1. Baka ni Moses ngayanka pengarap ngagai Jehovah lebuh iya ngiring orang Israel pansut ari Ejip?

 BUP Hebrew bisi nyebut pasal mayuh orang ke bisi pengarap ngagai Jehovah. Siku ari sida nya Moses, ke bisi pengarap ti besai. (Heb. 3:​2-5; 11:​23-25) Iya ngayanka pengarap lebuh iya ngiring orang Israel pansut ari menua Ejip. Iya enda nejuka Firaun enggau bala soldadu Ejip ngenakutka iya. Iya arapka Jehovah enggau pengabis iya lalu ngiring orang Israel meraka Tasik Mirah, lalu udah nya tama ngagai menua puang. (Heb. 11:​27-29) Lebuh mayuh ari orang Israel berengkah kakang ati sekalika Jehovah deka nyaga sida tauka enda, Moses mengkang arapka Petara. Pengarap Moses enda lebu ngapa laban Petara nyediaka pemakai enggau ai ke orang Israel ba menua puang. a—P-sut. 15:​22-25; Mas. 78:​23-25.

 2. Nama kebuah Petara nanya Moses: “Kati bisi nama-nama utai ke enda ulih dikereja Aku, Jehovah”? (Penyampau 11:​21-23)

² Taja pan Moses bisi pengarap ti tegap, tang kira-kira setaun pengudah Jehovah ngelepaska orang Israel ari Ejip, Moses berengkah kakang ati sekalika Jehovah deka meri sida dagin baka ke udah dipadah Iya. Maya nya bisi bejuta iku sida ba menua puang, lalu pemakai sida nyauka abis. Kati Jehovah ulih nyediaka dagin ti chukup ke semua sida? Ku Jehovah nyaut Moses: “Kati bisi nama-nama utai ke enda ulih dikereja Aku, Jehovah?” (Bacha Penyampau 11:​21-23.) Ba jaku Hebrew asal, ayat tu ngena rambai jaku ke mai reti “jari Jehovah.” Tu merujuk ngagai kuasa kudus Petara, tauka kuasa ke dikena Jehovah ngereja peneka Iya. Nyadi, kebendar iya, Jehovah benung  madah ngagai Moses: “Aku ulih ngereja sebarang utai ke udah dipadah Aku.”

 3. Nama kebuah kitai patut belajar ari utai ke nyadi ngagai Moses enggau orang Israel?

³ Kati nuan kala irau sekalika Jehovah deka nyediaka utai ti diguna nuan enggau diri sebilik nuan ba pengidup besehari-sehari? Enda ngira sekalika nuan kala irau tauka enda, aram kitai beratika pengalaman Moses enggau orang Israel ke kakang ati sekalika Jehovah ulih nyediaka utai ti diguna sida tauka enda. Lalu, kitai mega deka beratika sekeda ayat Bup Kudus ke deka nulung kitai arap agi ngagai Jehovah, ke deka seruran nulung kitai.

BELAJAR ARI MOSES ENGGAU ORANG ISRAEL

 4. Nama kebuah mayuh orang Israel berengkah kakang ati sekalika Jehovah ulih nyediaka utai ti diguna sida?

⁴ Peratika utai ti benung nyadi maya nya. Orang Israel enggau “mayuh macham bansa orang,” ke ukai orang Israel, ninggalka Ejip lalu udah bejalai ba menua puang pengelama sesiti timpuh. Sida benung ba pejalai nuju ngagai Menua ti Udah Disemaya. (P-sut. 12:38; U-dat. 8:15) Sida ke ukai orang Israel berengkah leju makai manna, nyentukka mayuh orang Israel pan berengkah nitihka sida. Udah nya, semua sida mutap ngagai Moses. (P-pau. 11:​4-6) Sida berengkah lelengauka pemakai ke kala diempa sida ba Ejip. Ketegal sida mutap ngagai Moses, Moses ngumbai iya meh ke patut ngiga dagin ke semua sida.—P-pau. 11:​13, 14.

5-6. (a) Baka ni runding orang ke ukai bansa Israel meri kesan ngagai orang Israel? (b) Nama ulih dipelajarka kitai ari nya?

⁵ Orang ke ukai bansa Israel enda beterima kasihka utai ti udah diberi Jehovah ngagai sida. Lalu orang Israel pan berengkah berunding baka sida. Nya mega ulih nyadi ngagai kitai. Lebuh orang ke ngelingi kitai enda beterima kasih, kitai mega engka berengkah enda beterima kasih ke utai ti diberi Jehovah ngagai kitai. Kitai engka berengkah lelengauka utai ti kala dikembuan kitai ba pengidup tauka berengkah kepapaska utai ti dikembuan orang bukai. Tang kitai deka gaga agi ati enti kitai nemu puas ati, enda ngira nama situasi kitai.

⁶ Kebendar iya, orang Israel patut berundingka utai ti udah disemaya Jehovah ngagai sida. Iya madahka Iya deka meri sida mayuh agi utai ti manah lebuh sida datai ngagai Menua ti Udah Disemaya, ukai lebuh sida ba menua puang. Baka nya mega, ari ke befokus ngagai utai ti enda dikembuan kitai ba dunya tu, manah agi enti kitai belematika semaya Jehovah ke deka meri kitai mayuh agi utai ti manah ba dunya baru. Kitai mega ulih belematika sekeda ayat Bup Kudus ke deka nulung kitai majak arapka Jehovah.

 7. Nama kebuah kitai yakin Jehovah seruran ulih nulung kitai?

⁷ Lebuh Jehovah madah ngagai Moses utai ke ditulis ba Penyampau 11:​23, Iya engka deka Moses berunding pasal dua iti pekara: (1) Kuasa Iya nadai tatak. (2) Iya ulih ngena kuasa Iya ba sebarang endur. Nyadi, taja pan orang Israel ba menua puang, tang Jehovah ulih nyediaka mayuh dagin ke sida. Ngena ‘jari Iya ti kering sereta lengan Iya ti bekuasa,’ Petara nunjukka Iya ulih nulung bala nembiak Iya ba sebarang endur. (Mas. 136:​11, 12) Nyadi, lebuh kitai benung napi situasi ti tusah, kitai yakin Jehovah ulih nulung tiap iku kitai enda ngira dini alai kitai.—Mas. 138:​6, 7.

 8. Nama ulih nulung kitai nyeliahka penyalah ti sama ke digaga mayuh ari sida ke ba menua puang? (Peda mega gambar.)

⁸ Jehovah ngamatka semaya Iya lalu nganjung mayuh burung puyuh ngagai bala nembiak Iya. Taja pia, sida enda beterima kasih ngagai Petara ke udah ngaga kereja ajih  tu. Sida nyadi amat amu. Pengelama sehari setengah, sida enda ngetu nangkap burung puyuh. Jehovah amat ringat enggau sida “ke rangka sereta amu,” lalu Iya ngukum sida. (P-pau. 11:​31-34) Nama ulih dipelajarka kitai? Kitai patut bejimat ngambika enda nyadi amu. Enda ngira sekalika kitai kaya tauka enda, kitai patut ngenuluka pengawa nyimpan “reta ba serega.” Kena ngereja tu, kitai patut negapka agi kaul kitai enggau Jehovah sereta Jesus, lalu majak semak enggau seduai iya. (Mat. 6:​19, 20; Luk. 16:9) Lebuh kitai ngereja tu, kitai ulih yakin Jehovah deka nyediaka utai ti diguna kitai.

 9. Nama utai ke ulih dikeandalka kitai?

⁹ Kemayaharitu, Jehovah mega seruran sedia deka nulung bala nembiak Iya. Kati tu reti iya kitai deka seruran bisi duit lalu enda kala lapar? Enda! b Tang kitai ulih andal enggau pengabis ati, Jehovah enda sekali-kali deka ninggalka kitai. Iya deka seruran meri kitai pengering, enda ngira nama penanggul ke ditapi kitai. Nyadi, baka ni kitai ulih nunjukka kitai arapka Jehovah deka nyediaka utai ti diguna kitai? Aram kitai beratika dua iti situasi: (1) Lebuh kitai napi penanggul ba penatai pemisi sereta (2) lebuh kitai irau pasal utai ti diguna kitai maya udah tuai.

LEBUH NAPI PENANGGUL BA PENATAI PEMISI

10. Nama penanggul ba penatai pemisi ke engka ditapi kitai?

¹⁰ Seraya pengujung dunya tu majak semak, majak mayuh agi penanggul ke deka nyadi. Pengidup kitai engka majak tusah ketegal perintah  ti enda stabil, perang, bencana alam, tauka pandemik. Kitai engka enggau enda disadang lenyau kereja, utai ti dikemisi, tauka rumah kitai. Lalu tu engka ngasuh kitai majak tusah deka nyediaka utai ti diguna ninting hari. Kitai engka patut ngiga kereja baru tauka pindah enggau diri sebilik kitai ngagai endur bukai ngambika ulih nyediaka utai ti diguna sida. Nyadi, nama ulih nulung kitai ngaga pemutus ke nunjukka kitai arapka Jehovah?

11. Nama ulih nulung nuan napi penanggul ba penatai pemisi? (Luke 12:​29-31)

¹¹ Chara ti pemadu penting iya nya madah ngagai Jehovah pasal pengirau nuan. Chara tu tentu deka nulung nuan. (J-lam. 16:3) Pinta meh ari Iya penemu-dalam ngambika nuan ulih ngaga pemutus ti manah. Nuan mega ulih minta Iya nulung nuan mengkang tenang ngambika enda “kelalu irau” pasal situasi nuan. (Bacha Luke 12:​29-31.) Bebendar minta Iya nulung nuan puas ati enggau utai ti dikemisi nuan ngambika ulih beridup ninting hari. (1 Tim. 6:​7, 8) Gaga meh pansik ba litaricha kitai kena nemu baka ni deka mutarka penanggul ba duit. Mayuh orang madahka, video enggau artikel ba jw.org udah nulung sida mutarka penanggul ba duit.

12. Nama sekeda tanya ke ulih nulung orang Kristian ngaga pemutus ti manah ke diri sebilik iya?

¹² Sekeda udah nerima kereja ke ngasuh sida jauh ari diri sebilik. Tang udah nya, mayuh ari sida sedar tu ukai pemutus ti manah. Nyadi, sebedau nerima sesiti tawaran kereja, anang semina berundingka gaji ke deka diulih, tang berunding dulu sekalika tu deka nulung nuan enggau diri sebilik nuan mengkang semak ngagai Jehovah tauka enda. (Luk. 14:28) Tanya diri empu: ‘Nama ulih nyadi ngagai tikah kami enti aku jauh ari kaling pengidup aku? Kati aku agi ulih datai begempuru, nginjil, sereta begulai enggau bala menyadi Kristian?’ Enti nuan bisi anak, nuan mega patut nanya utai ti penting tu: ‘Kati aku ulih ngemesaika bala anak aku nitihka “jaku ajar sereta iring ari Jehovah” enti aku jauh ari sida?’ (Eps. 6:4) Lebuh nuan ngaga pemutus, titihka meh runding Jehovah, ukai utai ti dipadah kaban belayan tauka bala kaban ke enda nitihka jaku Bup Kudus. c Tony, ke diau ba Asia Barat, nerima beberapa iti tawaran kereja ti begaji besai ba menua bukai. Taja pia, pengudah Tony besampi sereta berandauka pekara nya enggau bini iya, iya mutuska deka nulak tawaran kereja nya lalu berundingka baka ni sida sebilik ulih ngurangka belanja ba pengidup besehari-sehari. Lebuh Tony ngenang baru, iya madahka: “Ketegal aku ngaga pemutus tu, aku bisi peluang nulung beberapa iku orang ngelala Jehovah, lalu bala anak kami mega rindu ngereja pengawa ke Jehovah. Kami sebilik nemu Jehovah deka seruran nyaga kami seagi-agi kami nitihka jaku lalau ba Matthew 6:33.”

LEBUH BERUNDING PASAL MAYA NUAN UDAH TUAI

13. Nama sekeda utai ke ulih dikereja kitai diatu ngambika kitai bisi utai ke diguna kitai maya udah tuai?

¹³ Pengarap kitai ngagai Jehovah mega ulih diuji lebuh kitai ngaga pelan ke pengidup kitai maya udah tuai. Bup Kudus meransang kitai bebendar gawa ngambika kitai bisi chukup utai ke diguna kitai dudi hari. (J-lam. 6:​6-11) Nyadi, enti ulih, simpan meh mimit duit ke dudi hari. Endang amat, duit ulih nulung kitai maya kitai begunaka nya. (P-jar. 7:12) Taja pia, anang meh ngumbai duit nya utai ti pemadu penting ba pengidup kitai.

14. Baka ni Hebrew 13:5 nulung kitai ngambika enda kelalu irau?

¹⁴ Ba siti sempama, Jesus bejaku pasal siku  lelaki ke nyimpan reta, tang enda “kaya ba mata Petara.” Jesus madah, lelaki nya beli. (Luk. 12:​16-21) Nadai siku ari kitai nemu nama utai ke deka nyadi pagila. (J-lam. 23:​4, 5; Jas. 4:​13-15) Pia mega, Jesus madahka, barang sapa ke deka nyadi murid iya mesti sedia “ngelengkaka” utai ke dikemisi sida. (Luk. 14:33) Tu meh utai ke nyadi ngagai orang Kristian ba Judea ba abad keterubah. Sida sedia ngelengkaka semua utai ke dikembuan sida enggau gaga ati. (Heb. 10:34) Kemayaharitu, mayuh bala menyadi udah lenyau kereja ketegal enda nyukung sesiti pengawa politik. (Pem. 13:​16, 17) Nama udah nulung sida ngaga pemutus nya? Sida andal enggau pengabis ati ngagai semaya Jehovah ke madahka: “Aku enda sekali-kali ninggalka nuan, lalu Aku enda sekali-kali ngelengkaka nuan.” (Bacha Hebrew 13:5.) Nyadi, taja pan kitai ngereja ni ke ulih kitai ngambika ulih nyediaka utai ke diguna kitai maya udah tuai, tang enti bisi utai ke enda dijangka nyadi, kitai andal enggau pengabis ati, Jehovah deka nyaga kitai.

15. Nama runding ti seimbang ke patut dikembuan apai indai Kristian pasal bala anak sida? (Peda mega gambar.)

¹⁵ Ba sekeda budaya, laki bini ngaga pemutus deka bisi anak ngambika anak nya ulih nyaga sereta melanja sida lebuh sida udah tuai. Tang Bup Kudus madahka, apai indai meh ke patut nyediaka utai ke diguna bala anak. (2 Kor.  12:14) Endang amat, lebuh apai indai udah tuai, sida engka begunaka tulung ari bala anak sida, lalu mayuh bala anak gaga ati nyediaka utai ke diguna apai indai sida. (1 Tim. 5:4) Tang bala apai indai ke arapka Jehovah deka nulung bala anak sida nyadi nembiak Jehovah. Tu deka ngasuh bala apai indai gaga agi ati, ari ke ngemesaika anak enggau tuju ngambika anak nya bulih chukup duit kena melanja sida dudi hari.—3 Jhn. 4.

16. Baka ni apai indai ulih nulung bala anak sida nemu chara ngintu diri empu? (Epesus 4:28)

¹⁶ Bala apai indai, ajar meh bala anak kita chara sida ulih ngintu diri empu dudi hari. Lalu seraya kita ngereja nya, ari teladan kita, tunjukka meh kita arapka Jehovah. Kenyau ari maya sida agi biak, ajar meh sida, bagas gawa nya utai ti manah. (J-lam. 29:21; bacha Epesus 4:28.) Seraya sida mansang besai, tulung meh sida ngereja naka ulih sida ba sekula. Bala apai indai ulih ngaga pansik pasal prinsip Bup Kudus, lalu nulung bala anak sida ngaga pemutus ti manah pasal nama jenis pendidikan ke deka diulih bala anak sida. Tuju bala apai indai, iya nya nulung bala anak sida ngambika nemu ngintu diri empu sereta bisi mayuh agi awak nginjil, tauka indah nyadi pengerintis.

17. Nama utai ke ulih dikeandalka kitai?

¹⁷ Bala nembiak Jehovah ti tetap ati ulih andal, Jehovah ulih sereta deka nyediaka utai ke diguna sida. Seraya pengujung dunya ti jai tu majak semak, kitai nemu pengandal kitai ngagai Jehovah deka diuji. Tang enda ngira nama utai ke nyadi, kitai ulih andal enggau pengabis ati, Jehovah deka ngena kuasa Iya nyediaka utai ti diguna kitai. Kitai yakin, Jehovah seruran deka nulung kitai enda ngira dini alai kitai.