‘Bepegai ba Jaku Aku’

‘Enti kita bepegai ba jaku aku, kita amat murid aku, lalu kita deka nemu pemendar, lalu pemendar deka ngelepaska kita.’—JOHN 8:31, 32.

Reti: Ajar Jesus datai ari Apai iya. Ku iya madahka, ‘Apai ke ngirumka aku udah meri aku pesan pasal utai ti enda tau enda disebut aku.’ (John 12:49) Lebuh iya besampi ngagai Jehovah, Apai iya ba serega, Jesus madah, “Jaku Nuan nya pemendar.” Iya suah ngena ayat Bup Kudus lebuh ngajar. (John 17:17; Matthew 4:4, 7, 10) Nya alai, orang Kristian ti bendar patut ‘bepegai ba jaku iya.’ Sida ngaku jaku Petara nya “pemendar.” Semua utai ti dipechaya enggau dikereja sida bepelasarka Bup Kudus.

Teladan Orang Kristian Abad Keterubah: Rasul Paul mega neladan Jesus. Iya nulis, ‘Semua Bup Kudus endang bepun ari Petara magang, lalu beguna.’ (2 Timoti 3:16) Lelaki Kristian ke dipilih ngajar “enda tau enda bepegai teguh ba pesan ti tau dikarapka.” (Titus 1:7, 9) Orang Kristian ba abad keterubah mega diasuh nulak “kelakar ti nadai reti, ti datai ari ajar mensia, ti datai ari ajar bala roh ti merintah di langit enggau di dunya tu, ukai ari Kristus.”—Kolosi 2:8.

Sapa Nitihka Teladan Sida Kemayaharitu?: Nitihka Catechism of the Catholic Church, “adat mensia sama dikemeratka baka Ayat ti Kudus. Nya alai, ajar ari Gerija Katolik enda bepelasarka Ayat ti Kudus aja.” Siti artikel dalam majalah Maclean’s nuliska utai ti dipadah seiku tuai pengarap Kristian ba Toronto, Kanada. Ku iya madah, “Kitai bisi penemu diri ti manah. Nyadi, nama kebuah kitai nejuka Bup Kudus enggau ajar Jesus ari 2,000 taun suba nentuka pengidup kitai deh?”

Bekaul enggau Saksi-Saksi Jehovah, bup New Catholic Encyclopedia madahka, “Sida ngumbai Bup Kudus nya siti aja pugu pengarap sereta prinsip pengidup.” Baru-baru tu ba Kanada, seiku lelaki madah ngagai seiku Saksi ke benung megai Bup Kudus, “Aku nemu nuan Saksi laban kita seruran ngena Bup Kudus.”