Seminar Pertubuhan Bangsa-Bangsa Bersatu Pasal Ubah ba Suhu Bumi COP27 abis kena Hari Minggu, 20 November 2022. Pengari piak bekuasa besetuju deka meri bantu ari segi duit ngagai menua ke seranta kena nulung sida lebuh ditinggang penusah ketegal suhu bumi majak berubah. Tang mayuh orang nemu atur tu enda ulih mutarka penanggul ke nyadi ketegal suhu bumi majak berubah.

•   “Aku gaga ati ke atur tu ke deka meri duit ngagai orang ke merinsa ketegal utai ke nyadi. Tang kami nemu utai tu enda chukup. . . . Bumi tu benung sakit, lalu agi dalam bahaya.”—Jaku ari António Guterres, pengari ari Pertubuhan Bangsa-Bangsa Bersatu, kena 19 November, 2022.

•   “Enda lama da agi, suhu bumi balat berubah lalu tu deka mai kesan ngagai semua mensia.”—Jaku ari Mary Robinson, ke kala nyadi presiden Ireland sereta Suruhanjaya Hak Mensia PBB, kena 20 November 2022.

 Ke suah iya, orang ke biak irau nama utai ke deka nyadi ngagai bumi ba jemah ila. Taja pia, kati ulih bala pemerintah bekerejasama lalu ngamatka semaya sida kena mutarka penanggul ketegal suhu bumi majak berubah? Nama utai ke dipadah Bup Kudus?

 Bup Kudus madahka indah enti bala pemerintah ulih mutarka penanggul tu mimit, tang sida nadai kuasa muai penanggul tu. Peratika dua iti kebuah iya:

•   “Nuan enda ulih beruruska utai ti bingkuk.”—Pengajar 1:15.

   Reti iya: Kuasa pemerintah mensia bisi tatak laban mensia ditempa ukai kena merintah diri empu. (Jeremiah 10:23) Taja pan sida bebendar deka bekerejasama, tang sida tetap enda ulih mutarka penanggul kitai.

•   “Orang deka rinduka diri empu, rinduka duit, . . . enggai sepenemu enggau orang bukai.”—2 Timoti 3:2, 3.

   Reti iya: Bup Kudus madahka mayuh orang kemayaharitu semina deka berundingka diri empu lalu enggai bekerejasama kena nulung orang bukai.

 Taja pia, harapan pasal jemah ila enda bepanggai ba perintah mensia sereta semaya sida. Petara udah milih pemerintah dunya, iya nya Jesus Kristus. Bup Kudus madahka tu pasal iya:

•   ‘Iya deka nyadi raja kitai. Iya deka dikumbai “Penyaup ti Badas,” “Petara ti Bekuasa,” “Apai ti Meruan belama iya,” “Raja Pemaik.”’—Isaiah 9:6.

 Jesus Raja ba Perintah Petara di serega. (Matthew 6:10) Iya ngembuan kuasa, penemu-dalam, lalu bisi pengingin deka nyaga bumi tu sereta orang ke diau dia. (Masmur 72:12, 16) Ngena perintah tu, iya deka nagang orang ke “nganchurka dunya,” sereta ngeraika dunya tu.—Pemandang 11:18; Isaiah 35:1, 7.

 Kena nemu mayuh agi pasal chara penanggul tu deka diputarka belama iya, bacha artikel “Apakah yang Bible Katakan tentang Perubahan Iklim dan Masa Depan Kita?” dalam jaku Melayu.