KITAI berasai nyamai sereta lantang lebuh orang siru enggau kitai. Nya nunjukka sida ibuhka kitai. Ketegal kitai gaga ati lebuh orang siru enggau kitai, nya alai baka ni kitai ulih ngemansangka kualiti manah tu?

Orang ke ngembuan penyiru ibuhka orang bukai lalu iya ngayanka nya ari jaku enggau utai ti dikereja iya. Iya ukai semina bebasaka orang. Tang, iya kasihka orang ketegal iya rinduka sida sereta nemu asai ati sida. Keberat agi, penyiru nya sebagi ari buah roh kudus Petara. (Galatia 5:22, 23) Jehovah deka kitai siru enggau orang. Nya alai kitai deka nemu baka ni Jehovah enggau Anak Iya ngayanka penyiru, lalu baka ni kitai ulih neladan seduai iya.

Jehovah siru enggau semua orang, indah ngagai “orang ke enda nemu beterima kasih, sereta enggau orang ke jai.” (Luke 6:35) Ambika chunto, Jehovah “ngasuh mata panas manchar ngagai orang ke jai enggau ngagai orang ke manah, lalu ngasuh hari ujan ke orang ke lurus enggau ke orang ke jai.” (Matthew 5:45) Indah orang ke enda arapka Jehovah nya Penempa, tau bulih penguntung ari penyiru Iya lalu ulih idup lantang.

Utai ti digaga Jehovah ke Adam seduai Hawa nya chunto ti pemadu manah pasal penyiru Iya. Enda lama pengudah bedosa, “seduai iya lalu nyait daun kayu ara, kena seduai iya mampul tubuh diri.” Taja pia, Jehovah nemu seduai iya begunaka gari ke ulih ngelindung seduai iya lebuh ba luar Kebun Eden, laban tanah udah disumpah lalu penuh “rumput enggau duri.” Ketegal Jehovah manah ati, Iya “ngaga gari ari kulit jelu” ke seduai iya.—Pemungkal 3:7, 17, 18, 21.

Taja pan Jehovah siru “ngagai orang ke jai enggau ngagai orang ke manah,” tang Iya kelebih agi siru enggau bala nembiak Iya ke tetap ati. Ambika chunto, maya jeman nabi Sekariah, seiku melikat irau ketegal orang Israel ngetu nirika rumah sembiang Jehovah di Jerusalem. Jehovah mendingka utai ke dipadah melikat nya lalu nyaut iya “enggau jaku siru.” (Sekariah 1:12, 13) Jehovah mega ngereja utai ti sama ngagai nabi Elijah. Bisi sekali, nabi Elijah berasai balat tusah ati, nya alai iya minta Jehovah ngambi nyawa iya awakka iya mati. Jehovah ngayanka Diri ibuhka asai ati Elijah lalu nganjung seiku melikat ngeringka iya. Jehovah mega madahka, Elijah enda kediri. Penyiru Jehovah ngeringka Elijah ngambika iya ulih neruska pengawa ti diberi Jehovah. (1 Raja 19:1-18) Tang ari semua nembiak Jehovah, sapa ke neladan penyiru Iya enggau pemadu manah?

Lebuh Jesus ba bumi, orang ulih meda iya siruka orang. Iya enda kasar sereta enda mejal orang ngereja utai ti dikedekaka iya. Jesus ibuhka orang lalu madahka: ‘Datai ngagai aku semua kita ke lelak ngema utai ti berat, lalu aku deka ngasuh kita belelak.’ (Matthew 11:28-30) Ketegal  iya siruka orang, orang nitihka iya enda ngira kini penunga iya. Ketegal sinuka sida, Jesus meri sida pemakai, ngeraika sida, sereta ngajar sida “mayuh macham utai” pasal Apai iya.—Mark 6:34; Matthew 14:14; 15:32-38.

Jesus meretika asai ati orang lalu iya nelap sereta ibuhka sida. Indah taja pan nya enda senang, iya enggau manah ati nulung semua orang ke datai ngagai iya. (Luke 9:10, 11) Pikirka pasal utai ti nyadi ba seiku indu ke sakit begetah. Iya deka digeraika, nya alai iya negu baju Jesus. Tang nitihka Adat Moses, indu nya enda patut ngereja nya laban iya enda tuchi. (Adat Lewi 15:25-28) Nama digaga Jesus? Iya enda nganu indu nya. Jesus ulih meda indu nya takut, lalu Jesus sinuka iya laban iya udah merinsa sakit begetah 12 taun. Ku Jesus bejaku ngagai iya: “Anak, pengarap nuan udah ngeraika nuan. Mupuk meh nuan enggau selamat. Nuan udah gerai ari penyakit nuan.” (Mark 5:25-34) Jesus amat siruka orang!

Ari chunto ke dikerandauka kitai, enti kitai siru enggau orang, kita deka nulung sida. Jesus nekanka utai tu lebuh iya nusui siti sempama pasal seiku orang Samaria ti manah. Seiku orang Judah dirumpak, dipalu, lalu iya ditinggal setengah mati ba jalai. Seiku orang Samaria ke nengah jalai nya berasai kasihka iya, taja pan orang Samaria enggau orang Judah begedika pangan diri. Penyiru meransang iya nulung orang Judah ke balat bakal nya. Iya malut bakal orang Judah nya lalu mai iya ngagai rumah numpang. Orang Samaria nya meri duit ngagai orang ke bempu rumah numpang kena ngintu orang Judah nya. Indah orang Samaria nya deka mayar ungkus ti lebih, enti orang Judah nya bisi begunaka utai bukai.—Luke 10:29-37.

Penyiru deka nyungkak kitai ibuhka orang bukai sereta meransang sida nengah pengawa enggau utai ti disebut kitai. Bup Kudus madahka: “Pengirau ati nuan ulih muai pengelantang, tang jaku ti siru deka ngelantangka ati nuan.” (Jaku Dalam 12:25) Lebuh penyiru enggau pemadas nyungkak kitai nyebut utai ti meransang ati orang bukai, tu tentu ngagaka ati sida. a (Peda nota kaki.) Jaku ti siru nunjukka kitai ibuhka sida lalu nulung sida senang agi natka penanggul ba pengidup.—Jaku Dalam 16:24.

Mensia ditempa neladan gamal Petara, nya alai semua kitai ulih ngayanka penyiru. (Pemungkal 1:27) Ambika chunto, Julius, seiku pemesai soldadu Rome ke betanggungjawap mai rasul Paul ngagai Rome, “manah amat enggau Paul, lalu ngemendarka iya betemu enggau pangan iya, ngambika sida ngintu iya” di menua Sidon. (Kereja Rasul 27:3) Lebuh Paul enggau sida ke bukai belayar, kapal sida karam. Orang ba pulau Malta “manah amat” enggau sida. Indah sida nungkunka api ke Paul enggau sida ke bukai ngambika enda chelap. (Kereja Rasul 28:1, 2) Orang Malta ngereja utai ti badas. Taja pia, enti deka ngelantangka ati Jehovah, kitai patut seruran siruka orang. Kitai ukai ngayanka penyiru ba siti-siti maya aja.

Jehovah deka kitai nyadika penyiru nya sebagi ari personaliti sereta chara pengidup kitai. Nya kebuah Iya ngasuh kitai ‘ngerasukka’ penyiru ba diri empu. (Kolosi 3:12) Tang enda senang deka seruran ngayanka penyiru. Nama kebuah? Kitai engka enggai ngayanka penyiru ketegal malu, enda nemu chara ngayanka penyiru, tauka bisi mimit berundingka diri empu. Tauka kitai engka tusah deka siru enggau orang ke enda manah enggau kitai. Tang enti kitai besampi minta roh kudus sereta nguji neladan Jehovah, Iya ulih nulung kitai siruka orang bukai.—1 Korint 2:12.

Ba pekara ni kitai ulih ngayanka penyiru enggau manah agi? Tanya diri empu: “Kati aku  mendingka utai ku orang bukai lalu nguji meretika asai ati sida? Kati aku bisi beratika ni maya orang begunaka tulung? Ni maya kepenudi iya aku siru enggau orang ke ukai diri sebilik tauka pangan rapat?” Udah nya tetapka juluk ati, baka ngelala orang bukai enggau mayuh agi, kelebih agi sida ke ba eklisia. Enggau chara tu, nuan ulih nemu penanggul ke ditapi sida sereta utai ti diguna sida. Udah nya, belajar begulai manah enggau orang bukai, baka nuan ti dekaka orang manah enggau nuan. (Matthew 7:12) Penudi iya, minta tulung Jehovah, lalu Iya deka merekatka utai ti digaga nuan ngambika nyadi orang ke nemu siruka orang.—Luke 11:13.

Rasul Paul ngerintaika utai ti nulung iya nyadi ulun Petara. Seiti ari utai nya penyiru. (2 Korint 6:3-6) Orang rinduka Paul ketegal utai ti disebut enggau utai ti dikereja iya, lalu orang ngasaika Paul ibuhka sida. (Kereja Rasul 28:30, 31) Pia mega, enti kitai siruka orang, orang engka deka nemu mayuh agi pasal pemendar. Lebuh kitai siru enggau semua orang, nyengkaum orang ke enda manah enggau kitai, penyiru engka ulih negu ati sida lalu sida engka ngubah runding diri. (Rome 12:20) Indah nyau kelama sida engka deka belajar pasal Bup Kudus.

Ba Paradais, semua orang deka siru enggau pangan diri. Orang deka ngayanka penyiru ngagai sida ke diangkatka idup baru. Sekeda ari sida tu engka keterubah iya meda orang siru enggau sida. Tu tentu meransang sida siru enggau orang bukai. Tang, orang ke enda siru sereta enggai nulung orang bukai, enda dikemendarka diau di baruh Perintah Petara. Semina orang ke rindu sereta siru deka diau belama iya di Paradais. (Masmur 37:9-11) Paradais tentu endur ti likun sereta bisi pemaik! Taja pia, indah sebedau maya nya datai, kitai tau bulih penguntung enti kitai siruka orang. Baka ni?

Bup Kudus madahka: “Nuan nyamai diau enti nuan nelap.” (Jaku Dalam 11:17) Orang rindu begulai enggau orang ke ngembuan penyiru tauka nelap, lalu kesuah iya sida mega deka siru enggau iya. Jesus madahka: “Takar ti dikena kita nakar deka dikena nakar utai ke kita.” (Luke 6:38) Nya alai, orang ke ngembuan penyiru senang deka bulih pangan ti manah sereta ulih mengkang nyadi pangan rapat sida.

Rasul Paul ngasuh bala menyadi Kristian di Epesus “nelap enggau pangan diri, siru enggau pangan diri, ngampun pangan diri.” (Epesus 4:32) Enti bala menyadi Kristian kitai nelap sereta siru, eklisia deka nyadi kering sereta beserakup. Kitai enggai bisi runding ti enda manah ngagai bala menyadi Kristian kitai, nusui utai ti enda manah pasal sida, tauka nyebut utai ti ngemediska ati taja pan nya semina jaku tundi aja. Tang utai ti disebut kitai patut seruran manah sereta meransang ati orang. (Jaku Dalam 12:18) Enggau ngereja nya, bala menyadi Kristian kitai deka gaga ati nyembah Jehovah.

Baka ke udah dipelajarka kitai, penyiru nya kualiti ti diayanka nengah semua utai ti disebut sereta utai ti dikereja kitai. Lalu lebuh kitai nemu siru enggau orang, kitai neladan pengerindu enggau pengerah jari Petara Jehovah. (Epesus 5:1) Penyiru ulih ngeringka bala menyadi Kristian kitai sereta meransang orang bukai nyembah Jehovah. Nya alai, kitai enggau naka ulih nulung orang bukai nemu Saksi-Saksi Jehovah nya orang ti ngembuan penyiru!