Nabi Moses kala nulis, enti kitai ngasika pesan Petara, kitai deka diberekatka Iya. (Ulang Adat 10:13; 11:27) Kitai ukai ngasika Petara ketegal kitai takut diukum Iya. Pemanah Jehovah meransang kitai rinduka Iya, lalu pengerindu nya ngasuh kitai deka ngasika Iya, sereta nyeliahka diri ari sebarang utai ti ngenusahka ati Iya. ‘Laban reti rinduka Petara nya kitai ngasika pesan Iya.’—1 John 5:3.

Tang, baka ni ngasika Petara mai berekat ngagai kitai? Peratika dua iti chara.

‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita.’—ISAIAH 48:17.

Petara Jehovah, ti nempa kitai, amat ngelala sapa kitai ti bendar, lalu Iya deka meri iring ti beguna. Ngambika ajar Iya nulung kitai ngaga pemutus ti manah, kitai patut belajar dulu utai ke diasuh Iya kereja kitai, lalu ngereja nya enggau ati ti deka.

‘Gaga agi orang ke ninga lalu ngasika jaku Petara!’—LUKE 11:28.

Kemayaharitu, bejuta iku orang udah tetemuka pengaga ati ti bendar, ketegal sida ngasika Jaku Petara. Peratika chunto seiku lelaki ari menua Sepanyol. Iya udu ringat sereta kasar enggau orang, nyengkaum bini iya empu. Bisi sekali, iya macha pasal Josep anak Jakop dalam bup ke ditulis Nabi Moses. Josep nya amat nelap. Taja pan iya dijual nyadika ulun, dituduh besalah lalu dijil, Josep mengkang nelap, manah ati sereta deka ngampun. (Pemungkal bagi 37-45) Lelaki ari menua Sepanyol nya madah: “Ari belematika chunto Josep, aku diperansang ngemansangka penelap, pemanah ati sereta nemu nagang diri. Asil iya, diatu aku amat gaga ati.”

Bup Kudus meri mayuh jaku lalau pasal chara begulai enggau orang bukai. Artikel ke nangkanka tu deka bejuraika lalau nya enggau silik agi.