremiah 17:9) Ati ulih ngasuh seseiku orang ngereja sesiti dosa ke dikumbai iya enda salah. Nya kebuah, orang ke benung dating patut bejimat enggau ati sida empu. Sida patut nyeliahka sebarang pengawa ke ulih meransang sida ngereja utai ti salah. Maya dating, sida ulih mai seseiku orang tauka seraban orang. (Jaku Dalam 28:26) Orang Kristian ke agi bujang dara patut bejimat enggau laman sosial, kelebih agi enti laman web nya endang digaga kena orang ngiga pangan, kelebih agi dating enggau orang ke enda tentu dikelala.—Jaku Dalam 26:4.