GAMBARKA TU: Nuan ngelawa siti muzium ti penuh enggau patung ari jeman kelia. Mayuh ari patung nya udah belubang, bebali chura sereta merekah enggau pechah. Sekeda patung nya lenyau begian ti besai. Tang siti ari patung nya nadai nama-nama; chura sereta ukir iya agi manah. “Kati tu baru agi ari ke bukai?” ku nuan nanya pemalin temuai. Ku iya, “Enda. Tu lama agi ari ke bukai lalu nadai kala diaduka baru.” “Kati iya bisi dilindung?” tanya nuan. Ku iya nyaut, “Nadai. Tu udah napi ribut enggau ujan ti balat. Lalu mayuh orang udah nguji deka ngerusakka iya.” Nuan engka berunding enggau alit ati, ‘Patung tu digaga ari nama?’

Baka nya mega, Bup Kudus baka patung ke disebut tadi. Bup Kudus nya bup ti lama—lama agi ari bup bukai. Endang amat, bisi mayuh bup lama ti bukai. Tang baka patung lama ti merekah enggau pechah, nyau kelama mayuh bup lama udah balat rusak. Ambika chunto, pengudah orang tetemuka penemu baru ke bisi bukti, penerang sains ba bup ke lama enda ulih agi dikena. Jaku lalau pasal chara berubat suah agi nganu nyawa ari ke nulung. Lalu mayuh begian mit ari bup lama nya udah lenyau tauka balat rusak.

Bup Kudus enda baka bup ke bukai. Taja pan Bup Kudus berengkah ditulis lebih ari 35 kurun ti udah, tang iya agi manah. Bup Kudus suah diserang—ditunu, ditagang sereta dikumbai enda berega—tang iya agi ulih tan napi semua penanggul. Taja pan bisi penemu baru, penemu Bup Kudus manah agi ari penemu baru.—Peda Kutak “Udah Lama tauka Ngelui Maya Iya?”

Nuan engka berunding, ‘Kati ajar Bup Kudus agi ulih dikena kemayaharitu?’ Kena nyaut tanya tu, tanya diri empu: ‘Nama penanggul ti pemadu besai ke ditapi mensia kemayaharitu? Ni bagi penanggul ti amat ngenakutka?’ Nuan engka berundingka perang, pengamah dunya, penyai tauka pengawa ti enda lurus. Diatu perundingka sekeda prinsip ke diajar Bup Kudus. Seraya nuan ngereja nya, tanya diri empu, ‘Enti mensia nitihka prinsip tu, kati dunya deka nyadi manah agi?’

RINDUKA PEMAIK

‘Beberekat meh orang ke bekereja ke pemaik, laban sida deka dikumbai anak Petara.’ (Matthew 5:9) “Enti ulih, seagi-agi utai nya bepanggai ba kita, diau bebaik enggau semua orang.”—Rome 12:18.

PENGASIH, PENGAMPUN

“Beberekat meh orang ke kasihka orang, laban sida deka nerima pengasih.” (Matthew 5:7) “Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan [Jehovah, NW a] ke udah ngampun kita, baka nya mega kita ngampun pangan diri.”—Kolosi 3:13.

NYERAKUP BANSA

Petara “ngaga semua bansa ari siku orang, lalu Iya ngasuh sida diau di serata dunya.” (Kereja Rasul 17:26) ‘Petara endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.’—Kereja Rasul 10:34, 35.

NYAGA RAMPA MENUA

‘Petara Jehovah ngengkahka orang nya ba kebun Eden, ngambika iya gawa dia lalu nyaga kebun nya.’ (Pemungkal 2:15) Petara deka “ngerusak sida ke nyadi pengerusak dunya!”—Pemandang 11:18.

BEGEDIKA PENGAMU ENGGAU ULAH TI KAMAH

“Bejimat kita. Jaga diri ari semua macham pengamu, laban pengidup mensia ukai bepanggai ba pemayuh reta tengkira.” (Luke 12:15) “Tang pengawa bambai, enggau semua ulah ti kamah, tauka pengamu enda patut nyadi ba bala kita, laban kita nembiak Tuhan.”—Epesus 5:3.

PENGELURUS, PEMAGAS GAWA

“[Kami] ingin deka ngereja utai ti badas berari.” (Hebrew 13:18) “Orang ke penchuri enda tau enda badu agi ngenchuri, lalu ngereja pengawa ti menyana ngena jari iya empu.”—Epesus 4:28.

PEMANAH NULUNG ORANG KE BEGUNAKA BANTU

“Meransang orang ke takut, nulung orang ke lemi, lalu liat ati enggau semua sida.” (1 Tesalonika 5:14) “Ngintu orang ke patu balu, ke merinsa.”—James 1:27.

Bup Kudus ukai semina nulis pasal prinsip tu. Iya mega ngajar kitai chara ngena prinsip tu ba pengidup besehari-hari. Enti mayuh agi orang nitihka prinsip ke udah dipadah ba atas, tentu penanggul ba dunya deka majak kurang kemayaharitu. Endang amat, prinsip Bup Kudus agi ulih dikena nyentukka diatu! Tang baka ni ajar Bup Kudus ulih nulung nuan kemayaharitu?

Mensia ke pemadu bepenemu kala madahka: ‘Penemu-dalam Petara dikamatka ulih utai ti dikereja  penemu-dalam nya empu.’ (Matthew 11:19) Kati nuan setuju? Penemu-dalam nyata dipeda lebuh nuan bulih penguntung maya nuan ngena nya ba pengidup. Nya alai, nuan engka berunding: ‘Enti Bup Kudus nya amat agi ulih dikena kemayaharitu, enda ke asil iya ulih meri penguntung ba pengidup aku? Baka ni Bup Kudus ulih nulung aku napi penanggul?’ Peratika siti chunto.

Pengidup Delphine b amat kisuk, ngemuaska ati sereta lantang. Enda mukai-mukai, iya napi penusah besai ti betangkan. Anak indu iya ke agi biak mati. Rumah tangga iya rusak. Lalu iya bisi penanggul ba belanja. Iya ngenang baru lalu madah: “Aku nyau enda ngelala sapa aku ke bendar iya—lenyau anak indu, ditinggalka laki, nadai rumah. Aku ngasaika diri enda berega—ngasaika diri puang, aku enda baka suba, nadai pengering, nadai tuju ba pengidup.”

Diatu Delphine ulih meda pengamat ba jaku tu: “Umur kami semina 70 taun aja, lapan puluh taun, enti kami regas; tang umur kami semina mai pemerinsa enggau ati ti tusah. Umur jampat abis, lalu kami nadai agi.”—Masmur 90:10.

Delphine tetemuka tulung ari Bup Kudus lebuh napi penanggul tu. Endang amat, Bup Kudus ulih nulung iya. Baka ke deka dipeda ba tiga artikel ti nangkanka tu, orang bukai mega udah nerima tulung  ari Bup Kudus lebuh sida ngena jaku lalau nya maya mutarka penanggul ba pengidup sida. Sida udah ngasaika Bup Kudus nya baka patung ke disebut ba pun artikel tu. Bup Kudus enda sebaka enggau bup lama ke enda ulih dikena agi. Kati tu ketegal chara Bup Kudus digaga enda sama enggau ke bukai? Tauka ketegal Bup Kudus endang ngembuan runding Petara—ukai runding mensia?—1 Tesalonika 2:13.

Engka nuan pan ngasaika pengidup tu pandak sereta penuh enggau penanggul. Lebuh penanggul nya balat ngachau nuan, ba dini nuan ulih tetemuka pengelantang, sukung sereta lalau ti beguna?

Aram kitai meratika tiga iti chara Bup Kudus ulih mai penguntung ngagai pengidup nuan. Bup Kudus ulih nulung nuan

1. nyeliahka mayuh penanggul.

2. mutarka penanggul ke nuntung.

3. napi utai ke enda ulih diseliahka nuan enggau mujur.

Artikel ti nangkanka tu deka berandauka tiga iti chara tu.