1. Pengudah Adam seduai Hawa bedosa, nama dipadahka Jehovah pasal munsuh kitai?

 ADAM nemu ular enda ulih bejaku. Nya alai lebuh iya nemu pasal seiku ular udah bejaku enggau Hawa, iya sedar utai ke bejaku nya kebendar iya seiku melikat. (P-kal. 3:1-6) Adam seduai Hawa enda ngelala melikat nya. Taja pia, Adam milih enggau melikat ti enda dikelala nya lalu angkat ngelaban Apai iya ti di serega. (1 Tim. 2:14) Tekala nya mega, Jehovah berengkah madah mayuh penerang pasal munsuh ti jai nya, lalu besemaya deka munaska munsuh nya. Tang Jehovah madahka, ba siti timpuh, melikat ke udah bejaku nengah ular deka ngelaban semua orang ke rinduka Jehovah.—P-kal. 3:15.

2, 3. Nama kebuah Jehovah madah mimit aja penerang pasal Sitan sebedau Messiah datai?

² Jehovah nadai kala madahka nama melikat ke angkat ngelaban Iya. a (Peda nota kaki.) Tang 2,500 taun pengudah pengawa  ngelaban ba Kebun Eden, nya baru Jehovah madahka sapa melikat nya. (Jop 1:6) Iya dikangau ngena gelar “Sitan,” ke mai reti “Penyakal.” Semina tiga iti bup mit dalam Bup Kudus jaku Hebrew, iya nya 1 Bansa Israel, Jop, enggau Sekariah ke bisi nyebut pasal Sitan. Nama kebuah semina bisi mimit aja penerang pasal Sitan sebedau Messiah datai?

³ Jehovah nadai madah mayuh utai pasal Sitan sereta utai ti dikereja iya dalam Bup Kudus jaku Hebrew. Tu ketegal tuju Bup Kudus nya ditulis kena nulung orang ngelala sereta nitihka Messiah. (Luk. 24:44; Gal. 3:24) Pengudah Messiah datai, Jehovah ngena iya enggau bala murid iya madah mayuh utai pasal Sitan sereta bala melikat ke enggau iya. b (Peda nota kaki.) Tu endang patut, laban Jehovah deka ngena Jesus enggau sida ti dipilih ke serega munaska Sitan enggau sida ke nitihka Sitan.—Rom. 16:20; Pem. 17:14; 20:10.

 4. Nama kebuah kitai enda patut takutka Sitan?

⁴ Rasul Peter ngambarka Antu Sitan nya baka “singa ti negung,” lalu John ngumbai Sitan nya “ular” enggau “naga.” (1 Pet. 5:8; Pem. 12:9) Tang kitai enda patut takutka Sitan. Kuasa iya bisi sekat. (Bacha James 4:7.) Kitai dijaga Jehovah, Jesus, enggau bala melikat ke tetap ati. Enggau bantu ari sida, kitai ulih ngelaban munsuh kitai. Tang, kitai patut nemu saut ngagai tiga iti tanya tu: Ni pemalat Sitan udah nesatka orang? Baka ni iya nguji nesatka orang? Lalu nama utai ke enda ulih dikereja iya? Aram kitai nyaut semua tanya nya lalu beratika utai ke ulih dipelajarka kitai.

5, 6. Nama kebuah perintah mensia enda ulih mai ubah ke amat diguna mensia?

⁵ Mayuh melikat bela enggau Sitan angkat ngelaban Petara. Sebedau Bah Besai, Sitan udah ngumpan sekeda melikat ngambika beleman enggau bala indu mensia. Bup Kudus nerangka tu ngena chara simbolik lebuh Bup Kudus madahka naga ke dibuai ari serega narit sebagi ari tiga bagi bintang enggau iya. (P-kal. 6:1-4; Jud. 6; Pem. 12:3, 4) Lebuh bala melikat nya ninggalka ruang bilik Petara, sida ngawakka diri dipegai Sitan. Kitai enda tau ngumbai bala melikat nya enda diatur manah. Sitan udah numbuhka siti perintah ti enda ulih dipeda ke iya empu, nunda Perintah Petara. Iya nyiri diri empu nyadi raja, lalu iya udah ngatur bala antu, meri sida kuasa, sereta ngaga sida nyadi pemerintah dunya.—Eps. 6:12.

⁶ Sitan ngena gerempung iya nguasa semua perintah mensia. Kitai nemu tu amat laban iya mandangka ngagai Jesus “semua menua di dunya,” lalu madahka:  ‘Aku deka meri semua kuasa enggau semua pengaya nya ngagai nuan, laban semua utai nya udah diberi ngagai aku, lalu aku deka meri utai nya ngagai sebarang orang ke dipilih aku.’ (Luk. 4:5, 6) Mayuh perintah ngereja utai ti manah ke rayat sida, lalu sekeda pemerintah amat deka nulung orang. Tang nadai pemerintah mensia ulih mai ubah ke amat diguna kitai.—Mas. 146:3, 4; Pem. 12:12.

 7. Kelimpah ari ngena bala perintah, baka ni Sitan ngena jalai pengarap ti pelesu sereta pengawa dagang ba dunya tu? (Peda gambar ba pun artikel.)

⁷ Sitan enggau bala antu mega ngena jalai pengarap ti pelesu sereta pengawa dagang ba dunya tu nesatka “semua dunya,” tauka semua mensia. (Pem. 12:9) Sitan ngena pengarap pelesu ngelekaika pemula pasal Jehovah, lalu iya mega nguji ngelalaika nama Petara. (Jer. 23:26, 27) Ketegal tu, sekeda orang ke ngumbai diri nyembah Petara kebendar nya nyembah bala antu. (1 Kor. 10:20; 2 Kor. 11:13-15) Sitan mega ngena pengawa dagang ba dunya ngerembaika pemula, baka ngumbai duit enggau reta ulih ngelantangka orang. (J-lam. 18:11) Orang ke pechayaka pemula tu ngena pengidup sida betuaika pengaya, ukai betuaika Petara. (Mat. 6:24) Taja pan sida kala rinduka Petara, tang ketegal balat angkunka reta sida lenyau pengerindu ke Petara.—Mat. 13:22; 1 Jhn. 2:15, 16.

8, 9. (a) Nama dua iti utai ke ulih dipelajarka kitai ari pengawa Adam, Hawa, enggau bala melikat ke ngelaban? (b) Nama kebuah nya manah enti kitai nemu Sitan ke bekuasa atas dunya?

⁸ Bisi dua iti utai ke ulih dipelajarka kitai ari pengawa Adam, Hawa, enggau bala melikat ke ngelaban. Kesatu, kitai nemu kitai patut milih seiku entara dua iku. Kitai semina ulih milih Jehovah tauka Sitan. (Mat. 7:13) Kedua, kitai nemu sida ke enggau Sitan nadai bulih mayuh penguntung. Adam seduai Hawa bisi peluang nentuka bagi utai ti manah enggau utai ti jai kediri empu. Lalu bala melikat bulih kuasa merintah atas perintah mensia. (P-kal. 3:22) Tang nyukung Sitan seruran nadai bulih utai ti manah. Lalu endang nadai penguntung!—Jop 21:7-17; Gal. 6:7, 8.

⁹ Nama kebuah nya manah enti kitai nemu Sitan ke bekuasa atas dunya? Tu nulung kitai bisi runding ti patut pasal bala perintah lalu meransang kitai nusui berita manah. Kitai nemu Jehovah dekaka kitai masa bala perintah. (1 Pet. 2:17) Jehovah deka kitai ngasika undang-undang perintah seagi-agi nya enda ngelaban standard Iya. (Rom. 13:1-4) Tang kitai mega nemu kitai patut mengkang neutral sereta enda nyukung sebarang parti politik tauka pemerintah mensia. (Jhn. 17:15, 16; 18:36) Laban kitai nemu Sitan nguji ngelalai sereta ngenyaika nama Jehovah, nya alai kitai enggau naka ulih ngajar orang pemendar pasal Petara. Kitai temegah ati ngarika nama Iya sereta ngena nama Iya. Pengerindu ke Petara berega ari pengangkun ke duit tauka reta.—Isa. 43:10; 1 Tim. 6:6-10.

10-12. (a) Baka ni Sitan udah mujur ngena umpan manjuk sekeda melikat? (b) Nama ulih dipelajarka kitai ari pengawa bala melikat nya?

¹⁰ Sitan ngena chara ti ulih mujur nesatka seiku-seiku orang. Ngambika sida ngereja utai ti dikedekaka iya, kadang-kadang iya ngena umpan manjuk sida lalu ba maya bukai iya nguji ngena serang ti nyengala.

¹¹ Sitan udah mujur ngena umpan manjuk mayuh melikat. Iya engka udah lama beratika sida ngambika nemu bagi umpan ke ulih dikena manjuk sida. Sekeda melikat ulih diumpan lalu beleman enggau bala indu mensia. Bala anak sida besai gamal, mangah sereta jai enggau orang ke ngelingi sida. (P-kal. 6:1-4) Kelimpah ari manjuk bala melikat nya ngena ulah ti kamah, Sitan engka mega udah besemaya deka ngasuh sida bekuasa atas semua mensia. Enggau tu, Sitan engka nguji deka nagang semaya Jehovah pasal “anak” seiku indu dikeamatka. (P-kal. 3:15) Tang Jehovah enda nejuka pelan Sitan mujur. Jehovah ngenataika Bah Besai ke munaska pelan Sitan enggau bala antu.

¹² Nama ulih dipelajarka kitai? Ulah ti kamah enggau penyumbung nya bansa umpan ke ulih mujur dikena. Bala melikat ke nitihka Sitan udah lama enggau Jehovah di serega! Taja pia, mayuh ari sida nejuka pengingin ti salah tumbuh ba ati sida, lalu pengingin nya majak balat-sebalat. Kitai patut seruran ingat, pengingin ti salah ulih tumbuh ba ati kitai enda ngira ni pengelama kitai udah nyembah Jehovah. (1 Kor. 10:12) Nya kebuah kitai patut seruran meresa utai ke bisi ba ati, lalu muai semua runding ti kamah sereta penyumbung!—Gal. 5:26; bacha Kolosi 3:5.

13. Nama sebengkah agi umpan ke dikena Sitan, lalu baka ni kitai ulih nyeliahka iya?

¹³ Sebengkah agi umpan ke dikena Sitan nya ati ti keran deka nemu pasal bala antu. Kemayaharitu, iya nguji narit orang ngambika rindu enggau utai ti bekaul  enggau bala antu ngena jalai pengarap ti pelesu sereta pemerindang. Cherita wayang, game elektronik, sereta bansa pemerindang ti bukai ulih ngasuh utai ti bekaul enggau bala antu ngerinduka ati. Baka ni kitai ulih nyeliahka umpan tu? Kitai enda ulih ngarapka gerempung Jehovah deka ngerintaika bagi pemerindang ti manah enggau ti jai ke kitai. Kitai patut ngelatih ati kitai ngambika ulih ngaga pilih ti manah bepelasarka prinsip Bup Kudus. (Heb. 5:14) Lalu enti pengerindu ke Petara nya “pengabis ati,” kitai tentu deka milih enggau manah. (Rom. 12:9) Orang ke pura-pura ngereja utai ti enda sejalai enggau utai ti disebut diri. Nya alai lebuh kitai milih pemerindang, tanya diri empu: ‘Kati aku nitihka prinsip ti diasuh aku titihka orang bukai? Nama runding pemelajar Bup Kudus tauka orang ke alai aku datai ngabas enti sida meda pemerindang ke dipilih aku?’ Lebuh kitai nitihka prinsip ti diasuh kitai titihka orang bukai, kitai deka senang agi nulak umpan ari Sitan.—1 Jhn. 3:18.

14. Baka ni Sitan nguji ngachau kitai, lalu baka ni kitai ulih ngelaban?

¹⁴ Sitan mega nguji ngachau sereta ngenakutka kitai ngambika kitai enda taluk ngagai Jehovah. Ambika chunto, iya ulih ngena perintah nagang pengawa nginjil kitai. Iya ulih ngena orang ke sama gawa tauka sekelas enggau kitai ngeleseka kitai ketegal nitihka standard Bup Kudus. (1 Pet. 4:4) Sitan mega ulih ngena diri sebilik ke enda nyembah Jehovah, ke engka bisi tuju ti manah, tang sida nguji deka nagang kitai datai ke gempuru. (Mat. 10:36) Baka ni kitai ulih nyeliahka diri ari dikachau Sitan? Kitai enda ibuh tekenyit enti diserang Sitan ngena chara nya, laban kitai nemu iya benung beperang enggau kitai. (Pem. 2:10; 12:17) Kitai mega anang enda ingatka penanggul tu: Sitan ngumbai kitai nyembah Jehovah enti nya enda nating kitai, tang enti utai majak tusah Sitan ngumbai kitai deka nulak Jehovah. (Jop 1:9-11; 2:4, 5) Pengujung iya, kitai patut seruran minta Jehovah meri kitai pengering. Kingatka, Jehovah enda ninggalka kitai.—Heb. 13:5.

15. Ulih Sitan mejal kitai ngereja utai ti enggai dikereja kitai? Terangka.

¹⁵ Sitan enda ulih mejal orang ngereja utai ti enggai dikereja sida. (Jas. 1:14) Indah mayuh orang ba dunya enda sedarka diri nyukung Sitan. Tang pengudah sida belajarka pemendar, sida patut milih sekalika deka nyukung Jehovah tauka Sitan. (SKR. 3:17; 17:30) Enti kitai keran deka ngasika Jehovah, Sitan enda ulih ngerusak penaluk kitai.—Jop 2:3; 27:5.

16, 17. (a) Nama agi utai ke enda ulih dikereja Sitan enggau bala antu? (b) Nama kebuah kitai enda patut nangi besampi enggau nyawa ti inggar ngagai Jehovah?

¹⁶ Bisi utai bukai ke enda ulih dikereja Sitan enggau bala antu. Ambika chunto, Bup Kudus nadai madahka sida ulih nemu utai ke bisi ba ati tauka runding kitai. Semina Jehovah enggau Jesus aja ke ulih ngereja nya. (1 Sam. 16:7; Mrk. 2:8) Nyadi patut kitai berasai nangi enti kitai bejaku tauka besampi enggau nyawa ti inggar, Sitan enggau bala antu deka ninga utai ti disebut kitai lalu ngena nya ngelaban kitai? Enda! Nama kebuah? Pikirka tu: Kitai enda nangi ngereja utai ti manah lebuh gawa ke Jehovah ketegal Sitan ulih meda kitai. Sama mega, kitai enda patut nangi besampi enggau nyawa ti inggar ketegal Sitan ulih ninga kitai. Bup Kudus mega madahka nembiak Jehovah suah besampi enggau nyawa ti inggar, lalu kitai nadai kala macha pasal sida ke nangika Sitan deka ninga sida. (1 Raj. 8:22, 23; Jhn. 11:41, 42; SKR. 4:23, 24) Enti kitai enggau naka ulih bejaku sereta ngereja utai baka ti dikedekaka Jehovah, kitai pechaya Iya enda ngemendarka Sitan ngereja sebarang utai ke tau nekul kitai bulih pengidup ti meruan belama iya.—Bacha Masmur 34:7.

¹⁷ Kitai patut ngelala munsuh kitai, tang kitai enda patut takutka iya. Taja pan kitai enda sempurna, kitai ulih ngalahka Sitan enggau sukung ari Jehovah! (1 Jhn. 2:14) Enti kitai ngelaban Sitan, iya deka rari ari kitai. (Jas. 4:7; 1 Pet. 5:9) Kemayaharitu, Sitan suah agi nyerang orang ke biak. Baka ni sida ulih ngelaban serang ari Sitan? Kitai deka berandauka utai tu ba artikel pengudah tu.