Nitih ku Bup Kudus, semua mensia bisi dosa ke datai ari Adam. Ketegal nya, kadang-kadang kitai ngereja utai ti salah. Tang Jesus Kristus, Anak Petara, udah nebus dosa kitai ngena nyawa iya. Nya alai, genselan tebus iya udah muka jalai ngambika dosa kitai ulih diampun. Genselan tebus nya pemeri ari Petara.—Bacha Rome 3:23, 24.

Baka ni enti kitai udah ngereja dosa ti amat besai? Bup Kudus madah: ‘Darah Jesus nuchi kitai ari semua dosa.’ (1 John 1:7) Amat, Jehovah deka ngampunka dosa ti besai enti kitai amat nesal ati lalu badu agi ngereja nya. Tu tentu deka ngelantangka ati kitai.—Bacha Isaiah 1:18.

Kitai patut belajar pasal Petara Jehovah. Ambika chunto, kitai deka nemu utai ti dikerindu, utai ti dipegedi, utai ti dikedeka, sereta pesan Iya. (John 17:3) Jehovah deka ngampunka orang ti nesal ati sereta bebendar enda agi ngereja dosa nya.—Bacha Surat Kereja Rasul 3:19.

Jehovah bisi penyinu sereta pengasih ti besai. Iya nemu pengelemi kitai. Nya alai, kitai enda tusah deka ngelantangka ati Iya. Endaka tu meransang nuan deka datai semak ngagai Iya?—Bacha Masmur 103:13, 14.