Petara nempa tubuh kitai ngambika ulih ngeraika diri empu. Lebuh tubuh kitai telih, rajai tauka kena tanchum utai, tubuh ngereja utai ti ngalitka ati ke ngasuh telih ti mit tauka besai ngeraika diri empu. (Johns Hopkins Medicine) Tubuh enggau jampat ngasuh telih badu bedarah sereta gerai, lalu ngeringka tisu tubuh kitai.

PERUNDINGKA: Enti Petara ngaga tubuh kitai ngambika ulih ngeraika telih, kitai tentu ulih arapka semaya Iya ke deka ngeraika telih ba ati kitai. Ku pemasmur, “[Petara] ngeraika orang ke tusah ati lalu malut telih sida.” (Masmur 147:3) Tang enti nuan napi penusah ba emosi tauka balat tusah ati, baka ni nuan nemu Jehovah deka nulung nuan—diatu enggau ba jemah ila?

Petara besemaya: ‘Anang takut, Aku bisi enggau kita! Aku tu Petara kita. Anang nejuka utai ngenakutka kita! Aku deka ngasuh kita kering lalu nulung kita.’ (Isaiah 41:10) Enti kitai nemu Jehovah ibuhka kitai, kitai deka ngembuan runding ti lantang sereta bisi pengering lebuh napi bemacham penguji. Rasul Paul madahka pengelantang tu ‘pemaik Petara, ti ngelui peragam mensia.’ Lalu ku iya agi: “Aku ulih ngereja semua utai ulih Iya ke meri aku pengering.”—Pilipi 4:4-7, 9, 13.

Bup Kudus nulung kitai ngemansangka pengarap ba semaya Jehovah ke jemah ila. Ambika chunto, Pemandang 21:4, 5 madahka utai ke deka digaga Iya lalu kebuah kitai ulih arapka Iya ngereja nya:

• “Iya deka ngendas semua ai mata” ari mata mensia. Jehovah deka muai semua pemerinsa enggau pengirau kitai, nyengkaum pengirau ti baka ke mit ba orang bukai.

• Raja ti Pemadu Bekuasa ke “duduk atas penuduk” diraja deka ngena kuasa Iya nagang pemerinsa ari nyadi lalu deka meri bantu ngagai kitai.

• Jehovah meri jamin semaya Iya “amat lalu tau dikarap.” Iya meri jamin ngena nama Iya empu kena ngamatka semaya Iya.

“‘Iya deka ngendas semua ai mata ari mata sida. Nadai agi pemati, nadai agi tinggang pemerinsa tauka nyabak tauka pemedis. Utai ti lama udah lesap.’ Udah nya Iya ti duduk atas penuduk bejaku: ‘Nyadi diatu Aku ngaga semua utai nyadi baru!’ Iya mega bejaku enggau aku: ‘Tulis ka tu, laban jaku tu amat lalu tau dikarap.’”—Pemandang 21:4, 5, Bup Kudus Berita Manah Ka Rebak Diatu.

Dunya enggau langit luar sereta Bup Kudus sama bela mandangka personaliti enggau pemanah Apai kitai, Jehovah. Kitai diperansang ngelala Petara lebuh meda utai ti digaga Iya, lalu Bup Kudus mai kitai: ‘Datai semak ngagai Petara, lalu Iya deka datai semak ngagai kita.’ (James 4:8) Ku Kereja Rasul 17:27: “Iya enda jauh ari kitai siku-siku.”

Seraya nuan meri awak kena ngelala Petara, nuan deka andal agi Iya “ngibun” nuan. (1 Peter 5:7) Nama penguntung enti kitai arapka Jehovah?

Perundingka utai ti nyadi ba Toru, ari menua Jepun. Indai iya megai pengarap Kristian, tang Toru enggau geng yakuza ke dikumbai Mafia orang Jepun. Ku iya madah, “Aku nemu Petara begedika aku, lalu aku ngasaika pemati orang ke ngelingi aku, kelebih agi sida ti dikesayauka aku, baka ukum ke diberi Petara ngagai aku.” Toru ngaku ketegal gaya pengidup sereta runding ti enda manah, iya nyadi “orang ti nadai penyinu.” Pasal juluk ati iya, ku iya ngenang, “Aku deka mati biak pengudah munuh orang ti lebih tebilang ari aku ngambika aku nyadi tebilang.”

Taja pia, lebuh Toru enggau bini iya, Hannah, belajarka Bup Kudus, Toru ngaga ubah ti besai ba pengidup enggau ba runding iya. Ku Hannah: “Aku empu meda laki aku ngaga ubah.” Diatu, Toru enggau andal madahka: “Petara amat ibuhka tiap iku kitai. Iya enggai sapa-sapa mati lalu Iya deka ngampun sida ke amat nesal ati ke penyalah diri. Iya ninga utai ke enda ulih dipadahka kitai ngagai orang  bukai lalu Iya ulih meretika penusah kitai. Jemah ila, Jehovah deka muai semua penanggul, pemerinsa enggau pemedis. Indah kemayaharitu mega, Iya nulung kitai enggau chara ti enda disadang. Iya ibuhka kitai lalu ngelepaska kitai ba maya kitai balat ditekan.”—Masmur 136:23.

Baka Toru, penemu pasal Petara ke ulih sereta deka muai semua pemerinsa, ukai semina nulung kitai arapka pengadang ke jemah ila tang mega nulung kitai bulih pengidup ti manah kemayaharitu. Endang amat, taja pan mayuh pemerinsa nyadi ba dunya tu, nuan ulih bulih penguntung ari pengibuh Petara.