Enti nuan seiku ari Saksi-Saksi Jehovah, kati nuan ulih ngambarka diri dijaga lalu dibai polis nginjil ari rumah ke rumah? Nya meh utai ke nyadi ba Joseph di Micronesia ba taun 2017. Iya enggau tiga iku Saksi Jehovah ke bukai, sama enggau siti kimpin spesial, nginjil ngagai orang ke diau ba pulau-pulau ti jauh.

 Kira maya ngalih hari, empat iku Saksi Jehovah tu datai ngagai siti pulau ti mit endur alai kira 600 iku orang diau. Datuk bandar pulau nya ngelaluka penatai sida ba tebing tasik pulau nya. Joseph madahka utai ke nyadi: “Datuk bandar nya madahka bisi siti lori polis ke ulih mai kami ngagai semua rumah ba pulau nya. Kami amat alit ati ngagai utai ke dipadah datuk bandar nya, tang kami enggau basa madahka diri enda begunaka lori nya. Kami deka ngabas orang enggau chara baka ke suah dikena lebuh nginjil ari rumah ke rumah.”

 Sida penginjil nya lalu bejalai kaki, keran deka bejaku enggau mayuh orang. “Orang ba pulau nya amat rindu ngelaluka temuai lalu bisi minat ngagai berita manah. Ketegal nya, kami ngena mayuh agi awak ari ke dijangka ba tiap iti rumah.”

 Muak ke lemai, siti lori polis mansa Joseph dua kali lalu ngetu sepiak iya maya kali ketiga. Polis nya nanya sekalika iya ulih nganjung Joseph ngagai rumah ke bedau diabas iya. Joseph ngenang baru: “Aku madah enggai. Tang kali tu sida keran deka kami enggau. Sida madah, ‘Nuan semina bisi mimit awak aja ba pulau tu sebedau kita mupuk. Nyadi, kami deka mai nuan ngagai rumah-rumah ke bukai.’ Aku enda ulih nulak utai ke dipadah sida laban endang bisi mayuh rumah ke bedau diabas agi. Lebuh kami datai ba tiap iti rumah, polis nya madahka nama orang ke bempu rumah ngagai aku. Lalu enti nadai orang pansut pengudah aku ngetuk pintu rumah, sida deka nekan hon lori ngambika orang ke bempu rumah pansut.

 “Enggau tulung ke diberi, kami ulih ngabas semua rumah ke bisi dia sehari nya. Kami meri mayuh litaricha ngagai orang ba pulau nya lalu ngaga atur ngambika ulih datai baru ngagai sida ke bisi minat deka belajar mayuh agi.”

 Pegawai polis nya madah ngagai Joseph pasal sida ke “rindu ulih sama enggau nusui berita manah.” Lebuh bala Saksi Jehovah nya mupuk maya mata panas padam, pegawai polis ke ba tebing tasik nya ngepaika jari lalu tuchum seraya sida megai litaricha Bup Kudus.