Video ke disengkaum ba program konvenysen pelilih menua tiap taun negu ati kitai sereta nulung kitai mereti agi ajar Bup Kudus. Bisi 114 iti video ba program Konvensyen Pelilih Menua taun 2020 ke betajuk, “Seruran Gaga Ati”! Tu nyengkaum 43 iti cheramah ke dikenataika bala menyadi ari Raban ti Ngiring enggau bala penulung sida. Kati nuan kala berunding, ni pemayuh pengawa ke dikereja nembuka semua video tu? Lalu ni penyampau duit ke dikena melanja pengawa tu?

 Nyauka 900 iku menyadi kitai ari serata dunya sanggup meri awak engau pengelandik sida bekereja ba projek ti besai tu. Dalam timpuh dua taun, sida bekereja pengelama 100,000 jam. Tu nyengkaum 70,000 jam ke dikena ngaga cherita Bup Kudus Nehemiah: ‘Pengaga ti Diberi Jehovah Deka Ngasuh Kita Kering.’ Pemanjai video nya, 76 minit.

 Nuan engka ulih ngambarka pemesai ungkus duit ke dikena nyediaka utai ke diguna semua bala sukarela tu, sereta nyediaka perengka enggau endur alai sida gawa ba projek tu.

 Jared Gossman gawa ba Begian Audio/Video. Iya nerangka: “Komiti Ngajar ari Raban ti Ngiring arapka semua video kitai deka nunjukka, menyadi kitai datai ari mayuh bengkah bansa, menua sereta adat. Meda video tu ulih nulung kitai beterima kasih agi ke bala menyadi kitai di serata dunya. Ngambika nyapai juluk ati tu, kami bisi 24 iti tim ke bekereja ba projek tu, di 11 buah menua ba serata dunya. Ngatur pengawa tu di serata dunya begunaka belanja ti besai.”

 Ngambika ngerikut mayuh ari video nya begunaka perengka sereta set ti spesial. Ngambika chunto, beberapa buah set didirika dalam bengunan studio ba Mount Ebo di Patterson, New York, Amerika Serikat. Bala menyadi ke gawa ba projek tu nguji deka ngelimat duit ke dikena, tang ba maya ti sama, ngasilka siti video ti manah dipeda sereta sejalai enggau gaya nengeri Jerusalem kelia. Nya alai, sida nirika set ti enda kelalu besai ungkus, nitihka gamal dinding nengeri Jerusalem. Tiap iti dinding ke didirika nya digaga ari kayu lalu ngembuan peninggi 20 kaki. Kayu nya dibalut enggau kapas lalu dichat ngambika gamal iya nyau sama baka dinding batu kuta Jerusalem jeman kelia. Dinding set nya mudah ditukar sereta dipindah ngambika ulih dikena ba begian video ke bukai. Tu ngurangka penyampau set ke patut didirika lalu ngelimat duit ke dikena. Taja pia, ungkus duit ke dikena ngaga semua set ke cherita tu, nyau ka 100,000 dolar U.S, iya nya RM418,781. a

 Nemu pasal chara video tu udah diasilka ngasuh kitai beterima kasih agi ke program konvensyen taun tu. Kitai nemu, semua pengawa ti udah dikereja bala menyadi kitai ti bagas, endang ngemuliaka nama Jehovah di serata dunya. Terima kasih ke semua duit pemeri ke diberi nuan ngagai pengawa kitai di serata dunya, nemuka nya nengah online ba donate.jw.org tauka enggau chara bukai.