1. Nama deka digaga Jesus enda lama da agi?

 KITAI idup ba timpuh ti penting. Enda lama da agi, Jesus deka ngakim tiap iku orang ba dunya. Jesus madah ngagai kitai utai ke deka nyadi ba dunya sebedau iya belabuh ngakim. Jesus madah ngagai bala murid iya pasal siti “tanda” ke nunjukka penatai iya sereta “pengujung dunya tu.” (Mat. 24:3) Tanda tu bisi ditulis ba Matthew bagi 24 enggau 25, Mark bagi 13, sereta Luke bagi 21.

 2. Nama deka dikerandauka kitai dalam artikel tu, lalu nama kebuah belajarka tu ulih nulung kitai?

² Nengah tiga iti sempama, Jesus madah ngagai kitai jaku tangkan ke ulih nulung kitai. Sempama nya pasal bedus enggau kambin, bala indu dara ke pintar sereta ke beli, enggau sempama pasal beg duit pirak. Tiap iti sempama nya deka nulung kitai faham, Jesus deka ngakim sesiku orang bepelasarka utai ke dikereja orang nya. Dalam artikel tu, kitai deka berandauka tiga iti sempama nya sereta utai ke ulih dipelajarka kitai. Sempama ti keterubah ke deka dikerandauka kitai, iya nya sempama pasal bedus enggau kambin.

BEDUS ENGGAU KAMBIN

 3. Ni maya Jesus deka ngakim orang?

³ Ba sempama pasal bedus enggau kambin, Jesus madahka iya deka ngakim orang bepelasarka dua iti utai. Kesatu, sekalika sida nerima Berita Manah tauka enda. Lalu kedua, sekalika sida nyukung bala menyadi Kristus ke dipilih ke serega tauka enda. (Mat. 25:​31-46) Maya “Penusah ti Besai,” Jesus deka nentuka sapa bedus lalu sapa kambin. Iya deka ngereja nya nyentuk ngagai sebedau Armagedon berengkah. (Mat. 24:21)  Baka siku pengibun bedus ke nyeraraka bedus ari kambin, Jesus mega deka nyeraraka orang ke nyukung bala menyadi iya ari orang ke enda nyukung sida.

 4. Nitihka Isaiah 11:​3, 4, nama kebuah kitai ulih yakin, Jesus deka ngakim enggau adil? (Peda mega gambar.)

⁴ Bup Kudus madahka, lebuh Jesus nyadi pengari Jehovah ngakim orang, iya deka seruran ngereja nya enggau adil. (Bacha Isaiah 11:​3, 4.) Iya beratika ulah, runding, enggau jaku orang, nyengkaum chara sida ngintu bala menyadi Kristus. (Mat. 12:​36, 37; 25:40) Iya deka nemu sapa ke nyukung bala menyadi iya sereta pengawa sida. a Siti ari chara kitai ulih nyukung bala menyadi Kristus, iya nya nulung sida ba pengawa nginjil. Enti kitai ngereja tu, Jesus deka ngumbai kitai “lurus” lalu kitai deka bisi peluang “idup belama iya” ba dunya. (Mat. 25:46; Pem. 7:​16, 17) Tu siti berekat ti chukup besai enti kitai mengkang setia! Enti kitai mengkang setia maya Penusah ti Besai sereta pengudah nya, nama kitai deka mengkang bisi dalam “bup pengidup.”—Pem. 20:15.

 5. Sempama pasal bedus enggau kambin meransang kitai ngereja nama, lalu sapa ke patut ngereja nya?

⁵ Mengkang setia. Sempama Jesus pasal bedus enggau kambin merujuk ngagai sida ke bisi harapan idup belama iya ba dunya. Sida ngayanka pengarap lebuh sida nulung bala menyadi Kristus ba pengawa nginjil, sereta lebuh sida enggau setia nitihka iring ari ulun ke tetap ati sereta bepenemu-dalam, ke udah dipilih Jesus. (Mat. 24:45) Tang, sida ke bisi harapan idup ba serega mega patut beratika jaku tangkan dalam sempama tu. Nama kebuah? Laban Jesus beratika ulah, runding, enggau jaku sida. Sida mega patut mengkang setia. Kebendar iya, Jesus madahka dua iti agi sempama ke ngundan jaku tangkan ke ditujuka ngagai bala menyadi Kristus. Sempama nya bisi ditulis ba Matthew bagi 25. Diatu, aram kitai beratika sempama pasal bala indu dara ke pintar sereta ke beli.

BALA INDU DARA KE PINTAR SERETA KE BELI

 6. Baka ni lima iku indu dara nunjukka diri pintar? (Matthew 25:​6-10)

⁶ Dalam sempama pasal bala indu dara, Jesus bejaku pasal sepuluh iku indu dara ke mansang ngambat pengantin lelaki. (Mat. 25:​1-4) Semua sida ngarapka diri ulih enggau pengantin lelaki nya ngagai pengerami tikah iya. Jesus madah, lima iku ari sida “pintar,” tang lima iku da agi “beli.” Bala indu dara ke pintar nya udah besedia sereta mengkang bejaga. Sida sedia deka nganti penatai pengantin lelaki nya, indah enti iya datai maya laun malam. Nya kebuah, sida mai lampu kelita ngambika sida ulih meda maya hari nyau petang. Sida indah mai minyak lebih enti sema pengantin lelaki nya laun datai. Nyadi, sida udah besedia ngambika lampu kelita sida mengkang idup. (Bacha Matthew 25:​6-10.) Lebuh pengantin lelaki nya datai, bala indu dara ke pintar tama enggau iya ngagai pengerami tikah. Baka nya mega, bala menyadi Kristian ke dipilih ke serega, ke udah nunjukka diri mengkang bejaga sereta tetap ati maya penatai Jesus Kristus, deka nerima upah sida. Sida deka enggau pengantin lelaki, iya nya Jesus Kristus, tama ngagai Perintah serega. b (Pem. 7:​1-3) Tang nama deka nyadi ngagai lima iku indu dara ke beli nya?

 7. Nama nyadi ngagai lima iku indu dara ke beli, lalu nama kebuah?

⁷ Enda baka bala indu dara ke pintar, lima  iku indu dara ke beli nya enda besedia lebuh pengantin lelaki datai. Lampu kelita sida nyauka padam, lalu sida nadai mai minyak lebih. Lebuh sida nyau nemu pengantin lelaki deka datai enda lama da agi, sida patut mansang meli minyak. Lebuh pengantin lelaki nya datai, sida bedau pulai. Maya nya, “bala indu dara ke udah besedia nya, tama enggau pengantin lelaki nya ngagai pengerami tikah. Pintu pan lalu ditutup.” (Mat. 25:10) Pengudah nya, lebuh bala indu dara ke beli nya datai, lalu deka tama pengerami tikah nya, pengantin lelaki nya madah ngagai sida: “Aku enda ngelala kita.” (Mat. 25:​11, 12) Enda ngira berapa lama sida patut nganti penatai pengantin lelaki nya, lima iku indu dara ke beli nya kebendar iya patut besedia. Taja pia, sida enda besedia. Nyadi, nama ulih dipelajarka sida ke dipilih ngagai serega?

8-9. Nama ulih dipelajarka sida ke dipilih ngagai serega ari sempama pasal sepuluh iku indu dara? (Peda mega gambar.)

⁸ Mengkang besedia sereta bejaga. Lebuh Jesus bejaku pasal sempama sepuluh iku indu dara, kati iya benung merujuk ngagai dua iti raban orang ke dipilih ngagai serega, siti raban nya deka mengkang besedia nyentukka Jesus datai maya Penusah ti Besai, lalu siti da agi raban enda besedia? Enda, nya ukai reti sempama nya. Tang, iya nerangka utai ke deka nyadi enti sida enda nyediaka diri ngambika ulih mengkang tetap ati nyentukka ujung. Enti sida enda besedia, sida enda ulih nerima upah sida. (Jhn. 14:​3, 4) Nyadi, utai tu amat serius! Enda ngira harapan kitai nya ba serega tauka ba dunya, semua kitai patut belajar ari tangkan ke diberi Jesus nengah sempama tu. Semua kitai mesti mengkang bejaga sereta besedia ngambika ulih tan nyentukka ujung.—Mat. 24:13.

⁹ Nengah sempama tu, Jesus ngajar kitai kebuah nya penting patut mengkang bejaga sereta besedia. Pengudah nya, iya madahka siti agi sempama, iya nya sempama pasal beg duit pirak. Sempama nya deka ngajar kitai kebuah nya penting kitai patut bagas.

 BEG DUIT PIRAK

10. Baka ni dua iku ulun nunjukka diri tetap ati? (Matthew 25:​19-23)

¹⁰ Dalam sempama pasal beg duit pirak, Jesus bejaku pasal dua iku ulun ke tetap ati ngagai tuan sida, lalu siku agi ulun ke enda tetap ati. (Mat. 25:​14-18) Sebedau tuan sida bejalai ngagai menua bukai, iya meri bala ulun iya beg duit pirak. Penyampau duit ke diberi nya amat mayuh. Dua iku ulun nya amat bagas sereta ngena duit nya enggau manah. Seduai iya bebendar gawa kena nambahka penyampau duit ke tuan sida. Pengudah tuan sida pulai, penyampau duit ke diberi ngagai seduai iya udah nyadi dua kali lipat. Tuan sida muji seduai iya, lalu seduai iya “gaga ati enggau tuan” nya. (Bacha Matthew 25:​19-23.) Tang baka ni enggau ulun ke siku da? Nama digaga iya enggau duit ke diterima iya?

11. Nama nyadi ngagai ulun ke “ngelusu” nya, lalu nama kebuah?

¹¹ Ulun ke siku da nerima sebeg duit pirak. Tuan iya ngarapka iya ngena duit nya enggau manah, tang iya “ngelusu.” Iya nanam duit pirak nya. Lebuh tuan nya pulai, ulun nya semina nyuaka sebeg duit pirak nya pulai. Ulun tu mega bisi sifat ti enda manah. Ari ke berasai besalah ketegal enda ngiga mayuh agi duit ke tuan iya, ulun nya ngangauka tuan iya “orang ke terit.” Tuan nya enda gaga ati enggau iya. Tuan nya ngambi pulai beg duit pirak ari ulun nya, lalu muru iya.—Mat. 25:​24, 26-30.

12. Kemayaharitu, dua iku ulun ke tetap ati nya ngambarka sapa?

¹² Dua iku ulun ke tetap ati nya ngambarka bala menyadi ti tetap ati ke dipilih ngagai serega. Tuan sida, Jesus, mai sida “sama gaga ati” enggau iya. Sida nerima upah sida ba serega nengah pengangkat ari mati ti keterubah. (Mat. 25:​21, 23; Pem. 20:5a) Tang baka ni enggau ulun ke ngelusu nya? Nama ulih dipelajarka sida ke dipilih ngagai serega ari iya?

13-14. Nama ulih dipelajarka orang ke dipilih ngagai serega ari sempama pasal beg duit pirak? (Peda mega gambar.)

¹³ Mengkang bagas. Dalam sempama pasal beg duit pirak, Jesus ukai madahka, bala menyadi ke dipilih ngagai serega deka ngelusu.  Tang, iya madahka utai ke deka nyadi enti sida lenyau pengeransing. Enti sida enda “bebendar nentuka diri tetap setia,” sida enda ulih agi nyadi “orang ke dikangau sereta dipilih.” Enti utai tu amat nyadi, sida enda dikemendarka tama ngagai Perintah ba serega.—2 Pet. 1:10.

¹⁴ Sempama Jesus pasal bala indu dara sereta beg duit pirak enggau terang nunjukka, semua bala menyadi ke dipilih ngagai serega mesti mengkang bejaga, besedia, sereta bagas. Kati Jesus bisi nyebut jaku tangkan ke bukai ngagai sida ke dipilih ngagai serega? Au, bisi. Kitai ulih macha jaku tangkan ke disebut iya ba Matthew 24:​40, 41.

SAPA DEKA “DITABANKA”?

15-16. Baka ni Matthew 24:​40, 41 nulung sida ke dipilih ngagai serega meda kebuah sida patut mengkang bejaga?

¹⁵ Sebedau bejaku pasal tiga iti sempama nya, Jesus bisi nyebut pasal pengawa ngakim ti penudi ke sida ke dipilih ngagai serega. Tu deka nunjukka sapa ke deka tama ngagai Perintah ba serega. Jesus bejaku pasal dua iku lelaki ke gawa ba ladang sereta dua iku indu ke ngisar gandum. Dua iku lelaki nya baka ke ngereja utai ti sama, pia mega enggau dua iku indu nya. Tang ba tiap iti situasi nya, Jesus madahka “siku deka ditabanka, lalu siku ditinggalka.” (Bacha Matthew 24:​40, 41.) Nya alai, Jesus meransang bala murid iya: “Terus meh kita mengkang bejaga, laban kita enda nemu kemaya Tuan kita deka datai.” (Mat. 24:42) Jesus nyebut utai ti sama pengudah bejaku pasal sempama bala indu dara. (Mat. 25:13) Kati jaku tu bisi kaul enggau pangan diri? Engka bisi. Semina sida ke udah dikangau sereta dipilih, ke nunjukka diri tetap ati, deka “ditabanka” tauka dibai Jesus tama ngagai Perintah ba serega.—Jhn. 14:3.

¹⁶ Mengkang bejaga. Bala menyadi ke bisi harapan idup ba serega ke enda mengkang bejaga enda disengkaum ba raban “sida ke udah dipilih.” (Mat. 24:31) Tu mega siti tangkan ngagai sida ke bisi harapan idup belama iya ba dunya. Sida mesti mengkang bejaga sereta tetap ati.

17. Kati kitai patut berasai enda nyamai ati enti Jehovah milih orang ke deka merintah ba serega ba maya ke diatu?

¹⁷ Kati kitai patut berasai enda nyamai ati enti Jehovah milih orang ke deka merintah ba serega ba maya ke diatu? c Enda, laban kitai udah ngelala Jehovah, lalu kitai nemu semua utai ke dikereja Iya endang adil. Jesus bisi nyebut pasal sempama bala pekereja ke datai gawa ba kebun anggur. Siti ari raban pekereja nya datai gawa ba urung pukul lima lemai. (Mat. 20:​1-16) Taja pia, sida agi nerima gaji ti sama enggau bala pekereja ke dulu agi belabuh gawa. Nyadi, enda ngira kemaya sida ke bisi harapan ba serega dipilih, sida deka nerima upah sida enti sida mengkang tetap ati.

NGASIKA MEH JAKU TANGKAN

18-19. Nama udah dipelajarka kitai ari sempama ke dipadah Jesus?

¹⁸ Nama udah dipelajarka kitai? Ari sempama pasal bedus enggau kambin, sida ke bisi harapan idup belama iya ba dunya udah belajar kebuah nya penting mengkang setia ngagai Jehovah. Sida ukai aja patut tetap ati diatu, tang mega nyentuk ngagai pengujung Penusah ti Besai. Sebedau Perang Armagedon berengkah, Jesus deka mutuska sida ke tetap ati tu layak nerima pengidup ti meruan belama iya.—Mat. 25:46.

¹⁹ Kitai mega udah beratika dua iti sempama ke ngundan jaku tangkan ngagai sida ke dipilih  ke serega. Dalam sempama Jesus pasal sepuluh iku indu dara, lima iku ari sida pintar, lalu lima iku da agi beli. Bala indu dara ke pintar mengkang besedia enggau bejaga. Sida besedia nganti pengantin lelaki enda ngira berapa lama sida patut nganti. Tang bala indu dara ke beli nya enda besedia. Ketegal nya, pengantin lelaki enggai ngasuh sida tama ngagai pengerami tikah iya. Ari sempama tu, kitai belajar, kitai patut sedia nganti nyentuk ngagai maya Jesus ngujungka dunya ti jai tu, enda ngira ni pengelama kitai patut nganti. Dalam sempama pasal beg duit pirak, kitai udah berandau pasal dua iku ulun ti tetap ati. Seduai iya bagas gawa ke tuan sida. Ketegal nya, tuan sida gaga ati enggau seduai iya. Taja pia, tuan nya enda gaga ati enggau siku ulun ke ngelusu, lalu muru iya. Sempama tu ngajar kitai ngambika mengkang kisuk ba pengawa ke Jehovah nyentukka ujung. Kitai mega bisi berandauka kebuah sida ke dipilih ngagai serega mesti mengkang bejaga. Enti sida mengkang bejaga, Jesus deka ngempuruka sida, lalu sida enda sabar nganti maya sida deka nerima upah sida ba serega. Pengudah perang Armagedon, sida deka nyadi pengantin indu Jesus ba pengerami tikah Anak Bedus.—2 Tes. 2:1; Pem. 19:​7, 9.

20. Nama deka dikereja Jehovah ke sida ke ngasika jaku tangkan Iya?

²⁰ Enda lama da agi, Jesus deka berengkah ngakim. Tang kitai enda ibuh berasai takut. Enti kitai mengkang tetap ati, Apai kitai ti bepengerindu ba serega deka meri kitai “kuasa ke ngelui ari pengering mensia.” Enggau nya, kitai ‘ulih diselamatka, lalu bediri ba mua Anak Mensia.’ (2 Kor. 4:7; Luk. 21:36) Enda ngira sekalika kitai bisi harapan idup ba serega tauka ba dunya, kitai ulih ngelantangka ati Jehovah enti kitai ngasika jaku tangkan ke diberi Jesus dalam sempama iya. Ketegal pemanah ati Jehovah, nama kitai deka “ditulis dalam bup” pengidup.—Dan. 12:1; Pem. 3:5.