Pemati Jesus nya pengawa ti pemadu besai dalam sejarah—iya mati kena mulaika pengidup mensia baka ke asal. Mensia enda digaga enggau pengingin deka ngereja penyai, nyadi sakit, tauka mati. (Pemungkal 1:31) Tang, dosa datai ngagai dunya nengah mensia keterubah, Adam. Jesus nyerahka nyawa iya kena nyelamatka kitai ari dosa enggau pemati.—Bacha Matthew 20:28; Rome 6:23.

Petara ngayanka pengerindu ti besai enggau ngirumka Anak Iya ke dunya ngambika mati ke kitai. (1 John 4:9, 10) Jesus ngasuh murid iya ngingatka pemati iya ngena pengawa ke begunaka roti enggau wain. Ngereja tu ninting taun nunjukka kitai beterima kasih ke pengerindu ti udah diayanka Petara enggau Jesus.—Bacha Luke 22:19, 20.

Lebuh Jesus keterubah iya ngasuh murid iya ngingatka pemati iya, iya bejaku pasal sempekat tauka semaya. (Matthew 26:26-28) Tu muka peluang ke sida ti deka nyadi raja sereta imam enggau iya ba serega. Taja pan bejuta iku orang ngingatka hari pemati Jesus, tang semina sida ke dalam sempekat nya aja ulih makai roti enggau ngirup wain.—Bacha Pemandang 5:10.

Kira-kira 2,000 taun Jehovah udah milih orang ke deka nyadi raja. (Luke 12:32) Penyampau sida mimit aja enti dibanding enggau sida ke deka idup belama ba dunya.—Bacha Pemandang 7:4, 9, 17.