Virginia, seiku ari Saksi-Saksi Jehovah ke bisi sakit urat (tauka locked-in syndrome). Semua tubuh iya lumpuh. Iya ulih meda enggau ninga, muka enggau nutup mata, sereta engkebutka pala iya mimit. Iya enda ulih bejaku tauka makai. Sebedau tu, iya amat gerai sereta regas. Tang kena pagi taun 1997, belakang pala iya berasai balat pedis. Laki iya, mai iya ngagai sepital lalu lemai nya, tubuh iya majak lemi nyentukka iya koma. Lebuh iya ngeleda dua minggu pengudah nya, iya diengkah ba unit rawatan rapi. Maya nya, iya sigi udah lumpuh lalu begunaka perengka kena nulung iya enseput. Dalam beberapa hari, iya nadai ulih ingatka nama-nama utai, nyentukka iya pan enda ngelala sapa diri empu.

 Virginia nerangka utai ti nyadi pengudah nya. “Belubah-lubah aku ingatka utai. Aku bendar besampi. Aku enggai mati lalu ninggalka anak aku ti agi mit. Aku enggai iya nadai indai. Ngambika aku mengkang berani, aku bebendar ngingatka enggau naka ulih ayat-ayat Bup Kudus.

 “Udah nya, lutur mindahka aku ari unit rawatan rapi. Pengudah ngabiska enam bulan ba beberapa buah sepital sereta pusat pemulihan, aku dikemendarka pulai. Aku agi lumpuh, sereta begunaka tulung ari orang bukai. Aku berasai asa amat! Aku ngasaika diri enda beguna ngagai Jehovah, sereta orang bukai. Aku mega irau, laban aku enda ulih nyaga anak aku empu.

 “Aku berengkah macha pasal peneleba Saksi-Saksi ke bukai, ti napi utai ke sama baka aku. Ari nya, aku amat alit ati enggau utai ke ulih digaga sida ngagai Jehovah. Asil iya, aku nguji ngemansangka runding ti positif, lalu fokus ngagai utai ke ulih digaga aku. Sebedau aku sakit, enda mayuh utai ke ulih digaga aku ba pengarap. Tang diatu, aku ulih ngena mayuh awak, sepemanjai hari, ninting hari ngereja semua nya. Ketegal tu, ari ke asa ati, aku ngemeratka Jehovah.

 “Aku belajar ngena komputer. Kena naip, aku ngena program komputer ke ulih macha kebut pala aku. Ngereja tu sigi ngasuh aku lelak, tang program tu nulung aku belajarka Bup Kudus, lalu bekunsika pengadang jemah ila enggau orang bukai, nengah surat sereta email. Kena bejaku enggau orang ke semak aku, aku bisi siti papan burak ke bisi huruf. Orang ke semak aku, nunjukka huruf nya siti-siti. Enti sida nunjukka huruf ke betul, aku ngijapka mata. Kami ngulang-ngulang pengawa tu, nyentukka huruf nya nyadi siti jaku. Sekeda menyadi indu ke suah begulai enggau aku, udah nemu utai ke deka disebut aku. Kekadang lebuh sida salah, kami sama ketawa.

 “Aku rindu enggau semua pengawa ke diatur eklisia. Aku selalu datai begempuru nengah talipun, lalu diatu aku ulih begempuru nengah video call. Aku ulih naip saut diri empu, udah nya bisi menyadi bukai nulung aku macha nya ba tanya saut. Aku mega enggau seraban menyadi begulai meda program Berita JW. a

 “Diatu, udah 23 taun aku napi pemedis tu. Kekadang, aku tusah ati. Tang asai ati ti tusah tu ulih diputarka nengah sampi, kaul enggau bala menyadi, sereta ngereja mayuh pengawa ba pengarap. Lalu ketegal bantu ari menyadi ba eklisia, aku ulih nyadi pengerintis sukung lebih ari enam taun. Aku enggau naka ulih nyadi teladan ti manah ke anak aku, Alessandro. Diatu iya udah kawin, lalu nyadi seiku ari tuai gempuru. Iya enggau bini iya mega sama bela nyadi pengerintis biasa.

 “Aku selalu ngambarka utai ti deka digaga aku ba dunya Paradais ila. Utai ke keterubah deka digaga aku iya nya, aku deka bejaku ngagai Jehovah ngena nyawa aku empu. Aku mega deka bejalai ba tisi sungai mit, enggau meda rampa menua ti lawa ba kampung. Laban aku makai ngena tiub lebih ari 20 taun, enda sabar aku deka nyengkau buah ipul lalu makai nya. Nambahka nya, laban aku orang Itali, aku gagit amat deka bepandukka pemakai, lalu makai pemakai ke dikerinduka aku, nyengkaum pizza!

 “‘Pengadang ke pengelepas’ nulung aku nyaga runding diri. (1 Tesalonika 5:8) Lebuh aku ngambarka diri ba dunya baru, aku ulih terus gaga ati taja pan napi pemedis tu. Aku amat andal, enda lama da agi aku deka digeraika. Au, aku enda sabar deka ngasaika ‘pengidup belama iya’ baka ke disemayaka Jehovah nengah Perinta Iya.”—1 Timoti 6:19; Matthew 6:9, 10.