Baka Ni Tuai Gempuru Ngelatih Orang Bukai Ngambika Ulih Megai Tanggungjawap
“Jaku ti udah didinga nuan ari aku . . . , serahka jaku nya ngagai orang ke tetap ati.”—2 TIM. 2:2.
1. (a) Nama runding nembiak Petara pasal pengawa ngelatih, lalu baka ni tu dititihka kemaya hari tu? (b) Nama deka dikerandauka kitai ba pelajar tu?
NEMBIAK Petara nemu pengawa ngelatih ulih mai pemujur. Chunto, Abram ngatur “semua lelaki ke dalam kem, ke tau enggau beperang,” iya ke udah mujur nyelamatka Lot. (P-kal. 14:14-16) Orang ke belagu maya jeman Raja David “dilatih” belagu muji Jehovah. (1 Ban. 25:7) Kemaya hari tu, kitai patut ngelaban Sitan enggau dunya iya. (Eps. 6:11-13) Kitai mega bebendar muji Jehovah enggau madahka orang bukai pasal nama Iya. (Heb. 13:15, 16) Baka nembiak Petara menya, kitai patut dilatih ngambika mujur. Ba gempuru, Jehovah udah meri tanggungjawap ngagai tuai gempuru kena ngelatih orang bukai. (2 Tim. 2:2) Nama chara ti dikena sekeda tuai gempuru ngelatih menyadi Kristian ke lelaki ngambika nyaga nembiak Jehovah?
NGERINGKA PENGERINDU PELAJAR NGAGAI JEHOVAH
2. Sebedau ngajar pelajar penemu baru, nama ulih digaga tuai gempuru, lalu nama kebuah?
2 Tuai gempuru nya baka pekebun. Sebedau betanam, pekebun nambahka nutrien ba tanah ngambika utai tanam deka tumbuh sereta tan. Pia mega, sebedau tuai gempuru ngajar pelajar penemu baru, iya ulih bekunsi sekeda ajar Bup Kudus ke ulih nulung pelajar sedia nitihka utai ti dipelajarka.—1 Tim. 4:6.
3. (a) Baka ni jaku Jesus ba Mark 12:29, 30 ulih dikena berandau enggau pelajar? (b) Baka ni sampi tuai gempuru ulih nulung pelajar?
3 Endang beguna nemu baka ni pemendar bekaul enggau runding sereta pengasai ati pelajar. Kena nemu tu, nuan ulih nanya iya baka ni semaya iya ngagai Jehovah udah ngubah chara iya ngaga pemutus ba pengidup. Tanya nya ulih ngepunka randau pasal baka ni kitai ulih ngereja pengawa ke Jehovah enggau pengabis ati. (Bacha Mark 12:29, 30.) Nuan ulih mega besampi enggau pelajar nya, lalu minta Jehovah meri iya roh kudus kena iya nerima latih. Lebuh pelajar nya ninga nuan besampi ke iya, tu ulih meransang iya ngereja mayuh agi tanggungjawap!
4. (a) Beri chunto jerita Bup Kudus ke ulih nulung pelajar belajar enggau jampat. (b) Nama juluk ati ke patut dikembuan tuai gempuru maya ngelatih orang bukai?
4 Lebuh nuan berengkah ngelatih, nuan ulih berandau pasal jerita Bup Kudus ke ulih nulung pelajar meda kebuah pengawa nulung, tau dikearap sereta baruh ati nya beguna. (1 Raj. 19:19-21; Neh. 7:2; 13:13; SKR. 18:24-26) Pemanah tu beguna ngagai pelajar baka nutrien ke beguna ngagai tanah. Tu ulih nulung pelajar belajar enggau jampat. Jean-Claude, seiku tuai gempuru ari Perancis madahka juluk ati iya ngelatih, iya nya nulung pelajar ngaga pemutus ti manah ke sejalai enggau ajar Bup Kudus. Ku iya: “Aku ngiga awak alai kami duai ulih macha ayat Bup Kudus kena ‘muka mata’ pelajar meda ‘utai ti badas’ dalam Jaku Petara.” (Mas. 119:18) Nama agi chara bukai ke dikena ngeringka pelajar?
PADAHKA JULUK ATI ENGGAU KEBUAH IYA
5. (a) Nama kebuah beguna bejaku enggau pelajar pasal juluk ati ba ngereja pengawa ke Jehovah? (b) Nama kebuah tuai gempuru patut ngelatih sida ke agi biak? (Peda nota kaki.)
5 Tanya pelajar nama juluk ati iya ba ngereja pengawa ke Jehovah. Enti iya nadai juluk ati, tulung meh iya ngembuan siti juluk ati ke ulih digaga iya. Padahka iya juluk ati ke kala dikembuan nuan sereta pengaga ati nuan maya nuan ulih ngaga iya. Chara tu mudah sereta ulih mujur. Victor, seiku tuai gempuru sereta pengerintis ba Afrika madahka: “Lebuh aku agi biak, seiku tuai gempuru nanya sekeda tanya pasal juluk ati aku. Tanya nya nulung aku berengkah berunding enggau dalam pasal ngereja pengawa ke Jehovah.” Tuai gempuru ke bepeneleba madah manah agi ngelatih pelajar maya sida agi biak. Nuan ulih meri sida tanggungjawap ba gempuru nitihka umur sida. Enti pelajar dilatih lebuh sida agi biak, tu ulih nulung sida mengkang beratika juluk ati, taja pan umur sida mansang tuai sereta mayuh utai ti tau ngelimpangka.—Bacha Masmur 71:5, 17. * (Peda nota kaki.)
Padahka menyadi Kristian ke lelaki nama kebuah pengawa ke diberi nuan ngagai iya patut dikereja, lalu puji pengawa ke udah dikereja iya (Peda genteran 5-8)
6. Nama chara dikena Jesus ngelatih orang bukai?
6 Kena meransang pelajar ngambika deka megai tanggungjawap, nuan ukai semina madahka nama utai ti patut dikereja aja, tang nerangka nama kebuah utai nya patut dikereja. Jesus, Pengajar ti Tebilang, ngasuh bala rasul iya nginjil. Tang, iya nerangka dulu nama kebuah sida patut ngereja nya. Ku iya: ‘Semua kuasa di serega enggau di dunya udah diberi magang ngagai aku. Nya alai, bejalai kita ngagai semua bansa lalu gaga sida nyadi murid aku.’ (Mat. 28:18, 19) Baka ni nuan ulih neladan chara Jesus ngelatih?
7, 8. (a) Baka ni tuai gempuru kemaya hari tu ulih neladan chara Jesus ngelatih? (b) Nama kebuah patut muji pelajar? (c) Nama chara ke ulih nulung tuai gempuru ngelatih orang bukai? (Peda kutak “Baka Ni Ngelatih Orang Bukai.”)
7 Lebuh nuan ngasuh pelajar ngereja pengawa, kena meh Bup Kudus nerangka kebuah pengawa nya beguna. Enggau tu, nuan ngajar iya ngereja pengawa ukai ketegal atur, tang ketegal ajar Bup Kudus. Chunto, enti nuan ngasuh pelajar nyaga pemeresi enggau pengelikun ba pintu penama Palan Gempuru, nuan ulih nunjukka iya ayat ba Titus 2:10. Terangka baka ni pengawa iya ulih ngasuh berita pasal Perintah Petara tampak agi. Pia mega, asuh pelajar berundingka orang ke udah tuai ba gempuru, lalu baka ni ngereja pengawa tu ulih nulung sida. Randau ke baka tu nyediaka latih ke ulih nulung pelajar berundingka mayuh agi pasal orang ari berundingka atur. Lebuh iya meda bala menyadi Kristian bulih penguntung ari pengawa ke dikereja iya, iya deka gaga ati laban iya ulih gawa ke orang bukai.
8 Pia mega, puji meh pelajar ke udah nitihka utai ti dipelajarka. Nama kebuah? Baka ai ke nulung utai tanam tumbuh sereta tan, muji pelajar mega nulung iya mansang agi ngereja pengawa ke Jehovah.—Banding Matthew 3:17.
PENANGGUL BUKAI
9. (a) Nama kebuah tuai gempuru ba sekeda menua ke udah mansang ngasaika tusah deka ngelatih orang bukai? (b) Nama kebuah ngereja pengawa ke Petara enda dikenuluka sekeda menyadi Kristian lelaki ke agi biak?
9 Tuai gempuru ba menua ke udah mansang ngasaika tusah deka meransang menyadi Kristian lelaki ke udah dibaptisa, beumur 20 taun tauka 30 taun ke atas ngereja mayuh agi tanggungjawap ba gempuru. Tuai gempuru ke bepeneleba ba 20 iti menua madahka kebuah sekeda menyadi Kristian lelaki ke biak enda ulih ngereja mayuh agi tanggungjawap ba gempuru. Nitih ku sida, sekeda apai indai enda meransang anak lelaki sida netapka juluk ati ngereja pengawa ke Jehovah. Lalu maya anak deka ngereja mayuh agi tanggungjawap, apai indai ngansak sida netapka juluk ati belajar tinggi tauka ngiga kereja ke begaji besai! Nyadi, ngereja pengawa ke Petara enda kala dikenuluka sida ba pengidup.—Mat. 10:24.
10, 11. (a) Baka ni tuai gempuru ulih belubah-lubah nulung menyadi Kristian ke lelaki ngubah chara iya berunding? (b) Nama ayat Bup Kudus ke ulih dikena tuai gempuru meransang menyadi Kristian ke lelaki, lalu nama kebuah? (Peda nota kaki.)
10 Enti menyadi Kristian lelaki enda entu beminat ngereja mayuh agi tanggungjawap ba gempuru, tuai gempuru patut sabar sereta bebendar agi ngubah chara sida berunding. Tang, tu ulih dikereja. Pekebun ulih nulung utai tanam iya tumbuh lurus enggau belubah-lubah nungkat batang utai tanam iya. Pia mega, nuan ulih belubah-lubah nulung menyadi Kristian ke lelaki ngubah runding iya pasal nerima mayuh agi tanggungjawap ba gempuru. Tang, baka ni?
11 Meri awak ngambika ulih begulai rapat enggau iya. Awakka iya nemu gempuru begunaka iya. Nyau kelama, berandau meh enggau iya ngena ayat Bup Kudus kena nulung iya berundingka pasal semaya iya ngagai Jehovah. (P-jar. 5:4; Isa. 6:8; Mat. 6:24, 33; Luk. 9:57-62; 1 Kor. 15:58; 2 Kor. 5:15; 13:5) Uji muka ati iya ngena tanya baka: ‘Nama semaya nuan enggau Jehovah lebuh nuan nyerahka diri ngagai Iya? Baka ni asai ati Jehovah maya nuan dibaptisa?’ (J-lam. 27:11) ‘Baka ni asai ati Sitan?’ (1 Pet. 5:8) Ayat ke baka tu bekuasa sereta ulih muka ati pelajar.—Bacha Hebrew 4:12. * (Peda nota kaki.)
PELAJAR, AYANKA PENETAP ATI
12, 13. (a) Nama ulah ti diayanka Elisa ke nyadi pelajar? (b) Baka ni Jehovah merekat Elisa ke tetap ati?
12 Menyadi Kristian lelaki ke agi biak, gempuru begunaka tulung nuan! Nama ulah ke ulih nulung nuan mujur ngereja pengawa ke Jehovah? Kena nemu saut iya, aram kitai berandauka pasal Elisa, seiku pelajar kelia menya.
13 Kira-kira 3,000 taun ti udah, nabi Elijah mai Elisa ke agi biak nyadi penulung iya. Elisa terus setuju, lalu enggau baruh ati ngereja pengawa ke nabi nya. (2 Raj. 3:11) Elijah ngelatih Elisa kira-kira 6 taun. Lebuh pengawa Elijah ba Israel nyau ka tembu, iya ngasuh Elisa badu nulung iya. Tang, Elisa tiga kali madahka: “Aku enggai ninggalka nuan.” Iya keran mengkang deka enggau pengajar iya. Lalu Jehovah merekat penaluk sereta penetap ati Elisa enggau ngelakka iya meda Elijah ditabanka ribut pulas uchung.—2 Raj. 2:1-12.
14. (a) Baka ni pelajar kemaya hari tu ulih neladan Elisa? (b) Nama kebuah pelajar patut tetap ati?
14 Pelajar, baka ni nuan ulih neladan Elisa? Jampat meh nerima tanggungjawap, taja pan tanggungjawap nya baka ke mit. Kingatka, pengajar nuan nya orang ke rapat enggau nuan. Padahka iya, nuan beterima kasih ke utai ti udah digaga iya ke nuan, lalu nunjukka diri deka terus belajar enggau iya. Kelebih agi, tetap ati meh bejalaika tanggungjawap nuan. Nama kebuah? Lebuh nuan ngayanka diri tetap ati sereta tau dikearapka, tuai gempuru pechaya Jehovah deka nuan megai mayuh agi tanggungjawap ba gempuru.—Mas. 101:6; bacha 2 Timoti 2:2.
BEBASAKA TUAI GEMPURU KE BEPENELEBA
15, 16. (a) Baka ni chara Elisa ngayanka basa ngagai pengajar iya? (Peda gambar ba pun pelajar.) (b) Nama kebuah nabi ke bukai arapka Elisa?
15 Jerita Elisa mega nunjukka menyadi Kristian ke lelaki kemaya hari tu patut bebasaka tuai gempuru ke bepeneleba. Pengudah Elijah enggau Elisa ngelawa seraban nabi di Jeriko, seduai iya datai ba Sungai Jordan. Udah nya, “Elijah lalu muka kelambi iya, ngulungka kelambi nya lalu maluka kelambi nya ngagai ai Sungai Jordan. Ai nya lalu bebagi dua.” Seduai iya meraka Sungai Jordan nengah tanah ti rangkai, lalu “lebuh seduai iya benung bejalai, seduai iya majak berandau.” Elisa ningaka enggau manah semua utai ke dipadah pengajar iya, lalu terus belajar ari iya. Elisa enda kala ngumbai diri nemu semua utai. Pengudah Elijah ditabanka ribut pulas uchung, Elisa pulai ngagai tebing Sungai Jordan. Ba dia, iya malu ai sungai nya ngena kelambi Elijah lalu bejaku: ‘Dini alai Jehovah, Petara Elijah?’ Sekali da agi, ai sungai nya bebagi dua.—2 Raj. 2:8-14.
16 Bisi nuan beratika, kereja ajih keterubah ti digaga Elisa sebaka enggau kereja ajih penudi ti digaga Elijah? Nama dipelajarka kitai ari tu? Elisa enda ngumbai diri patut ngereja pengawa lain agi ari chara ke udah digaga Elijah, pengudah iya nganti Elijah. Tang, enggau nunda chara Elijah, Elisa ngayanka diri bebasaka pengajar iya. Tu ngasuh nabi ke bukai arapka Elisa. (2 Raj. 2:15) Elisa nyadi nabi pengelama 60 taun, lalu Jehovah meri iya kuasa kena ngaga mayuh agi kereja ajih ari ke udah digaga Elijah. Nama ulih dipelajarka pelajar kemaya hari tu?
17. (a) Baka ni pelajar kemaya hari tu neladan ulah Elisa? (b) Baka ni Jehovah ngena pelajar ke tetap ati ba maya ti patut?
17 Lebuh nuan nerima mayuh agi tanggungjawap ba gempuru, anang ngumbai nuan tau ngubah semua utai ke udah digaga. Kingatka, pengawa ba gempuru semina ulih diubah maya pengawa nya beguna ba gempuru tauka maya nerima iring ari gerempung Jehovah. Nuan enda tau ngaga ubah nitihka peneka ati nuan. Enggau terus ngena chara Elijah, Elisa ngasuh nabi ke bukai arap ke iya. Iya mega ngayanka basa ngagai pengajar iya. Pia mega, enti nuan terus ngena chara pengajar nuan ke sejalai enggau Bup Kudus, nuan ngayanka basa ngagai tuai gempuru ke bepeneleba, lalu bala menyadi Kristian mega deka arap ke nuan. (Bacha 1 Korint 4:17.) Seraya nuan bulih mayuh agi peneleba, nuan deka ngaga ubah ke ulih nulung gempuru nitihka gerempung Jehovah ke terus mansang. Lalu Jehovah deka nulung nuan ngereja tanggungjawap ke besai agi ari ke udah dikereja pengajar nuan ba maya ti patut, baka Iya ke nulung Elisa.—Jhn. 14:12.
18. Nama kebuah beguna ngelatih menyadi Kristian ke lelaki enggau jampat ba gempuru?
18 Kami ngarapka chara ke dipadah ba pelajar tu enggau ba pelajar ke dulu ari tu, deka meransang mayuh agi tuai gempuru meri awak ngelatih menyadi Kristian ke lelaki. Kami mega ngarapka mayuh agi menyadi Kristian ke lelaki deka dilatih, lalu ngena utai ti dipelajar sida nyaga nembiak Jehovah. Latih tu deka ngeringka gempuru ba serata dunya, lalu deka nulung semua kitai meruan tetap ati maya penusah besai ti deka datai.
^ per. 5 Enti menyadi Kristian lelaki ke biak nunjukka diri teguh ba pengarap, baruh ati sereta ngembuan pemanah bukai ke beguna kena megai tanggungjawap ba gempuru, tuai gempuru ulih berundingka iya ngambika dipilih nyadi penulung gempuru taja pan umur iya bedau manggai 20 taun.—1 Tim. 3:8-10, 12; peda Menara Jaga kena 1 Julai 1989, lambar 29.
^ per. 11 Nuan ulih berandauka chara ke bisi ba Menara Jaga 15 April, 2012, lambar 14-16, genteran 8-13; enggau “Meruan Dalam Pengerindu Petara,” Pelajar 16, genteran 1-3.
