1, 2. Nama pengawa bibat ke ditapi nembiak Jehovah?

 SEMUA nembiak Petara ke tetap ati bibat ngetanka pengarap, kenyau ari Abel ti lurus nyentuk ngagai nembiak ke taluk kemaya hari tu. Rasul Paul ngasuh orang Kristian Hebrew, “natka diri balat diperinsa” seraya sida nguji diterima Jehovah, lalu bulih berekat ari Iya. (Heb. 10:32-34) Paul mandingka pengawa bibat orang Kristian enggau bala atlet ke enggau ba pekit, baka lumba belanda, bibat sereta boksing di menua Gerika. (Heb. 12:1, 4) Kemaya hari tu, kitai ba lumba ke nuju ngagai pengidup ti meruan belama iya, lalu kitai bisi munsuh ke deka ngelimpangka kitai sereta ngasuh kitai lenyau pengaga ati diatu enggau upah kitai ke jemah ila.

² Pengawa “bibat” kitai ke pemadu tusah iya nya ngelaban Sitan enggau dunya iya. (Eps. 6:12) Endang beguna bendar kitai nyeliahka diri ari dikachau ajar ke datai ari dunya, penemu mensia sereta penyai ke dikereja baka ngereja ulah ti kamah, nginsap sereta salah guna ai bisa tauka dadah. Kitai mega enda tau enda terus ngelaban asai ati ti lemi sereta pengelemi diri.—2 Kor. 10:3-6; Kol. 3:5-9.

 3. Baka ni Petara ngelatih kitai ngelaban bala munsuh?

 ³ Kati ulih kitai menang ngelaban bala munsuh ke kering nya? Ulih, tang enda senang! Paul mandingka diri empu enggau pemain boksing, lebuh iya madahka: “Aku belanda terus ngagai adan. Aku enda belaban baka orang ke mukut angin.” (1 Kor. 9:26) Sama baka pemain boksing ke besatup ngelaban seiku agi pemain boksing, kitai patut ngelaban bala munsuh kitai. Jehovah nulung sereta ngelatih kitai ngelaban munsuh nya. Iya ngereja tu ngena Bup Kudus. Iya mega nulung kitai nengah litaricha kitai ke bepelasarka Bup Kudus, gempuru Kristian, gempuru besai sehari sereta gempuru besai pelilih menua. Kati nuan ngena semua ajar ke diterima nuan? Enti enda, nuan engka bedau bebendar ngelaban munsuh nuan, sama baka pemain boksing ke mukut angin.

 4. Baka ni kitai ulih nyeliahka diri ari dialahka Sitan?

⁴ Kitai patut seruran bejaga. Nama kebuah? Bala munsuh engka nyerang kitai lebuh kitai enda ngadang tauka lebuh kitai lemi. Bup Kudus meri kitai tangkan sereta peransang lebuh iya madahka: “Anang alah laban penyai, tang alahka penyai ngena pemadas.” (Rom. 12:21) Enti kitai terus ngelaban Sitan, kitai ulih menang! Taja pia, enti kitai enda bejaga sereta badu ngelaban, Sitan, dunya iya enggau pengelemi kitai ulih ngalahka kitai. Nya alai, anang alah. Anang lemi semengat sereta nejuka jari nuan lelak!—1 Pet. 5:9.

 5. (a) Nama patut dikingatka kitai ngambika diterima lalu diberekat Petara? (b) Sapa orang ke bisi dalam Bup Kudus ti deka dikerandauka kitai?

⁵ Ngambika ulih menang, kitai patut ingatka kebuah kitai bibat. Tu ketegal kitai deka diterima Petara, lalu diberekat Iya. Ku Hebrew 11:6 madahka: ‘Barang sapa datai ngagai Petara enda tau enda arapka Petara endang amat bisi, lalu arapka Iya deka ngupah orang ke ngiga Iya.’ Enggau pengeran ngiga Jehovah, reti iya, kitai bebendar enti kitai deka diterima Iya. (SKR. 15:17) Dalam Bup Kudus, bisi mayuh teladan ti manah ari bala lelaki enggau indu ke baka tu. Jakop, Rachel, Josep, sereta Paul, napi penanggul ke ngasuh sida tusah ba asai ati sereta tubuh. Tang sida ulih mujur. Teladan sida nunjukka, enti kitai bebendar, kitai mega tau bulih berekat ari Jehovah. Aram kitai meda chara nya.

 6. Nama nulung Jakop ulih natka diri, lalu nama upah ke diterima iya? (Peda gambar ba pun artikel.)

⁶ Jakop, seiku lelaki ke tetap ati, bibat lalu ulih natka diri laban iya rinduka sereta beberatka kaul iya enggau Jehovah. Iya ngembuan pengarap ti bendar ngagai semaya Jehovah ke deka merekat peturun iya. (P-kal. 28:3, 4) Lebuh umur Jakop nyau deka 100 taun, iya bibat ngelaban seiku melikat ketegal deka bulih berekat ari Petara. (Bacha Pemungkal 32:24-28.) Kati Jakop amat bisi penau dikena bibat ngelaban melikat ti kering nya? Tentu nadai! Tang iya amat keran, lalu nunjukka diri deka bebendar ngulihka berekat nya! Jehovah merekatka Jakop ketegal iya ulih natka diri, lalu meri iya nama Israel, ke ngembuan reti “Orang ke Bibat tauka Orang ke Tan Natka Diri, Ngelaban Petara.” Jakop nerima upah ke digiga kitai mega, iya nya deka diterima lalu diberekat Jehovah.

 7. (a) Nama utai ti ngelemika semengat ke ditapi Rachel? (b) Nama digaga Rachel, lalu baka ni iya diberekat?

⁷ Rachel, bini ti dikesayauka Jakop, mega keran deka meda baka ni Jehovah ngamatka semaya Iya ngagai Jakop. Tang bisi siti penanggul. Rachel enda ulih beranak. Maya jeman Bup Kudus, tu ngasuh bala indu balat merinsa. Baka ni Rachel terus bibat, taja pan  iya napi utai ti ngasuh iya lemi? Iya enda putus pengarap. Tang iya terus bibat enggau suah agi besampi ngagai Jehovah. Jehovah ningaka sampi Rachel ke ari ati, lalu iya ngasaika diri diberekat lebuh iya nyau bisi anak. Nya kebuah iya nyebut: “Aku bebendar amat bepekit [ngelaban] . . . tang aku udah menang.”—P-kal. 30:8, 20-24.

 8. Nama penanggul ke ditapi Josep, lalu baka ni iya nyadi teladan ti manah ke kitai?

⁸ Chunto Jakop enggau Rachel ke tetap ati engka udah nyadi teladan ngagai anak seduai iya Josep, lalu nulung Josep lebuh iya napi penanggul ba pengidup. Lebuh Josep beumur 17 taun, pengidup iya balat berubah. Ketegal bala menyadi iya kepapas, sida nyual iya nyadi ulun. Udah nya, iya dijil betaun ba menua Ejip, taja pan iya enda salah. (P-kal. 37:23-28; 39:7-9, 20, 21) Tang Josep enda lemi semengat tauka pedis ati, lalu iya enda nguji deka malas. Nama kebuah? Laban Josep beberatka kaul iya enggau Jehovah, lalu beratika kaul nya enggau pengabis ati. (Lew. 19:18; Rom. 12:17-21) Teladan Josep ulih nulung kitai. Taja pan kitai kala napi utai ke enda manah maya agi mit tauka enti pengidup kitai ke diatu baka ke nadai daya, kitai patut terus bibat lalu ulih tan natka diri. Enggau ngereja tu, kitai ulih pechaya, Jehovah deka merekatka kitai.—Bacha Pemungkal 39:21-23.

 9. Baka ni kitai ulih neladan Jakop, Rachel, enggau Josep?

 ⁹ Kemaya hari tu, kitai mega patut tan natka penanggul ti besai. Nuan engka merinsa ketegal pengawa ke enda lurus, bepilih mata tauka dikeduan tauka ketegal orang kepapas enggau nuan. Ari ke lemi semengat, kingatka utai ke udah nulung Jakop, Rachel, enggau Josep ngambika terus nyembah Jehovah enggau ati ti lantang. Petara ngeringka sereta merekatka sida laban sida balat beberatka kaul sida enggau Iya. Sida terus bibat sereta ngereja utai sejalai enggau sampi sida. Laban kitai idup ba hari ti penudi, endang beguna terus ngetanka pengadang kitai ke jemah ila ngambika mengkang teguh! Kati nuan deka bibat, iya nya bebendar, ngambika diterima Jehovah?

10, 11. (a) Nama kebuah kitai engka patut bibat ngulihka berekat ari Petara? (b) Nama ulih nulung kitai ngaga pemutus ti betul?

¹⁰ Nama kebuah kitai patut bibat ngulihka berekat ari Petara? Kebuah iya, laban kitai enda sempurna, kitai bibat enggau pengingin ti salah. Sida ke bukai bibat deka ngembuan runding ti manah ngagai pengawa nginjil, lalu sekeda ke bukai bibat ketegal penanggul ba pengerai tauka asai ati ti sunyi. Bisi mega sekeda ke bukai ngasaika diri tusah deka ngampun orang ke ngemediska ati sida. Enda ngira ni pengelama kitai udah nyembah Jehovah, semua kitai patut ngelaban utai ke ngasuh kitai tusah nyembah Iya, ke meri upah ngagai orang ke tetap ati.

¹¹ Endang amat, deka nyadi orang Kristian sereta ngaga pemutus ke betul enda senang, kelebih agi lebuh kitai ngelaban pengingin diri ke salah. (Jer. 17:9) Enti nuan ngasaika baka tu, besampi meh ngagai Jehovah, lalu minta Iya meri nuan roh kudus. Sampi enggau roh kudus ulih nulung nuan bulih pengering kena ngereja utai ti badas, lalu udah nya nuan deka bulih berekat ari Petara. Enggau naka ulih idup sejalai nitihka sampi nuan. Nguji macha Bup Kudus ninting hari sereta magi jam kena belajarka Bup Kudus kediri empu sereta belajarka Bup Kudus ba diri sebilik.—Bacha Masmur 119:32.

12, 13. Baka ni dua iku orang Kristian bulih tulung kena nagang pengingin ti salah?

¹² Bisi mayuh chunto pasal baka ni Bup Kudus, roh kudus Petara sereta litaricha Kristian kitai udah nulung bala menyadi Kristian kitai mutarka pengingin ti salah. Seiku nembiak macha artikel “Bagaimana Anda Dapat Melawan Hasrat yang Salah?”-IN, ke dikeluarka ba Sedarlah! kena 8 Disember 2003. Nama digaga iya? “Aku bebendar ngelaban runding ti enda manah. Lebuh aku macha artikel nya, dia madahka ‘ba sekeda orang, bibat ngelaban pengingin ti salah nya utai ti balat tusah,’ tu ngasuh aku ngasaika diri sama enggau sida. Aku enda kediri bibat.” Nembiak tu mega bulih penguntung ari artikel “Alternatif Life-Styles—Does God Approve?”, ke bisi ba Awake! kena 8 Disember 2003. Dalam artikel nya iya beratika, ba sekeda orang, pengawa bibat ke enda ngetu-ngetu nya baka “sebengkah penyakit udah diberi ngagai tubuh.” (2 Kor. 12:7) Tang, lebuh sida terus bibat ngetanka pendiau sida ke tuchi, sida bisi runding ti manah pasal pengadang ke jemah ila. Ku nembiak nya madahka: “Ketegal tu, ninting hari aku ngasaika diri ulih mengkang tetap ati. Aku amat beterima kasih ngagai Jehovah laban Iya ngena gerempung Iya nulung kitai ulih tan natka diri ninting hari ba dunya ti jai tu.”

¹³ Peratika mega peneleba seiku menyadi Kristian indu ba menua Amerika Serikat. Ku iya nulis: “Aku deka meri terima kasih ngagai kita laban seruran meri utai ti amat diguna kami lalu meri utai nya ba maya ti patut. Aku suah ngasaika artikel tu dituju ngagai  aku. Betaun aku udah bibat ngelaban pengingin ti balat ke utai ti dipegedika Jehovah. Kekadang aku nyurutka diri, lalu badu agi belaban. Aku nemu, Jehovah endang pengasih sereta deka ngampun, tang ketegal aku bisi pengingin ti salah sereta enda bebendar begedika utai nya, aku ngasaika diri enda ulih nerima tulung ari Iya. Pengawa bibat ke enda ngetu-ngetu tu balat ngenusahka pengidup aku. . . . Pengudah macha artikel ‘Adakah Hati Anda Memiliki Kemahuan untuk Mengenal Yehuwa?’-ML ba Menara Pengawal kena 15 Mac 2013, aku amat ngasaika, Jehovah endang deka nulung aku.”

14. (a) Nama runding Paul pasal pengawa bibat? (b) Baka ni kitai ulih menang bibat ngelaban pengelemi diri?

¹⁴ Bacha Rome 7:21-25. Paul empu nemu, baka ni asai pemedis bibat ngelaban pengelemi diri sereta pengingin ti salah. Taja pia, iya pechaya, iya ulih menang enti iya besampi ngagai Jehovah, bepanggai ba tulung ari Iya, sereta ngayanka pengarap ba genselan Jesus. Baka ni enggau kitai? Kati ulih kitai menang bibat ngelaban pengelemi diri? Ulih, enti kitai neladan Paul, bepanggai ba Jehovah enggau pengabis ati, ukai bepanggai ba pengering diri, sereta bisi pengarap ba tebus.

15. Baka ni Jehovah ulih nulung kitai mengkang tetap ati sereta ulih tan natka penguji?

¹⁵ Kekadang Petara engka ngelakka kitai nunjukka pengirau diri pasal siti-siti pekara. Ngambika chunto, enti kitai tauka seiku ari diri sebilik napi penyakit ti raya tauka pengawa ti enda lurus, nama deka digaga kitai? Enti kitai arap bendar ke Jehovah, kitai deka minta Iya meri kitai pengering ke diguna ngambika mengkang tetap ati, lantang ati sereta bisi kaul ti teguh enggau Iya. (Plp. 4:13) Chunto ari orang Kristian menya enggau kemaya hari tu, udah nunjukka sampi ulih ngeringka kitai sereta meri kitai pemerani ke diguna kitai, ngambika kitai ulih terus tan natka diri.

16, 17. Nama deka digaga nuan?

¹⁶ Sitan tentu gaga ati meda kitai lemi semengat, alah sereta lelak. Nya alai, enggau naka ulih meh “bepegai teguh ba utai ti badas.” (1 Tes. 5:21) Nuan ulih menang ngelaban Sitan, dunya iya ti jai, sereta semua pengingin ti salah! Nuan ulih menang enti nuan amat pechaya, Petara deka ngeringka sereta nulung nuan.—2 Kor. 4:7-9; Gal. 6:9.

¹⁷ Nya alai, enggau naka ulih terus bibat. Terus tan natka diri. Nuan ulih pechaya, Jehovah deka “nuang mayuh macham utai ti manah, ti belimpah-limpah” ngagai nuan.—Mal. 3:10.