Bisi sekali maya ngalih hari kena Hari Minggu, Kenneth seduai Filomena, ke diau di Curaçao, datai ngabas sepasang melaki-bini ke belajar Bup Kudus enggau seduai iya.

Kenneth madahka: “Lebuh kami duai datai, rumah baka ke nadai orang lalu kerita pan nadai dia. Tang bisi utai ke ngasuh aku deka betelefon ngagai bini pemelajar Bup Kudus nya.”

Bini pemelajar Bup Kudus nya nyaut kangau telefon lalu madahka laki iya gawa. Taja pia, sepengudah iya nemu Kenneth seduai Filomena bisi ba luar rumah iya, iya muka pintu lalu ngelaluka seduai iya tama.

Kenneth seduai Filomena tekala nya nemu iya baru udah nyabak. Lebuh Kenneth besampi kena ngepunka pengawa belajarka Bup Kudus, iya nyabak baru. Nya alai Kenneth seduai Filomena nanyaka kebuah.

Bini pemelajar Bup Kudus nya madahka diri berunding deka munuh diri empu maya ngalih hari nya, lalu iya benung nulis surat munuh diri ngagai laki iya lebuh Kenneth betelefon. Iya madahka diri napi penanggul ba runding, nya alai Kenneth seduai Filomena bekunsi sekeda ayat ti ngelantangka ati ari Bup Kudus enggau iya. Jaku peransang nya udah nyelamatka nyawa iya.

Kenneth madahka: “Kami duai beterima kasih ngagai Jehovah laban ngena kami duai nulung indu ke tusah ati nya, lalu kelebih agi ke ngasuh kami betelefon ngagai iya—engka melikat tauka roh kudus Petara!” a

Kati Kenneth seduai Filomena pechaya Petara amat bisi nulung, sekalika ngena melikat tauka roh kudus, iya nya kuasa aktif Iya? Tauka kati pengawa Kenneth ke betelefon nya semina nyadi pia aja?

Kitai enda entu nemu iya ke amat. Tang kitai nemu, Petara ngena bala melikat Iya nulung orang ba pengarap. Ambika chunto, Bup Kudus madahka, Petara ngena seiku melikat ngiring penginjil Kristian ke benama Philip nulung seiku pemesai ari Etiopia ke ngiga iring ba pengarap.—Kereja Rasul 8:26-31.

Mayuh macham jalai pengarap ngasuh orang pechayaka bala melikat, lalu bala melikat digambarka nyadi melikat ti manah ke bejalaika peneka Petara tauka nyadi melikat penyaga ke seiku-seiku orang. Mayuh orang pechaya, bala melikat amat bisi lalu sida nulung orang ba pengidup dalam mayuh macham chara. Taja pia, mayuh mega orang enda pechayaka bala melikat nya amat bisi.

Kati melikat nya amat bisi? Enti bisi, ari ni penatai sida? Nama utai ti bendar pasal melikat? Kati sida bisi kaul enggau pengidup nuan? Aram kitai mansik bukti.