1. Nama kebuah Paul gaga ati enggau chara iya ngena pengidup iya?

 RASUL Paul nemu, enda lama da agi iya deka diukum bunuh. Tang lebuh iya berunding pasal chara iya udah ngena pengidup iya, iya berasai amat gaga ati. Lebuh iya ngenang baru, iya madahka: “Aku udah belanda nyentuk ke ujung lalu aku udah nitihka ajar ke dipechayaka kitai.” (2 Tim. 4:​6-8) Paul udah ngaga pemutus ti manah lebuh iya ngena pengidup iya nyembah Jehovah, lalu iya yakin Jehovah tentu gaga ati enggau iya! Kitai mega keran deka ngaga pemutus ti manah lalu ngelantangka ati Petara. Baka ni kitai ulih ngereja nya?

 2. Nama reti utai ke dipadah Paul ba 2 Korint 5:7?

² Paul madahka tu pasal diri iya sereta bala menyadi ke bukai ti tetap ati: “Kitai idup bepelasarka pengarap, ukai bepelasarka utai ke ulih dipeda.” (2 Kor. 5:7) Nama reti utai ku Paul? Orang ke idup “bepelasarka utai ke ulih dipeda” semina ngaga pemutus bepelasarka utai ke ulih dipeda, didinga, sereta ditegu iya. Taja pia, orang ke “idup bepelasarka pengarap” ngaga pemutus bepelasarka pengarap iya ba Petara Jehovah. Utai ke digaga iya nunjukka iya yakin Petara deka merekatka iya, lalu iya deka bulih penguntung lebuh nitihka jaku lalau Jehovah dalam Bup Kudus.—Mas. 119:66; Heb. 11:6.

 3. Nama penguntung iya lebuh kitai idup bepelasarka pengarap? (2 Korint 4:18)

³ Endang amat, kekadang semua kitai ngaga pemutus bepelasarka utai ke ulih dipeda, didinga, sereta ditegu kitai. Tang enti kitai semina bepanggai ba utai ke dipeda tauka didinga  lebuh ngaga pemutus ti penting, kitai engka deka ngaga pemutus ti salah. Nama kebuah? Laban utai ke dipeda enggau didinga kitai enda seruran betul. Enti kitai semina ngaga pemutus bepelasarka utai tu aja, tu ulih ngujungka kitai ngereja utai ti enda dikerinduka Jehovah. (P-jar. 11:9; Mat. 24:​37-39) Taja pia, lebuh kitai ngaga pemutus bepelasarka pengarap kitai, kitai deka ngaga pemutus “ti ngelantangka ati Tuan.” (Eps. 5:10) Lebuh kitai nitihka jaku lalau Petara, tu deka meri kitai pengelantang sereta ngasuh kitai gaga ati. (Mas. 16:​8, 9; Isa. 48:​17, 18) Lalu enti kitai terus idup bepelasarka pengarap, kitai deka idup belama iya.—Bacha 2 Korint 4:18.

 4. Baka ni sesiku orang ulih nemu nama utai ke ngiring iya lebuh iya ngaga pemutus?

⁴ Semua kitai patut nanya diri empu: ‘Nama utai ke ngiring aku lebuh aku ngaga pemutus? Kati aku semina bepanggai ba utai ke ulih dipeda, tauka kati aku bepanggai ba jaku lalau Jehovah?’ Kitai deka beratika baka ni kitai ulih terus idup bepelasarka pengarap ba tiga iti pekara ti penting: (1) Lebuh milih kereja, (2) lebuh milih kaling pengidup, sereta (3) lebuh nerima iring ari gerempung Jehovah. Ba tiap iti situasi nya, kitai deka berandauka utai ke patut diperundingka kitai ngambika ulih ngaga pemutus ti manah.

LEBUH MILIH KEREJA

 5. Nama utai ke patut diperundingka kitai lebuh milih kereja?

⁵ Semua kitai deka milih kereja ke ulih melanja diri empu sereta ruang bilik kitai. (P-jar. 7:12; 1 Tim. 5:8) Sekeda kereja begaji besai. Kereja ke baka tu ulih ngasuh sesiku pekereja bisi chukup duit kena melanja diri sebilik iya, lalu iya mega ulih nyimpan mimit duit ke jemah ila. Taja pia, sekeda kereja enda entu begaji besai, lalu pekereja nya semina bisi chukup duit kena nyediaka pekara asas ke ruang bilik iya, baka pemakai, endur diau, sereta gari. Endang amat, lebuh kitai milih kereja, kitai tentu deka berunding pasal penyampau gaji ke deka diterima kitai. Taja pia, enti nya aja utai ke diperundingka kitai, tu nunjukka kitai enda idup bepelasarka pengarap.

 6. Baka ni kitai ulih idup bepelasarka pengarap lebuh milih kereja? (Hebrew 13:5)

⁶ Enti kitai idup bepelasarka pengarap, kitai deka berundingka baka ni kereja nya deka bisi kesan ba kaul kitai enggau Jehovah. Kitai ulih nanya diri empu: ‘Kati kereja tu deka ngasuh aku ngereja utai ti dipegedika Jehovah?’ (J-lam. 6:​16-19) ‘Kati kereja tu deka ngachau sembah aku lalu engka ngasuh aku jauh ari diri sebilik aku pengelama timpuh ti panjai?’ (Plp. 1:10) Enti saut ngagai tanya ke baka tu nya ‘au,’ reti iya manah agi kitai enda nerima kereja nya, taja pan kitai engka tusah deka ngiga kereja. Ketegal kitai idup bepelasarka pengarap, kitai deka ngaga pemutus ke nunjukka kitai yakin Jehovah deka nyediaka utai ke diguna kitai.—Mat. 6:33; bacha Hebrew 13:5.

7-8. Baka ni siku menyadi lelaki ba Amerika Selatan idup bepelasarka pengarap? (Peda mega gambar.)

⁷ Siku menyadi lelaki ba Amerika Selatan ke benama Javier, a nemu kebuah nya penting idup bepelasarka pengarap. Ku iya madahka: “Aku minta jawatan kereja ba kompeni alai aku gawa, ke deka meri aku gaji dua kali ganda ari jawatan aku ke diatu, sereta ke amat dikerinduka aku.” Taja pia, Javier mega keran deka nyadi pengerintis. Ku iya agi: “Aku bisi interbiu ke jawatan nya. Sebedau interbiu nya, aku besampi minta tulung ari Jehovah laban aku yakin Iya nemu utai ti  pemadu manah ke aku. Aku ka megai mayuh agi tanggungjawap sereta bisi gaji ti besai agi. Tang aku enggai jawatan tu enti iya enda ulih nulung aku ngereja mayuh agi ke Jehovah.”

⁸ Javier madahka: “Maya interbiu nya, manager kompeni nya madahka aku patut suah gawa overtime. Aku enggau basa nerang ngagai iya, aku enda ulih ngereja nya ketegal sembah aku ngagai Jehovah.” Nyadi, Javier nulak tawaran nya. Dua minggu udah nya, iya berengkah ngerintis. Udah nya, iya mega tetemuka kereja part-time. Ku iya madahka: “Jehovah ningaka sampi aku sereta nulung aku tetemuka kereja ke nyukung pengawa ngerintis aku. Aku amat gaga ati laban bisi mayuh agi awak gawa ke Jehovah sereta nulung bala menyadi Kristian aku.”

 9. Nama dipelajarka nuan ari pengalaman Trésor?

⁹ Baka ni enti kitai sedar kereja kitai ke diatu ngasuh kitai tusah deka mengkang semak ngagai Jehovah? Peratika pengalaman Trésor ari Congo. Ku iya madahka: “Kereja aku ti baru tu kereja ti amat dikedekaka aku. Gaji aku tiga kali ganda ari kereja aku ke sebedau tu, lalu orang amat bebasaka aku.” Taja pia, Trésor suah enda datai begempuru ketegal gawa overtime. Pia mega, kekadang iya ditekan ngambika bula ngagai orang bukai pasal pengawa ti enda lurus ke digaga ba endur iya gawa. Trésor deka ngetu gawa dia, tang iya irau sekalika iya ulih tetemuka kereja bukai. Nama nulung iya? Ku iya madahka: “Habakuk 3:​17-19 nulung aku faham, taja pan aku patut ngetu kereja nya lalu bulih gaji ti mit agi, tang aku yakin Jehovah ulih nyaga aku. Nyadi, aku pan badu kereja nya.” Iya nerangka: “Mayuh tuke berunding, enti kereja nya begaji besai, sesiku orang deka ngelengkaka sebarang utai, nyengkaum kaul iya enggau diri sebilik sereta pengawa rohani. Aku gaga ati laban udah nyaga kaul aku enggau Jehovah sereta enggau diri sebilik aku. Setaun  pengudah nya, Jehovah nulung aku tetemuka kereja ti stabil, ke ulih ngasuh aku idup enggau sederhana sereta bisi mayuh agi awak gawa ke Iya. Lebuh kitai ngenuluka Jehovah, kekadang kitai engka napi penanggul ba duit. Tang Jehovah deka nyaga kitai.” Au, enti kitai arapka jaku lalau sereta semaya Jehovah, kitai deka ngaga pemutus ke nunjukka kitai bisi pengarap, lalu Jehovah deka merekatka kitai.

LEBUH MILIH KALING PENGIDUP

10. Lebuh milih kaling pengidup, nama utai ke ulih ngasuh kitai milih bepelasarka utai ke ulih dipeda aja?

¹⁰ Tikah nya pemeri ari Jehovah, nyadi enda salah enti kitai bisi pengingin deka kawin. Ambika chunto, lebuh sesiku menyadi berunding pasal ngiga kaling pengidup, iya engka beratika personaliti, gamal, reputasi, situasi kewangan, tanggungjawap ba ruang bilik, tauka enti orang nya deka ngasuh iya gaga ati tauka enda. Amat, semua utai tu penting. Taja pia, enti iya semina beratika utai tu, iya engka milih bepelasarka utai ti ulih dipeda.

11. Baka ni kitai ulih idup bepelasarka pengarap lebuh milih kaling pengidup? (1 Korint 7:39)

¹¹ Jehovah amat temegah ati lebuh bala nembiak Iya nitihka jaku lalau Iya maya milih kaling pengidup. Ambika chunto, sida nitihka jaku lalau Bup Kudus ke ngasuh sida nganti nyentukka sida udah chukup matang sebedau berengkah bepangan. (1 Kor. 7:36) Lebuh milih kaling pengidup, sida nentuka orang nya bisi sifat ti dipadah Jehovah patut bisi ba siku laki tauka bini ti manah. (J-lam. 31:​10-13, 26-28; Eps. 5:33; 1 Tim. 5:8) Enti bisi orang ke ukai Saksi ngayanka minat ngagai sida, sida ngasika jaku lalau ke ngasuh sida kawin enggau “murid Tuan,” ke dipadah ba 1 Korint 7:39. (Bacha.) Sida ngereja nya laban sida nemu Jehovah deka seruran nyukung sida ari segi emosi.—Mas. 55:22.

12. Nama dipelajarka nuan ari teladan Rosa?

¹² Peratika pengalaman Rosa, siku pengerintis ba Colombia. Siku lelaki ke ukai Saksi ba endur kereja iya berengkah ngayanka minat ngagai iya. Rosa pan bisi ati ngagai lelaki nya. Rosa madahka: “Iya baka ke lelaki ti manah. Iya nulung orang ba komuniti iya, sereta nadai tebiat ti enda manah. Iya amat manah enggau aku. Iya bisi semua sifat ti dikedekaka aku ba siku laki, tang iya ukai siku Saksi. Aku tusah ka madah ngagai iya, aku enggai bepangan enggau iya. Maya nya, aku berasai sunyi lalu aku ka kawin, tang aku bedau tetemuka menyadi lelaki ti sesuai.” Taja pia, Rosa enda semina befokus ba utai ke ulih dipeda iya. Iya berunding pasal nama deka nyadi ngagai kaul iya enggau Jehovah enti iya mutuska deka bepangan enggau lelaki ba endur kereja nya. Nyadi, iya badu agi berandau enggau lelaki nya, lalu mengkang kisuk ba pengawa iya ke Jehovah. Enda lama udah nya, iya dikangau ngagai Sekula Penginjil Perintah Petara, lalu diatu iya siku pengerintis spesial. Ku Rosa madahka: “Jehovah udah meri aku mayuh berekat ke ngasuh aku amat gaga ati.” Endang amat, enda seruran senang deka ngereja utai ti dikedekaka Jehovah, kelebih agi lebuh kitai bisi asai ati ti kuat pasal pekara nya. Tang enti kitai diiring runding Jehovah, kitai deka seruran bulih penguntung.

LEBUH NERIMA IRING ARI GEREMPUNG JEHOVAH

13. Nama engka reaksi kitai lebuh kitai nerima iring ari gerempung Jehovah?

¹³ Bala tuai gempuru, tuai ti ngabas, pampang opis, sereta Raban ti Ngiring suah meri kitai iring kena nulung kitai nyembah Jehovah. Tang baka ni enti kekadang kitai  enda faham kebuah iring nya diberi? Kitai engka kakang ati sekalika iring nya manah tauka enda. Kitai engka indah berengkah befokus ba pengurang menyadi ke meri iring nya.

14. Nama deka nulung kitai ngasika iring ke diterima ari gerempung Jehovah? (Hebrew 13:17)

¹⁴ Lebuh kitai idup bepelasarka pengarap, kitai yakin Jehovah benung ngiring gerempung Iya, lalu Iya nemu utai ti pemadu manah ke kitai. Ketegal nya, kitai sedia deka ngasi sereta ngereja nya enggau runding ti positif. (Bacha Hebrew 13:17.) Kitai nemu, lebuh kitai nitihka iring, kitai nulung raban gempuru mengkang beserakup. (Eps. 4:​2, 3) Kitai yakin, taja pan bala menyadi ke ngiring nya enda sempurna, tang enti kitai ngasi, Jehovah deka merekatka kitai. (1 Sam. 15:22) Lalu enti iring nya patut diubah, Jehovah tentu deka ngereja nya.—Mik. 7:7.

15-16. Nama nulung siku menyadi lelaki idup bepelasarka pengarap taja pan iya kakang ati pasal iring ke diterima? (Peda mega gambar.)

¹⁵ Peratika siti pengalaman ke nunjukka penguntung ke diulih enti kitai arap sereta nitihka iring ari gerempung. Ba Peru, taja pan jaku Sepanyol mayuh dikena, tang mayuh orang ke bempu rumah ngena jaku tempatan. Siti ari nya jaku Quechua. Pengelama betaun-taun, bala menyadi ke ngena jaku Quechua ngiga orang ke ngena jaku nya ba endur alai sida nginjil. Tang ngambika ulih ngasika undang-undang, bisi ubah digaga pasal chara ngiga orang. (Rom. 13:1) Ketegal nya, sekeda menyadi irau enti tu deka ngasuh sida tusah agi ngiga orang ke ngena jaku Quechua. Taja pia, lebuh sida ngasika iring nya, Jehovah merekatka usaha sida ngambika ulih betemu enggau mayuh agi orang ke ngena jaku Quechua.

 ¹⁶ Siku ari menyadi ke irau nya, Kevin. Iya siku tuai gempuru ba raban gempuru jaku Quechua. Ku iya madah: “Aku berunding, ‘Baka ni kami deka ngiga orang ke ngena jaku Quechua diatu?’” Nama digaga Kevin? Ku iya madahka: “Aku ingatka Jaku-Dalam 3:​5, lalu aku berunding pasal Moses. Jehovah meri iya iring ke baka ke enda masuk akal. Iya ngasuh Moses mai orang Israel pansut ari Ejip ngagai Tasik Mirah. Dia, orang Israel baka ke enda ulih ngerarika diri ari orang Ejip ke benung begagaika sida. Taja pia Moses ngasi, lalu Jehovah merekatka iya enggau chara ti ngalitka ati.” (P-sut. 14:​1, 2, 9-11, 21, 22) Kevin sanggup ngubah chara iya nginjil. Nama asil iya? Iya madahka: “Aku kagum enggau chara Jehovah merekatka kami. Suba kami mayuh bejalai, tang semina betemu enggau siku tauka dua iku orang ke ngena jaku Quechua. Diatu, kami ngagai endur ke bisi mayuh orang ke ngena jaku Quechua. Asil iya, kami ulih berandau enggau mayuh agi orang, bisi mayuh agi datai ngabas, sereta pemelajar Bup Kudus. Lalu mayuh agi orang datai ngagai gempuru.” Au, lebuh kitai idup bepelasarka pengarap, kitai deka seruran bulih berekat ari Jehovah.

17. Nama udah dipelajarka nuan ari artikel tu?

¹⁷ Kitai udah berandauka chara kitai ulih terus idup bepelasarka pengarap ba tiga iti pekara ti penting. Tang kitai patut terus idup bepelasarka pengarap ba semua aspek pengidup kitai, baka lebuh milih cherita ke deka dipeda tauka rekreasi, lebuh ngaga pemutus pasal penyampau pendidikan ke deka diulih kitai tauka pasal chara ngemesaika anak. Enda ngira nama pemutus ke patut digaga, kitai deka pemutus nya bepelasarka kaul kitai enggau Jehovah, jaku lalau Iya, sereta semaya Iya ke deka nyaga kitai, ukai semina bepelasarka utai ke ulih dipeda aja. Enti kitai ngereja nya, kitai ulih ‘nyembah sereta ngasika Jehovah Petara kitai belama lama iya.’—Mik. 4:5.