1, 2. Nama runding sekeda orang pasal Petara?

MAYUH orang ngumbai utai ti dikereja sida nadai kaul enggau Petara. Sida mega ngumbai Petara enda bedulika utai ke nyadi ba sida. Chunto, pengudah ribut balat ngerusak mayuh endur ba Filipina kena November 2013, datuk bandar ba siti nengeri besai madahka: “Petara engka ba endur bukai.”

² Bisi mega ngumbai Petara enda meda utai ti dikereja sida. (Isa. 26:10, 11; 3 Jhn. 11) Sekeda orang maya jeman rasul Paul mega berunding baka nya. Ku Paul nyebut pasal sida: ‘Sida ngumbai diri tau enda ibuh nemu Petara.’ Sida jai, amu sereta enda lurus.—Rom. 1:28, 29.

3. (a) Nama tanya ke patut ditanya kitai empu? (b) Ba Bup Kudus, “jari” Petara suah dikena ngambarka nama?

³ Baka ni enggau kitai? Kitai nemu Jehovah meda semua utai ti dikereja kitai. Tang, kati kitai pechaya Jehovah amat ibuhka kitai? Kati kitai meda Iya nulung kitai ba pengidup? Ba Bup Kudus, “jari” Petara suah dikena ngambarka kuasa ke dikena Iya. Petara ngena kuasa Iya nulung nembiak Iya sereta ngalahka munsuh Iya. (Bacha Ulang Adat 26:8.) Jesus madah sekeda  orang deka ‘meda Petara.’ (Mat. 5:8) Kati tu nyengkaum kitai? Baka ni kitai ulih ‘meda Petara’? Aram meh kitai belajarka chunto ari Bup Kudus, pasal orang ke meda enggau ke enda meda kuasa Petara ba pengidup sida. Kitai mega deka belajar baka ni pengarap nulung kitai meda kuasa Petara.

4. Nama kebuah munsuh orang Israel enggai ngaku meda kuasa Petara?

⁴ Kelia menya, mayuh orang bisi peluang meda sereta ninga baka ni Petara nulung orang Israel. Jehovah ngena kereja ajih ngelepaska nembiak Iya ari menua Ejip, lalu ngalahka mayuh raja ba Menua ti Udah Disemaya. (Jos. 9:3, 9, 10) Taja pan raja bukai ninga sereta meda baka ni Jehovah nyelamatka nembiak Iya, “sida begempuru lalu berakupka ngelaban Josua enggau orang Israel.” (Jos. 9:1, 2) Lebuh bala raja nya ngelaban orang Israel, sida bisi peluang meda kuasa Petara. Ketegal kuasa Jehovah ti besai, “mata panas lalu enda nginsit, lalu bulan enda mindah nyentuk ngagai maya orang Israel udah malas munsuh sida.” (Jos. 10:13) Tang, Jehovah udah ngasuh ati munsuh orang Israel “kieh,” ngambika sida ngelaban orang Israel. (Jos. 11:20) Munsuh orang Israel alah laban sida enggai ngaku Jehovah ke beperang ngarika nembiak Iya.

5. Raja Ahap ke jai enggai pechayaka nama?

⁵ Udah nya, Raja Ahap ke jai bisi peluang beberapa kali meda kuasa Petara. Elijah madahka iya: “Nadai ambun tauka ujan dalam dua tauka tiga taun ti deka datai tu, nyentuk ngagai maya aku ngasuh hari ujan.” (1 Raj. 17:1) Tu semina ulih nyadi ketegal kuasa ari Petara, tang Ahap enggai pechayaka utai tu. Udah nya, Elijah besampi ngagai Jehovah, lalu Jehovah nyaut sampi iya enggau ngasuh api nurun ari langit. Ahap meda api nya. Udah nya, Elijah madahka Ahap, Jehovah deka ngetuka kemarau, lalu ngasuh ujan nurun. (1 Raj. 18:22-45) Ahap meda semua kereja ajih nya, tang iya agi enggai pechayaka diri udah meda kuasa Jehovah. Nama dipelajarka kitai ari chunto tu? Kitai patut ngiga peluang meda kuasa Petara ba pengidup kitai.

6, 7. Nama utai ti dipeda orang Gibeon enggau Rahap?

⁶ Orang Gibeon enda baka orang bansa bukai ke diau semak sida. Sida meda kuasa Petara. Ari ke ngelaban orang Israel, orang Gibeon deka bebaik enggau sida. Nama kebuah? Ketegal sida udah ninga pasal Jehovah sereta semua utai ke udah digaga Iya. (Jos. 9:3, 9, 10) Sida ngaga pemutus ti betul laban sida nemu Jehovah ke beperang ngarika orang Israel.

⁷ Rahap mega meda kuasa Jehovah. Iya ukai orang Israel, tang iya kala ninga pasal baka ni Jehovah ngelepaska nembiak Iya ari menua Ejip. Lebuh dua iku pematau bansa Israel datai ngagai iya, ku iya madahka sida: ‘Aku nemu Jehovah udah meri menua tu ngagai kita.’ Rahap pechaya Jehovah ulih nyelamatka iya enggau sida sebilik. Iya ngayanka pengarap ba Jehovah, taja pan iya nemu utai tu ulih ngenusahka iya.—Jos. 2:9-13; 4:23, 24.

8. Baka ni sekeda orang Israel meda kuasa Petara?

⁸ Enda baka Raja Ahap ke jai, sekeda orang Israel ke meda api nurun ari langit pengudah Elijah besampi, pechaya Petara ke ngereja nya. Sida bejaku enggau nyawa ti inggar: ‘Semina Jehovah siku aja ti Petara!’ (1 Raj. 18:39) Sida pechaya sida udah meda kuasa Petara.

9. Baka ni kitai ulih meda Jehovah enggau kuasa Iya kemaya hari tu?

 ⁹ Kitai udah berandauka chunto ti manah enggau ti jai, ke nulung kitai meretika nama reti ‘meda Petara’ tauka meda kuasa Petara. Seraya kitai ngelala Jehovah enggau nemu kualiti Iya, kitai meda kuasa Iya ngena “mata ati kita.” (Eps. 1:18) Tu meransang kitai deka neladan mensia ke tetap ati kelia menya enggau ke diatu, ke udah meda baka ni Jehovah nulung nembiak Iya. Taja pia, nama nunjukka Petara nulung orang kemaya hari tu?

10. Nama nunjukka Jehovah nulung orang kemaya hari tu? (Peda gambar ba pun artikel.)

¹⁰ Mayuh utai nunjukka Jehovah terus nulung orang kemaya hari tu. Kitai suah ninga pengalaman orang ke besampi minta tulung ari Petara ba pengidup sida, lalu sampi sida udah disaut. (Mas. 53:2) Chunto, lebuh nginjil ba siti pulau mit di Filipina, Allan betemu enggau seiku indu ke nyabak. Ku Allan: “Baru pagi nya, indu nya besampi ngagai Jehovah ngambika bala Saksi tetemuka iya.” Lebuh indu nya agi biak, iya kala belajarka Bup Kudus enggau bala Saksi. Tang pengudah iya belaki sereta pindah ngagai pulau nya, iya nadai belajar agi. Petara jampat nyaut sampi iya, lalu tu ngasuh iya sinu ati. Kurang ari setaun, iya nyerahka diri ngagai Jehovah.

11, 12. (a) Baka ni Jehovah nulung nembiak Iya? (b) Terangka baka ni Jehovah nulung seiku menyadi Kristian ke indu.

¹¹ Mayuh ari nembiak Jehovah udah meda Iya nulung sida, lebuh sida ninggalka pengawa enda manah ke udah dikereja sida sebedau nyadi nembiak Jehovah baka nginsap, salah guna dadah, tauka meda pornografi. Sekeda ari sida nguji ninggalka pengawa nya kediri empu, tang enda ulih. Taja pia, lebuh sida minta tulung ari Jehovah, Iya meri sida “kuasa ti besai,”  lalu sida ulih ninggalka pengawa ke enda manah nya.—2 Kor. 4:7; Mas. 37:23, 24.

¹² Jehovah mega nulung nembiak Iya betan napi penusah ke ninggang sida. Tu nyadi ba Amy. Iya diasuh nulung nirika siti Palan Gempuru enggau siti rumah ke pengerintis seberai tasik ba siti pulau mit di Tasik Pasifik. Chara pengidup ba dia enda sama. Dia suah nadai karan enggau ai, lalu jalai ampuh ai. Iya mega lelengauka diri sebilik, sereta diau ba bilik hotel ke mit. Bisi sekali, iya merak seiku menyadi Kristian indu ke gawa enggau iya. Iya balat nesal ke ulah iya nya. Lebuh iya pulai ngagai bilik iya ke petang, iya besampi minta tulung ari Jehovah. Udah nya, maya karan bisi baru, iya macha siti artikel dalam Watchtower pasal seiku graduet ari Gilead. Artikel nya berandau pasal penanggul ti sama baka ke ditapi iya. Ku iya: “Aku ngasaika Jehovah bejaku enggau aku malam nya. Tu meri aku peransang kena neruska pengawa aku.”—Mas. 44:25, 26; Isa. 41:10, 13.

13. Nama nunjukka Jehovah udah nulung nembiak Iya ngetanka hak sida nginjil?

¹³ Jehovah mega nulung nembiak Iya ngetan sereta ngasuh berita manah dikemendarka undang-undang. (Plp. 1:7) Chunto, lebuh sekeda perintah nguji deka nagang pengawa nginjil, kitai mai pekara nya ngagai kot. Kitai udah menang 268 iti kes ba kot besai di serata dunya, lalu 24 iti kes menang ba European Court of Human Rights kenyau ari taun 2000. Endang amat, nadai orang ulih nagang kuasa Petara!—Isa. 54:17; bacha Isaiah 59:1.

14. Nama utai bukai ke nunjukka Petara bisi nulung nembiak Iya?

¹⁴ Pengawa nginjil ke digaga di serata dunya mega nunjukka Petara nulung kitai. (Mat. 24:14; SKR. 1:8) Lalu penyerakup entara nembiak Jehovah ke datai ari semua bansa semina ulih nyadi ketegal tulung ari Jehovah. Penyerakup tu ngalitka ati! Indah orang ke enda nyembah Jehovah ngaku: ‘Petara amat bisi enggau kita.’ (1 Kor. 14:25) Mayuh utai nunjukka Petara nulung nembiak Iya. (Bacha Isaiah 66:14.) Baka ni enggau nuan empu? Kati nuan meda kuasa Jehovah ba pengidup nuan?

15. Kekadang, nama kebuah kitai engka enda meda kuasa Jehovah ba pengidup kitai?

¹⁵ Kekadang kitai engka enda meda kuasa Jehovah ba pengidup kitai. Nama kebuah? Lebuh kitai bisi mayuh penusah, kitai engka enda ingatka Jehovah udah suah nulung kitai. Tu nyadi ba Elijah. Iya orang ke berani, tang lebuh Kuin Jesebel deka munuh iya, iya takut. Maya nya, iya enda ingatka baka ni Jehovah kala nulung iya. Bup Kudus madah, Elijah ngajihka diri mati. (1 Raj. 19:1-4) Dini iya tau bulih tulung enggau pemerani? Iya patut ngiga Jehovah!—1 Raj. 19:14-18.

16. Baka ni kitai ulih meda Petara lebuh kitai bisi penusah?

 ¹⁶ Jop kelalu berundingka pengirau diri nyentukka iya enda meda utai ke nyadi ba iya baka chara Jehovah meda. (Jop 42:3-6) Kekadang, kitai mega engka ngasaika diri tusah meda Petara ketegal penusah kitai. Nama ulih nulung kitai meda utai ke digaga Jehovah ke kitai? Kitai enda tau enda belematika utai ti dipadah Bup Kudus pasal penusah kitai. Udah nya, Jehovah deka nyata agi ba kitai, lalu kitai mega deka nyebut: “Dulu menya, aku semina nemu utai ti dipadahka orang ngagai aku, tang diatu aku udah meda Nuan ngena mata aku empu.”

17, 18. (a) Baka ni nuan ulih meda kuasa Jehovah ba pengidup nuan? (b) Padahka siti pengalaman ke nunjukka chara Petara nulung kitai kemaya hari tu.

¹⁷ Baka ni nuan ulih meda kuasa Jehovah ba pengidup nuan? Aram kitai beratika lima chunto. Kesatu, nuan engka ngasaika Jehovah nulung nuan tetemuka pemendar. Kedua, nuan engka teingatka diri ngagai gempuru Kristian, ninga cheramah, lalu nyebut: “Nya meh utai ti diguna aku!” Ketiga, nuan engka udah meda baka ni Jehovah nyaut sampi nuan. Keempat, nuan engka deka ngaga mayuh agi utai ke Jehovah, lalu nuan meda baka ni Iya nulung nuan ngulihka juluk ati nya. Kelima, nuan engka badu kereja ketegal kereja nya ngasuh nuan tusah nyembah Jehovah, lalu udah nya nuan meda Petara ngamatka semaya Iya: “Aku enggai sekali-kali . . . ngelengkaka kita.” (Heb. 13:5) Lebuh kitai bisi kaul ti teguh enggau Jehovah, kitai ulih senang agi meda kuasa Iya ba pengidup kitai.

¹⁸ Sarah, seiku menyadi Kristian ke indu ari menua Kenya madahka: “Aku besampi pasal seiku pelajar Bup Kudus ke enda entu ka belajar. Aku madah ngagai Jehovah sekalika aku patut ngetu belajar enggau iya. Pengudah aku nyebut ‘Amin,’ telefon aku bebunyi. Pelajar Bup Kudus nya telefon. Iya nanya sekalika iya tau enggau aku datai gempuru! Aku tekenyit!” Enti kitai beratika utai ti digaga Jehovah ke kitai, kitai deka meda Iya nulung kitai. Rhonna, seiku menyadi Kristian indu ke diau ba Asia madahka, kitai begunaka awak kena meda chara Jehovah nulung kitai ba pengidup. Ku iya agi: “Tang pengudah nuan ngereja nya, nuan deka alit ati laban nemu Jehovah balat ibuhka kitai!”

19. Nama utai bukai ke enda tau enda digaga kitai ngambika ulih meda Petara?

¹⁹ Jesus madahka, orang ke ‘deka meda Petara’ patut “tuchi ati.” (Mat. 5:8) Nama reti nya? Kitai enda tau enda ngetanka runding ti tuchi sereta badu agi ngereja utai ti salah. (Bacha 2 Korint 4:2.) Ba artikel tu kitai belajar, ngambika ulih meda Petara, kitai enda tau enda neguhka kaul kitai enggau Iya. Ba artikel pengudah tu, kitai deka berandauka baka ni pengarap ulih nulung kitai meda kuasa Jehovah enggau terang agi ba pengidup kitai.